Faiga Faalilolilo i le Suafa o le Alii

O SE osofaiga na faaaogā ai le kasa oona, na faia i le auala o nofoaafi i Tokyo, i Iapani ia Mati 1995, na maliliu ai tagata e toʻa 12, e faitau afe na mamaʻi ai, ma na fesoasoani foi lea e faaalia ai se mea lilo. O se vaega faalotu e taʻua o le Aum Shinrikyo (Supreme Truth) na latou faaputuputuina mālie faalilolilo se aofaiga tele o le kasa oona o le sarin ina ia faaaogā e faataunuuina ai ni sini faalilolilo.

I se masina mulimuli ane, na pa ai se pomu ma malepe ai se fale o le malo i le Aai o Oklahoma, i le Iunaite Setete, ma e toʻa 167 na maliliu ai. Ua faaalia i faamaoniga, e foliga mai o le osofaiga lea, atonu e fesootai atu ma le taofia e le malo o gaoioiga a se vaega faalotu e taʻua o le Branch Davidian i Waco, i Texas, ina ua atoa tonu lava i ai le lua tausaga. I lena taimi, na maliliu ai ni sui auai se toʻa 80 o le lotu. Na faaalia ai foi i le pa o le pomu se mea lilo e lei iloa e le toatele o tagata: E tele vaega faavaegaau ua faavaeina nei i le Iunaite Setete, ma o nisi o na vaega ua masalomia i le fuafuaina faalilolilo o se gaoioiga e tetee atu ai i le malo.

Mulimuli ane i lena lava tausaga, a o agaʻi ina faaiuina le 1995, na maua ai tino na susunuina o tagata e toʻa 16 i se togavao e latalata i Grenoble, i Falani. O i latou ia sa avea ma sui auai o se vaega faalotu toaitiiti o le Order of the Solar Temple, e faapea ia Oketopa 1994, na faasalalau mai ai i tala fou i Suisilani ma Kanata e faapea, e toʻa 53 sui o lea vaega faalotu na maliliu a lē o le pule i o latou lava ola, pe na fasiotia. Ae e ui lava ina ua mavae lenei mala, sa faaauau pea ona faagaoioia lea vaega faalotu. E oo mai i le asō, o loo tumau pea ona natia ona sini ma fuafuaga i faiga faalilolilo.

Le Matautia o Faiga Faalilolilo Faalotu

I le vaai atu i na mea na tutupu, po o se mea ea e ofo ai ona o le toatele o tagata o loo iai se loto masalomia i vaega faalotu? E mautinoa lava, e leai se tasi e manao e lagolagoina se faalapotopotoga faalilolilo—faalapotopotoga faalotu pe lē faalelotu—e faapea ona faaaogaseseina ai lona maufaatuatuaina ma faapogaia ai lona tuliloaina o ni sini e na te lē ioeina. O le ā la e mafai ona faia e tagata ina ia alofia ai le puʻea faamanu i ofaga i le mailei o le faaaafia i faalapotopotoga faalilolilo na e masalomia?

E mautinoa lava, o so o se tasi e manatu e fia avea o ia ma sui o se vaega faalilolilo, e lelei pe a faamautinoa e uiga i fuafuaga autū a lea vaega. E tatau foi ona leoleo faasaga i uunaiga mai uo ma ē masani, ma o filifiliga e fai, e tatau ona faavae e lē i faalogona ootia ae i mea moni. Ia manatua, o le tagata lava ia e masani ona aafia—ae lē o isi—o le a puapuagatia i iuga mulimuli e tulai mai.

O le mulimuli i mataupu silisili o le Tusi Paia, o le auala sili lea ona mautinoa e aloese ai mai i vaega matautia o loo latou faia gaoioiga e lē faamaoni. (Isaia 30:21) E aofia ai i lenei mea le tausisia o le solitu mai faiga faapolotiki, le faaalia o le alofa i isi, e oo lava i fili, ia aloese i “galuega a le tino,” ma ati ae fua o le agaga o le Atua. I mea uma lava, o Kerisiano moni e lē tatau ona avea o ni o le lalolagi, e oo lava ia Iesu sa lē avea ma so le lalolagi, ma e aofia ai i lenei auala le lē auai i sosaiete faalilolilo a le lalolagi.—Kalatia 5:19-23; Ioane 17:14, 16; 18:36; Roma 12:17-21; Iakopo 4:4.

