Faaolaina i se Taimi o Mala
O LE faleoloa fogafale lima i Seoul, Korea e faatau ai le tele o oloa eseese na faafuasei lava ona masofa i lalo, ma puea ai faamanu i ofaga i totonu le faitau selau o tagata! Sa galulue ai i le ao ma le po le au faigaluega laveai ina ia faasaoina le toatele e mafai ai. A o mavae atu aso, na amata ai ona tauau ina mou atu le faamoemoe o le toe sailia o nisi tagata ola o loo tanumia ai i lalo o faupuega o simā ma uamea.
A o tauāu lava ina mavae atu le faamoemoe, na tupu ai se mea e faateia ai. Na faalogoina ai se tagi o se leo vāivai mai i lalo o faupuega o mea na faaleagaina. Na vave lava ona ʻeli ma le popole e le au faigaluega laveai i o latou lima le faupuega o mea na faaleagaina ina ia faasaoina mai se tamaitai talavou e 19 tausaga, o lē na tanu ola i lalo o faupuega o mea na faaleagaina mo le umi e 16 aso. O se uamea lapotopoto o se lifi na faaleagaina, na avea ma puipuiga mo ia, ma puipuia ai o ia mai le anoanoai o ogā simā na toulu ifo i ona luga. E ui ina iai i se tulaga leaga ona sa lē lava se vai i lona tino ma sa faamanualia, ae na sao o ia mai le oti!
I aso nei, e tau lē ʻasa se masina ma ni tala e uiga i ni mala na tutupu, a lē o se mafuie, o se afā matautia, le pasae aʻe o se mauga mū, o se faalavelave faafuasei, po o se oge. Ma o ni tala mataina e uiga i galuega laveai ma ni faasaoina, na matuā maofa ma faateia ai le faitau miliona o tagata o ē faitau, matamata ma faalogologo i tala fou. Ae peitai, o le lapataiga e uiga i se mala o loo sau—o se mala e sili mamao atu nai lo se isi lava mala na tupu i le talafaasolopito—ua tele lava ina lē amanaiaina. (Mataio 24:21) Ua faamatalaina e le Tusi Paia lenei mala o loo fotuai mai i upu nei: “Faauta, e alu atu le malaia e afua i le tasi nuu e oo atu i le tasi nuu, e tupu mai le afā tele mai tuluiga o le lalolagi. O le fasi a Ieova i lea aso e afua mai i le tasi pito lalolagi e oo atu i le tasi pito lalolagi; e leai ni e taufaitagituʻi ia te i latou, e le aofia i latou, e le tanumia foi i latou; e fai i latou ma otaota i luga o le laueleele.”—Ieremia 25:32, 33.
O ni upu e faateia ai! Ae e lē pei o mala ma faalavelave faafuasei e masani ai, o lenei mala o le a lē o se faatamaiaga e lē faavasegaina. O le mea moni, o le faasaoina—o lou faasaoina—e mafai!
O se Taimi Faanatinati
Ina ia iloaina atoatoa le uiga o lenei mea moni, e tatau ai i se tasi ona muai malamalama i le mafuaaga o le a oo mai ai lenei mala i le lalolagi aoao. O le mea moni, ua na o lea le vaifofo moni i faafitauli o le fanau a tagata. E toaitiiti lava ni tagata i aso nei o loo lagona le malupuipuia ma le saogalemu. E ui lava i taumafaiga e sili ona lelei faasaienisi, ae o loo faaauau pea ona pepesi atu faamaʻi matautia i tagata i le lalolagi. O taua ua māfua ona o feeseeseaiga faalotu, ituaiga, ma faapolotiki, ua faaumatia ai le faitau afe o tagata. Ua faaopoopo atu i ai ma oge i tulaga pagatia ma mafatiaga o tane, fafine, ma tamaiti e lē sala. O le paʻū maulalo o tulaga tau amio ua ōia ai le faavae moni o le sosaiete; e oo lava i tamaiti, ua amio faapiopio.
Ua faamatalaina ai ma le matuā saʻo aʻiaʻi e se valoaga i le Tusi Paia na tusia e sili atu i le 1,900 tausaga ua mavae lo tatou tulaga. Ua faapea mai le valoaga: “E tatau ona e iloa, o aso e gata ai, o le a tumu i mea matautia.”—2 Timoteo 3:1, The New Testament in Modern English, a J. B. Phillips; faatusatusa i le Mataio 24:3-22.
Pe e talafeagai ia te oe le manatu e faapea, e iai se Atua alofa e lē o manatu mamafa mai i o tatou mafatiaga? Ua faapea mai le Tusi Paia: “O Ieova, o le na faia le lagi; o ia lava o le Atua; o le tufuga o le na faia le lalolagi; . . . na ia le faia fua, na ia faia ina ia āina.” (Isaia 45:18) Ioe nai lo o le faatagaina o lenei paneta matagofie e faaleagaina, ma faaumatia ai mea ola uma o aināina, o le a faalaa ane le Atua e laveaiina. O le fesili la e faapea, O le a faapefea ona ia faia o lenei mea?
Ia Filifili i le Ola!
Ua tali mai le Tusi Paia i le Salamo 92:7: “A tupu olaola o e amio leaga e pei o le vao iti, a fuga mai foi i latou uma o e fai mea leaga, e faapea i latou ina ia faaumatia e oo i le faavavau lava.” O le vaifofo a le Atua mo faafitauli i le lalolagi, o le faaumatiaina lea o tagata amioleaga. E fiafia lava, ona e lē o le uiga o lenei mea e faapea, e manaomia ona faaumatia tagata uma lava. Ua faamautinoaina i tatou e le Salamo 37:34: “Ia e faatalitali ia Ieova, ma e tausi i lona ala; ona faaeaina lea o oe e ia ina ia fai mou le nuu; e te iloa atu le fanoga o e amio leaga.”
Ua faaalia i nei upu e faapea, e iai se avanoa e faasaoina ai mai lenei mala sili ona matautia o le a oo mai i le fanau a tagata. Ua tuuina mai e le Atua ia i tatou se filifiliga. Ua faapena foi ona fetaui mo i tatou i aso nei upu na faamafanafana atu ai Mose i le nuu o Isaraelu a o sauniuni e ulu atu i le Nuu o le Folafolaga e faapea: “Ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau.” (Teuteronome 30:19) Ae pe e faapefea i se tasi ona “filifili i le ola” ma faaolaina ai? O le ā tonu lava le uiga o le faaolaina moni?
[Ē Ana le Ata i le itulau 2]
COVER: Explosion Copyright © Gene Blevins/Los Angeles Daily News
[Ata i le itulau 3]
Yunhap News Agency/Sipa Press