Fesili Mai le Au Faitau

O le ā e tatau ona faia e se Kerisiano pe a amia o ia e avea ma faatonu o se faamasinoga?

I nisi atunuu, o faiga tau faamasinoga e faaaogā ai le ʻau faatonu, e filifilia mai i tagatanuu. I atunuu o loo faia faapea, e ao i se Kerisiano ona filifili po o le a paau atu e pei ona poloaiina ai o ia. E toatele Kerisiano e lē o afaina o latou loto fuatia ifo i le manatu faapea e lē o faasaina e mataupu silisili o le Tusi Paia le au atu i ai, e pei ona usitaia e Sataraka, Mesako, ma Apeteniko ia le poloaiga a le malo o Papelonia ina ia ō atu i le laugatasi o Turu, ma e pei foi ona ō atu Iosefa ma Maria i Peteleema ina ua faatonuina e tagata maualuluga o le malo o Roma. (Tanielu 3:1-12; Luka 2:1-4) E ui i lea, e iai vala e ao i Kerisiano faamaoni ona manatunatu i ai.

O le faaaogaina o le ʻau faatonu e lē o faatinoina e atunuu uma o le lalolagi. I nisi atunuu, o mataupu faalauaitele ma mataupu tau solitulafono, e faia e se faamasino ua tomai le faaiuga, po o se vaega o faamasino ua tofiaina. O isi atunuu, e faaaogā ai le vaega e taʻua o tulafono faaleaganuu ua faamautuina, ma ua avea ai le ʻau faatonu (juries) ma vaega o faiga tau faamasinoga. Ae e toatele tagata e lē tele so latou silafia i le auala ua filifilia ai lenei vaega ma po o ā foi a latou mea e fai. O lea la, o le mauaina o se malamalamaga lautele o le a aogā e tusa lava pe e te aafia ai po o le lē aafia ai i le feagai ai ma tiute i le avea ma faatonu.

Ua iloa e tagata o le Atua o Ieova o le Faamasino Sili. (Isaia 33:22) I Isaraelu anamua, o tane ua lava le poto masani ma sao le amio ma lē faaituau, na fai ma faamasino e faaleleia finauga ma faia faaiuga o mataupu e fesiligia ai le tulafono. (Esoto 18:13-22; Levitiko 19:15; Teuteronome 21:18-21) E oo ane i le taimi na afio mai ai Iesu i le lalolagi, o faiga tau faamasinoga na faafoeina e le ʻau Saniterini, le faamasinoga maualuga a Iutaia. (Mareko 15:1; Galuega 5:27-34) Sa leai se avanoa mo tagata lautele o Iutaia e au atu ai e avea ma faatonu i faamasinoga mo mataupu faalauaitele.

O isi atunuu e latou te faaaogaina tagatanuu e filifili mai ai ni faatonu. O le faamasinoga o Socrates na faaaogā ai le ʻau faatonu e toʻa 501. O faamasinoga e faaaogā ai faatonu na faia foi i le Republic a Roma, e ui i lea, o lenei faiga na faaleaogaina i le vaitaimi o emeperoa. Mulimuli ane, o le tupu o Enele III o Egelani na ia faatagaina lē ua molia ina ia faia lona faamasinoga e ona tuaoi. Na iai le lagona faapea ona latou te masani i lē ua molia, o le a fetaui la latou faaiuga nai lo faiga ia e taumafai ai lē ua molia e faamaonia lona lē solitulafono e ala i se fetaiaiga ma lē na molia o ia po o le faamaonia lona lē sala ina ua sao mai se mea faigata matautia na faaooina atu i ai. A o faagasolo mai le taimi, na suia ai le faiga lea e faaaogā ai faatonu i se fuafuaga e faaaogā ai se vaega mai tagatanuu ina ia latou faalogo atu i se faamasinoga ma faia se iuga e faavae mai i faamaoniga. E fesoasoani atu se faamasino tomai ia i latou i mea ua fai ma faamaoniga.

