Ia Faaeteete i Aʻoaʻo Pepelo!
“O le a iai foi ia te outou o aʻoaʻo pepelo.”—2 PETERU 2:1, NW.
1. O le ā na faanaunau Iuta e tusi faatatau i ai, ae aisea na sui ai lana mataupu?
PAGĀ se mea e faateia ai! Sa iai ni aʻoaʻo pepelo i le faapotopotoga Kerisiano i le uluai senituri! (Mataio 7:15; Galuega 20:29, 30) Sa iloa e le ʻafa uso o Iesu o Iuta lenei mea na tupu aʻe. Na ia taʻua faapea sa iai lona faanaunauga e tusi atu i ona uso talitonu e faatatau “i le faaolataga ua tuu tele,” peitai sa ia faamatala: “Ua tatau . . . ona ou tusi atu ia te outou, e apoapoai atu ia outou faamalolosi ona finau mo le faatuatua.” Aisea na sui ai e Iuta lana mataupu e talanoaina? Auā na ia faapea mai, “ua o ane faaleiloga o isi tagata [i totonu o faapotopotoga] . . . ua liua e i latou le alofa tunoa o lo tatou Atua i le faamatāitu [“amioga lē taupulea,” NW].”—Iuta 3, 4.
2. Aisea ua tali tutusa ai le 2 Peteru mataupu e 2 ma le Iuta?
2 E foliga mai, na tusi upu a Iuta ina ua faatoʻā uma lava ona tusia e Peteru lana tusi lona lua. E lē masalomia sa masani lelei Iuta ma lenei tusi. E mautinoa la, e tele ni mafaufauga tali tutusa ua ia faaalia mai i lana lava tusi malosi o timaiga. O le mea lea, a o tatou iloiloina le 2 Peteru mataupu e 2, o le a tatou matauina ai le tali tutusa atu i le tusi a Iuta.
Iuga o Aʻoaʻoga Pepelo
3. O ā mea na tutupu anamua ua faapea mai Peteru o le a toe tutupu foi?
3 Ina ua uma ona faalaeiau atu Peteru i ona uso ina ia uaʻi atu i valoaga, ua ia faapea atu: “Sa i ai foi i le nuu [i Isaraelu anamua] o perofeta pepelo, e pei ona i ai ia te outou, o aʻoaʻo pepelo.” (2 Peteru 1:14–2:1) Sa maua e tagata o le Atua i aso anamua valoaga moni, peitai sa tatau foi ona latou tetee atu i aʻoaʻoga leaga a perofeta pepelo. (Ieremia 6:13, 14; 28:1-3, 15) Na tusi mai Ieremia: “Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo.”—Ieremia 23:14.
4. Aisea ua talafeagai ai ona faaumatia aʻoaʻo pepelo?
4 I le faamatalaina o mea o le a fai e aʻoaʻo pepelo i totonu o le faapotopotoga Kerisiano, ua faapea mai Peteru: “Latou te faatupuina faalilolilo o vaevaega e fano ai, ma latou faafiti i le Alii [Iesu Keriso] na ia faatau mai ia te i latou, o i latou lava e oo mai ai ia i latou le malaia e vave mai lava.” (2 Peteru 2:1; Iuta 4) O le iuga mulimuli lava o lena faiga vaega i le uluai senituri, lea ua faapogai mai ai Kerisinetoma e pei ona tatou iloa i aso nei. Ua faaalia e Peteru le mafuaaga e matuā talafeagai ai ona faaumatia aʻoaʻo pepelo: “E toatele foi latou te mulimuli atu i tuinanau vale o o latou tino; ona o i latou e upuleagaina ai le ala o le upu moni.”—2 Peteru 2:2.
