Lomiga Faale-Tusi Paia I LE INITANETI
Lomiga Faale-Tusi Paia
I LE INITANETI
Faa-Samoa
ā
  • ā
  • ē
  • ī
  • ō
  • ū
  • ʻ
  • TUSI PAIA
  • LOMIGA
  • SAUNIGA
  • w97 1/1 itu. 3-5
  • Aisea e Ao ai ia i Tatou Uma Ona Vivii i le Atua?

Leai se vitiō o maua i lenei vaega.

Faamalie atu na iai se faalētonu i le kopiina o le vitiō.

  • Aisea e Ao ai ia i Tatou Uma Ona Vivii i le Atua?
  • Le Olomatamata Faasilasilaina le Malo o Ieova—1997
  • Tamaʻi Ulutala
  • Mataupu e Taitutusa
  • ‘E na o Ieova e Mafai Ona Aumaia le Faamoemoe ia te Au’
  • ʻE Ui Ina Ou Tauaso, ae o Loo Mafai Ona Ou Vaai’
  • Ia “Vivii Tatou Uma ia Ioa”
  • Pe a E Lagona ua E lē Fia Ola
    Le Olomatamata Faasilasilaina le Malo o Ieova (Lomiga mo le Lautele)—2019
  • Mai le Loto Mafatia i le Fiafia
    Le Olomatamata Faasilasilaina le Malo o Ieova—1991
  • Tatou Viia Ioa
    Pepese Atu iā Ieova
  • Tatou Viia Ioa
    ʻPepese Fiafia’ iā Ieova
Le Olomatamata Faasilasilaina le Malo o Ieova—1997
w97 1/1 itu. 3-5

Aisea e Ao ai ia i Tatou Uma Ona Vivii i le Atua?

ALELUIA! E matuā lauiloa lenei upu i le toatele o tagata lotu o Kerisinetoma. O nisi o i latou e alagaina ma le leo tetele i a latou sauniga i Aso Sa. Ae e toafia i latou e iloa le uiga moni o lenei upu? O le mea moni, o le upu lenei i le gagana Eperu mo le “Vivii ia Ioa!” O le faailoaina atu ma le olioli o viiga o Lē na Foafoaina Mea o lona suafa o Ieova.a

O le upu “Aleluia” e masani ona aliali mai i le Tusi Paia. Aisea? Ona e tele mafuaaga e vivii ai i le Atua. O Ioa (Ieova) o Lē na Foafoaina ma Faatumauina Mea i le vateatea aoao. (Salamo 147:4, 5; 148:3-6) Na ia amataina le ekositema (taualumaga e faasino i meaola ma o latou siosiomaga) lea ua mafai ai ona maua le ola i le lalolagi. (Salamo 147:8, 9; 148:7-10) Ma ua ia faaalia se naunau totino i tagata. Afai tatou te faia lona finagalo, na te faamanuia ma lagolagoina i tatou i lenei olaga ma ofo mai ia i tatou le faamoemoe mautinoa o le ola e sili o le a oo mai. (Salamo 148:11-14) O Ioa (Ieova) na ia faagaeeina upu: “E fai lava le nuu mo tagata amiotonu, e nonofo ai pea i latou.”—Salamo 37:29.

O lea, o le faalaeiauga e mo tagata uma lava: “Aleluia!” “Ia outou vivii atu ia Ioa!” (Salamo 104:35; faaopoopoga i le pito i lalo o le mau i le NW) E ui i lea, e faanoanoa lava, ona e lē o tagata uma e iai le lagona e fia tali lelei atu i ai. I aso nei, ua mafatia tagata. O le toatele ua fia aai, mamaʻi, po o le puapuagatia foi. Ua toatele tagata o loo fesagai ma le tele o faanoanoaga talu ai le faaaogaseseina o vailaau faasaina po o le ʻava malosi po ona o iuga o a latou amioga lē mamā po o le fouvale. Pe o iai ea se mafuaaga e tatau ai ia i latou na ona vivii i le Atua?