E eseese ituaiga o faatonu o faamasinoga, le aofaiga o ē e faaaogā, ma po o le ā o aofia ai i le faia o se faaiuga. E fai ma faataitaiga, i le Iunaite Setete o Amerika, o le ʻau faatonu mo lē ua tuuaia (grand jury), e toa 12 e oo atu lava i le 23 i latou, o i latou ia e faia le faaiuga pe ua lava faamaoniga e molia ai se tagata faaletulafono ona o se solitulafono; latou te lē fuafuaina pe faasalaina o ia pe leai. E faapena foi i le ʻau faatonu e faia le suesuega (jury of inquest), e iloilo e i latou nei ia faamaoniga ona faia lea o se faaiuga pe na faia se solitulafono.

Pe a mafaufau le toatele o tagata i faatonu o faamasinoga, o le ata o loo i o latou mafaufau o se lisi lea o igoa o ni tagatanuu se toʻa 12 e iai i se faamasinoga e faalogo atu i tautinoga ona filifili lea pe solitulafono pe leai. O se vaega toalaiti o faatonu (petit jury), e eseese ma faatonu e toatele (grand jury). O le faiga masani, e auina atu e le faamasinoga ia tusi ia i latou taitoatasi ia ua filifilia mai le lisi o ē ua palotaina, o avetaavale e fai laisene, po o isi tulaga tali faapena ina ia auai e avea ma faatonu o le faamasinoga. O isi o le a otometi lava ona lē faaaogaina ona ua lē agavaa, pe afai ua aafia i se solitulafono i mea tau tupe, faapena foi ma i latou ua lē toe atoatoa lelei o latou mafaufau. E faalagolago lava i le tulafono a le atunuu lava ia, o isi— e pei o fomai, o faifeau, o loia, po o le ʻau fai pisinisi laiti— e mafai ona lē taliaina le valaaulia. (O isi e mafai ona teena le auai ona e matuā aafia tele o latou loto fuatia ifo i galuega o aafia ai i le avea ma faatonu. Peitai, o ē mautofiga o le malo ua faateleina le aveesea o nei faatagaga ina ia faamalosia tagata uma e auai i tiute e avea ai ma faatonu, atonu foi o le a tele ina faaaogā o ia a o mavae atu tausaga.

E lē o i latou uma e paau atu i tiute e fai ma faatonu e auai i le faagasologa o le faamasinoga. Mai se faasologa o tagata ua amia mo lenei tiute, ua filifilia ai nisi i se tulaga faasolosolo o ni ē e mafai ona faaaogā i le lumanai latou te iloiloina se moliaga po o faamaoniga o se faamasinoga faapitoa. Ona faailoa atu lea e le faamasino i le itu tagi ma le itu tetee ma a latou loia ma faamatala atu le mataupu o faamasinoina. E iloilo e le faamasino ma loia i latou taitoatasi ua faamoemoe e faaaogā e fai ma faatonu o le faamasinoga. O le taimi lea e faailoa atu ai e le tagata lava ia lona lē fia auai ona o se mafuaaga tau le loto fuatia ifo e fesootai atu i le mataupu lea o loo faamasinoina.

E manaomia ona faaitiitia le aofaiga o faatonu ia i latou o le a auai moni lava i le faamasinoina o lea mataupu. O le a lē faaaogaina e le faamasino so o se tasi o le a masalomia lona faaituau ona e ono māfua mai i lona naunau i le mataupu o faamasinoina. E lē gata i lea, o loia mai itu uma e lua, e iai le aiā e teena ai nisi mai lenei vaega o ē o le a iloiloina le moliaga ma faamaoniga i se solitulafono. O so o se tasi e lē faaaogaina mai lena vaega o le a toe tuu atu i le faasologa e faatali ai le toe filifilia i le faagasologa o loo faia mo isi faamasinoga. Ua faaaogā e nisi Kerisiano o i tulaga ia le taimi e molimau atu ai lē fuafuaina. Pe a uma ni nai aso, ona faataunuuina ai lea e se tasi lona tiute o le paau atu e avea ma faatonu, e tusa lava pe auai pe lē auai o ia i le vaega lea o le a faaaogā e faia le iloiloga.

