Ieova—Le Atua o Lē Faaalia Mea ua Lilo

“O i ai le Atua i le lagi, o le na te faaalia mea ua lilo.”—TANIELU 2:28.

1, 2. (a) Ua faapefea ona ese Ieova mai i lona Fili sili? (e) Ua faapefea ona faaatagia mai e tagata lenei eseesega?

O IEOVA, o le Atua e silisili ma le alofa i le aoao o mea, ua na o ia Lē na Foafoaina Mea, o le Atua o le atamai ma le faamasinotonu. E lē tau natiaina po o ai o ia, o ana galuega, po o ana fuafuaga. I lana lava taimi ma i lana lava faautautaga, na te faaalia mai ai o ia. O le itu lenei ua ese ai o ia mai lona Fili, o Satani le Tiapolo, o lē o loo taumafai e nanā po o ai moni o ia ma ona faanaunauga.

² E pei lava ona tuufaafeagai Ieova ma Satani, ua faapena foi ona tuufaafeagai o la tagata tapuai. O i latou o loo mulimuli atu i le taitaiga a Satani ua iloagofie i le faagutugutulua ma le faapiopio. Latou te taumafai e faatagā foliga lelei mai i fafo, ae o loo latou faia galuega o le pogisa. Sa lapataia Kerisiano i Korinito ina ia aua neʻi ofo i lenei mea. “Auā o i latou, o aposetolo pepelo i latou, o le au faigaluega ʻoleʻole, ua liua i latou e i latou ma aposetolo a Keriso. E le se mea foi lea e ofo ai, auā o Satani lava, ua liua o ia e ia ma agelu o le malamalama.” (2 Korinito 11:13, 14) Ae i le isi itu, e vaavaai atu Kerisiano ia Keriso o lo latou Taʻitaʻi. A o soifua o ia i le lalolagi, sa atoatoa ona ia faaatagia maia uiga moni o lona Tamā, o Ieova le Atua. (Eperu 1:1-3) O le mulimuli atu la ia Keriso, ua faataitai atu ai Kerisiano ia Ieova, le Atua o le upu moni, o mea saʻo, ma le malamalama. E lē tau natia foi po o ai i latou, a latou galuega, po o a latou fuafuaga.—Efeso 4:17-19; 5:1, 2.

3. E mafai faapefea ona tatou faaleaogaina le tuuaʻiga faapea o tagata ua avea ma Molimau a Ieova sa faatauanauina faamalosi e auai atu i se “lotu lilo”?

³ E iai taimi pe a silafia e Ieova ua sili ona talafeagai, e na te taʻu mai ai auiliiliga o ana fuafuaga ma e faatatau i le lumanai lea sa lē iloa muamua e tagata. O le uiga lena ua avea ai o ia ma Atua o lē faaalia mai mea ua lilo. O lea, o tagata o ē fia auauna ia te ia ua valaauliaina—ioe ua uunaia—ina ia aʻoaʻoina na faamatalaga ua faaalia mai. I se sailiiliga na faia i le 1994 mo le silia i le 145,000 Molimau i se tasi atunuu o Europa na faaalia ai e faapea, i se tuu faatatauga, o i latou uma taitoatasi, e tusa ma le tolu tausaga sa latou iloiloina totino ai aʻoaʻoga a Molimau a Ieova a o latou lei filifili e avea ma Molimau. Sa latou faia le filifiliga mai lo latou lava lotomalie e aunoa ma se faatauanauina faamalosi. Ma sa faaauau pea ona latou saoloto i o latou manatu ma gaoioiga. Mo se faaaoaoga, talu ai sa iai nisi na lē malilie i tapulaa maualuluga o amioga tatau mo Kerisiano, na mulimuli ane ai filifili i latou nei e lē toe fia avea ma Molimau. Peitai, o le mea mālie, a o faagasolo tausaga e lima ua tuanai atu, sa iai se vaega tele o i latou nei na avea muamua ma Molimau na faia ni laasaga e toe auaufaatasi atu ai ma faia a latou galuega o ni Molimau.