5. O ā mea na tuuaʻia ai aʻoaʻo pepelo?
5 Manatu i le mea lenei! Talu ai le aafiaga mai aʻoaʻo pepelo, e toatele i latou i faapotopotoga o le a aafia i amioga lē taupulea. O le upu Eleni ua faaliliuina “amioga lē taupulea” e faaalia ai le leai o ni taofiofiga tau i amioga tatau, le leai o se puleaina o lagona ma manatu, le matuā lē pulea o amioga, le amioleaga, o amioga e faia ma le lē mā. Na muai taʻua e Peteru o Kerisiano na “sosola ese . . . i le amio leaga o i le lalolagi i le tuʻinanau.” (2 Peteru 1:4) Peitai na iai nisi sa toe foi atu i na amioga leaga, ma na sili ona tuuaʻia ai aʻoaʻo pepelo i faapotopotoga ona o na mea! O lea na faalumaina ai le ala o le upu moni. Pagā le faanoanoa! E mautinoa lava, o le mataupu lenei e tatau i Molimau a Ieova uma i aso nei ona uaʻi totoʻa atu i ai. E lē tatau lava ona tatou faagaloina, o la tatou amio e faalagolago i ai, pe mafai ona tatou aumaia le viiga ia Ieova le Atua ma ona tagata po o le faalumaina ai o i latou.—Faataoto 27:11; Roma 2:24.
Le Faaofi Mai o Aʻoaʻoga Sese
6. O ā mea ua uunaia ai gaoioiga a aʻoaʻo pepelo, ma ua faapefea ona latou saili ina ia maua mea o loo latou mananao ai?
6 Ia tatou matauina ma le atamai le auala e faaofi mai ai e aʻoaʻo pepelo o latou mafaufauga leaga. Ua muai taʻua e Peteru faapea, e latou te faia faalilolilo, pe i se auala e lē lauiloa, e iloagata. Ua ia fai mai atili: “O le matapeapea foi i a outou mea, ua latou faavalea ai outou i upu pepelo.” O faanaunauga manatu faapito ua uunaia ai gaoioiga a aʻoaʻo pepelo, e pei ona faamamafa mai i le faaliliuga a le Jerusalem Bible: “O le a latou taumafai ma le naunautai e faatauina outou mo i latou e ala i faamatalaga faatosina.” E faapena foi le faaliliuga a James Moffatt lea o loo faapea mai: “O o latou tuʻinanau o le a latou faavalea ai outou e ala i finauga taufaasese.” (2 Peteru 2:1, 3) O faamatalaga faasausili a aʻoaʻo pepelo atonu e foliga manaia i se tasi e lē o mataala faaleagaga, peitai o a latou upu ua matuā fuafua lelei ina ia “faatauina” mai ai tagata, e faatosina mai ai i latou e auauna atu mo fuafuaga manatu faapito a le au taufaasese.
7. O le ā le filosofia na taatele i le uluai senituri?
7 E lē masalomia, sa taaina aʻoaʻo pepelo o le uluai senituri e mafaufauga faalelalolagi na iai i lena vaitaimi. E tusa o le vaitaimi na faia ai tusitusiga a Peteru, sa taatele ai se filosofia na taʻua o aʻoaʻoga a le au Gnostic (Gnosticism). Sa talitonu tagata Gnostic e faapea o mea uma lava e leaga, ae na o le mea o loo fesootai i le agaga o le tagata e lelei. O lea, na faapea mai nisi o i latou e lē afaina po o ā mea e faia e le tagata i lona tino faaletino. Na latou finau mai, o le a oo ina lē toe iai i le tagata lenei tino. O le mea lea, sa latou faapea ai, o agasala o le tino—e aofia ai faiga faaleituaiga—e lē tāua. E foliga mai, o na manatu sa amata ona taaina ai nisi o ē na faapea mai o loo iai i le Faa-Kerisiano.
8, 9. (a) O le ā le manatu sese na aafia ai nisi o uluai Kerisiano? (e) E tusa o le faamatalaga a Iuta, o ā mea na faia e nisi i faapotopotoga?
8 Na taʻua e se tasi tagata suesue o le Tusi Paia e faapea, “sa iai nisi i le Ekalesia o ē na latou faaleagaina le aʻoaʻoga o le alofa agalelei,” po o le “alofa tunoa.” (Efeso 1:5-7) E tusa o le faamatalaga a lea tagata, o le auala lenei na finau mai ai nisi: “Pe tou te faapea mai ea o le [alofa tunoa] o le Atua e matuā lava lona telē e ufiufi ai agasala uma? . . . Seʻi o tatou faia pea la le agasala, auā e mafai e le [alofa tunoa] o le Atua ona soloiesea agasala uma. O le mea moni o le tele lava o lo tatou agasala o le tele foi lea o avanoa o le a maua e faatinoina ai le [alofa tunoa] o le Atua.” Pe ua e faalogo muamua ea i ni manatu e sili ona sese nai lo lena manatu?
