Mai le Taulau Manuia o ni Tagata Aʻoga e Oo Atu i le Avea ma Misionare e Taulau Manuia
“E LĒ o talitonuina pea e loʻu loto lenei faaeaga sa matou maua!” o le faamatalaga maofa lea a Uili, i lona faasino atu i le aʻoga sa faatoʻā la faamaeʻaina ma lana avā o Patsy, i lo la avea ma ni tagata aʻoga o le vasega lona 103 a le Aʻoga Faale-Tusi Paia a le Olomatamata o Kiliata. Sa ioeina foi e Zahid ma Jeni. Fai mai a laʻua: “O se faaeaga mo i maʻua le iai iinei. Sa suesue ma le maelega tagata uma i le aʻoga. O lenei la ua latou naunautai e amata la latou galuega o ni misionare. Ae muamua lava, i le polokalame o le faauuga sa faia ia Setema 6, 1997, na latou mauaina ai ni fautuaga alofa o le a fesoasoani ina ia latou taulau manuia ai i o latou tofiga faamisionare.
O Theodore Jaracz sa avea ma taitaifono o le polokalame, o ia o se sui o le Vaega Pule. Na ia taʻua faapea—e lē gata i le aiga Peteli ma sui mai lālā e 48 a le Sosaiete o le Olomatamata—ae sa auai foi uo ma aiga mai Europa, Iunaite Setete, Puerto Rico, ma Kanata, ina ia faamautinoa mai i le au aʻoʻoga la latou lagolagosua ma lo latou alofa. Sa taʻua e le uso o Jaracz faapea, o misionare ia e aauina atu e lotu o Kerisinetoma e masani lava ona tosina ese mai a latou galuega faamisionare ae amata saili atu mo nisi fuafuaga e maualuluga atu po o le oo lava ina lapelapea i faiga faapolotiki. E ese mai ai tagata faauu o Kiliata, auā latou te faia le mea sa toleniina ai i latou e fai. Latou te aʻoaʻo atu le Tusi Paia i tagata.
Ona talanoa lea o Robert Butler, o ia e mai le ofisa o le Sosaiete i Brooklyn, i le matua “Ia Faataulauina Manuia Ou Ala.” Sa ia faamatala e faapea, a o fuaina e tagata le taulau manuia i tulaga o tupe po o isi meatotino, peitai o le mea e sili ona tāua o le auala o loo fua ai e le Atua le taulau manuia. Sa taulau manuia le faiva a Iesu, e lē ona o le toatele o tagata sa ia faaliliuina, ae ona o lona faamaoni i lona tofiga. Sa avatu e Iesu le mamalu ia Ieova, ma ia tumau ma le lē ponā mai le lalolagi. (Ioane 16:33; 17:4) O mea nei e mafai e Kerisiano uma lava ona fai.
“Ia Avea ma Pologa i Tagata Uma,” o le fautuaga lena mai ia Robert Pevy, o lē sa avea muamua ma misionare i le Atu Filipaina. Sa avea le aposetolo o Paulo o se misionare na taulau manuia. O le ā le ki i lona taulau manuia? Sa avea o ia ma pologa i tagata uma. (1 Korinito 9:19-23) Na faamatala mai e le failauga: “O se tagata faauu a Kiliata e iai lena uiga o le a ia lē manatu i le auaunaga faamisionare faapea o se siitiaga i se galuega, o se tulaga e laa atu ai i nisi tofiga tāua i totonu o le faalapotopotoga. E na o le tasi lava le faanaunauga e alu atu ai se misionare i lona tofiga—ina ia auauna, auā o le galuega lena e fai e pologa.”
I le faavae aʻe o ana fautuaga e faaautū i le 2 Korinito mataupu e 3 ma le 4, na timai mai ai Gerrit Lösch o le Vaega Pule i le au aʻoʻoga ina ia “Avea o ni Faʻata e Faaāta Atu le Mamalu o Ieova.” Na ia faamanatu ia i latou faapea, o le poto e uiga i le Atua ua pei o se molī o loo faamalamalamaina se Kerisiano pe afai e tatala atu lona loto ma taliaina. Tatou te toe faasusulu atu lena malamalama e ala i le talaʻiina o le tala lelei ma le tausisia o amioga lelei. Na ia taʻutino mai: “E iai taimi atonu tou te manatu ai ua lē o lava saunia i tatou. Pe a oo ane na lagona, ia faalagolago atu ia Ieova, ‘ina ia i le Atua le matuā tele o le mana.’” (2 Korinito 4:7) I le toe taʻua o upu a Paulo o loo faamauina i le 2 Korinito 4:1, na aioi atu ai le uso o Lösch i le au aʻoʻoga: “Aua lava neʻi tou faamaamulu mai o outou tofiga faamisionare. Ia faaiila pea a outou faʻata!”