4. O le ā e lē manaomia ona faaletonu ai Kerisiano faamaoni, ma aisea e lē tatau ai?

⁴ O le mea moni, e lē o i latou uma na muai avea ma Molimau na toe foi atu, ma e iai faatasi ia i latou na nisi sa iai i ni tulaga maufaatuatuaina i totonu o le faapotopotoga Kerisiano. E lē tatau ona faateʻia ai i lenei mea, auā na oo lava i se tasi o soo sa sili ona vavalalata ia Iesu, le aposetolo lea o Iuta, na ia toe liliu ese. (Mataio 26:14-16, 20-25) Ae pe o se mafuaaga ea lenei e tau faaletonu ai i le Faa-Kerisiano lava ia? Pe ua faalēaogā ai ea e lenei mea le taulau manuia o loo faataunuuina ai e Molimau a Ieova la latou galuega tau aʻoaʻoga? E matuā leai lava, e pei lava foi ona lē mafai e gaoioiga faalata a Iuta le Sekara ona taofia ai fuafuaga a le Atua.

E Alofa e Ui o Ia o Lē Ona le Malosi Uma Lava

5. E faapefea ona tatou iloa e alolofa Ieova ma Iesu i tagata, ma ua faapefea ona la faataitaia mai lenei alofa?

⁵ O Ieova o ia o le Atua o le alofa. E manatu alofa mai o ia i tagata. (1 Ioane 4:7-11) E ui i lona tulaga maualuga, ae e fiafia o ia e faauo mai i tagata. E faatatau i se tasi o ana auauna anamua, ua tatou faitau i ai e faapea: “Na faatuatua Aperaamo i le Atua, ona taʻua ai lea ia te ia e fai ma amiotonu; sa taʻua foi o ia o le uo a le Atua.” (Iakopo 2:23; 2 Nofoaiga a Tupu 20:7; Isaia 41:8) E pei ona fetufaʻi uo faaletagata i a latou mataupu faalilolilo, po o mea ua lilo, ua faapena foi ia Ieova ma ana uo. O le itu lenei ua faataʻitaʻi atu ai Iesu i lona Tamā, auā sa ia faauo atu i ona soo ma taʻu atu ia i latou mea ua lilo. Na ia fetalai atu ia i latou: “Ou te le toe taʻua outou o auauna, auā e le iloa e le auauna mea e faia e lona alii; a ua ou taʻua outou o uo, auā ua ou faailoa atu ia te outou mea uma na ou faalogo ai i loʻu Tamā.” (Ioane 15:15) O faamatalaga totino, po o “mea ua lilo,” ia na fetufaʻi ai Ieova, lona Alo, ma a la uo, ua autasia ai i latou i se fusi o le alofa ma le tuutoina atoatoa e lē mafai ona motusia.—Kolose 3:14.

6. Aisea e lē tau manaomia ai e Ieova ona natia ona faanaunauga?

⁶ O le uiga o le suafa Ieova, “O Ia Lava ua Mafua ai Ona Iai,” e faaalia ai lona tomai e faia ai so o se mea lava na te finagalo e iai ina ia mafai ona faataunuuina lana fuafuaga. I le lē pei o tagata, e lē tau manaomia e Ieova ona natia ona faanaunauga i se mataʻu ina neʻi mafai e isi ona taofia o ia mai le faataunuuina o na faanaunauga. E lē mafai ona lē taulau o ia, o lea na te faaalialia mai ai i lana Afioga, le Tusi Paia, le tele o mea ua ia fuafua e faia. Ua ia folafola mai: “E faapea foi laʻu upu . . . e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”—Isaia 55:11.

7. (a) O le ā na valoia e Ieova i Etena, ma na faapefea ona faamaonia e Satani le moni o le Atua? (e) Ua faapefea ona moni pea le mataupu silisili o loo i le 2 Korinito 13:8?

