Pe Tatau Ona Alu Sau Tama i se Aʻoga Nofotumau?

SEʻI manatu faalemafaufau faapea o loo e nofo i se nuu i se atunuu tauatiaʻe. O loo iai nisi o lau fanau i aʻoga tulagalua, ma e ō atu i le aʻoga maualuga pe a atoa le taʻi 12 o o latou tausaga. E toatele naʻuā tamaiti aʻoga i aʻoga maualuluga i lou vaipanoa, ae e lē lava mea e aʻoaʻoina ai tamaiti, ma e lē lava foi faiaʻoga. I nisi taimi e solo tetee ai ma e faitau vaiaso ma masina o leai ni aʻoga.

A ua tuuina atu e se tagata ia te oe se polosiua matagofie o loo faamatalaina ai se aʻoga nofotumau o i le laumua. Ua e vaaia ata o tamaiti aʻoga e fiafia o loo oofu i ofu mananaia, o loo suesue i potu aʻoga ua lava saunia, potu mo mataupu faasaienisi, faapea ma potu tusi eseese. O loo faaaogā e tamaiti aʻoga komepiuta ma o loo mālōlō i potu moe e mamā ma matagofie. Ua e faitau atu i se tasi o sini o le aʻoga faapea e fesoasoani atu i tamaiti ina ia “ausia tulaga tau aʻoaʻoga aupito lelei lea ua latou agavaa e ausiaina.” Ona faaauau lea o lau faitau: “E tatau i tamaiti aʻoga uma ona gauai atu i amioga lelei e tusa ai, ia talitutusa ma uiga ia e tatau ona faaalia i aiga lea e faamamafa ai le faaaloalo, tausaafia, faaaloalo i mātua ma tagata matutua, felagolagomai, onosai, agalelei ma le faamaoni.”

O loo sii mai se faamatalaga a se taulealea laumata ʻataʻata e faapea: “Ua tuu mai e oʻu mātua se avanoa sili o le auai atu lea i le aʻoga e aupito sili ona lelei.” Ua faapea mai se teineitiiti: “O le aʻoga o se luʻitau ma o se fiafiaga. E faigofie tulaga tau aʻoaʻoga iinei.” Pe o le a auina atu la oulua tama i se aʻoga nofotumau faapena?

Aʻoaʻoga ma le Itu Faaleagaga

O mātua uma lava e manatunatu mamafa e naunau e saunia se faavae mausali mo olaga o a latou fanau, o lea ina ia ausia lena tulaga, e tāua ai se aʻoaʻoga maeʻaeʻa ma paleni. E masani lava ona tatalaina e aʻoaʻoga faalelalolagi avanoa mo galuega ma e fesoasoani foi i talavou ina ia avea ma tagata matutua o loo agavaa e tausiaina i latou lava faapea ma o latou aiga i le lumanai.

Atonu e te fesili ifo ‘Afai e ofo mai e se aʻoga nofotumau se aʻoaʻoga lelei faapea ma ni taiala tau amio, aisea la e le faaaogā lelei ai lena avanoa?’ I le taliina o lena fesili, e ao i mātua Kerisiano ona iloilo i le tatalo se vala e sili ona tāua—le lelei faaleagaga o a latou fanau. Na faapea le fesili a Iesu Keriso: “Auā se a le aoga i le tagata, pe afai na te maua le lalolagi uma, a e maumau lona ola?” (Mareko 8:36) Ioe, e leai lava se aogā o nei mea uma. O lea, a o lei faia se faaiuga e auina atu a latou fanau i se aʻoga nofotumau, e ao i mātua Kerisiano ona iloilo le aafiaga o lenei filifiliga i le faamoemoe mo le ola e faavavau o a latou fanau.