‘E na o Ieova e Mafai Ona Aumaia le Faamoemoe ia te Au’

Ioe, o loo iai. Ua valaaulia e Ieova tagata uma ia latou iloa lelei o ia, ia aʻoaʻo e faia lona finagalo, ma olioli ai i faamanuiaga ua mananao ai tagata e vivii atu ia te ia. Ma e toatele ua tali lelei mai. Seʻi fai ma faataitaiga Adriana i Guatemala. Na maliu le tinā o Adriana a o fitu ona tausaga. E lei umi ae tuulafoaia o ia e lona tamā. Ina ua sefulu ona tausaga, sa amata ona ia faigaluega e tausia ai o ia. Talu ai sa faatonu o ia e lona tinā ia auauna i le Atua ma le lotu, o lea sa ia auai atu ai i ni vaega eseese o le lotu Katoliko, peitai e oo ane i le taimi ua 12 ai ona tausaga, ua lē fiafia i vaega a le Katoliko ma auai atu loa i kegi a tamaiti e feoai solo i le auala. Sa amata loa ona ia ulaula, faaaogā fualaau faasaina, ma gaoi. Aisea o le a manao ai se teine talavou faapena e vivii atu i le Atua?

Sa amata ona suesueina e le uso o Adriana le Tusi Paia ma Molimau a Ieova, ae sa ula atu Adriana ia te ia. Ona maliu lea o le uso o lo la tinā. I le falelauasiga o le uso o lona tinā, sa faatumulia le mafaufau o Adriana i le tele o fesili e lē o mautonu i ai. O fea o alu i ai le uso o lona tinā? Pe o iai o ia i le lagi? Pe o alu atu o ia i se afi e faapuapuagatia ai? Sa matuā fenuminumiai lava, ma sa alu atu loa Adriana i le falesa o loo i le fanuatanu e tatalo ai mo se fesoasoani, ma sa ia faaaogaina le suafa o le Atua o Ieova, e pei ona aʻoaʻo atu e lona uso ia te ia.

E lei umi ae ona suesueina loa le Tusi Paia ma Molimau a Ieova ma auai atu i a latou sauniga faa-Kerisiano. Ua tatalaina atu ai ia te ia se vaaiga fou i le olaga, ma ia motusia loa le auai atu i kegi a tamaiti e feoai solo i le auala. Nei la ua pe ā ma le 25 tausaga o Adriana ua ia faapea mai: “E na o le alofa lava mo Ieova na mafai ai ona ou tuua na ala leaga o le olaga. E na o Ieova e ala i le tele o lona alofa mutimutivale e mafai ona aumaia ia te au le faamoemoe o le ola e faavavau.” E ui lava ina faigata le amataga o le olaga o Adriana, ae ua ia te ia mafuaaga e sili ona lelei e vivii atu ai i le Atua.

O se isi mea e faigata tele ona talitonuina ni iuga lelei na oo i ai ua lipotia mai lea mai Ukraine. O loo nofo se tamaloa i le falepuipui e faatali ai lona faasalaga oti. Pe o faanoanoa ea o ia ona o ia lava? Po o mafatia? E leai, e matuā ese lava. Ina ua uma ona faafesootaia o ia lata mai nei e Molimau a Ieova ma ua maua se poto e uiga ia Ieova, sa ia talosaga atu ia i latou e faafesootai lona tinā. Ua ia tusi atu nei ia i latou ona ua ia faalogo ua latou faataunuu lona manaoga. Ua ia faapea atu: “Faafetai tele mo le asia o loʻu tinā. O se matuā tala fiafia lea na ou maua i loʻu tausaga mulimuli.”

I le talanoa e faatatau ia te ia ma ana uo i totonu o le sela lea na ia talaʻi i ai, sa ia tusi ai e faapea: “Ua matou faatuatua nei i le Atua ma taumafai e gaoioi e tusa ma lo matou faatuatua.” Sa ia faaiuina lana tusi e faapea: “Faafetai tele lava mo le fesoasoani mai ia i matou e iloa le uiga o le alofa ma mauaina le faatuatua. Pe afai e faatumauina pea loʻu ola, o le a ou fesoasoani foi ia te outou i le galuega talaʻi. Faafetai i le Atua ona o loo tou soifua ma o loo tou fesoasoani i isi ia alolofa i le Atua ma talitonu ia te ia.” Na toe talosagaina e lenei tamaloa lona faasalaga oti. Peitai, pe e fasiotia o ia po o le faaaluina o ni tausaga se tele i le falepuipui, ua manino le ia te ia o mafuaaga e vivii ai i le Atua.

