ʻLatou te Tausisi i a Latou Aʻoaʻoga Faalelotu’

NA TUSIA e se fafine mai Miami, Florida, i le Iunaite Setete o Amerika le tusi o loo mulimuli mai i se nusipepa i lona vaipanoa: “Na gaoia le ato tupe a laʻu tama mai le taga o lona ofu vae i le filī maketi i le aso 10 o Tesema. Na iai lona laisene ave taavale, pepa mo le Social Security, ma isi mea, faapea foi ma se tinoitupe e $260.

“Ina ua uma ona lipotia le mea na gaoia i le pule, ona sau ai lea o ia i le fale. Na telefoni mai i ai se fafine e tautala i le gagana Sepania i le afiafi, ma e ala i le fesoasoani a le [tagata tali telefoni] lea na avea ma sē e faaliliu, na taʻu atu i ai sa ia mauaina lana ato tupe.

“Na tuuina ane e le fafine lona tuatusi. . . . Na ia tuuina ane lana ato tupe, lea na i se tulaga lelei, e aofia ai ma le $260.

“Na ia vaaia le gaoi o tago atu i le ato tupe a laʻu tama ma na ia valaau atu i ai. Na faapaʻū e le gaoi le ato tupe ae alu i le atoa. O le taimi lena na lē toe iloa atu ai e le fafine laʻu tama, o lea na ia aveina ai le ato tupe i le fale ma telefoni mai ai.

“O ia ma lona aiga o ni Molimau a Ieova. E manino lo latou tausisi i a latou aʻoaʻoga faalelotu.”

E lē faaalia e Molimau a Ieova le faamaoni ina ia maua ai ni viiga mai tagata. (Efeso 6:7) Nai lo lea, e latou te naunau moni lava e viia lo latou Tamā faalelagi, o Ieova. (1 Korinito 10:31) Ua uunaia i latou e lo latou alofa mo le Atua ma o latou tuaoi ina ia folafola le “tala lelei” o le Malo o le Atua. (Mataio 24:14) E ala i le Malo, ua folafola mai e le Atua o le a faafouina le lalolagi ina ia avea ma se parataiso matagofie. O le a avea ai loa le lalolagi ma se nofoaga e lē gata e matagofie i le vaai, ae faapea ma le maoae o le tulaga lelei tau amio lea o le a faatumulia i le faamaoni e faavavau.—Eperu 13:18; 2 Peteru 3: 13.