Ia Faaeteete i le Faauiga Sese o Uunaiga a Isi

NA FAIA e se faievagelia lauiloa i le televise se faitioga matuia e tuuaʻia ai se isi uso failauga i le faia o le mulilua. Ae peitai, pe ā ma se tausaga, na maua faatasi ai le faievagelia na faia le tuuaiga ma se fafine talitane.

I se isi foi mea na tupu, na aauina atu ai e se malo malosi o le lalolagi ni sui ina ia faia ni feutagaiga mo le filemu i atunuu na fetauai. I lena taimi, na faatau faalilolilo atu ai e lena lava malo ana auupega i isi atunuu ma maua ai le faitau piliona o tālā i le tau o auupega.

Talu ai le taatele o le faagutugutulua, po o se mea la e ofo ai ona ua matuā tele le masalosalo nai lo o le maufaatuatuaina? I le toatele, ua fai ma masani le fesiligia o uunaiga a isi.

I le avea o ni Kerisiano, e tatau ona tatou faaeteete ina ia aua neʻi faatagaina na uiga e faaaafia ai la tatou faiā ma uso talitonu faamaoni. E ui lava ina lapataia i tatou e Iesu Keriso ina ia “atamamai e pei o gata” a o iai faatasi ma o tatou fili, e lei faapea mai o ia e tatau ona tatou masalosalo e uiga i ona soo moni. (Mataio 10:16) O lea la, o ā ni matautia o le faauiga sese o uunaiga a isi? O ā vala e tatau ai ona tatou matuā faaeteete ina ia alofia na ituaiga o manatu? Ma e mafai faapefea ona tatou puipui i la tatou faiā faapelepeleina ma uso Kerisiano?

Se Lesona Mai Aso ua Mavae

O le faauiga sese o uunaiga a isi e aunoa ma se mafuaaga tatau, e tutusa lava lea ma le faamasinoina o i latou. E tutusa lava lea ma lo tatou muai faia o se faaiuga sese e faapea, o a latou upu po o gaoioiga, o mea taufaasese, ua na ona faia ina ia natia ai se mea faatogafiti ma le loto leaga. E masani lava o le aa o le faafitauli e māfua mai i le lē saʻo o le vaaiga e uiga i mea, e pei ona iloa mai i le tala a le Tusi Paia o loo maua i le tusi o Iosua mataupu e 22.

Sa pulea e tagata Isaraelu le Nuu o le Folafolaga ma faatoʻā uma ona maua laueleele o ituaiga. Ona fausia ai lea e le ituaiga o Reupena ma Kato ma se vaega o le ituaiga o Manase se fata faitaulaga “tele e iloagofie” i tafatafa o le vaitafe o Ioritana. Sa manatu sese isi ituaiga e faapea, o se gaoioiga faaaposetasi lenei. Sa manatu e faapea, o le a faaaogā e nei ituaiga e tolu lenei fausaga telē e osi ai taulaga nai lo o le ō atu i le fale fetafai i Sailo, o le nofoaga tofia lea mo le tapuaiga. Sa sauniuni loa ituaiga ia na faitio mo se taua.—Iosua 22:10-12.

E faamālō ia i latou ona sa latou feutagai ma o latou uso Isaraelu e ala i le aauina faavave atu loa o ni sui aloaia sa taimua ai Fineaso. Ina ua faalogo i tuuaʻiga sese e faapea o le lē faatuatua, fouvale ma le faaaposetasi faasaga ia Ieova, sa faamatala atu loa e ituaiga na tuuaʻiseseina la latou mafuaaga na fausia ai lenei fata faitaulaga telē. Nai lo o le avea o se fata faitaulaga mo le osia ai o taulaga, sa faia ina “ia fai ma molimau” mo le autasi o ituaiga o Isaraelu i le tapuaiga ia Ieova. (Iosua 22:26, 27) Na foi atu i aiga sui ua faamalilieina o latou loto auā e leai se mea na sese ai o latou uso. I lea na alofia ai se taua faaleatunuu ma le matautia o le toto masaa.

Maeu se lesona mo i tatou, ia aua lava neʻi vave faauiga sese uunaiga a isi! E masani lava, o mea o aliali mai e foliga e saʻo i le na o le vaavaai atu i ai, ae e matuā iai sona eseesega tele pe a iloilo totoʻa i ai. E moni lenei manatu i le tele o vala o le olaga o se Kerisiano.