ʻE Ui Ina Ou Tauaso, ae o Loo Mafai Ona Ou Vaai’

Seʻi manatu nei i se teine o loo malaulau lona talavou ua faafuasei ona tauaso. O le mea tonu lena na tupu ia Gloria, e nofo i Anitenitina. Sa faafuasei ona tauaso Gloria ina ua 19 ona tausaga, ma lē mafai ai ona toe pupula. Ina ua 29 ona tausaga, na oo ina nonofo faapouliuli ma se tamaloa ma e lei umi ae maʻito loa o ia. Sa ia lagona faapea ua iai se uiga moni i lona olaga. Ae ina ua oti lana tama, sa amata loa ona ia faatutū ni fesili. Sa ia tau mānatu, ‘Aisea ua tupu ai lenei mea ia te au? O le ā laʻu mea sese ua fai? Po o soifua moni ea le Atua?’

I lena lava taimi, na asiasi atu ai ni tamaitai Molimau a Ieova se toalua i lona fale. Sa amata loa ona ia suesue le Tusi Paia ma aʻoaʻoina ai ana folafolaga e faapea i le lalolagi fou, o le a toe faapupulaina ai ē tauaso. (Isaia 35:5) Maeu se faamoemoe matagofie mo Gloria! Sa matuā fiafia o ia, ae maise ina ua ioe lana tane e faamauina faaletulafono le la faaipoipoga. Sa aafia lana tane i se faalavelave faafuasei ma oo ai ina lē toe mafaia se mea, ma faaaogā ai se nofoa faataavalevale. I aso nei o loo galue mamafa lenei fafine tauaso i le tausia aʻe o i laua. E lē gata i lea, na te faia galuega uma i le fale, e aofia ai ma le uaʻi totino atu i manaoga o lana tane. E ui i lea o loo vivii atu pea Gloria ia Ieova! I le fesoasoani a ona uso ma tuafāfine Kerisiano, na te suesueina ai le Tusi Paia Braille, ma ua matuā faalaeiauina o ia i sauniga faa-Kerisiano i le Maota o le Malo. Ua ia faapea mai: “E faigata ona faamatala, ae e ui ina ou tauaso, ae pei lava o loo mafai ona ou vaai.”

O nisi taimi e sauāina ai tagata pe a latou vivii i le Atua. Sa fiafia se fafine i Croatia ina ua ia aʻoaʻo e uiga i le Atua, ae sa tetee lana tane i lona faatuatuaga fou ma lafoaia o ia, sa alu ma ave le la tama teine e tasi le tausaga. Na leai se aiga, tuulafoaia e lana tane ma le aiga, leai se fale, se galuega, e oo lava i lana tama, sa ia te ia se lagona fenuminumiai i le taimi muamua. Ae o lona alofa i le Atua sa faamalosia ai o ia, e ui ina itiiti sana fesootaiga ma lana tama seia oo ina matua. Ua maua e lenei fafine se “penina tautele” ma ua lē mafai ona lafoaia. (Mataio 13:45, 46) Sa faatumauina faapefea lona olioli i na taimi faigata? Fai mai o ia: “O le olioli o le fua o le agaga o le Atua. E mafai ona maʻoti lona atiina ae e tusa po o le ā le tulaga o iai, e pei ona mafai ona ola se laau i se falelaau e tusa po o le ā le tulaga o le tau o iai i fafo.”

I Finilani, sa maua ai Markus e ono ona tausaga i se maʻi ua lē matogafitia o musele o le tino. E lei umi ae oo atu i le tulaga o lona faaaogaina o se nofoa faataavalevale. I nai tausaga mulimuli ane, sa aveina ai o ia e lona tinā i se tamaloa lotu Penetekoso lea sa matuā lauiloa i le faamaloloina o maʻi. Ae peitai sa leai se faamaloloina faavavega mo Markus. O lea sa leai ai se fiafia o Markus i le Atua ma sailia loa aʻoaʻoga faasaienisi ma isi aʻoaʻoga faalelalolagi. O lea, pe ā ma le lima tausaga ua mavae, sa alu atu ai se fafine i se nofoa faataavalevale faatasi ma se tama talavou i le fale o loo nofo ai Markus. O i laua o ni Molimau a Ieova. O le taimi lea ua avea Markus ma se e lē talitonu i le Atua, ae e na te lē teena le talanoaina o tapuaiga ma sa ia valaaulia loa i laua i totonu.

