O Mea e Vaivai ai le Tagata e Faalauiloa ai le Mana o Ieova

“Sa manatu tagata uma o aʻu o se faifeau faataimi atoa fiafia ma le tiotio. Sa masani ona ou fesoasoani atu i tagata i o latou faafitauli. Ae ui i lea i le taimi e tasi, sa ou lagona ai e pei a nofo laʻu manava. O le lē toʻa o oʻu manatunatuga ma le faanoanoa o le mafaufau ua oo atu i sona tulaga e sili ona faigata mo aʻu. Sa amata ona ou faaesea mai tagata. Pau lava le mea sa ou manao ai e na o le nofo i loʻu aiga ma moe. Mo le tele o masina, sa ou tatalo ai ia Ieova ina ia ou oti.”—Vanessa.

E TUSA ai ma le tulaga o loo taʻua i luga, o se mea e masani ai auauna a Ieova i lo latou lagonaina i nisi o taimi aafiaga o le ola i “aso faigata.” (2 Timoteo 3:1) Atonu e lagonaina e nisi le faanoanoa. (Filipi 2:25-27) A oo ina faaumiumi, e mafai e lagona o le loto vaivai ona aveesea ai le malosi mai ia i tatou, auā ua taʻua faapea e le Tusi Paia: “Afai e te faavaivai i le aso vale, ua itiiti lava lou malosi.” (Faataoto 24:10) Ioe, pe a tatou faavaivai, e tatou te manaomia le malosi—atonu e pei ona taʻua e le aposetolo o Paulo “le matuā tele o le mana.”—2 Korinito 4:7.

O Ieova o ia o le puna o le malosi e lē uma. Ua faaalia lenei mea pe a tatou iloiloina lana foafoaga. (Roma 1:20) Seʻi o tatou manatu i le lā, e fai ma faataitaiga. E taofia e le lalolagi le susulu mai pea o le pe ā ma le 240 tiliona o le malosiaga mai le lā. Peitai, o lenei fuainumera e faaalia ai pe tusa lea ma le ʻafa o se piliona o le malosi o loo aumaia e le lā. Ae e laitiiti le lā pe a faatusatusa atu i isi fetu e matuā tetelē lava. O se tasi o ia fetu o Rigel, o se fetu i le faagasologa o fetu e fitu (Orion) i le itu i sisifo o le ekueta lea e faalimasefulu taimi e telē atu ai nai lo le tatou lā ma e na te aumaia le malosiaga e faaselau limasefulu afe taimi e sili atu ai nai lo le lā!

O Lē na Foafoaina na malosiaga faalelagi e tatau ona ia te ia le “tele o lona malosi.” (Isaia 40:26; Salamo 8:3, 4) O le mea moni, na taʻua e le perofeta o Isaia faapea o Ieova e “le vaivai o ia, e le tigaina foi.” Ma e naunau le Atua e tuuina atu lona malosi i so o se tasi o lē, ona o mea e vaivai ai le tagata, ua lagona ai ua latou faavaivai. (Isaia 40:28, 29) Na ia faia faapea e pei ona faataitaia mai i le mea na tupu i le aposetolo Kerisiano o Paulo.

Faafetaiaia o Tulaga Faigata

Sa taʻu atu e Paulo i tagata i Korinito le toʻatugā lea sa ia onosaia. Sa ia taʻua lea mea o le “mea matuitui i le tino.” (2 Korinito 12:7) O lenei “mea matuitui” atonu o se faafitauli o le soifua maloloina, atonu po o le leaga o le vaai. (Kalatia 4:15; 6:11) Pe atonu na faasino atu e Paulo i aposetolo pepelo ma isi au faavevesi o ē na luia lona tulaga faaaposetolo ma galuega. (2 Korinito 11:5, 6, 12-15; Kalatia 1:6-9; 5:12) Po o le ā lava le tulaga sa iai, ae o lenei “mea matuitui i le tino” na matuā faanoanoa loloto ai Paulo, ma sa ia tatalo ai pea ina ia aveesea.—2 Korinito 12:8.

Peitai, sa lei taliaina e Ieova le talosaga a Paulo. Nai lo lena, sa ia taʻu atu ia Paulo: “O loʻu nei alofa tunoa e lava lea e fesoasoani ia te oe.” (2 Korinito 12:9) O le ā na uiga i ai lenei fetalaiga a Ieova? Ia, pe a tatou mafaufau i le tulaga o Paulo i taimi ua tuanai i lona sauāina o Kerisiano, e na o le alofa tunoa lava sa mafai ai ona ia maua se faiā ma le Atua—ae lē taʻua ai lona auauna o se aposetolo!a (Faatusatusa i le Sakaria 2:8; Faaaliga 16:5, 6.) Atonu na fetalai atu Ieova ia Paulo ua “lava” le faaeaga o le avea ma soo. E lē ō atu faatasi ma le aveesea faavavega o faafitauli o le olaga. Ioe, o nisi o faigata atonu e oo mai ua māfua, ona o faaeaga ua faaopoopo atu. (2 Korinito 11:24-27; 2 Timoteo 3:12) Po o le ā lava le mea e tupu mai, e na o le pau lava le mea a Paulo e fai o le onosaia lea o “mea matuitui i le tino.”