⁷ Ina ua faatoʻā mavae lava le fouvalega i Etena, na otooto ai ona faaalia mai e Ieova le taunuuga faaiu o le fefaloaiga faifai pea i lo la va ma lona Fili, o Satani. O le a fesagai le Fanau folafolaina a le Atua ma ni tiga o le tuimomomoina, peitai e lē tumau na tiga, ae o le a matuā puapuagatia Satani i se tuimomomoina e oti ai. (Kenese 3:15) I le 33 T.A., na tuimomomoina moni ai e le Tiapolo le Fanau, o Keriso Iesu, e ala i le faapogaia o lona maliu. O lenei auala, na faataunuu ai e Satani le mau ma o iina foi na faamaonia ai o Ieova o ia o le Atua o le upu moni, e ui lava e mautinoa sa lē o le faanaunauga lea o Satani. O lona ʻinoʻino i le upu moni ma le amiotonu, faapea ma lona uiga faamaualuga, ma le lē salamō, na iu ai i lona faia o le mea tonu lava na valoia e le Atua o le a ia faia. Ioe, ua moni le mataupu silisili i tagata uma o ē tetee i le upu moni, e oo lava ia Satani, e faapea: “Matou te le mafaia se mea e le tatau ma le upu moni, a o mea e tatau ma le upu moni.”—2 Korinito 13:8.

8, 9. (a) O le ā ua iloa e Satani, ae pe e taofiofia ai ea i lenei iloa le faataunuuina o fuafuaga a Ieova? (e) O le ā le lapataiga manino e lē o amanaia e i latou o ē tetee ia Ieova, ma aisea?

⁸ Talu ai sa faavaeina i se tulaga lē vaaia le Malo o le Atua i le 1914, ua faataunuu ai le Faaaliga 12:12: “O le mea lea ia outou olioli ai, le lagi e atoa ma e ua nonofo ai! Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” Peitai, po o le iloa ea o le saasaa o lona taimi, e faapogaia ai Satani e suia ona ala? O le a pei lena o se tautinoga mai a Satani e faapea o Ieova o ia o le Atua o le upu moni ma o le Pule e Silisili ona Maualuga, ua na o ia lava e tatau i ai le tapuaiga. Peitai ane, e lē o sauni le Tiapolo e taʻutino mai sona toilalo, e ui lava o lea ua ia iloa lenei mea moni.

⁹ Ua faaalia manino mai e Ieova le mea o le a tupu pe a afio mai Keriso e faaoo mai le faamasinoga i le faiga o mea o le lalolagi a Satani. (Mataio 24:29-31; 25:31-46) I lenei tulaga, ua faasilasila mai ai e lana Afioga e faatatau i pule o le lalolagi e faapea: “Pe a latou fai ane, ‘O loo filemu, ua le afaina [“saogalemu,” NW],’ ona oo lea ia te i latou o le fano faafuasei, faapei o le faatiga o le fafine to a fanau mai.” (1 Tesalonia 5:3) Ua faataligatuli i latou o loo mulimuli atu i le taitaiga a Satani i lenei lapataiga manino. Ua faatauasoina i latou ona o o latou loto ina leaga, ma ua taofia ai e lenei mea i latou mai le salamō i o latou ala leaga ma le suia o a latou fuafuaga ma ni taumafaiga e ono faalavelavea ai fuafuaga a Ieova.

10. (a) O le ā le tele atonu ua faataunuuina ai le 1 Tesalonia 5:3, ae e tatau faapefea ona tali atu i ai tagata o Ieova? (e) Aisea atonu o le a atili ai le lotoa o tagata lē faatuatua i le tetee atu i tagata o le Atua i le lumanai?

¹⁰ Ae maise lava talu mai le 1986, ina ua faalauiloa mai e Malo Aufaatasi le Tausaga Faavaomalo o le Filemu, sa tumu le lalolagi i talanoaga o le filemu ma le saogalemu. Ua faia ni laasaga maumaututū o ni taumafaiga e faamautuina ai le filemu o le lalolagi, ma e foliga mai sa iai sina taulau manuia. Pe o le faataunuuga atoatoa ea lenei o le valoaga, pe o loo tatou faatalitalia se faasilasilaga matilatila i le lumanai? O le a faamanino mai e Ieova lena mataupu i lana lava taimi tonu. Ae i le taimi nei, seʻi o tatou mataala faaleagaga, i le “faatalitali ma naunau atu ia aulia mai le aso o le Atua.” (2 Peteru 3:12) A o faagasolo pea le taimi ma le tele o isi talanoaga i le filemu ma le saogalemu, e iai ni tagata o ē ua latou iloa lenei lapataiga, ae o loo filifili e lē amanaia, atonu ua oo ina maaa o latou loto ma faapea o le a lē faataunuu pe e lē mafai ona faataunuu e Ieova ana fetalaiga. (Faatusatusa i le Failauga 8:11-13; 2 Peteru 3:3, 4.) Peitai ua iloa e Kerisiano moni o le a faataunuu lava e Ieova lana fuafuaga!