9 Sa tetee le aposetolo o Paulo i mafaufauga sese ia na fai e faatatau i le alofa mutimutivale o le Atua ina ua ia fesili: “Tatou te nonofo pea ea i le agasala, ina ia faatele ai le alofa tunoa?” Na ia fesili foi: “Tatou te agasala ea, ina ua tatou le nonofo i le tulafono, a o le alofa tunoa?” I ia fesili taitasi na matuā faamamafa ai le tali a Paulo: “Aua neʻi faapea.” (Roma 6:1, 2, 15) E manino mai, e pei ona taʻua e Iuta, sa iai nisi na “liua e i latou le alofa tunoa o lo tatou Atua i le faamatāitu [“amioga lē taupulea,” NW].” Peitai ane, ua taʻua e Peteru faapea, o i latou na, “o lo latou malaia foi e le moe lea.”—Iuta 4; 2 Peteru 2:3.
O Faaaoaoga Lapatai
10, 11. O ā faaaoaoga lapatai e tolu ua aumaia e Peteru?
10 Ina ia faamamafa le manatu o le a gaoioi le Atua e taui ma sui i ē faia mea sese ma le loto i ai, ua aumaia ai e Peteru ni faaaoaoga lapatai se tolu mai le Tusi Paia. Muamua, ua ia tusi mai: “Na le faasaoina e le Atua le au agelu o e na agasala.” O i latou nei ua taʻua e Iuta, “na le taofi i lo latou mamalu, a ua tuua e i latou le mea sa latou nofo ai” i le lagi. Na ō mai i latou i le lalolagi a o lei oo mai le Lolo ma faia ni o latou tino faaletino ina ia mafai ona faia ni feusuaiga ma afafine o tagata. O le faasalaga mo a latou amioga lē tatau, ma le lē faalenatura, sa lafoina ai i latou i “Tartarus,” pe, e pei ona taʻua i le tala a Iuta, na “taofia e ia [o i latou] i noanoataga faavavau i lalo o le pogisa, seia oo i le faamasinoga o le Aso tele.”—2 Peteru 2:4; Iuta 6; Kenese 6:1-3.
11 Ua sosoo ai ma le faasino atu o Peteru i tagata i aso o Noa. (Kenese 7:17-24) Ua ia faapea mai i taimi o Noa, sa “lei faasaoina foi [e le Atua] le lalolagi tuai . . . ina ua au mai le lolo i le lalolagi faalematau.” I le faaiuga, ua tusi ai Peteru e faapea, ua faataatia e le Atua se “faailoga i e faalematau i aso amuli” e ala i le ‘olopalaina o aai o Sotoma ma Komoro ina ia lelefu.’ Ua aumai e Iuta ni faamatalaga atili e faapea o na tagata sa “faitaaga pei o i latou, ma mulimuli atu i tuinanau ese o le tino.” (2 Peteru 2:5, 6; Iuta 7) E lē gata sa faia e tamaloloa feusuaiga lē mamā ma fafine, ae sa tuʻinanau atu foi i le faia o feusuaiga ma isi tamaloloa, e foliga mai sa oo lava ina tuʻinanau atu i le faia o feusuaiga ma manu.—Kenese 19:4, 5; Levitiko 18:22-25.
12. E tusa o le faamatalaga a Peteru, e faapefea ona tauia amio e tonu?
12 Peitai, i le taimi lava e tasi, ua taʻua ai e Peteru faapea o Ieova o lē na te tauia mai i latou o loo auauna ma le faamaoni ia te ia. Mo se faaaoaoga, ua ia faamatala mai le auala na ‘faasaoina ai e le Atua Noa, o lē talaʻi le amiotonu, faatasi ma le isi toafitu’ ina ua Ia aumaia le Lolo. Ua ia taʻu mai foi le faasaoina e Ieova o le ‘tagata amiotonu o Lota’ i le taimi o Sotoma, i lona faaiu mai faapea: “Ua silafia e le Alii [Ieova] se mea e laveai mai ai i e amio Atua ai le tofotofoga, a e taofi i e amio leaga e oo i le aso faamasino ina ia faasalaina i latou.”—2 Peteru 2:5, 7-9.