Le Aafiaga Mai Isi Tamaiti Aʻoga

O nisi o aʻoga nofotumau atonu e lelei o latou tulaga tau aʻoaʻoga. Ae faapefea tulaga tauamio a ē o loo auai i le aʻoga po o ē foi atonu o loo pulea na ituaiga aʻoga? Na tusi Paulo e faatatau i uiga o le toatele o tagata i nei “aso e gata ai” e faapea: “O ona aso e gata ai e oo mai ai aso faigata. Auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua toaga i lotu, a o le mana ua i lea mea ua latou teena; ia e ʻalo ese lava i tagata faapena.”—2 Timoteo 3:1-5.

O loo aafia le lalolagi atoa i lenei faasolosolo ina leaga o le itu faaleagaga ma tulaga tauamio, lea ua avea ai le tausisia o mataupu faale-Tusi Paia ma se lui mo Molimau a Ieova. Ua iloa e tamaiti aʻoga e tausāvali i aso uma faapea e oo i lo latou auaumea i se tulaga faatapulaa ma tamaiti aʻoga o le lalolagi e ono iai se aafiaga leaga malosi i lo latou itu faaleagaga. O le teena o na aafiaga e mafai ona avea ma mea faigata mo tamaiti Molimau, e ui lava o loo mauaina le lagolagosua, fautuaga ma faalaeiauga mai o latou mātua i aso taitasi.

E faapeī la le tulaga o tamaiti e tuua o latou aiga ina ia nonofo i aʻoga nofotumau? Ua tuua na o i latou, ua lē toe maua le lagolagosua faaleagaga faifai pea mai mātua alolofa. Ona ua latou nonofo ma tamaiti o a latou vasega mo le 24 itula o le aso, o omiga ina ia pei o le toatele o i latou nei ua telē sona aafiaga i o latou mafaufau ma loto talavou nai lo o tamaiti ia e tausāvali mai aiga. Ua faapea mai se tasi tamaitiiti aʻoga: “O loo lamatia se tamaitiiti nofotumau i le itu tauamio mai le taeao seia oo i le po.”

Na tusia e Paulo e faapea: “Aua neʻi faaseseina outou, O le feoai ma e amio leaga e leaga ai amio lelei.” (1 Korinito 15:33) E lē tatau ona faaseseina mātua Kerisiano i le manatu faapea e leai se aafiaga leaga faaleagaga i a latou fanau pe afai latou te auaumea pea ma ē e lē auauna i le Atua. I le faagasologa o le taimi, e mafai ona lē amanaia e tamaiti amioatua ia mataupu o loo faatāuaina e le Faa-Kerisiano ma oo ina matuā lē talisapaia ai mea faaleagaga. O nisi o taimi e faatoʻā iloa ai e mātua lenei mea ina ua tuua e a latou fanau aʻoga nofotumau. E masani lava ona lē mafai ona toe faaleleia lea tulaga.

E faapena le mea na tupu ia Clement. Na ia faapea mai: “Ae ou te lei alu atu i le aʻoga nofotumau, na iai loʻu alofa mo le upu moni ma na ou auai faatasi ma uso i le auaunaga i le fanua. Na ou fiafia tele e auai i le suesuega a lo matou aiga faapea ma le Suesuega Tautusi a le Faapotopotoga. Ae peitai, o le 14 o oʻu tausaga na ou alu atu ai i le aʻoga nofotumau ona ou tuua ai lea o le upu moni. I le lima o tausaga a o oʻu iai i le aoga nofotumau, ou te lei alu lava i sauniga. Ona o aumea leaga, na ou faaaogaina ai fualaau faasaina, na ou ulaula ma inu tele.”

Le Aafiaga Mai Faiaʻoga

E mafai ona iai i so o se aʻoga faiaʻoga e lē mamā tauamio o ē e faaaogaina sese lo latou tulaga pule. O isi e sauā ma inainā, a o isi e latou te faaleagaina faaleituaiga a latou tamaiti aʻoga. E foliga mai e ono lē lipotia uiga o nei faiaʻoga i aʻoga nofotumau.