Le Faaaloalo Talafeagai mo Ē ua Faaaogaina e Ieova

11. O le ā na iloa e Tanielu ma Iosefa e faatatau ia Ieova?

¹¹ Ina ua faia e le tupu o Nepukanesa le pule o le Emepaea a Papelonia, se faalepo matautia sa lē mafai ona ia manatua, ona ia tāpā lea o se fesoasoani. Sa lē mafai e ana taulāitu, o vaafaatau, ma ē fai togafiti faataulāitu ona latou taʻu atu ia te ia lana faalepo, sa lē mafai foi ona latou faamatala atu le uiga. Ae peitai, o le auauna a le Atua, o Tanielu, sa mafai ona ia faia faapea, e ui sa ia taʻutino manino atu o le faaaliaina o le faalepo ma lona uiga sa lei maua mai i sona lava atamai. Na faapea atu Tanielu: “O i ai le Atua i le lagi, o le na te faaalia mea ua lilo, ma faailoa mai ia Nepukanesa le tupu o mea e oo mai i aso amuli.” (Tanielu 2:1-30) I ni senituri muamua atu, sa tupu ai foi ia Iosefa, o se isi perofeta a le Atua, se mea na ia iloa ai o Ieova o Lē Faaalia mea ua lilo.—Kenese 40:8-22; Amosa 3:7, 8.

12, 13. (a) O ai sa avea ma perofeta sili a le Atua, ma aisea ua e tali mai ai faapea? (e) O ai i aso nei o loo avea o ni “auauna . . . e tausi i upu lilo a le Atua,” ma e ao faapefea ona tatou manatu ia i latou?

¹² O le perofeta sili lava a Ieova na auauna i le lalolagi o Iesu. (Galuega 3:19-24) Na faamatala mai e Paulo: “O le Atua, na fetalai mai anamua i o tatou tamā e ala mai i perofeta, na auauaʻi mai i faiga eseese, a ua fetalai mai ia te i tatou i nei ona aso e gata ai e ala mai i le Alo, o le ua tofia e ia e fai mea uma lava mona tofi, na ia faia foi mea uma e ala ia te ia.”—Eperu 1:1, 2.

¹³ Sa fetalai atu Ieova i uluai Kerisiano e ala atu i lona Alo, o Iesu, o lē na ia faailoa atu mea ua lilo tauatua ia i latou. Na fetalai atu Iesu ia i latou: “Ua foaiina atu ia te outou ina ia outou iloa mea lilo o le malo o le Atua.” (Luka 8:10) Mulimuli ane ona talanoa atu lea o Paulo i Kerisiano faauuina i le avea o ni “auauna a Keriso, o auauna foi e tausi i upu lilo a le Atua.” (1 Korinito 4:1) I aso nei, o loo auauna ai pea Kerisiano faauuina i lena tulaga, ua latou faia aʻe ai se vasega o le auauna faamaoni ma le mafaufau lea ua faaauala mai ai i lana Vaega Pule le saunia o meaʻai faaleagaga i le taimi tonu. (Mataio 24:45-47) Pe afai tatou te matuā faaaloalogia perofeta faagaeeina a le Atua i aso anamua, ae maise lava le Alo o le Atua, pe ua lē tatau ea foi la ona tatou faaaloalo i le vaega o tagata o loo faaaogā e Ieova i aso nei i le faaalia mai o faamatalaga faale-Tusi Paia ia ua matuā talafeagai mo ona tagata i nei aso faigata?—2 Timoteo 3:1-5, 13.

Faaaliali Atu pe Faalilolilo?

14. O fea le taimi e tatau ai i Kerisiano ona faia ni gaoioiga i se auala faalilolilo, ma ua mulimuli ai i le faaaoaoga a ai?

