Ua Tautino e Lotu

“Ua Tuu e le Pope le Lotu i Faamasinoga.” “Sauāga Faalotu ma le Faatavā i Tagata Iutaia —Ua Sauniuni le Lotu e Faaalia Ana Lava Mea Sese (Mea Culpa).”a “Faaalia Ana Lava Mea Sese i le Faatamaiaga o Tagata Siū.” “Faatoese Tagata Metotisi i Tagata Initia Mai le Iunaite Setete i Sisifo.”

PO UA e faitau ea i ni ulutala faapenei? E foliga mai o loo faateleina pea mai lea taimi i lea taimi ona taliaina e lotu tuuaʻiga ma o loo faatoese atu foi mo mea ua latou faia i le tele o senituri. O loo faaauau pea ona faamatilatila mai e ala o faasalalauga ia isi foi mea sese fou na faia e le pope.

Pe a Talosagaina e le Pope se Faamagaloga

I le va o le 1980 ma le 1996, o Ioane Paulo II na ia ‘matauina mea sese i le talaaga o le Lotu pe talosaga atu mo se faamagaloga’ e lē itiiti ifo i le 94 taimi, o le faamatalaga lea a le faamatalaupu a le Vatikana o Luigi Accattoli i lana tusi o le Quando il papa chiede perdono (Pe a Talosagaina e le Pope se Faamagaloga). E tusa ai ma le faamatalaga a Accattoli, “i le Lotu Katoliko, e na o le pope lava e iai le aiā e fai atu ai pe a na faia se mea sese.” Ma ua uma ona ia faia lenei mea, i le toe faasino atu i nisi o faamaumauga lauiloa o le talaaga o le Katoliko—o Taua Faalotu, o taua, le lagolagoina o pulega faatautalatasi, fevaevaeaiga i totonu o lotu, faatavā i Tagata Iutaia, sauāga faalotu, le Mafia, ma le faailoga lanu. I se tusi faamanatu na auina atu i le 1994 i katinale (lea sa manatu i ai nisi faapea o se tusi e sili ona tāua e tusa ai o le tulaga maualuga o le pope), na faatū ai e Ioane Paulo II se manatu ina ia faia “se tautinoga e faalauaitele ma se tautinoga mo agasala sa faia i meleniuma ua mavae.”

E iai ni taʻitaʻi lotu ua mulimuli atu i le faataitaiga a le pope. Ia Tesema 1994 sa lipotia mai ai e le nusipepa Italia, o le Il Giornale e faapea: “E toatele epikopō mai Amerika sa faaalia o latou ata i le televise ma sa talosaga atu i tagata lautele mo se faamagaloga.” Faamagalo mai le ā? Mo le tuumāmāina o le manatu i faifeau o loo faaaogaseseina tamaiti mo faiga faaleituaiga ia ua aafia ma faamanualia ai le toatele o tamaiti. Ia Ianuari 1995 sa lipotia mai ai e le nusipepa o le La Repubblica “se gaoioiga lē mafaatusalia i le talafaasolopito o mea na tutupu i faiga faa-Katoliko i ona po nei”—sa talanoaina ai le faafitauli o Pope Pius XII i lona lē taʻua o mea e fesootai atu ma faatamaiaga o tagata Siū. Ia Ianuari 1995 na lipotia mai ai e le nusipepa lava lea e faapea o le au epikopō i Siamani sa latou talosagaina se faamagaloga mo le “tele o mea sese” a le Katoliko Roma i lona lagolagoina o soligatulafono a Nasi. O isi lotu eseese a le Porotesano ua faapea foi ona lotomalilie e tautino a latou lava mea sese.

Aisea?

Ua faalaeiau mai le Tusi Paia ia i tatou ina ia talosaga atu mo se faamagaloga pe afai ua tatou sese, ma o le toatele ua latou viiviia lotu pe a latou tautino mai o latou lava sese. (Iakopo 5:16) Ae aisea ua faia ai e lotu lenei gaoioiga? E ao faapefea ona aafia ai le auala o tatou manatu ai i na lotu?

[Faaopoopoga i lalo]