E taumafai Kerisiano ‘e tausia na o a latou lava mataupu totino,’ e lē aafia fua “i mea a isi tagata.” (1 Tesalonia 4:11; 1 Peteru 4:15) Ina ua talosaga atu se tagata Iutaia ia Iesu ina ia faamasinoina se mataupu e faatatau i le tofi, na tali atu o ia e faapea: “Sole, o ai ea le na fai aʻu ma faamasino ma pule ia te outou?” (Luka 12:13, 14) Na afio mai Iesu e folafola le tala lelei o le Malo, ae lē ia faamasino i mataupu tau tulafono. (Luka 4:18, 43) O le tali atu a Iesu atonu na uunaia ai le tamaloa e faaaogā le auala ua uma ona faatulaga mai e le Tulafono a le Atua e foia ai feeseeseaiga. (Teuteronome 1:16, 17) E ui e aogā na manatu, ae o le tali atu i se faatonuga ina ia auai i se tiute e fai ma faatonu o le faamasinoga, e ese lea mai le isuisu fua o se tasi i pisinisi a isi. E tai pei lava o le tulaga o Tanielu ma ana aumea e toatolu. Na faatonuina i latou e le malo o Papelonia ina ia ō atu i le laugatasi o Turu, ma i le faia faapea sa lē solia ai e i latou le Tulafono a le Atua. O le mea na latou faia mulimuli ane ai o se mataupu e ese ai, e pei ona faaalia mai e le Tusi Paia.—Tanielu 3:16-18.

Ina ua lē toe tausia e auauna a le Atua le Tulafono Faa-Mose, sa tatau la ona feagai ai i latou ma faamasinoga faalelalolagi i isi atunuu. Na augani atu le aposetolo o Paulo i le “au paia” i Korinito ina ia foia feeseeseaiga i totonu o le faatulagaga a le faapotopotoga. E ui ina taʻua nei tagata i faiga tau faamasinoga a le lalolagi o “e amioletonu,” sa lei teena e Paulo le aogā o na faamasinoga i le faafoeina o mataupu masani o lenei lalolagi. (1 Korinito 6:1) Na ia tulai atu e puipuia o ia i faiga tau faamasinoga a Roma, e oo lava ina talosaga e avatu lona faamasinoga ia Kaisara. E lē faapea ua peiseai ua sese le faavae o faamasinoga faalelalolagi.—Galuega 24:10; 25:10, 11.

O faamasinoga faalelalolagi o ni vaega o faatulagaga a “faipule silisili.” Ua “faatuina i o latou tulaga faatatau e le Atua,” ma latou te faia ma faamautinoa le tausisia o tulafono. Na tusi Paulo e faapea: “Auā o le auauna ia a le Atua ia te oe, ia lelei ai; a e afai e te amio leaga, ia e fefe ai, auā e le fai fua e ia lana pelu; auā o le auauna o ia a le Atua, o le na te taui atu le toasa i lē amio leaga.” E lē tetee Kerisiano ‘i le pule’ auā o loo ia faatinoina le vaega e tusa ma le tulafono, ona latou te lē mananao e ‘tetee i ai’ ma faasalaina ai.—Roma 13:1-4; Tito 3:1.

I le faapaleniina o manatu, e tatau i Kerisiano ona manatu pe mafai ona latou lolo atu i nisi faatonuga maʻoti e fai mai ai Kaisara. Na fautua mai Paulo e faapea: “O lenei, ia avatu i tagata uma lava [o faipule silisili] a latou mea; o le lafoga i e ua tatau i ai le lafoga; o le tiute i e ua tatau i ai le tiute; o le mataʻu i e ua tatau i ai le mataʻu; o le faaaloalo i e ua tatau i ai le faaaloalo.” (Roma 13:7) O se faamatalaga manino lena e faatatau i lafoga tau tupe. (Mataio 22:17-21) Pe a faapea mai Kaisara e tatau i tagatanuu ona avatu lo latou taimi ma taumafaiga e faamamā ai auala po o le faia o isi galuega o faapea ona faafoeina e Kaisara, e tatau i Kerisiano taitoatasi ona filifili pe e gauai atu i ai.—Mataio 5:41.