¹⁴ Po o le faaaliali mai ea e Ieova ma le manino o mea ua uiga ai faapea e tatau i Kerisiano i mea uma ma i tulaga uma lava ona faaalialia so o se mea ua latou iloa? E mulimuli Kerisiano i le fautuaga a Iesu i ona aposetolo ina ia “atamamai pei o gata, a ia fifilemu e pei o lupe.” (Mataio 10:16) Pe afai e taʻu atu ia i latou e lē mafai ona latou tapuai i le Atua e pei ona faatonuina ai e o latou loto fuatia ifo, ona faaauau lea e Kerisiano le “anaana i le Atua,” auā ua latou iloa e leai se faalapotopotoga faaletagata ua iai se aiā e taofia ai le tapuaiga ia Ieova. (Galuega 5:29) Na faataitaia e Iesu lava ia le tonu ma le tatau o lenei mea. Tatou te faitau ai: “Ua mavae ia mea, ona femaliuai ai lea o Iesu i Kalilaia; auā e lei finagalo o ia e femaliuai i Iutaia, auā ua mananao tagata Iutaia e fia fasioti ia te ia. Ua latalata le tausamiga a Iutaia, o le tausamiga o fale apitaga. Ona fetalai atu ai lea o Iesu ia te i latou [ona uso moni o ē sa lē talitonu], . . . ‘O ae ia outou i lea tausamiga; ou te le alu ae nei i lea tausamiga, auā e lei oo mai oʻu po.’ Ua ia fetalai atu ia mea ia te i latou, a ua nofo pea o ia i Kalilaia. Ua o ae ona uso, ona maliu ae lea o ia i le tausamiga, e lei faaali, a e peiseai ua faalilolilo.”—Ioane 7:1, 2, 6, 8-10.

Pe Tatau Ona Taʻu Atu ni Mea pe Leai?

15. Na faapefea ona faaalia mai e Iosefa o le tausia o se mea ua lilo i nisi taimi ua avea o se faiga alofa?

¹⁵ I nisi tulaga, o le tausia faaliloliloina o se mataupu e lē gata ina atamai, ae o se faiga alofa foi. Mo se faaaoaoga, na faapeī le tali atu a Iosefa, le tamāfai o Iesu, ina ua ia iloa ua to Maria o lē sa ia fuafua e faaipoipo atu i ai? Tatou te faitau i ai: “O Iosefa foi lana tane o le tagata amiotonu ia, e lei loto foi o ia ina faamasiasi ia te ia i luma o tagata, ua ia manatu e faatea lemu ia te ia.” (Mataio 1:18, 19) Pagā se lē agalelei pe ana fai e faamasiasi ia te ia i luma o tagata!

16. O le ā le tiute tauave ua iai i toeaina, faapea ma isi uma tagata o le faapotopotoga, e tusa ai o mataupu faalilolilo?

¹⁶ O mataupu faalilolilo e ono faapogaia ai le masiasi po o ni tiga e lē tatau ona faaali atu i ni tagata e leai sa latou aiā e iloa ai. Ua teumau i mafaufau o toeaina Kerisiano lenei mea pe afai e tatau ona latou avatu ni fautuaga po o ni faamafanafanaga totino i ni uso Kerisiano pe oo foi i le aoaia o i latou ona o ni agasala matuia i luma o Ieova. E manaomia tele le taulimaina o nei mataupu i se ala faale-Tusi Paia; o le faaali atu o ni faamatalaga faalilolilo ia i latou e lē o aafia ai ua lē talafeagai ma o se lē alofa. E mautinoa lava, o le a lē taumafai tagata o le faapotopotoga Kerisiano e isuisu fua ina ia maua faamatalaga faalilolilo mai toeaina, ae o le a latou faaaloalogia le tiute tauave a toeaina o le faaliloina o ni mea faalilolilo. Ua taʻua i le Faataoto 25:9: “Ia fai la oulua finauga ma lē lua te tuaoi; a e aua le faaali atu le upu faalilo a le tasi tagata.”

17. Aisea o le tele lava o tulaga, e tausia ai faalilo e Kerisiano ni mataupu faalilolilo, ae aisea e lē mafai ai ona latou faia faapena i taimi uma?

