Latou te Lei Faia se Igoa Taʻutaʻua mo i Latou
E LĒ o faaigoaina e le Tusi Paia i latou na fausiaina le olo taʻutaʻua o Papelu. Ua faapea mai le tala: “Ona latou fai ane lea: ‘O mai ia! Ina tatou fai ia o se aai, ma se olo, ia oo lona tumutumu i le lagi, ia tatou faia foi se igoa e taʻutaʻua ai i tatou, neʻi faataapeapeina i tatou i le fogāeleele uma.’ ”—Kenese 11:4, NW.
Po o ai i “latou” ia? Na tupu lenei mea pe ā ma le 200 tausaga talu ona mavae le Lolo. E oo atu i lena taimi, o loo soifua pea Noa lea ua tusa ma le 800 tausaga faatasi ai ma le faitau afe o ē na tupuga mai ia te ia. Na latou tautatala uma i le gagana e tasi ma nonofo faatasi i le nofoaga lea na ia faamautu ai ma ona atalii ina ua mavae le Lolo. (Kenese 11:1) A o faagasolo le taimi, na agaʻi atu ai i sasaʻe se vaega o lenei faitau aofai o tagata lea ua faatoateleina, ma ‘maua ai le fanua laugatasi i le nuu o Senara.’—Kenese 11:2.
O se Matuā Lē Taulau
O le vanu lenei na filifili ai le vaega e fouvale i le Atua. I le ā le auala? Na faailoa atu e Ieova lana fuafuaga ina ua ia faatonuina le uluai ulugalii faaletagata ‘ia fanafanau, ma ia uluola, ma ia tumu ai le lalolagi.’ (Kenese 1:28) Na toe taʻua lenei fuafuaga ia Noa ma ona atalii ina ua mavae le Lolo. Na faatonuina i latou e le Atua e faapea: “O outou foi, ia outou fanafanau, ma ia outou uluola; ia outou tuputupulaiina i le lalolagi, ma ia outou uluola ai.” (Kenese 9:7) I le tetee atu i le taitaiga a Ieova, na fausia ai e tagata se aai ina ia alofia lo latou ‘taapeape atu i le fogāeleele uma.’
Na amata foi ona fausia e nei tagata se olo mo le fuafuaga ina ia faia ‘se igoa e taʻutaʻua’ ai i latou lava. Ae i le tuufaafeagai ma o latou faanaunauga, sa lei maeʻa lo latou fauina o le olo. Ua faaalia mai e le tala a le Tusi Paia e faapea na faafenumiai e Ieova la latou gagana ina ia lē mafai ai ona malamalama le tasi i le isi. Ua faapea mai faamaumauga faagaeeina: “Ona faataapeape lea e Ieova ia te i latou ai lea mea i le lalolagi uma; ona tuua lea e i latou ona faia o le aai.”—Kenese 11:7, 8.
Ua faamatilatila le lē taulau o lenei galuega i le mea moni faapea e lei ‘taʻutaʻua’ lava pe lauiloa igoa o tagata na fauina le olo. O le mea moni, e lē o iloa o latou igoa ma ua aveesea mai le talafaasolopito a tagata. Ae faapefea Nimarota, le atalii o le atalii, o le atalii o Noa? Pe na lei avea ea o ia ma taʻitaʻi o lenei fouvalega i le Atua? Pe lē o lauiloa ea lona igoa?
Nimarota—Se Tagata Fouvale Amioleaga
E mautinoa na avea Nimarota o le taʻitaʻi. Ua faatomua mai e le Kenese mataupu e 10 o ia “o se tuli manu malosi e tetee ia Ieova.” (Kenese 10:9, NW) Ua faapea mai foi le Tusi Paia “o ia foi na amata ona fai ma alii malosi i le lalolagi.” (Kenese 10:8) O Nimarota o se tagata toa malosi, ma e sauā. Na avea o ia ma taʻitaʻi faaletagata muamua ina ua mavae le Lolo, i lona tofiaina o ia lava e avea ma tupu. O Nimarota foi o se tufuga. Ua faapea mai le Tusi Paia na ia faavaeina aai e valu, e aofia ai ma Papelu.—Kenese 10:10-12.
O lea, na mautinoa le iai o se vaega a Nimarota—o lē na tetee atu i le Atua, le tupu o Papelu, ma sē e fauina aai—i le fauina o le olo i Papelu. Pe na ia lei faia ea la se igoa taʻutaʻua mo ia lava? Na tusi le tagata poto mai se atunuu i le itu i Sasaʻe o E. F. C. Rosenmüller e faatatau i le igoa o Nimarota e faapea: “Na avatu le igoa Nimarota mai le upu [ma·radhʹ], ‘na ia fouvale,’ na ‘teva ese,’ e tusa ai ma le uiga Eperu o le upu. Ona faamalamalama lea e Rosenmüller e faapea “o tagata e mai atunuu i le itu i Sasaʻe e masani lava i le tele o taimi ona faaigoa o latou tagata aloaia pe a feoti, e iai se fesootaiga uigaese o le igoa ma mea na faia.”
O le toatele o tagata atamamai faapitoa ua latou autasi i le manatu e faapea o le igoa o Nimarota e lei faaigoaina ai o ia ina ua fanau mai. Nai lo lea, na latou manatu i ai o se igoa na mulimuli ane ave i ai ina ia ogatusa ma ona uiga tetee na faaalia. Mo se faataitaiga, ua faapea mai C. F. Keil: “O le igoa o Nimarota [ma·radhʹ], ‘o le a matou fouvale,’ ua faasino atu i se faatuʻiese sauā i le Atua. Ua matuā fetaui lelei ma ona uiga, o lea e mautinoa na faaigoa ai e tagata na ola i lona vaitaimi, ma ua avea ma se igoa totino.” I se faaopoopoga i le pito i lalo, na sii mai e Keil le tusiaina e le tusitala o talafaasolopito o Jacob Perizonius e faapea: “Ou te talitonu o lenei tagata [Nimarota], sa avea o se tuli manu feai ma na siomia e ni aumea, ma ina ia faaosofia ai isi e fouvale, o taimi uma na te faapea ai ‘nimarota, nimarota,’ o lona uiga, ‘Seʻi o tatou tetee! Seʻi o tatou tetee!’ O lea, i se taimi mulimuli ane, na tofia ai e isi, e oo lava ia Mose, lena upu e avea ma se igoa e talafeagai mo ia.”
E manino la, sa lei faia e Nimarota se igoa taʻutaʻua mo ia lava. E lē mailoa le igoa na faaigoaina ai o ia i lona fanau mai. Na lei faamaumauina i talafaasolopito, e pei o igoa o i latou na mulimuli atu ia te ia. Na leai foi ni ana fanau e faaauauina lona igoa. Nai lo le maua o viiga ma lauiloa ai, ua iai sona talaaga matagā. O le igoa Nimarota ua iloga ai o ia e faavavau o se fouvale amioleaga, o lē na luia ma le lē mafaufau Ieova le Atua.