O Gaoioiga ua Talafeagai i ai le Faasalaga
13. O ai ua tuu faapitoa mo le faamasinoga, ma o ā miti e foliga mai sa faafiafiaina ai i latou?
13 Ua faamatilatila mai e Peteru i latou o ē ua tuu faapitoa mo le faamasinoga a Ieova, i le taʻua mai, o “i latou o e mulimuli atu i la le tino i le tuʻinanau i le fia ulavale, ma latou taʻufaatauvaa i le pule.” E toetoe lava mafai ona tatou lagonaina le matuā ita o Peteru a o ia faapea mai: “Ua faamalosi, ua finau vale, ma ua le fefe ona upu leaga i e ua mamalu.” Ua tusi mai Iuta e faapea o “ia tagata moemiti, latou te faaleaga le tino . . . ma upu leaga i e ua mamalu.” (2 Peteru 2:10; Iuta 8) Atonu o loo latou moemiti i mafaufauga faivavale i faiga lē mamā faaleituaiga, na e uunaia atili ai lo latou saili atu mo le faamalieina i faiga lē mamā faaleituaiga. Ae i le ā le itu o loo latou “taʻufaatauvaa [ai] i le pule” ma “upu leaga i e ua mamalu”?
14. I le ā le itu e “taʻufaatauvaa [ai] i le pule” ma “upu leaga i e ua mamalu” ia aʻoaʻo pepelo?
14 Latou te faia faapea e ala i lo latou ʻinoʻino i le tulaga pule ua tofia e le Atua. O toeaina Kerisiano ua fai ma sui o Ieova le Atua ma lona Alo o ē ua faamamaluina, ma ona o lea, ua tuuina atu ai foi ia i latou nei se mamalu. E moni, latou te faia mea sese e pei ona sa faia foi e Peteru, peitai ua faalaeiauina e le Tusi Paia tagata o le faapotopotoga ina ia gauai atu i na tagata o ē ua mamalu. (Eperu 13:17) E lē avea o latou vaivaiga ma mafuaaga e upu leaga ai ia i latou. Ua faapea mai Peteru o agelu “e le molimau lava [i aʻoaʻo pepelo i] se upu leaga,” e ui ina e matuā talafeagai le faia faapea. Ona faaauau mai lea o upu a Peteru: “A o i latou nei, faapei o mea ola e tutupu ma le le o i ai se mafaufau, na faia ina ia puea ma fasimatea, latou te faifai i mea latou te le iloa, e fano lava i latou.”—2 Peteru 2:10-13.
“Ina o Fai Faigaai . . . Faatasi ma Outou”
15. O ā auala e faaaogā e aʻoaʻo pepelo, ma o fea o loo agaʻi atu i ai a latou faatosinaga?
15 E ui ina manatu nei tagata amioleaga “o le mea e fiafia ai le sololelei i le ao” ma “o ila i latou ma mea e pona ai,” ae o i latou foi o ni ē amioleaga faananā. Latou te gaoioi “faalilolilo,” i le faaaogaina o “upu pepelo,” e pei ona taʻua e Peteru i le taimi ua mavae. (2 Peteru 2:1, 3, 13, LT) O lea atonu e lē o matuā matilatila mai lo latou luʻia o taumafaiga a toeaina ina ia faasilisilia tapulaa a le Atua i amioga tatau, latou te lē soona faaalialia foi a latou sailiga mo o latou lava faamaliega i faiga faaleituaiga. Nai lo lea, ua faapea mai Peteru, ua matuā faaseseina i latou i le “sololelei lava i o latou lava faasese, ina o fai faigaai i latou faatasi ma outou.” Ma ua tusi mai Iuta: “O papa i latou i o outou faigaai alofa.” (Iuta 12) Ioe, e pei lava ona mafai e papa maamaai i lalo o le sami ona tuʻia ai le taʻele o le vaa ma iu ina malelemo ai ni seila e lē o mataala, sa faapena foi i aʻoaʻo pepelo ona latou faaleagaina i latou sa lē mataala, o ē sa latou faatagā faafoliga alofa atu i taimi o “faigaai alofa.”
16. (a) O ā “faigaai alofa,” ma o ā faatasitasiga tali tutusa atonu o loo gaoioi ai foi ē amio lē mamā i aso nei? (e) O ai lea o loo uaʻi atu i ai aʻoaʻo pepelo, o le ā la e tatau ona faia e i latou na?