¹⁷ Ua moni foi lenei mataupu silisili i totonu o le lio o le aiga, pe i le va o uo vavalalata. E matuā tāua le tausia faalilolilo o ni mataupu ina ia alofia ai le lē femalamalamai ma faaleagaina ai faigauo. “O le matagi mai le itu i matu e tupu ai uaga; ma le laulaufaiva faatuaupua e tupu ai mata ita.” (Faataoto 25:23) O le mea moni lava, o le faamaoni atu ia Ieova ma ana mataupu silisili, faapea ma le alofa i ē ua sese, atonu i nisi taimi ua talafeagai ai le taʻu atu i mātua, i toeaina Kerisiano, po o isi o ē ua iai le aiā, ni mea, e oo lava i ni mataupu faalilolilo.a Peitai i le tele lava o tulaga, e tausia ai faalilolilo e Kerisiano mataupu totino a isi, ina ia leoleomalu ai mataupu a na tagata e pei ona latou leoleomalu i a latou lava mataupu.

18. O ā uiga faa-Kerisiano e tolu e mafai ona fesoasoani ia i tatou e filifili ai po o ā mea e tatau ona tatou taʻu atu ma mea e lē tatau ona tatou taʻu atu?

¹⁸ I se aotelega, e faataitai atu se Kerisiano ia Ieova e ala i le tausia faalilolilo o ni mataupu patino pe a talafeagai, e faatoʻā faaali lava pe afai ua talafeagai ai. I le filifili po o ā mea e tatau ona ia taʻu atu ma mea e lē tatau ona ia taʻu atu, ua taitaia ai o ia e le lotomaulalo, le faatuatua, ma le alofa. O le lotomaulalo e taofia ai o ia mai le fia faalialia o sona lava tāua, i le taumafai e faaofo isi a lē i le taʻu atu i ai o mea uma o loo ia iloa, pe i le faaulaula atu ia i latou o ni tala o ni mea ua lilo e lē mafai ona ia taʻuina atu loa. O le faatuatua i le Afioga a Ieova ma le faapotopotoga Kerisiano e uunaia ai o ia e talaʻi atu faamatalaga tauatua ua saunia mai e le Tusi Paia, ae faaeteete ina ia alofia le tautala atu i ni mea e ono faatiga ai i isi i le uluai taimi lava. Ioe, o le alofa e uunaia ai o ia e taʻu saʻo atu ni mea e viiviia ai le Atua ma o mea e manaomia ona iloa e tagata ina ia maua ai le ola. Peitai, o mataupu totino faalilolilo, e na te lē faaali atu, i lona iloaina faapea, i le tele o tulaga, o le faaali atu o na mea e faaalia ai le leai o se alofa.

19. O le ā le gaoioiga e fesoasoani ina ia mataulia ai Kerisiano moni, ma o le ā e iu i ai?

¹⁹ O lenei faatulagaga paleni e fesoasoani lea ina ia mataulia ai Kerisiano moni. Latou te lē natia po o ai moni le Atua e pei o le lē faaaogaina o lona suafa pe faaaogā se aʻoaʻoga lilo e lē mafai ona faamatalaina o le Tolutasi. O atua e lē iloa ua mataulia ai lotu sese, ae lē o le lotu saʻo. (Tagai i le Galuega 17:22, 23.) E matuā talisapaia e Molimau faauuina a Ieova le faaeaga o le avea ma “auauna . . . e tausi i upu lilo a le Atua.” O le faaalialia manino atu o nei mea ua lilo i isi, ua latou fesoasoani ai e tataʻi atu ē loto faamaoni ia sailia se faauooga ma Ieova.—1 Korinito 4:1; 14:22-25; Sakaria 8:23; Malaki 3:18.

[Faaopoopoga i lalo]

Pe Faapefea Ona E Tali?

◻ Aisea e lē tau manaomia ai e Ieova ona natia ona faanaunauga?

◻ O ai e faaali atu i ai e Ieova ana mea ua lilo?

◻ O le ā le tiute tauave ua iai i Kerisiano e tusa ai o mataupu faalilolilo?

◻ O ā uiga e tolu o le a fesoasoani i Kerisiano e iloa ai po o ā mea e taʻu atu ma mea e lē tatau ona taʻu atu?

[Ata i le itulau 8, 9]

E faaalia e Ieova mea ua lilo e ala mai i lana Afioga