O Karl Adams, o se tasi o faiaʻoga o Kiliata, sa ia talanoa i le matua mataina “O Fea Ieova?” E lē o faasino atu le fesili, i le afioaga o le Atua i le lagi, ae o loo faasino atu i le manaoga ina ia manatunatu i le silafaga a Ieova ma mea o loo atagia mai ai lana taitaiga. Na ia taʻua: “Pe a fesagai ma mafatiaga, e oo lava i se tagata ua autausagā o auauna ia Ieova, e mafai ona galo ia te ia le silafaga a Ieova.” (Iopu 35:10) Ae faapefea i o tatou aso nei? I le 1942, sa manaomia ai e tagata o le Atua se taitaiga. Pe na faaiuina ai ea le galuega talaʻi, pe sa tele atu nisi galuega sa ao ona faia? O le ā le finagalo o Ieova sa iai mo ona tagata? A o latou suesueina le Afioga a le Atua, na oo ina manino mai le tali. Na faailoa mai e le uso o Adams: “A o lei iu lena tausaga, ae ua uma ona faataatitia fuafuaga mo le Aʻoga Faale-Tusi Paia a le Olomatamata o Kiliata.” E mautinoa lava le faamanuia e Ieova o le galuega a misionare sa aauina atu e lena aʻoga.
O Mark Noumair, o le faiaʻoga lona lua lea na lauga. I lana lauga, sa faamatuaina “O le a Faapefea Ona E Faaaogaina Lau Taleni?” sa ia faalaeiauina ai le au aʻoʻoga ina ia faatatauina le toleniga ua latou maua mai Kiliata, i le taimi lava e taunuu ai i o latou tofiga fou. Na ia taʻua: “Ia outou pulunaunau e faaalia lagona naunau fiafia atu i isi. Ia naunau i tagata ma a latou agaifanua. Ia naunautai e iloa a latou tū masani, le talafaasolopito, mea e mālie i tagata o lena atunuu. O le vave tou te aʻoaʻoina ai le gagana, o le faigofie foi lena ona tou faamasani atu i o outou tofiga.”
Ua Maua e Tagata Aʻoga Maelega le Olioli i le Faiva
E lē gata i lo latou uaʻi atu i a latou suesuega a o iai i Kiliata, ae sa tofia atu foi le au aʻoʻoga i faapotopotoga e 11 sa iai i lena vaipanoa. I faaiuga o vaiaso, sa faia ai so latou sao maelega i le galuega talaʻi. Sa valaaulia e Wallace Liverance, o se faiaʻoga o Kiliata, nisi o i latou e faamatala atu i le aofia ni mea na tutupu ia i latou. Sa manino mai lo latou olioli a o faamatala mea na latou fetaiai a o molimau atu i nofoaga o faleoloa, i pākaga o taavale, i oganuu o pisinisi, i alatetele, ma le galuega mai lea fale i lea fale. O nisi o i latou sa saili mo ni auala e talanoa atu ai i tagata e ese gagana e tāutala ai, o ē na nonofo ma faigaluega i le oganuu a la latou faapotopotoga. A itiiti mai e sefulu suesuega faale-Tusi Paia i aiga na amata ma faia e i latou mai le vasega lona 103, i totonu o le lima masina o la latou aʻoga.
Tufa Mai e Misionare ua Leva Auala o lo Latou Taulau Manuia
Ina ua maeʻa lenei vaega fiafia o le polokalame, ona valaaulia lea e Patrick Lafranca ma William Van de Wall ni sui se toafitu o Komiti o Lālā ina ia otooto mai ni lesona sa latou aʻoaʻoina mai i o latou tofiga faamisionare ina ia aogā mo le vasega. Sa latou fautua mai i le au faauu ina ia manatu i lo latou tofiga faamisionare o se mea na foaiina mai e Ieova, ma ia maumauai e pipii atu i le tofiga. Sa latou taʻua āuga aogā na iai i le galuega i isi atunuu ona o le iai o misionare sa aʻoaʻoina mai Kiliata.
O le ā na fesoasoani i nei sui o Komiti o Lālā e auauna ai pea mo le faitau fiasefulu o tausaga o ni misionare fiafia, ma le fua tele mai? Talu ai sa latou galulue vavalalata ma uso i a latou oganuu ma aʻoaʻoina ai ni mea mai ia i latou. Sa latou uaʻi atu i le aʻoaʻoina o le gagana i le taimi lava na latou taunuu ai i o latou tofiga. Sa latou aʻoaʻo ina ia fetuutuunai ma faamasani atu i tū masani a le atunuu. O Charles Eisenhower, o se tasi na faauu mai le uluai vasega a Kiliata ma e 54 tausaga o avea ma misionare, sa ia taʻu mai ni ‘ala se lima’ ua aʻoaʻoina e misionare o loo taulau manuia: (1) Suesue e lē aunoa le Tusi Paia, (2) aʻoaʻoina le gagana, (3) ia faia se vaega tiotio i le faiva, (4) taumafai e faatupuina le filemu i totonu o le aiga misionare, ma le (5) tatalo e lē aunoa ia Ieova. Sa maofa le au aʻoʻoga e lē gata i fautuaga aogā ua latou mauaina ae o le olioli ua manino mai sa mauaina e nei misionare agavaa i le auaunaga a Ieova. E pei ona faaupu mai e Armando ma Lupe, “e fiafia i latou a o latou talanoa e uiga i o latou olaga.”