O nisi Kerisiano ua manatu o le tautua e avea ma faatonu, e tutusa lea ma le avatu o mea a Kaisara ia Kaisara. (Luka 20:25) O le faia o se tiute faapea, o le faalogo atu lea i faamaoniga ma fai atu se manatu faamaoni i mea moni po o le tulafono. E fai ma faataitaiga, o faatonu e faia le suesuega, o i latou ia e faia le faaiuga e tusa ai ma faamaoniga pe ua tatau ona molia se tasi i luma o le faamasinoga; latou te lē fuafuaina pe ua solitulafono o ia. Ae faapefea se faamasinoga o se mataupu faalauaitele? I faamasinoga o mataupu faalauaitele, atonu e faaoo atu e ē o faia le iloiloga le faaiuga o le toe totogia po o le taui atu o mea ua faaleagaina. I faamasinoga tau solitulafono, e latou te fuafuaina pe e lagolagoina e faamaoniga ia se faaiuga e faasalaina ai. O nisi taimi latou te fautua atu ai po o lē fea le faasalaga ua faatulaga mai e le tulafono e tatau ona faaooina atu. Ona faaaogā loa lea e le malo lana pule “na te taui atu le toasa i lē amio leaga,” pe “ina ia faasalaina ai ē amio leaga.”—1 Peteru 2:14, LT.

Ae faapefea pe afai ua lagona e se Kerisiano e lē faatagaina o ia e lona loto fuatia ifo e galue ai e avea ma faatonu e iloiloina se mataupu faapitoa? E lē o taʻua mai e le Tusi Paia ni tiute faapea, o lea la e lē mafai ona ia faapea atu, ‘E faasā e laʻu lotu ona ou galue i so o se vaega o le ʻau faatonu.’ E faalagolago lava i le mataupu o faamasinoina, atonu e mafai ona ia fai atu o le auai e avea ma faatonu o le faamasinoga e lē tusa ai ma lona lava loto fuatia ifo e faatatau atu i se mataupu faapitoa. Atonu o le tulaga lea pe afai o se mataupu e aafia ai amioga lē mamā faaleituaiga, faapaʻū tama, fasioti tagata, po o isi mataupu o le a aafia ai ona manatu i le poto ua aʻoaʻoina mai le Tusi Paia, ae lē o tulafono a le lalolagi. O le tulaga moni, atonu e lē aafia ai mataupu faapena i le faamasinoga lea ua filifilia ai o ia.

O le a manatu foi le Kerisiano taumatuaina po o le a iai sana vaega i le faasalaga lea e tuuina atu e faamasino. (Faatusatusa i le Kenese 39:17-20; 1 Timoteo 5:22.) Pe afai e sese se faaiuga e faapea e solitulafono ma ua faaoo atu ai le sala oti, po o le a aafia le Kerisiano i le nofosala i le toto pe afai sa iai ia i latou ia na iloiloina faamaoniga? (Esoto 22:2; Teuteronome 21:8; 22:8; Ieremia 2:34; Mataio 23:35; Galuega 18:6) I le faamasinoga o Iesu, na manao ai Pilato e “mamā . . . i le toto o lenei tagata.” Na lotomalie Iutaia e faapea atu: “Ia i luga ia i matou, ma a matou fanau lona toto.”—Mataio 27:24, 25.

Pe afai e auai se Kerisiano i ona tiute e avea ma faatonu, e pei ona poloaiina ai e le malo, ae ona o lona loto fuatia ifo na te teena ai le faaaogaina o ia i se faamasinoga patino e ui i le finau maumauai mai o le faamasino, e tatau la i le Kerisiano ona sauni e talia iuga e mulimuli mai ai—a lē o le faasala tupe ia po o le faafalepuipuiina.—1 Peteru 2:19.

I le taunuuga mulimuli, e tatau i Kerisiano taitoatasi o feagai ai ma tiute e avea ai ma faatonu o le faamasinoga ona fuafua le mea na te faia, e faavae i mea ua ia iloa mai le Tusi Paia ma lona lava loto fuatia ifo. O nisi Kerisiano ua latou talia ni tiute faapea ma ua faaaogaina ai i latou i nisi o nei vaega. O isi ua latou lagona latou te lē taliaina e tusa lava pe faasalaina ai. E taitoatasi le Kerisiano ma filifili po o le ā lana mea e fai, ma e lē tatau ona faitioina e isi lana faaiuga.—Kalatia 6:5.