Mulimuli ane, sa asia o ia e se ulugalii, ma amata loa se suesuega faale-Tusi Paia. Na oo ina suia e le mana o le Tusi Paia le vaaiga a Markus i mea, ma iloa ai e ui i lona lē toe mafaia o se mea, ae ua ia te ia moni mafuaaga e vivii ai i le Atua. Sa ia faapea mai: “Ua ou matuā fiafia ona ua ou maua le upu moni ma le faalapotopotoga o loo faaaogā e Ieova. Ua iai nei se fuafuaga ma se uiga i loʻu olaga. Ua maua nei se isi mamoe na sē ma ua lē manao e tuua le lafu a Ieova!”—Faatusatusa i le Mataio 10:6.

Ia “Vivii Tatou Uma ia Ioa”

Ua na o ni nai faataitaiga na mai le tele o faataitaiga e mafai ona faamatala e faaalia ai o tagata i aso nei, po o ā lava o latou tulaga, e mafai ona iai mafuaaga e vivii ai i le Atua. Sa faamatala faapea e le aposetolo o Paulo: “A o le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.” (1 Timoteo 4:8) Pe a tatou faia le finagalo o le Atua, o le a ia faataunuuina le “mea ua folafolaina mai i la le olaga nei.” E moni, o le a ia lē faamauoloaina ē matitiva pe faamaloloina ē mamaʻi i lenei faiga o mea. Ae na te tuuina lona agaga ia i latou o auauna ia te ia ina ia mafai ai ona latou maua le fiafia ma le lotomalie po o le ā lava lo latou tulaga o le olaga o iai. Ioe, e oo lava i le “olaga nei,” o ē mamaʻi, ē mafatia, ma ē matitiva e mafai ona iai mafuaaga e vivii ai i le Atua.

Ae ā le olaga ‘lea o le a oo mai’? Ioe, o le manatu atu i lea olaga ua ao ai ona tatou matuā naunautai e vivii i le Atua! Tatou te fiafia pe a manatu i le taimi o le a lē toe iai le mativa; pe a “le fai mai foi se tasi ua mau ai, Ou te maʻi”; ma pe a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Isaia 33:24; Faaaliga 21:3, 4; Salamo 72:16) O le ā lau vaaiga i nei folafolaga a le Atua?

Sa talia e se tama talavou mai i El Salvador se sāvali faale-Tusi Paia lea na faamatala ai nisi o nei mea. Sa ia fai atu i le Molimau lea na tuuina atu le sāvali ia te ia, “Tamaitai, e lelei tele mea ia e fai mai ai lenei sāvali ua faigata ai ona ou talitonu i ai.” E toatele e tali mai faapena. Peitai o folafolaga nei a Lē na foafoaina le vateatea aoao, na ia faatulaga le faataamilosaga masani a le lalolagi, ma o lē e fesoasoani e oo lava i ē matitiva ma mamaʻi ina ia maua le fiafia. E mafai ona tatou talitonu i le mea ua ia fai mai ai. O le tama talavou na taʻua i le amataga na ia suesue le Tusi Paia ma Molimau a Ieova ma iloa ai le moni o nei mea. Afai e lē o faia nei sau suesuega faale-Tusi Paia, matou te faalaeiauina oe ia faia le mea lava lea e tasi. O lea, atonu o le a e iai i le lalolagi fou pe a mavae lenei faiga o mea, ma aufaatasi e alalaga atu: “Aleluia!” “Ia outou vivii atu ia Ioa!”—Salamo 112:1; 135:1.

[Faaopoopoga i lalo]

a I le Tusi Paia, o “Ieova” e faapuupuuina i nisi taimi ia “Ioa.”

[Ata i le itulau 5]

Talosia o le a e iai iina pe a aufaatasi uma le foafoaga e alalaga atu: “Aleluia!”

    Lomiga Faa-Samoa (1971-2026)
    Log Out
    Log In
    • Faa-Samoa
    • Lafo Faamatalaga
    • Faapolokalame
    • Copyright © 2025 Watch Tower Bible and Tract Society of Pennsylvania
    • Aiāiga Faapitoa
    • Aiā Faaletulafono
    • Privacy Settings
    • JW.ORG
    • Log In
    Lafo Faamatalaga