Kirisimasi—Se Aso Mālōlō Faalelalolagi po o se Aso Paia Faalelotu?

I SAINA e taʻua ai o ia o le Tamā Matua o le Kirisimasi. I Peretania, e lauiloa ai o ia o le Tamā o le Kirisimasi. E taʻu e tagata Rusia o Grandfather Frost, ma i le Iunaite Setete, e faaigoaina ai o ia o Santa Claus.

E toatele e manatu i lenei tamaloa matua foliga fiafia o lē e iai sona manava telē ma se ʻava sinā e faapea o loo faaatagia moni ai le uiga o le Kirisimasi. Ae e lauiloa foi Santa Claus e faapea o se tala faafagogo, po o se tala o le vavau e faavae i uputuu masani e fesootai atu i se epikopo sa ola i le senituri lona fa i Mura (po o Take i aso nei).

O faiga masani ma uputuu ua faapena foi ona taaina malosi ai pea lava le faamanatuina o aso mālōlō ma le Kirisimasi. O le tala faafagogo e uiga ia Santa, ua na o se tasi lea o faaaoaoga o fesoo-taiga o tu masani i se aso mālōlō lauiloa. A o faapea mai nisi tagata o tu masani o le Kirisimasi e faavae i mea na tutupu ia o loo faamauina i le Tusi Paia, ae o le mea moni, o le tele lava o nei tu masani e iai o latou amataga faapaupau.

O se isi foi faaaoaoga, o le laau Kirisimasi. Ua faapea mai le New Encyclopædia Britannica: “O le tapuai i laau lea sa taatele i tagata faapaupau i Europa, na faaauau pea ona iai i tu masani a tagata Scandinavia ina ua uma ona faaliliuina i latou i le Faa-Kerisiano, e teuteuina le fale ma le laufanua i la laau lanumeamata i le Tausaga Fou, e tuli ese ai le tiapolo, ma faatuina se laau mo manu felelei i le vaitaimi o le Kirisimasi.”

O le faia o pale i le laau o le holly po o isi laau lanumeamata, o se isi foi lea tu masani lauiloa i le Kirisimasi. O lenei foi faiga e matuā faavae mai lava i tapuaiga faapaupau. Sa faaaogā e Roma anamua ia lālā o le laau o le holly e teuteu ai malumalu i le vaitaimi o le Saturnalia, o se aso faamanatu e fitu aso e faia ai i le taulotoaiga o le tau mālūlū mo le atua o faatoaga, o Saturn. Sa matauina faapitoa lenei aso fiafia faapaupau ona o le lē taofiofia o le soona pisapisao ma amioga lē pulea.

O le tu masani o le Kirisimasi o le feasogi i lalo ifo o se lālā o le laau o le mistletoe (e pei ona faaatagia iinei) e ono foliga mai i nisi e faapea o se faiga alofa, ae o lea faiga, ua toe faamanatu mai ai tu sa masani ai le talafaasolopito o Europa mai le 500 T.A. e oo i le 1500 T.A. Sa talitonu tagata Druids o Peretania anamua e faapea, o le mistletoe, e iai se mana; o lea, sa faaaogā ai lea laau e puipuia ai mai temoni, faalauatau, ma isi ituaiga o mea leaga uma. Na oo mai le taimi, na mapuna aʻe ai le talitonuga faaanamua e faapea, o le feasogi i lalo ifo o le laau o le mistletoe o le a iu ai ina faaipoipo. O loo taatele pea lenei faiga i nisi o tagata i le vaitaimi o le Kirisimasi.

O nisi na o uputuu i aso nei i le vaitaimi o le Kirisimasi ua taaina ai pe na tuufaasolo saʻo mai lava i aʻoaʻoga faapaupau. Atonu la o le a e tau mānatu pe na faapefea ona oo mai nei mea uma. Na faapefea i se aso mālōlō ua faapea mai e faamamaluina ai le aso fanau o Keriso ona faafefiloi ma tu masani e lē faa-Kerisiano? O le mea e sili ona tāua, po o le ā le silafaga a le Atua i le mataupu?

[Ē Ana le Ata i le itulau 2]

Itulau e 3: Santa Claus: Thomas Nast/Dover Publications, Inc., 1978; mistletoe i le itulau e 3 ma le ata i le itulau e 4: Suesueina o Tu Masani o le Kirisimasi ma Agaifanua e Margaret Baker, lomia e Shire Publications, 1994