Lipoti a Ē Faalauiloa le Malo

Foia Luʻi i “le Atunuu e Faateia Ai”

NA FESILI atu le aposetolo o Paulo i Kerisiano i uluai-senituri i Korinito e faapea: “Auā foi a faaletonu le leo o le pu, o ai ea se na te sauni e tau! E faapea foi outou, afai tou te le sauniuni atu i o outou laulaufaiva ni upu matala, e iloa ea faapefea le upu ua tautala aʻi?”—1 Korinito 14:8, 9.

I Papua Niu Kini, o nisi taimi e taʻua o le Atunuu e Faateia Ai, e faafetaiaia e Molimau a Ieova toatuga i le faaleoina atu o le feau manino o le Tusi Paia. E latou te talaʻi atu i tagata e tautatala i gagana eseese e sili atu i le 700 ma iai le tele o aganuu eseese. E tauivi foi Molimau a Ieova ma oganuu maugā, e tau leai ni auala, ma le faateteleina o le solitulafono. E ese mai i nei faafitauli uma, e iai teteega mai isi lotu, ma e iai taimi e ala mai foi i alii ofisa o aʻoga.

E ui i lea, o taiala lelei faaleagaga ma se faaputuga faatuputupulaia o lomiga e fesoasoani i suesuega faale-Tusi Paia i a latou lava gagana ua faaauupegaina ai Molimau a Ieova e faailoa atu le tala lelei e pei o se leo o le pu o loo manino le iliina atu. E masani ona lelei le tali mai, e pei ona faailoa mai e le lipoti o loo mulimuli mai:

• I le amataga o le tausaga fou faaleaʻoaʻoga, na fia iloa ai e se faiaʻoga le mafuaaga e lē faalo ai pe pepese i le vii o le fua tamaiti Molimau a Ieova. Sa tuusao atu lana fesili ia Maiola, o se teineitiiti aʻoga e 13 tausaga le matua o se Molimau ua papatisoina. Sa avatu e Maiola se faamatalaga, manino e faavae mai le Tusi Paia. Na talia e le faiaʻoga lana mafuaaga talu ai e mai le Tusi Paia. Sa faailoa atu foi lana faamatalaga i le isi vaega o faiaʻoga.

Mulimuli ane, ina ua faatonuina tamaiti aʻoga e tusia ni tala, sa filifilia ai e Maiola le mataupu o le Tolutasi. Na togi silia lana tala i le vasega ma na fesili atu le faiaʻoga ia te ia i le mea na maua mai ai ana faamatalaga. Sa ia faasino atu ia te ia le tusi E Mafai Ona E Ola e Faavavau i Parataiso i Le Lalolagi i le gagana Peretania. Na faailoa atu e le faiaʻoga le tusi i le vasega atoa, ma e toatele na mananao i ni a latou lava kopi totino. I le aso na sosoo ai, na ofoina atu ai e Maiola ni tusi e 14 ma mekasini e 7 i ana uo i le aʻoga, ma sa amata ai ni suesuega faale-Tusi Paia ma nisi o i latou e toatolu. O le sini o Maiola ia avea ma faifeau faataimi atoa.

• O se vaega maotua o Molimau a Ieova i se nuu tu matafaga e latalata i Port Moresby na fesagai ma ni teteega talu mai vaitausaga amata o le 1970. Ae peitai, talu ai nei, na latou mauaina ai se fesoasoani mai se puna e lei faatalitalia. O le epikopō o le Lotu Tuufaatasi (United Church) iina, o se tagatanuu o Papua Niu Kini sa aʻoga i atunuu i fafo, na valaauliaina le aofia e faia ni fesili i le lotu i le isi aso. Na fesili atu se tamaloa: “E lua tapuaiga i totonu o lo tatou nuu—Lotu Tuufaatasi ma Molimau a Ieova. O le ā e tatau ona matou faia pe a ō mai Molimau a Ieova i o matou aiga?” Sa umi o nofo le epikopō ona ia tali atu lea e faapea: “Tou te iloa, ua ou matuā lē iloa lava po o le ā le tala o le a taʻu atu ia te outou. Talu ai nei, na ō mai ai ni Molimau talavou se toalua i loʻu fale. Na la fai mai se fesili ia te au, ma e lei mafai e loʻu atamai uma lava faa-Iunivesite ona ou iloa ai le tali. Ae sa faigofie ona la aumaia ia te au le tali mai le Tusi Paia. O lea ou te lē taʻuina atu ia te outou le mea e fai—faitalia outou. E lē faamalosia outou tou te faalogologo atu i ai pe afai tou te lē manao ai, ae aua le sauā ia i latou.”

Na lipotia mai e se sui femalagaai o le Sosaiete o le Olo Matamata lea na mulimuli ane asiasi atu i lenei vaega o Molimau e faapea: “E toetoe lava o tagata uma o le nuu na faalogo atu i Molimau ina ua latou ō atu e talaʻi. O nisi na oo lava ina latou valaauliaina atu i latou i totonu o o latou fale. O se parataiso mo le talaʻiga i le taimi lenei.”