Lipoti a Ē Faalauiloa le Malo

Faasalalau Fatu o le Malo i so o se Avanoa

O LE Afioga a le Atua, le Tusi Paia, ua faalaeiauina mai ai le toaga. Na faapea mai le tupu o Solomona: “O le taeao ia e lulu ai au saito, aua foi le mapu lou lima i le afiafi; auā e te le iloa po o le fea e manuia, o lenei, po o lena, pe gatusa ona lelei o ia mea e lua.”—Failauga 11:6.

I so o se avanoa talafeagai ai, ua lūlū ai e Molimau a Ieova “fatu” e ala i le talaʻia o le tala lelei o le Malo o le Atua. E silia ma le 230 atunuu ma atumotu, ua faaauau ona latou “le mapu . . . i aso uma ona aʻoaʻo atu, ma talaʻi atu . . . le tala lelei o Iesu le Keriso.” (Galuega 5:42) O mea na tutupu o loo mulimuli mai ua faailoa mai ai le auala ua mafai ai e Molimau a Ieova ona ‘lē mapu o latou lima’ i le galuega talaʻi.

◻ I le Republic of Cape Verde, na savali ane ai i tala ane o se falepuipui se tasi o Molimau a o auai i le faiva i le fanua. I totonu o le lotoā o le falepuipui, sa nofonofo ai nisi o pagota i luga o se laau. A o autilo ifo i le Molimau, na tauvalaau ane ai pagota mo ni mekasini. Sa saisai faatasi e le Molimau ni mekasini o Le Olomatamata ma le Ala Mai! ma se maa ma togi atu i luga aʻe o le pa o le falepuipui. O le iuga o lenei uluai naunau, e 12 suesuega faale-Tusi Paia na amataina. E toatolu pagota ua tuuina atu o latou ola i le Atua ma ua faailoa atu i latou e ala i le papatisoina i le vai. O se tasi o ia pagota ua auauna nei o se faievagelia faataimi atoa, po o se paeonia, ua sili atu nei ma le tausaga. Ua faapefea ona latou taulimaina galuega o le auaunaga i le fanua i totonu o le falepuipui? Muamua lava ua vaevaeina le falepuipui i oganuu. Ona tofu lea o Molimau e toatolu ma le oganuu e galulue ai mai lea sela i lea sela. Ua asia e nei tagata talaʻi o le Malo ē naunau i le auala lava lea e faia e Molimau a Ieova i le lalolagi atoa—e ala i le faia o toe asiga. Peitai, o se tasi eseesega, o le tele o taimi e faia ai suesuega faale-Tusi Paia. Nai lo le faatasi po o le faalua i le vaiaso ona suesueina le Tusi Paia mo se itula pe sili atu foi, o nisi pagota ua latou suesueina i aso uma! E lē gata i lea, ua tuuina atu i Molimau le faatagaga mai le faatonu sili o le falepuipui ina ia taulimaina ai sauniga uma a le faapotopotoga i totonu o le falepuipui.

◻ Sa mauaina e se fafine i Potukali ni lomiga a le Sosaiete o le Olo Matamata ina ua maliu le tinā o se tasi o ona mātua. Talu ai e lē o ia o se tasi o Molimau a Ieova, sa lē naunau ai e teuina ia tusi. Peitai, sa lē manao foi o ia e faaleagaina. I se tasi aso na ia taʻu atu ai i se tasi o Molimau a Ieova o lē na asiasi ane ia te ia a o auai i le galuega mai lea fale i lea fale e faatatau i le faaputuga tusi. Sa fesiligia o ia e le Molimau pe o manatu i lea faaputuga tusi e iai sona tāua moni. Sa tali atu le fafine: “O le mea moni, ou te lē iloa so latou tāua moni, ae e mafai faapefea ona ou iloaina?” Sa taliaina e le fafine se suesuega faale-Tusi Paia, ma sa ia faatāuaina ai loa le faaputuga tusi a le tinā o se tasi o ona mātua. O le taimi nei ua avea foi o ia ma Molimau a Ieova ua papatisoina. E lē gata i lea, ua suesueina foi e lana tama teine ma se tasi o uo mamae a lo latou aiga le Tusi Paia. Maeu le tāua tele na maua mai ona o lenei faaputuga tusi!