Ina ua maeʻa faatalatalanoaga, ona totoe ai lea o le lauga e tasi. Sa filifilia e Albert Schroeder, o se sui o le Vaega Pule, lana matua “O Auauna Tausimea Faamaoni o le Afioga a le Atua ua Faaalia Mai ai Oa Tautele o le Upu Moni.” Talu ai o le Tusi Paia o le tusi aʻoga autū lea a le Aʻoga o Kiliata, sa naunau atu ai le au aʻoʻoga i mea na ia taʻua. Sa faasino mai e le uso o Schroeder e faapea ina ua amata galuega i le New World Translation of the Holy Scriptures i le 50 tausaga talu ai, sa lei saili atu sui faauuina o le Komiti Faaliliu o le Tusi Paia a le Lalolagi Fou (New World Bible Translation Committee) mo se faamaoniga mai tagata ae sa latou faalagolago atu i le taitaiga a le agaga paia. (Ieremia 17:5-8) Peitai, talu ai nei lava, ua mataulia ai e nisi tagata i tulaga taualoa le maualuga o le tulaga o loo iai le New World Translation. I se tusi na auina atu i le Sosaiete, na tusi atu ai se tasi tagata e aʻoga i mataupu faale-Tusi Paia e faapea: “Ou te iloagofie lava le lomiga e aogā i laʻu vaai i ai, ma ua faia e la outou ‘Komiti Faaliliu o le Tusi Paia a le Lalolagi Fou’ se galuega e sili ona lelei.”
Ina ua maeʻa lenei lauga, ona tauaaoina atu loa lea i le au aʻoʻoga o latou tusipasi, ma sa faasilasila atu foi i le aofia o latou tofiga. O se taimi lea o lagona ootia mo tagata uma o le vasega. A o lauina mai e se sui o le vasega se tusi o lo latou agaga talisapaia, sa matuā ootia lagona faafetai o le toatele ma maligi o latou loimata. O nisi o le au aʻoʻoga ua leva tausaga o latou sauniuni mo le galuega faamisionare. Talu ai sa iloa e faafoeina aʻoaʻoga i Kiliata i le gagana Peretania, e iai nisi sa tatau ona see atu i faapotopotoga e tāutala i le gagana Peretania ina ia faaleleia ai lo latou faaaogaina o le gagana. O isi sa see atu i nofoaga sa sili ona manaomia ai ni paeonia, a lē i vaipanoa i o latou lava atunuu pe i nisi vaipanoa atu i fafo. Ae o isi foi, sa latou sauniuni e ala i le faitau i tala o mea tutupu, faia ni sailiiliga, po o le matamata soo i le kaseti vitiō a le Sosaiete, To the Ends of the Earth.
O Uili ma Patsy, lea na taʻua i le amataga o le mataupu, sa matuā faagaeetia i laʻua i le naunau totino na faaalia e le au aʻoʻoga. “O tagata sa matou lei masani sa latou fusi mai ia i maʻua ma tapue o ma ata. Sa matou lūlūlima ma se sui o le Vaega Pule ma na ia faapea mai, ‘Ua avea outou o se mitamitaga ia i matou!’” Ma le mautinoa lava, sa matuā alofagia le au aʻoʻoga o le vasega lona 103. Sa lelei ona toleniina i latou. O aʻoaʻoga ua latou maua mai Kiliata o le a mafai ai ona latou faia le suiga mai ni tagata aʻoga taulau manuia e oo atu i le avea ma ni misionare e taulau manuia.
[Pusa i le itulau 22]
Faamaumauga o le Vasega
Aofai o atunuu o loo iai o latou sui: 9
Aofai o atunuu ua tofia i ai: 18
Aofai o tagata aʻoga: 48
Aofai o ulugalii: 24
Faatatauga o tausaga: 33
Faatatauga o tausaga i le upu moni: 16
Faatatauga o tausaga i le faiva faataimi atoa: 12
[Ata i le itulau 23]
Vasega Faauu Lona 103 o le Aʻoga Faale-Tusi Paia a le Olomatamata o Kiliata
I le lisi i lalo, o laina e amata mai i luga agaʻi i tua, ma o igoa e lisi mai le itu agavale i le itu taumatau i laina taitasi.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Ata i le itulau 24]
O fea lo ta tofiga?