Ae peitai, e taumafai ma le faamaoni le tele o faiaʻoga e aʻoaʻoina tamaiti ina ia avea ma tagata aogā o le sosaiete, ina ia fetuutuunai ma ola talafeagai e tusa ai o o latou siomaga. Ae peitai ua avea foi lenei mea ma faafitauli mo tamaiti Molimau. E masani lava ona lē ogatusa mataupu o loo faatāuaina e le lalolagi ma mataupu silisili faa-Kerisiano. A o faalaeiau e faiaʻoga tamaiti aʻoga ina ia avea ma vaega o lenei lalolagi, na fetalai Iesu i ona soo “e le ni o le lalolagi i latou.”—Ioane 17:16.

Ae faapefea pe a tulai mai ni faafitauli pe afai o loo mulimuli atu tamaiti i mataupu silisili faale-Tusi Paia? Afai o loo auai atu tamaiti i se aʻoga o lata ane ma o loo nonofo i aiga, e mafai ona latou talatalanoa ma o latou mātua e faatatau i ia mataupu. O le faia faapea, e mafai ai e mātua ona fesoasoani i a latou fanau ma atonu e talanoa atu i faiaʻoga. O le iuga, e masani lava ona vave foia faafitauli ma feeseeseaiga.

E ese le tulaga i aʻoga nofotumau. O ia tamaiti aʻoga o loo i lalo o le vaavaaiga faifai pea a o latou faiaʻoga. Afai e maumauai tamaiti i mataupu silisili faa-Kerisiano, e ao ona latou faia e aunoa ma le lagolagosua i aso taitasi a o latou mātua. I nisi o taimi, na mafai ai e tamaiti ona tumau i le faamaoni i le Atua i lalo o na tulaga. Ae peitai, e masani lava ona latou lē faia faapea. E foliga mai e lolo atu se tamaitiiti i le mea o manao i ai se faiaʻoga.

E Faatapulaa Gaoioiga

E lē pei o iunivesite lea e pule lava tagata aʻooga i a latou mea e fai, e faatapulaa e aʻoga nofotumau gaoioiga a tamaiti aʻoga. E faasa e le tele o nei aʻoga tamaiti ona tuua le lotoā o le aʻoga seʻi vaganā ai le Aso Sa, ae o isi e oo lava i lena tulaga e lē faatagaina. Na faapea mai se teineitiiti aʻoga nofotumau e 11 tausaga e igoa ia Eru: “E matuā faasa lava e pule o le aʻoga i matou mai le ō atu i sauniga, ae maise le auaunaga i le fanua. E iai faigalotu mo na o tamaiti Katoliko ma Musalimi i totonu o le aʻoga. E tatau i tamaiti aʻoga taitoatasi ona filifili po o lē fea faigalotu e auai atu i ai, a leai e matuā itagia e faiaʻoga ma tamaiti aʻoga. E faamalosia foi tamaiti aʻoga ina ia usuina vii o le fuʻa ma pese lotu.”

Afai e faaulu atu e mātua igoa o a latou fanau i se aʻoga faapenei, faamata o le ā le manatu ua latou avatuina i a latou fanau? O le manatu faapea e tāua atu aʻoaʻoga faalelalolagi nai lo o faatasitasiga mo tapuaiga ma le auai i le galuega o le faia o soo—e sili atu foi ona tāua nai lo le faamaoni i le Atua.—Mataio 24:14; 28:19, 20; 2 Korinito 6:14-18; Eperu 10:24, 25.

I nisi aʻoga nofotumau, ua mafai e tamaiti aʻoga Molimau ona suesueina faatasi le Tusi Paia, ae e oo foi i lenei mea e masani lava ona faigata. Na faapea mai se talavou e 16 tausaga e igoa ia Blessing e faatatau i le aʻoga nofotumau na iai: “O aso uma e faatasitasi ai ē ua taʻua o Kerisiano e tatalo. O i matou o Molimau na matou aioi atu ia i latou ina ia mafai ona faia la matou suesuega, ae na faapea mai tamaiti aʻoga o le tausaga faauʻu e lē amanaiaina la matou faalapotopotoga. Ona latou taumafai lea e faamalosi i matou ina ia auai atu i a latou tatalo. A matou lē faia, e latou te faasalaina i matou. O le taʻu atu i faiaʻoga e atili ai le faafitauli. E latou te faaigoaina i matou i igoa eseese e matagā ma faatonuina tamaiti o i le tausaga faauʻu e faasala i matou.”