E lē faapea ai sa tuulafoaia ma le lē alofa e le Atua Paulo. Nai lo lena, sa ia faapea atu ia te ia: “Auā o le vaivai e faaatoaina ai loʻu mana” (2 Korinito 12:9) Ioe, e tuuina atu ma le alofa e le Atua ia Paulo le malosi e faafetaiaia ai lona tulaga. O lea, o “mea matuitui i le tino” o Paulo ua avea ma lesona e taulai atu i ai. Sa aʻoaʻoina ai o ia e faalagolago i le malosi o Ieova nai lo o lona lava malosi. E manino le aʻoaʻoina lelei e Paulo o lenei lesona, ona i tausaga mulimuli ane sa ia tusi atu ai i tagata i Filipi: “Auā ua aʻoaʻoina aʻu ia toʻa filemu loʻu loto i mea ua ia te au. Ou te mafaia mea uma lava ona o ia ua faamalosi mai ia te au.”—Filipi 4:11, 13.

Ae faapefea oe? Po o e onosaia ea ni ituaiga o “mea matuitui i le tino,” atonu o se maʻi po o se tulaga o le olaga ua faapogaia ai le tele o popolega ia te oe? Afai o lea, e ao ona faamafanafanaina oe. Atonu o le a lē aveesea faavavega e Ieova toʻatugā, ae e mafai ona ia avatu ia te oe le poto ma le malosi e faafetaiaia ai a o e faaauau ona faamuamua manaoga o le Malo i lou olaga.—Mataio 6:33.

Afai o maʻi po o le tulaga matua ua māfua ai ona taofia oe mai le faataunuuina o le tele o mea sa e manao ai i galuega faa-Kerisiano, ʻaua le faanoanoa. Nai lo le vaai i lou faafitauli ua faaitiitia ai lau auaunaga ia Ieova, vaai i ona tala atu, o se avanoa e faateleina ai lou faalagolago ia te ia. Ia manatua foi, e lē fuaina le aogā o se Kerisiano i ana galuega, ae o lona faatuatua ma le loloto o lona alofa. (Faatusatusa i le Mareko 12:41-44.) O le alofa ia Ieova ma lou loto atoa o lona uiga o le auauna ia te ia i le mea sili e te mafaia—ae lē o le mea e mafaia e le isi tagata.—Mataio 22:37; Kalatia 6:4, 5.

Afai o le “mea matuitui i le tino” ia te oe o loo aafia ai tulaga pagatia o le olaga, e pei o le maliu o sē e pele, ia mulimuli i fautuaga a le Tusi Paia: “Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.” (Salamo 55:22) Sa faia faapea e se fafine Kerisiano e igoa ia Silivia. I totonu o se vaitaimi e na o ni nai tausaga le umi, na maliu ai lana tane ina ua mavae le 50 tausaga o le la faaipoipoga faapea foi ma le toaiva o isi tagata o le aiga—e aofia ai ma fanau laiti e toalua a a la fanau. Ua faapea mai Silivia: “Ana lē seanoa Ieova, semanu e lē mataofiofia loʻu faanoanoa. Ae ua ou maua le faamafanafanaga tele i le tatalo. O loo faaauau ona ou talanoa atu ia Ieova. Ua ou iloa e na te aumaia ia te au le malosi e faafetaiaia ai.”

Maeu le faalototeleina o le iloa e faapea “o le Atua foi e ana le faamafanafanaga uma” e mafai ona avatua i ē o faanoanoa le malosi e onosai ai! (2 Korinito 1:3; 1 Tesalonia 4:13) O le talisapaia o lenei mea, e mafai ai ona tatou malamalama i le faaiuga a Paulo i le mataupu. Sa ia tusi: “O lea ou te fiafia ai i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.”—2 Korinito 12:10.

Faafetaiaia o Tulaga o le Lē Lelei Atoatoa

O i tatou uma lava ua maua le lē lelei atoatoa ona o o tatou uluai mātua. (Roma 5:12) O le iuga, ua tatou tauivi ai faasaga i tuinanauga o le tino augavale. Pagā le lotovaivai e oo i ai i le iloa faapea o uiga o le “tagata tuai” e sili atu ona malosi lana taaʻiga ia i tatou nai lo le mea o loo tatou manatu i ai! (Efeso 4:22-24) I na taimi atonu tatou te lagona ai e pei o le aposetolo o Paulo, o lē sa tusi faapea: “Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foi aʻu ma tagata o taua i le tulafono a le agasala o loo i oʻu tino.”—Roma 7:22, 23.