O Molimau a Ieova, o ni tagata aʻoga faamaoni o le Tusi Paia o ē e matuā manatu mamafa i lo latou faatuatuaga ma taumafai e ola e tusa ai i le tulaga lautele. I le lalolagi aoao, e lauiloa i latou o tagata lotu e ‘saili le filemu ma tausisi i ai.’ (1 Peteru 3:11) Ua taʻua ma le saʻo ai i la latou tusi, Jehovah’s Witnesses—Proclaimers of God’s Kingdom e faapea: “O Molimau a Ieova, e lē o se sosaiete faalilolilo. O o latou talitonuga e faavae i le Tusi Paia o loo faamatalaina atoatoa i lomiga o loo mafai ona maua e so o se tasi. E lē gata i lea, e latou te faia se taumafaiga faapitoa e valaaulia tagata lautele e auai i a latou sauniga ina ia faalogo ma vāai i ai i latou lava i mea o faia ai.”

O le lotu moni e mautinoa e lē faia ai ni faiga faalilolilo. Ua uma ona faatonuina tagata tapuai o le Atua moni ina ia aua neʻi natia le faailoaina atu o i latou, pe taofia le faailoaina atu o a latou fuafuaga o ni Molimau a Ieova. Na faatumuina e uluai soo o Iesu Ierusalema i la latou aʻoaʻoga. Na faaalia atu i le lautele o latou talitonuga ma la latou galuega. E faapena foi i Molimau a Ieova i aso nei. Ma le malamalama lava, pe a faasaina e pulega tautalatasi ona o tuuaʻiga sese le saolotoga o le tapuaiga, e tatau i Kerisiano ona faia pea ma le atamai ma le loto tetele la latou galuega, i le usiusitai i le ‘Atua o le pule nai lo le usiusitai i tagata,’ o se tulaga ua uunaia malosi ai i latou ona o lo latou molimau atu ma le loto tetele i luma o le lautele.—Galuega 5:27-29; 8:1; 12:1-14; Mataio 10:16, 26, 27.

Afai e oo ia te oe se manatu faapea o Molimau a Ieova o se faiga faalotu faalilolilo po o se lotu mavae, atonu la ona o le laitiiti o sou silafia e uiga ia i latou. Atonu o le tulaga foi lena sa iai i le toatele o tagata i le uluai senituri.

Ua taʻu mai ia i tatou i le Galuega 28 e uiga i se talatalaga na faia e le aposetolo o Paulo i Roma ma “alii o Iutaia.” Na latou fai atu ia te ia: “A o lo matou manao nei, seʻi faalogo atu ia te oe i lou taofi; auā ua iloa e i matou ua talaeseina lena lotu i nuu uma lava.” (Galuega 28:16-22) I le tali atu a Paulo, “ua faamatala atu e ia, ma molitino atu i le malo o le Atua ia te i latou,” ma ua “talitonu foi nisi.” (Galuega 28:23, 24) E mautinoa lava o le mauaina o mea moni e faatatau i le Faa-Kerisiano moni, sa aogā ia i latou mo lo latou lelei e faavavau.

O le tuuina atu o i latou i le lautele ma i le auaunaga a le Atua e pei ona latou faia ai, o le a fiafia ai Molimau a Ieova e faailoa atu mea moni manino e uiga i la latou galuega ma talitonuga i so o se tasi e manao e fia iloa mea moni. Aisea e te lē suesue ai e oe lava ma iloa lelei ai e uiga i lo latou faatuatuaga?

[Ata i le itulau 6]

E fiafia lava Molimau a Ieova e faailoa atu po o ai i latou ma le mea o latou faia