Pe Afai ua E Lagona ua E lē Fia Ola

Na taʻutino mai e Adriana mai i Pasili e faapea, “Sa faaauau pea ona lofitūina aʻu i nei faalogona, o lea na ou mafaufau ai e sili ai le pule i loʻu ola.”

PE E iai se taimi na e mafatia ma lagona ai ua e lē fia ola? E te ono malamalama la i faalogona o Adriana. Na mafatia o ia i le popole tele, faanoanoa ma le leai o se faamoemoe. Na aafia Adriana i mafatiaga o le mafaufau ma matuā faanoanoa ai i taimi uma.

Mātau se tamāloa Iapani e igoa iā Kaoru, o lē na tausia ona mātua matutua ua mamaʻi. Na ia faamatala mai, “I lenā taimi, na tele omiga ogaoga na ou fesagaʻia i le galuega. A o faagasolo taimi, na ou lē lagona se fia ʻai ma sa lē lelei foʻi se moe. Na amata ai ona ou mafaufau atonu o le a lē toe iai ni oʻu faafitauli pe a ou oti.”

Na faapea mai se tamāloa Nigeria e igoa iā Ojebode e faapea,“O le tele o taimi ou te faanoanoa ma tagi ai, o lea na ou saʻili ai i se auala e pule ai i loʻu ola.” Ae o le mea e faafetai ai, e leʻi faia faapea e Ojebode, Kaoru ma Adriana. Peitaʻi i tausaga taʻitasi, e faitau selau afe i latou ua pule i o latou ola.

O FEA E TATOU TE MAUA AI LE FESOASOANI?

O le toʻatele o tagata e pule i le ola o tamāloloa, ma o le toʻatele o i latou na e matamumuli e fesili mo se fesoasoani. Na taʻua e Iesu e manaʻomia e tagata mamaʻi se fomaʻi. (Luka 5:31) Pe afai o loo iai na faalogona iā te oe, aua le matamuli e saʻilia se fesoasoani. O le toʻatele o tagata e aafia i le lotomafatia ua latou maua togafitiga faafomaʻi lea e fesoasoani iā i latou e onosaia ai na tulaga. Na maua e Ojebode, Kaoru ma Adriana le fesoasoani faafomaʻi ma ua mafai nei ona latou onosaia na maʻi.

E ono faaaogā e fomaʻi a lē o fualaau po o se fomaʻi o le mafaufau, pe faaaogā uma nei auala e togafitia ai le lotomafatia. E manaʻomia foʻi e i latou o loo lotomafatia le onosaʻi, malamalama, tausiga ma le lagolagosua mai i a latou uō ma aiga. O le uō sili e mafai ona maua e se tasi, o Ieova le Atua, o lē e saunia mai le fesoasoani sili i lana Afioga le Tusi Paia.

PE E IAI SE VAIFOFŌ TUMAU?

Atonu e manaʻomia e i latou o lotomafatia ni togafitiga faafomaʻi mo se taimi umi, pe manaʻomia foʻi ona suia a latou masaniga. Pe afai o loo e aafia i le lotomafatia, e mafai ona e tulimataʻia se lumanaʻi fiafia e pei ona faia e Ojebode. Na ia faapea mai, “Ou te tulimataʻia le faataunuuina o le Isaia 33:24, lea e valoia mai ai le taimi o le a lē toe faapea mai ai se tasi i le lalolagi ʻOu te maʻi.’” I le pei o Ojebode, e faamāfanafanaina i tatou i folafolaga a le Atua mo “le lalolagi fou,” lea o le a lē toe iai se tigā. (Faaaliga 21:1, 4) O lenā folafolaga e aofia ai le aveesea atoatoa o mafatiaga o le mafaufau ma faalogona. O le a lē toe iai e faavavau ou faalogona tigā, o le a “lē toe manatua . . . e lē toe alu aʻe foʻi i [lou] loto.”—Isaia 65:17.

O Mau o le Tusi Paia e Maua ai Fautuaga Lelei

E malamalama lelei le Atua i ou faalogona.

“O aʻu o Ieova lou Atua, o loo uuina lou lima taumatau, o Lē e fai atu iā te oe, ʻAua e te fefe. Ou te fesoasoani iā te oe.’”—Isaia 41:13.

E sili atu ona malamalama le Atua i o tatou faalogona nai lo o se isi lava tagata, ma e finagalo o ia e fesoasoani mai.

Ia manatunatu loloto i le Afioga a le Atua.

“Ua talosaga atu [Elia] ina ia oti, ua faapea atu: ʻ. . . Ieova e, ia e aveese loʻu ola.’”—1 Tupu 19:4.

Na faapea mai Ojebode, “Na fesoasoani iā te aʻu le manatunatu loloto i le Afioga a le Atua. Na ou iloa ai na oo foʻi nei faalogona i le perofeta o Elia.”

Ia aʻoaʻo ni lesona mai i faaaʻoaʻoga o loo i le Tusi Paia.

“Ua ou [Iesu] faatoga atu mo oe [Peteru], ina ia aua neʻi mou atu lou faatuatua.”—Luka 22:32.

Ina ua uma ona faafitia faatolu e Peteru Iesu, na ia lagona le mafatia ma tagi masūsū ai. Na taʻua e Kaoru, “O le manatunatu loloto i le mea na faia e Peteru iā Iesu ma le auala na tali atu ai Iesu, na fesoasoani iā te aʻu e iloa ai na manatu mamafa Ieova ma Iesu i ona faalogona. Na faalaeiauina ai aʻu.”

O le a lē toe iai e faavavau ou faalogona tigā, o le a “lē toe manatua . . . e lē toe alu aʻe foʻi i [lou] loto.”—Isaia 65:17