O Tatou Manatu e Uiga i Toeaina

I le faataunuuina o la latou tiute tauave “ia leoleo atu i le ekalesia a le Atua,” ua iloa ai e toeaina i nisi taimi, e tatau ona avatu ni fautuaga i tagata eseese i le faapotopotoga. (Galuega 20:28) Mo se faataitaiga, o ā o tatou uiga faaalia pe a talanoa mai se toeaina ia i tatou e uiga i a tatou fanau i mataupu e pei o aumea leaga po o ni uiga lē talafeagai ma se tasi o le isi ituaiga? Pe tatou te manatu ea e faapea o loo ia te ia se uunaiga lilo, ma faapea ifo, ‘E lē taitai lava ona fiafia o ia i lo tatou aiga’? Afai tatou te faatagaina na faalogona e taaʻina ai i tatou, atonu o le a tatou lagona le salamō i se taimi mulimuli ane. Atonu ua lamatia le lelei faaleagaga o a tatou fanau, ma e tatau ona tatou talisapaia fautuaga aogā faale-Tusi Paia.—Faataoto 12:15.

Pe a fautuaina i tatou e se toeaina o le faapotopotoga, ʻaua neʻi o tatou vaavaai mo ni uunaiga lilo. Nai lo o lea, seʻi o tatou fesili ifo ia i tatou lava po o iai se auala e mafai ona tatou maua ai aogā mai lana fautuaga e faavae i le Tusi Paia. Na tusi le aposetolo o Paulo e faapea: “O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aʻoaʻoina ai.” (Eperu 12:11) O lea, seʻi o tatou loto faafetai ma fefulisai faalaau mamafa mea. Ia manatua e masani lava ona faigata i toeaina ona aumai se fautuaga ia i tatou e pei foi ona faigata ia i tatou ona taliaina.

Lagona e Uiga i Mātua

Pe a fesagai ma nisi o faasasaaga faamātua, e fesiligia ai e nisi talavou uunaiga o loo iai i o latou mātua. Atonu e faapea ifo nisi talavou: ‘Aisea e faia ai e oʻu mātua le tele o tulafono? Atonu e la te lē mananao ina ia ou fiafia i le olaga.’ Ae peitai, nai lo o le faia o se faaiuga faapena, e manaomia ona iloilo totoʻa faatasi ai ma se manatu lelei e le au talavou lea tulaga.

E tele tausaga na faaalu e mātua e tausia ai a latou fanau. Na faia lenei mea i ni faataulagaina tetele i mea faaletino ma isi mea. Pe e iai la se mafuaaga e faia ai se faaiuga e faapea ua latou mananao ia lē fiafia olaga o a latou fanau talavou i le taimi nei? Pe lē sili atu ea ona lelei le manatu faapea, o le alofa ua uunaia ai nei mātua e puipuia a latou fanau ma tausia i latou? Pe e lē o le alofa lava ea lena atonu ua uunaia ai i latou e faia nisi o faasasaaga i a latou fanau, o ē o loo fesagai nei ma nisi o luʻi fou i le olaga? Pagā se lē alofa ma le lē loto faafetai o le faauiga sese o uunaiga a mātua pele!—Efeso 6:1-3.

O Tatou Uiga Faaalia i Uso Kerisiano

E toatele ua naunau e faamasinosino ma faia se faatulagaga o isi. Ae faapefea pe afai e ia i tatou sea uiga ma pei e foliga mai e iai ni tagata patino ua tatou masalosalo i ai? Pe e taaʻina ea i tatou i uiga o le lalolagi e tusa ai o lenei mea?

Mo se faaaoaoga, seʻi faapea o se tasi o o tatou uso faaleagaga, e iai sona fale manaia ma se taavale taugata. Pe tatau ea ona tatou vave faia se faaiuga e faapea, o ia o se tasi e manao tele i mea faitino, e na te lē o faamuamuaina i lona olaga mea tau i le Malo? O nisi Kerisiano atonu e mafai ona latou gafatia mea mananaia, ae e lē o le uiga o lena mea e faapea e iai ni o latou faanaunauga leaga pe e lē o “muai saili le Malo.” Atonu o loo pisi tele i latou i galuega faaleagaga, ma faaaogā ma le matamau a latou alamanuia faaletino e faaauiluma ai manaoga o le Malo, atonu e lē o faia i se auala fia faalialia.—Mataio 6:1-4, 33.