O iinei foi, e mafai ona tatou faaaogā lelei ai le malosi mai ia Ieova. Pe a tauivi ma se vaivaiga totino, ʻaua lava le taofia le liliu atu ia te ia i le tatalo, ia maumauai e sailia lana faamagaloga e tusa lava po ua faafia ona e alu atu ia te ia ma le faafitauli lava lea e tasi. Ona o lona alofa tunoa, o Ieova o ia “na te fuatia loto” ma o ia e na te silafiaina le loloto o lo tatou faamaoni aʻiaʻi, o le a ia aumaia ia te oe se loto fuatia ifo mamā. (Faataoto 21:2) E ala i lona agaga paia, e mafai ona aumaia e Ieova mo oe le malosi e toe faaauau ai i le taua faasaga i vaivaiga o le tino.—Luka 11:13.

E tatou te manaomia foi le malosi mai ia Ieova i le feagai ai ma lē lelei atoatoa o isi. Mo se faaaoaoga, atonu e “soona tautala, e pei o tutuʻi i le pelu” se uso Kerisiano ia i tatou. (Faataoto 12:18) E mafai ona matuā faatiga ai i tatou, ae maise lava pe afai e sau mai se tasi e tatou te lagona e na te iloa lelei o se mea sese le faia faapea. Atonu e tatou te matuā lē malie ai lava. O nisi ua oo lava ina faaaogā na ituaiga o faatigaloto e fai ma faamolemolega o le alu ese mai ia Ieova—o se mea e silisili atu ona sese!

Peitai, o se uiga paleni lelei o le a fesoasoani ia i tatou e vaai ai i vaivaiga o isi i se malamalamaga saʻo. E lē mafai ona tatou faatalitalia le lelei atoatoa mai tagata lē lelei atoatoa. “E leai se tagata e le agasala,” ua faamanatu mai ai ia i tatou e le tagata poto o Solomona. (1 Tupu 8:46) O Afa, o se Kerisiano faauuina sa auauna ma le faamaoni ia Ieova mo le fitusefulu tausaga, na ia matauina: “O mea e vaivai ai o tatou uso a auauna e ati ae ai ia i tatou tulaga e faamaoni ai, tofotofoina ai lo tatou malosi faa-Kerisiano. Afai tatou te faatagaina mea o tautala ai, po o faia e tagata e faalavelavea ai lo tatou auauna ia ia Ieova, ua tatou auauna la i tagata. E lē gata i lea, o loo alolofa foi o tatou uso ia Ieova. Afai e tatou te vaai i ni lelei o ia i latou, o le a lē pine ae tatou iloaina e lē o ni tagata leaga i latou.”

Le Malosi e Talaʻi Ai

A o lei afio Iesu i le lagi, sa taʻu atu e Iesu i ona soo: “O le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema, ma Iutaia uma lava, ma Samaria, e oo lava i le tuluʻiga o le lalolagi.”—Galuega 1:8.

Ua moni ai upu a Iesu, o lenei galuega ua tauaveina nei e Molimau a Ieova i le 233 atunuu i le lalolagi atoa. I lona aotelega, ua latou faaalu ai le sili atu i le piliona itula i tausaga taitasi e fesoasoani ai i isi ia iloa lelei Ieova. O le faataunuuina o lenei galuega e lē faigofie i taimi uma. I nisi o atunuu ua taofia ai le galuega talaʻi po o le faatapulaaina. Ia mafaufau foi, o i latou o loo faia le galuega—o tagata e lē lelei atoatoa, e vaivai, o i latou taitoatasi ua tofu ma o latou lava faafitauli ma popolega. Peitai ua faaauau pea le galuega, ma o le iuga, i tausaga e tolu ua mavae, e sili atu i le miliona tagata ua tuuina atu o latou ola ia Ieova ma faailoa lo latou tuuina atu e ala i le papatisoina i le vai. (Mataio 28:18-20) O le mea moni o lenei galuega ua faataunuuina i le na o le malosi lava o Ieova. Sa fetalai Ieova e ala i le perofeta o Sakaria: “E le o le fitafita, e le o le malosi, a o loʻu Agaga.”—Sakaria 4:6.

Afai o oe o se tagata talaʻi o le tala lelei, ua faia la sau vaega—e lē afaina pe a foliga mai e itiiti—i lena faataunuuga tele. E ui lava i ‘mea matuitui’ lea e tatau ona e onosaia, e mafai ona faamautinoaina oe e faapea o Ieova o le a ia lē faagaloina a “outou galuega ma le alofa ua outou faaali mai ai i lona suafa.” (Eperu 6:10) O lea ia faaauau ona faalagolago atu i le Puna o le malosi uma mo le lagolagosua. Manatua, e na o le malosi lava o Ieova e mafai ai ona tatou onosai; o o tatou vaivaiga e faaatoaina ai lona mana.

[Faaopoopoga i lalo]

[Ata i le itulau 26]

O le galuega talaʻi ua faataunuuina i le na o le mana lava o Ieova