16 O nei “faigaai alofa” e foliga mai o faatasiga faasamasamanoa ia sa faatasitasi ai Kerisiano o le uluai senituri ina ia olioli i a latou faigaai ma auaufaatasiga. I aso nei, e iai foi nisi taimi e faatasitasi ai faasamasamanoa Molimau a Ieova, atonu i ni aiga o faaipoipoga, ni tafaoga, po o se faatasitasiga i se afiafi. E mafai faapefea e tagata amioleaga ona faaaogā na faatasiga e faaseseina ai nisi? Ua tusi mai Peteru: “Ua tutumu o latou mata i le . . . mulilua . . . latou te maileia tagata ua le faatumauina.” E matuā uaʻi atu o latou “loto ua masani i le matapeapea” i tagata e lē o mautū lelei faaleagaga o ē ua lē taulau ona latou faatāuaina atoatoa le upu moni. O lea, ia avea ma lapataiga le mea na tupu i aso o Peteru, ma ia mataala! Ia teena so o se faatosinaga lē mamā e aliae, ma ia aua neʻi faavaleaina i le momosi ma le aulelei mai faaletino o se tasi o loo faia mai ni faatosinaga i amioga lē mamā!—2 Peteru 2:14.
“Le Ala o Palaamo”
17. O le ā “le ala o Palaamo,” ma na faapefea ona aafia ai le toʻa 24,000 o tagata Isaraelu?
17 O i latou nei ua “faafanoina” ua fai si umi o se taimi sa latou iloa ai le upu moni. Atonu latou te faafoliga mai pea o loo maelega i le faapotopotoga. Peitai ua faapea mai Peteru: “Ua tuua e i latou le ala tonu, ua sese i latou, ua mulimuli atu i le ala o Palaamo le atalii o Peoa, o le na manao i le totogi o le amioletonu.” (2 Peteru 2:14, 15) O le ala a le perofeta o Palaamo o le fautuaina lea o se ala o faatosinaga lē mamā ina ia maua ai sona lava lelei. Na ia taʻu atu i le tupu Moapi o Palako e faapea, o le a faamalaiaina e le Atua Isaraelu pe afai e mafai ona maileia tagata e faia le faitaaga. O le iuga, na faaseseina le toatele o tagata o le Atua e fafine Moapi, ma e toʻa 24,000 na fasiotia ona o a latou amioga lē mamā.—Numera 25:1-9; 31:15, 16; Faaaliga 2:14.
18. Sa faapeī le maumauai o Palaamo, ma o le ā le iuga ua faaatagia mai ai mo aʻoaʻo pepelo?
18 Ua taʻua e Peteru faapea sa faatautū Palaamo ina ua tautala atu lana asini ia te ia, peitai sa matuā “manao [Palaamo] i le totogi o le amioletonu,” lea e ui lava na taunuu lena mea, ae sa lē taofia ai le faaauau pea i lona ‘ala valea.’ (2 Peteru 2:15, 16) Pagā se amioleaga! Talofa e, i so o se tasi e pei o Palaamo, o lē taumafai e faaleagaina tagata o le Atua e ala i le faatosina o i latou e faia amioga lē mamā! Na oti Palaamo i lana amioleaga, o se ata foi lea o le mea o le a tupu i ē uma o loo mulimuli atu i lona ala.—Numera 31:8.
A Latou Faatosinaga Faatiapolo
19, 20. (a) O ai e faatusatusa atu i ai ē pei o Palaamo, ma aisea? (e) O ai o loo latou maileia, ma e faapefea? (i) Aisea e mafai ai ona tatou faapea atu o a latou faatosinaga e faatiapolo, ma e mafai faapefea ona tatou puipuia i tatou lava ma isi mai ia i latou na?
19 I le faamatalaina o ē pei o Palaamo, ua tusi ai Peteru: “O punavai [po o vaieli] i latou e le o i ai se vai, o ao ua lelea i le afā.” A o iai i le toafa se tagata faimalaga ua matuā galala i le fia inu, e na o le oti e iu i ai pe afai e iai se vaieli ae o loo matutu. E lētioa la ona “tuu . . . le pogisa o le pouliuli” mo i latou o ē ua faaatagia mai i na mea! Ua faapea mai atili Peteru: “Auā o loo tautala i latou i upu faasausili ma le le aoga, latou te maileia i tuʻinanau o le tino ma le faamatāitu o e na matuā sosola ese i e ua nonofo ma le sese.” Latou te faaseseina tagata e lē o lava so latou tomai, e ala i le “folafola atu ia te i latou le saʻolotoga,” ae, ua faapea mai Peteru “a o i latou lava ua fai ma pologa o le amio leaga.”—2 Peteru 2:17-19; Kalatia 5:13.