O le faapotopotoga Kerisiano i le uluai senituri, na faia aʻe i ituaiga o tagata eseese—o ē mauoa ma ē matitiva. (Galuega 17:34; 1 Timoteo 2:3, 4; 6:17; Iakopo 2:5) E lē fuaina e le Atua tagata e tusa ma o latou tulaga tau tamaoaiga, ma e lē tatau foi ona faapena i tatou. E tatau ona tatou alolofa i o tatou uso talitonu ua tofotofoina ma faamaonia, i le ‘ʻaua le faia se mea ma le faailoga tagata.’—1 Timoteo 5:21.

I lenei lalolagi o loo pulea e le mana o Satani, ua faia ai i auala eseese manatu sese ma le masalosalo. Mo se faaaoaoga, atonu ua manatu i se tagata e faapea e sauā ma manao tele i mea faitino i le na o le vaai atu i lona talaaga. Ae peitai, i le avea o ni Kerisiano, e lē tatau ona maileia ai i tatou i na manatu. I le faalapotopotoga a Ieova, e lē o se nofoaga mo manatu faailoga tagata ma le masalosalo. E manaomia e Kerisiano moni uma lava ona faataitai ia Ieova le Atua, o lē “e leai se amioletonu . . . po o se faailogaina o tagata.”—2 Nofoaiga a Tupu 19:7; Galuega 10:34, 35.

Ia Uunaia e le Alofa

Ua faapea manino mai le Tusi Paia, “ua agasala tagata uma lava, ma ua le oo i le viiga mai le Atua.” (Roma 3:23) O lea, e manaomia ona tatou manatu i o tatou uso tapuai e faapea o i latou ua aufaatasi ma i tatou i le taumafai e tuuina atu le auaunaga e talileleia mai e Ieova. Afai tatou te faatagaina le masalosalo po o isi faalogona sese e aafia ai la tatou faiā ma se uso po o se tuafafine faaleagaga, seʻi o tatou tatalo mo le fesoasoani a le Atua ia manumalo ai i sea uiga ina ia tatou lē paʻūū atu ai i le mailei a Satani. (Mataio 6:13) Sa ia faatalitonuina Eva e faapea, e iai uunaiga sese o Ieova, sa lē popole mo lona lelei, ma sa ia taofia le saolotoga lea o le a ia maua ai le fiafiaga moni. (Kenese 3:1-5) O lo tatou faauiga sese o uunaiga a o tatou uso, ua lagolagoina ai faamoemoega a Satani.—2 Korinito 2:11; 1 Peteru 5:8.

Afai e tatou te iloa ua iai ia i tatou le faauiga sese o uunaiga a isi, manatunatu i le faaaoaoga a Iesu Keriso. E ui lava o ia o le Alo o le Atua sa lelei atoatoa, ae sa lei sailia e ia ni uunaiga leaga i ona soo. Nai lo o lea, sa vaavaai Iesu i o latou uiga lelei. Ina ua fefinauai ona soo mo se tulaga o le fia muamua, sa lei manatu o ia e faapea e iai ni o latou uiga leaga ma toe suia ai i latou i nisi aposetolo fou se toʻa 12. (Mareko 9:34, 35) Ona o le lē lelei atoatoa, atonu sa taaʻina i latou i nisi auala i aganuu a Iutaia aposetate, i le faatāuaina o le loto fefete ma le faailoga tagata. Sa silafia e Iesu e faapea o le uunaiga autū i gaoioiga a ona soo, o lo latou alofa lea mo Ieova. I le faaalia o lea alofa ma le pipii atu ia Iesu, na matuā tele ai so latou taui.—Luka 22:28-30.

Afai tatou te vaavaai ma le masalosalo i o tatou uso talitonu, o le a tusa lea ma le pei e tatou te vaavaai atu i mea i se faʻata nenefu. E leai lava se mea e foliga saʻo mai e pei ona iai. O le mea lea, seʻi o tatou vaavaai atu e faaaogā ai le faʻata o le alofa. E tele faamaoniga ua iloa ai e alolofa uso Kerisiano faamaoni ia i tatou ma ua tatau ona tatou manatunatu ma le agalelei ia i latou. (1 Korinito 13:4-8) O lea, seʻi o tatou faaalia atu ia i latou le alofa, ma ia faaeteete i le faauiga sese o a latou uunaiga.

[Ata i le itulau 26]

E faapefea ona e vaai i isi o ē tapuai faamaoni i le Atua?

[Ata i le itulau 27]

O le fetalitonuai ma le faaaloalo ua avea ai Molimau a Ieova ma aiga fiafia e tasi