Po o ia te Oe “se Mea Matuitui i le Tino”?
1 Tatou te matuā faanaunau ina ia faataunuuina lo tatou tofiga e talaʻi le tala lelei i le lelei e gata ai lo tatou tomai. Ae peitai, o le toatele o o tatou uso ma tuafāfine pele, ua latou iloa le faigata ona faia atoatoa se sao ona o maʻi tugā o le tino, po o ni mea foi ua faaletonu ai le malosi, ua faafaigata ai ona faia ni mea se tele e pei ona latou mananao ai. Atonu o le a avea o se luʻi ia i latou le taumafai e feagai ai ma faalogona o le lotovaivai, ae maise lava pe a latou vaai atu i isi o matuā tiotio i le faiva.—1 Kori. 9:16.
2 O se Faaaoaoga e Faataitai i Ai: Sa tauivi le aposetolo o Paulo ma “se mea matuitui i le tino.” Sa faatolu ona ia faatoga atu ia Ieova ina ia aveesea le toatuga matuitui, lea na ia faamatalaina e faapea o “le agelu a Satani” sa tuʻi atu pea ia te ia. Peitai, e ui lava i lena mea, sa tumau pea Paulo ma agaʻi atu i luma i lana faiva. Sa lei faalogologo tiga o ia pe faitio i aso uma. Sa ia faia le mea aupito sili ona lelei na ia mafai. O le auala sili na taulau ai i le feagai ma lenei mea, o le faamautinoaga lea mai le Atua: “O loʻu nei alofa tunoa e lava lea e fesoasoani ia te oe; auā o le vaivai e faaatoaina ai loʻu mana.” Na avea le vaivai o Paulo ma malosi ina ua ia taumafai e talia lona tulaga ma faalagolago ia Ieova ma le agaga paia ina ia tumau ai.—2 Kori. 12:7-10.
3 Le Auala e Mafai ai Ona E Tumau: Po o avea ea ni vaivaiga faaletagata ma mafuaaga e faatapulaa ai lau auaunaga i le Atua? Afai o lena, ia faataitai i le vaaiga a Paulo. E tusa lava pe foliga mai ua lē maua se vaifofo tumau o lou maʻi po o ni faaletonu o le tino i lenei faiga o mea, e mafai lava ona tuu atu lou faatuatua atoatoa ia Ieova, o lē e silafia lelei mea o loo e manaomia ma o le a ia foaiina mai ‘le malosi e sili atu nai lo o le malosi masani.’ (2 Kori. 4:7) Ia faaaogā lelei le fesoasoani lea ua faaavanoa mai ia te oe e ala i le faapotopotoga, ae lē o lou vavae ese mai ai. (Faata. 18:1) Afai e faafaigata ia te oe ona faia se sao i le galuega mai lea fale i lea fale, ia vaavaai mo ni auala aogā e molimau lē fuafuaina atu ai pe molimau atu i le telefoni.
4 E ui lava o se mea matuitui i le tino atonu e taofia ai mea e mafai ona e faia i le faiva, aua lava neʻi ia te oe le manatu faapea e leai sou aogā i le faiva. I le pei o Paulo, e te mafaia foi ona “molitino atu le tala lelei o le alofa tunoa o le Atua,” i le faia lea o mea ua mafaia e lou malosi ma ou tulaga ona faia. (Galu. 20:24) A o e faia taumafaiga ina ia faataunuuina lau faiva, ia e iloa o loo matuā faafiafiaina ai Ieova.—Epe. 6:10.