Po o ni Pologa a Tagata po o ni Auauna a le Atua?

“ATONU ua talafeagai ona viiviia Molimau a Ieova.” Ua faapea mai ai le tusi Siamani o le Seher, Grübler, Enthusiasten (Visionaries, Ponderers, Enthusiasts). E ui lava i lo latou faitioina o Molimau, ae ua tautino mai e faapea: “I le tulaga lautele, ua latou ola i ni olaga e lē mataʻuleagaina, se ituaiga o olaga e paleni. E maelega ma maufaatuatuaina i a latou galuega, o ni tagata filemu ma e faamaoni i le totogiina o lafoga. E latou te lē soona tuliloaina ni oa. . . . O o latou uiga pulea i tauaofiaga e matuā viiviia lava. O lo latou agaga faataulaga e tutusa ai ma isi vaega faalotu; ae o la latou faiva e sili atu ai i latou i isi lotu uma. Peitai o le itu ua maualuga ai i latou i isi uma lotu Kerisiano ma isi vaega i o tatou aso, o le matuā maumauai lea ua faalauiloa ai e le toatele o i latou a latou aʻoaʻoga i lalo o tulaga uma ma faapea ai ona latou fesagaia lamatiaga uma.”a

E ui i lena faatatauga mautinoa, ae sa lāgā nisi manatu e ese mai e uiga i Molimau a Ieova. I le tele lava o atunuu i le lalolagi, ua faia ai e Molimau i le lautele la latou auaunaga faalelotu mo le faitau sefulu o tausaga e aunoa ma le faalavelaveina. E faitau miliona tagata e latou te iloaina i latou, faaaloalo ia i latou, ma ioe ane faapea ua ia i latou le aiā tatau e fai ai la latou tapuaiga. Aisea la, ua lē mautonu ai manatu po o ai Molimau a Ieova?

Atonu o se tasi mafuaaga o le lē mautonu ona e lei mamao atu sa iai se isi vaega tele faalotu ua faapea ona aafia i le faataugaina o tamaiti, pule o le toatele o tagata i ola, ma le tele o osofaiga a tagata faatupu faalavelave. O le mea moni, o amioga faapenei ua iai i so o se mea, e lē na o tagata lotu o loo aafia ai. E ui i lea, e tusa ai ma tulaga faalelotu, ua masalosalo i ai le toatele o tagata, o nisi ua oo lava ina ʻinoʻino i lotu.

Lamatiaga o le Mulimuli i Tagata

O se “vaega faalelotu” ua faaupuina faapea o “se vaega o loo pipiimau atu i se aʻoaʻoga tutasi po o se taʻitaʻi.” I se tulaga talitutusa, o i latou e auai i se “lotu taufaasese” ua “matuā tuutoina atu i se tagata, i se manatu, po o se mea.” O le mea moni, o tagata o so o se vaega faalotu o loo matuā usiusitai atu i taʻitaʻi faaletagata ma o latou manatu ua lamatia i le avea o i latou ma pologa a tagata. O se faiā malosi ma se taʻitaʻi e mafai ona taitaia atu i se faalogona lē lelei ma le faalagolago atu faaleagaga. Atonu e sili atu ona lamatia pe afai e tuputupu aʻe le tagata mai lona laitiiti i se siomaga e iai tagata e lolotu i se vaega faalelotu.

O i latou o loo iai na popolega e faatatau i se lotu e manaomia ona avatu i ai faamatalaga e maufaatuatuaina. Atonu ua taʻu atu i nisi faapea, o Molimau e auai i se faalapotopotoga faalelotu lea e na te faapologaina ona tagata, faia ni pulega pulepuletutu e pulea ai i latou, soona faasāsā lo latou saolotoga, ma taofia i latou mai le gauai atu i le sosaiete.

Ua iloa e Molimau a Ieova o nei popolega e leai ni faavae. O lea ua latou valaaulia ai oe ina ia faia sau oe lava sailiiliga. A uma ona e manatunatu i ai ma le faaeteete, ona fai lea o sau lava faaiuga. Po o Molimau ea o ni auauna a le Atua, e pei ona latou taʻua ai i latou, po o i latou moni o ni auauna a tagata? O le ā le puna o lo latou malosi? O mataupu e lua o loo i itulau e 12-23 o le a saunia tali faamalie loto i na fesili.

[Faaopoopoga i lalo]