Lipoti a Ē Faalauiloa le Malo

‘E Fai Taulaga ma le Loto i ai Ou Tagata’

SA AAFIA le taʻitaʻiau malosi o Suria o Naamanu, i le maʻi lepela. Ana faapea na tuua o ia e lē togafitia, e mafai e lenei maʻi leaga ona iu i le faaleagaina o le tino ma oti ai. O le ā e ono faia e Naamanu? Sa iai i le aiga o Naamanu se teineitiiti ‘na aumai mai le nuu o Isaraelu i le taua.’ Sa ia tautala atu ma le lē fefe ma faailoa atu le perofeta o Elisaia o lē e mafai ona faamaloloina le maʻi lepela o Naamanu.—2 Tupu 5:1-3.

Ona o lona maumauaʻi ma le lē fefe, na saili ai e Naamanu Elisaia ma faamaloloina ai. E lē gata i lea, ua avea ai Naamanu ma se tagata tapuai o Ieova! O lenei mea na tupu, lea o loo faamauina i le Tusi Paia, na tupu i le sefulu senituri T.L.M. (2 Tupu 5:4-15) I aso nei, e toatele talavou o loo faaalia lea lava lototele i le tautala atu e uiga i manaoga o le Malo. Ua faamaonia lenei mea i le tala o loo mulimuli mai i le mea na tupu i Mozambique.

O Nuno o se tamaitiiti e ono ona tausaga, o se tagata talaʻi e lei papatisoina o le tala lelei. E oo lava i le taimi a o lei avea o ia ma se tagata talaʻi e lei papatisoina, e faapotopoto faatasi e Nuno tamaiti o lona vaipanoa, ona fai lea o se tatalo, ma aʻoaʻo atu ia i latou le Tusi Paia e ala i le lomiga o Laʻu Tusi o Tala o le Tusi Paia.

I le tele o taimi e ala vave ai Nuno i taeao o Aso Toonai ma faamanatu atu i lona aiga e faapea: “O le asō tatou te ō ai i le faiva i le fanua.” O lona maelega i le faiva o loo faaalia i isi auala. A o faatasi ai ma ona mātua i le auaunaga i luga o magaala i Maputo, e masani ona faalatalata atu na o Nuno i tagata. I se tasi o taimi faapena, na sau ai se tamaloa faipisinisi ma fesili mai ia te ia: “Aisea e te faatau ai nei mekasini?” Na faapea atu Nuno: “Ou te lē o faatauina atu ia mekasini, ae ou te taliaina ni meaalofa e fesoasoani ai i le faatupeina o le galuega talaʻi.” Na tali mai le tamaloa faipisinisi: “E ui lava ou te lē fiafia i ai, ae ua ou maofa i ou uiga faaalia ma lou agavaa. Ou te fiafia e fai se meaalofa mo lenei galuega.”

I le tasi o mea na tupu, na faalatalata atu ai Nuno i se tamaloa i luga o le ala ma ofo atu i ai le tusi True Peace and Security—How Can You Find It? Na fesili atu le tamaloa: “Pe e te lē aʻoga i le aʻoga lale?” “Ioe,” o le tali atu lea a Nuno, “Ou te aʻoga i le aʻoga lena, ae o le asō o loo oʻu tauaveina ai se feau tāua mai lenei tusi. O loo faaalia ai ia te oe e mafai ona e ola i le lalolagi fou lea o le a aumaia e le Atua, e pei ona faaali mai i le ata o lenei tusi.” Ma le lē iloa e Nuno, o le tamaloa lea la te talanoa, o se faiaʻoga i le aʻoga e aʻoga ai. E lē gata na talia e le faiaʻoga le tusi, ae i le taimi nei ua ia maua ai pea lava pea ia mekasini o Le Olomatamata ma le Ala Mai! mai ia Nuno.

Ina ua fesiligia Nuno i le mafuaaga e ala ai ona fiafia e auai i le galuega talaʻi, na faapea mai: “Ou te naunau e talanoa atu i tagata ma aʻoaʻo i latou e faatatau ia Ieova ma lona Alo, o Iesu Keriso.” Ma na ia toe faapea mai: “Afai e lē fia faalogo mai tagata, e leai se mafuaaga o le a faanoanoa ai.”

I le lalolagi aoao, e faitau afe talavou e pei o Nuno latou te ‘fai taulaga ma le loto i ai’ ina ia aʻoaʻo ma talaʻi le Malo o le Atua. (Salamo 110:3) Ae e lē tupu faafuasei lenei mea. O mātua o ē e aʻoaʻo i a latou fanau e uiga ia Ieova a o tamameamea, faataatia se faataitaiga lelei i le faiva ma sailia ma le maelega manaoga o le Malo, o le a matuā tauia lava.