20 E faatiapolo faatosinaga a na aʻoaʻo leaga. Mo se faaaoaoga, atonu latou te faapea mai: ‘Ua silafia e le Atua lo tatou vaivai ma le lolo gofie atu i tuinanauga o le tino. O lea afai tatou te faafiafiaina i tatou ma faamalie o tatou tuʻinanauga faaleituaiga, o le a alofa mutimutivale mai le Atua. Afai tatou te tautino a tatou agasala, o le a ia faamagaloina i tatou e pei ona ia faia ina ua faatoʻā tatou ō mai i le upu moni.’ Ia manatua e tai faapena foi le auala na faalatalata atu ai le Tiapolo ia Eva, i le folafola atu i ai faapea, e mafai ona ia agasala ae aunoa ma le faasalaina. I le tulaga o Eva, na ia faapea atu o le agasala i le Atua e faamalamalamaina ma faasaoloto ai o ia. (Kenese 3:4, 5) Pe a teʻi ua tatou iloa se tagata amioleaga faapena o loo auaumea faatasi ma le faapotopotoga, ua ia i tatou se avega tauave e puipuia ai i tatou lava faapea ma isi, e ala i le lipotia atu o lena tagata i ē o loo iai lena tiute tauave i totonu o le faapotopotoga Kerisiano.—Levitiko 5:1.
Ua Puipuia e le Poto Saʻo
21-23. (a) O ā iuga o le lē taulau ona faatatauina le poto saʻo? (e) O le ā le isi faafitauli o loo talanoaina e Peteru o le a sosoo ona iloiloina?
21 Ua faaiu e Peteru lenei vaega o lana tusi i lona faamatalaina o iuga o le lē taulau ona faatatauina le poto lea na ia muai taʻua e matuā tāua i le “ola ma le amio Atua.” (2 Peteru 1:2, 3, 8) Ua ia tusi mai: “Auā afai na latou sosola ai mea leaga a le lalolagi ina ua iloa lelei [“e ala i le poto saʻo,” NW] o le Alii o le Faaola lea o Iesu Keriso, a e toe faalavelaveina, ma toilalo i latou i na mea, ona tele ai lea o le leaga o lo latou iuga i lo latou amataga.” (2 Peteru 2:20) Pagā se faanoanoa! O na tagata i aso o Peteru sa latou lafoaia le faamoemoe tautele o le olaga faalelagi e lē mafai ona oti, talu ai le fia faamalieina mo sina taimi puupuu i manaoga faaleituaiga.
22 Ona faapea mai lea o Peteru: “E lelei pe a na latou le iloa le ala o le amiotonu, a e leaga ina ua latou iloa, ma toe liliu ese i le poloaiga paia sa tuuina mai ia te i latou. A ua taunuu ia te i latou le upu faataoto moni, Ua toe foi le ulī i lona lava puaiga; i le ma lea, O le puaa na faataeleina ua toe foi ia e taafili i le palapala.”—2 Peteru 2:21, 22; Faataoto 26:11.
23 O se isi faafitauli e foliga na amata ona aafia ai uluai Kerisiano sa talitutusa ma le faafitauli lea o loo aafia ai foi nisi i aso nei. I tuā iina, e manino mai sa faitio nisi e faatatau e foliga ua lē oo le faatasi mai o Keriso lea na folafolaina. Seʻi o tatou tilofaia le auala na talanoaina ai e Peteru lenei mataupu.
E te Manatua?
◻ O ā faaaoaoga lapatai e tolu ua sii mai e Peteru?
◻ Ua faapefea e aʻoaʻo pepelo ona latou “taʻufaatauvaa i le pule”?
◻ O le ā le ala o Palaamo, ma ua faapefea ia i latou o loo mulimuli atu i ai, ona taumafai e faaseseina isi?
◻ O ā iuga o le lē taulau ona faatatauina le poto saʻo?
[Ata i le itulau 16, 17]
Ua avea Palaamo o se faaaoaoga lapatai