Le Tulaga e Matilatila Ese Ai

Afai e iloa lelei o ni Molimau a Ieova tamaiti o loo i le aʻoga nofotumau, e mafai ona aogā lenei mea ia i latou. E ono faataga e pule o le aʻoga lo latou lē auai i gaoioiga faalotu sese e fai faamalosi, lea e feteenai ma talitonuga o Molimau. Atonu o le a lē taumafai tamaiti aʻoga e faaaafia i latou i le auai atu i gaoioiga ma talanoaga lē mamā. Atonu e tulai mai ai ni avanoa e molimau atu ai i tamaiti aʻoga ma faiaʻoga. E lē gata i lea, e foliga mai e lē masalosalo ai pe e faia e ē o tausisi i mataupu silisili faa-Kerisiano ia mea sese, ma i nisi taimi e faaaloalogia ai e faiaʻoga ma tamaiti aʻoga.

Ae peitai, e lē faapea uma mea e tutupu. O le tu ese e masani ona avea ai se talavou ma taulaiga o sauaga ma ulaga a tamaiti aʻoga faapea ma faiaʻoga. Ua faapea mai se tama e 15 tausaga o loo auai i se aʻoga nofotumau e igoa ia Yinka: “I le aʻoga, e avea oe ma taulaiga pe a iloa o oe o se tasi o Molimau a Ieova. Talu ai ua latou iloaina lo matou tulaga tauamio ma lo matou tulaga faaleagaga, ua latou taumafai ai e faia ni togafiti e maileia ai i matou.”

Tiute Tauave a Mātua

E lē mafai e so o se faiaʻoga, aʻoga po o se kolisi ona taumafai e faatinoina le galuega o le fesoasoani atu lea i tamaiti ina ia avea ma auauna tuuina atu a Ieova. E lē o se latou galuega po o se latou tiute tauave. Ua faatonuina e le Tusi Paia faapea o mātua lava ia e tatau ona tausiaina manaoga faaleagaga a o latou fanau. Na tusia faapea e Paulo: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.” (Efeso 6:4) E faapefea i mātua ona faatatauina lenei fautuaga mai le Atua pe afai o loo nonofo a latou fanau i se aʻoga nofotumau lea e faatapulaa asiasiga i le faatasi pe faalua i le masina?

E matuā eseese lava tulaga, ae e ao i mātua Kerisiano ona taumafai ia ogatusa a latou gaoioiga ma lenei fautuaga faagaeeina e faapea: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.”—1 Timoteo 5:8.

Pe Iai Nisi Aʻoaʻoga e Filifili Mai Ai?

O le ā se mea e ao ona faia e mātua pe a foliga mai e na o le lua mea e filifili mai ai—aʻoga nofotumau po o se aʻoga e lata ane e lē lava mea e aʻoaʻoina ai tamaiti? O nisi ua i lenei tulaga na totogiina le faia o lesona faapitoa ina ia faaopoopo i aʻoaʻoga a latou fanau i se aʻoga e lata ane. O nisi mātua ua latou faaavanoaina se taimi ina ia latou aʻoaʻoina ai a latou lava fanau.

I nisi o taimi e alofia e mātua faafitauli e ala i le fuafua mamao o le taimi talafeagai e auai atu ai a latou fanau i aʻoga maualuga. Afai e iai sau fanau po o e fuafua foi e faia sau fanau, e ao ona e sailia po o iai se aʻoga maualuga lelei i le vaipanoa o e nofo ai. Afai e leai, atonu e mafai ona tou siitia atu ina ia faalatalata i se aʻoga lelei.

E pei ona iloa lelei e mātua, e manaomia le tomai, onosai, ma le tele o se taimi ina ia faatumauina ai i se tamaitiiti le alofa mo Ieova. Afai e faigata le faia o lenei mea a o nofo se tamaitiiti i le aiga, e sili atu la le faigata pe a nofo mamao se tamaitiiti! Talu ai o loo aafia le ola e faavavau o le tamaitiiti, e tatau i mātua ona manatu mamafa ma tatalo i le la filifiliga pe o talafeagai le tuu atu o le la tama i se aʻoga nofotumau. Pagā se lē magafagafa o le faataulagaina o le lelei faaleagaga o se tamaitiiti mo le mauaina o se aʻoaʻoga lelei i se aʻoga nofotumau! Ua pei o le tamoe atu i totonu o se fale o loo mu ina ia aumaia se mea totino faalētāua—ae mu ai i le afi.

Ua faapea mai le Afioga a le Atua: “O le ua faautauta, na te iloa atu le leaga, ma lafi ai; a o e ua faigofie, e o atu pea i latou, ona faasalaina ai lea.” (Faataoto 22:3) E sili le alofia o se tulaga leaga nai lo le tau toe faaleleia mulimuli. E lelei lou mafaufau i lena mea pe fesili ifo foi ia te oe, ‘Pe e ao ona alu atu saʻu tama i se aʻoga nofotumau?’

[Pusa i le itulau 28]

Ua Toe Manatunatu Molimau Talavou i le Taimi sa Iai i Aʻoga Nofotumau

“E motusia aumea faaleagaga a tamaiti Molimau i aʻoga nofotumau. E tele ni omiga ina ia faia le mea sese ma o se siomaga e matuā lē mafana.”—Rotimi, o sē na auai i se aʻoga nofotumau mai le 11 e oo i le 14 o ona tausaga.

“E matuā faigata lava le auai atu i sauniga faa-Kerisiano. E na o Aso Sa na mafai ai ona ou auai, ma ina ia faia faapea, na tatau ona ou sola a o gasolo atu tamaiti i le falesa. Sa lē taitai ona ou fiafia, auā i lo matou aiga sa masani ona ou auai i sauniga uma lava a le faapotopotoga, ma sa ou auai foi i le auaunaga i le fanua i Aso Toonai ma Aso Sa. E lei avea le aʻoga ma faalaeiauga. E ese le tele o mea na ou misia.”—Esther, o sē na masani ona sasa e faiaʻoga ona o le lē auai i sauniga faalelotu a le aʻoga.

“E lei faigofie le molimau atu i tamaiti o le aʻoga nofotumau. E lē faigofie le tu matilatila ese mai. Na ou manao e mulimuli atu i taaiga a tamaiti. Atonu na mafai ona sili atu loʻu malosi pe ana mafai ona ou auai i sauniga ma le auaunaga i le fanua. Ae na lē mafai ona ou faia faapea seʻi vaganā ai le taimi o tuuaga, lea e na o le faatolu ona faia i le tausaga. Afai e iai sau lamepa ua lē o toe utuina i le suauu, e faasolosolo malie ona pe ifo lona mumū. E tutusa lena tulaga ma le aʻoga.”—Lara, o sē na auai i se aʻoga nofotumau mai le 11 e oo i le 16 o ona tausaga.

“Ona ua ou lē toe iai i se aʻoga nofotumau, ua ou fiafia ai lava ua mafai ona ou auai i sauniga uma, i le auaunaga i le fanua, ma le mau o le aso faatasi ma le aiga. E ui ina iai aogā o le nofo i se aʻoga nofotumau, ae e leai se isi mea e sili atu nai lo le ma faiā ma Ieova.”—Naomi, o sē na faatauanau i lona tamā ina ia aveesea o ia mai le aʻoga nofotumau.