Le Faatuatua Ma Lou Lumanai

“O le faatuatua, o le faalagolago lea ma le mautinoa i mea ua faamoemoe i ai.”—EPERU 11:1, NW.

1. O le ā le ituaiga o lumanai o loo mananao i ai le toatele o tagata?

PE E te naunau i le lumanai? O le toatele o tagata e naunau i ai. O lo latou faamoemoega o se lumanai e filemu, e aunoa ma le mataʻu, e lelei tulaga uma mo le soifua ai, galuega e fuatele mai ma olioli ai, e soifua maloloina ma umi le soifua. E lē taumatea e manaomia e augatupulaga uma lava o le talafaasolopito na mea. Ma i aso nei, i lenei lalolagi ua matuā tumu i faafitauli, ua sili atu ai ona manaomia na tulaga nai lo o se isi lava taimi.

2. Na faapefea ona faaleo mai e se tagata faitofā se manatu e faatatau i le lumanai?

² A o agaʻi atu le fanau a tagata i le senituri e 21, pe iai ea se auala mo oe e mafai ai ona e silafia pe faapeī le lumanai o le a iai? O se tasi o auala na faaleo mai lea i le sili atu i le 200 tausaga talu ai e le tagata faitofā mai Amerika o Patrick Henry. Na ia faapea mai: “Ou te lē iloa se isi auala tatou te iloa ai le lumanai nai lo le fua i mea ua tuanai.” E tusa ai o lenei manatu, e mafai ona iloa le lumanai o le aiga faaletagata i le tele e talafeagai ai e ala i le fua i mea na faia e tagata i taimi ua tuanai. E toatele e ioe i lena manatu.

Sa Faapeī Taimi ua Tuanai?

3. O le ā ua faaalia e le talaaga faasolopito e faatatau i faamoemoega mo le lumanai?

³ Pe afai o le lumanai e toe faatino mai ai mea na tutupu i le taimi ua tuanai, pe e faalaeiauina ai oe i lena faamatalaga? Pe sa faasolo ea ina lelei le lumanai mo le gasologa o tupulaga ua tuanai atu? E leai. E ui lava i faamoemoega o tagata sa iai mo le faitau afe o tausaga ma ni agaigai i luma tau le tamaoaiga sa iai i nisi nofoaga, ae ua faatumulia le talafaasolopito o tagata i mafatiaga, o solitulafono, o faiga sauā, taua, ma le mativa. Ua oo i lenei lalolagi mala faalausosoo, e tele lava ina māfua ona o tagata ma a latou faiga malo lē lelei. Ua saʻo ai le faapea mai o le Tusi Paia: “E pule . . . le tasi tagata i le tasi, e leaga ai o ia lava.”—Failauga 8:9.

4, 5. (a) Aisea na oo ai ni faamoemoega i tagata i le amatamataga mai o le 20 senituri? (e) O le ā na tupu i o latou faamoemoega mo le lumanai?

⁴ O le mea moni, o le talafaasolopito malaia o le tagata e lē gata, e tupu pea lava—ae i se tulaga faateteleina ma matuā faatamaia ai. Ua avea lenei 20 senituri ma faamaoniga o lena mea. Pe na maua ea e tagata se aogā, ma alofia ai measese sa fai i le taimi ua teʻa? I le amataga o lenei senituri, e toatele tagata sa faatuatua atu i se lumanai e sili ona lelei auā sa iai se vaitaimi umi o le filemu ma talu ai foi le tulaga auiluma i le gaosiga o mea, le faasaienisi, ma i aʻoaʻoga. I uluai tausaga mai le 1900, na faapea mai ai se polofesa i se iunivesite, sa iai le talitonuga o le a lē toe mafai ona tupu se taua talu ai “ua matuā malamalama tagata.” Na faapea mai se tasi na avea muamua ma palemia o Peretania e faatatau i le manatu sa iai i tagata i tuā i lena taimi: “O mea uma o le a faasolo ina lelei ma sili atu ona lelei. O le lalolagi lenei na ou fanau mai ai.” Peitai na ia taʻua: “Ae faafuasei lava, e lei faatalitalia, i se tasi taeao i le 1914, na faamutaina ai mea uma.”

⁵ E ui lava sa maualuga le faamoemoe na iai i lena taimi mo se lumanai e sili atu ona lelei, peitai, a o faatoʻā amata le senituri fou ae lofia loa le lalolagi e se puapuaga e sili ona matautia ua faia e tagata—le Taua Muamua a le Lalolagi. O se faaaoaoga o lena mea, seʻi manatu i le mea na tupu i le 1916 i se tasi o fetauaiga ina ua osofaia e fitafita a Peretania autau a Siamani, e latalata ane i le Vaitafe o le Somme i Falani. I le na o ni nai itula ae na fasiotia le toʻa 20,000 mai le itu a Peretania, ma e toatele foi na fasiotia i le itu a Siamani. E fa tausaga o lena fasigā tagata ma na faaumatia ai soifua o le toeitiiti lava sefulu miliona fitafita ma le toatele o tagata lautele. Na paʻū ifo le faitau aofai o tagata i Falani mo se taimi umi talu ai le toatele o tamaloloa na fasiotia. Na faaleagaina le tulaga tau tamaoaiga, ma oo atu ai i se vaitaimi o le Paʻū Maulalo o le tamaoaiga mai le 1930 i le 1933. E letioa ona faapea mai nisi, o le aso na amata ai le Taua Muamua a le Lalolagi o le aso lea na vālea ai le lalolagi!

6. Pe na faaleleia ea le olaga ina ua mavae le Taua Muamua a le Lalolagi?

⁶ Po o le lumanai ea lena sa faatalitalia e lena tupulaga? E leai, e matuā mamao lava ma le mea na manatu i ai. Na matuā lē taulau o latou faamoemoega; e lei taitaia atu foi e na mea uma i latou i se iuga e sili ona lelei. E na o le 21 tausaga talu ona mavae le Taua Muamua a le Lalolagi, pe i le 1939, ae tupu loa se isi mala e aupito sili atu foi ona matautia na faia e tagata—le Taua Lona Lua a le Lalolagi. Na faaumatia ai soifua e tusa ma le 50 miliona o tamaloloa, fafine, ma tamaiti. Na matuā faaleagaina aai na tuʻia i pomu. I le Taua Muamua a le Lalolagi, sa iai se faitau afe o fitafita na fasiotia i se fetauaiga e tasi i ni nai itula, ae i le Taua Lona Lua a le Lalolagi, e na o le lua lava pomu atomika na fasiotia ai le silia i le 100,000 tagata i le na o ni nai sekone lava. O le mea e manatu le toatele sa sili atu ona leaga, o le faitau miliona lea na fasiotia faasolosolo ai i nofoaga o faasalaga a le ʻau Nasi.

7. O le ā le mea moni e faatatau i lenei senituri atoa?

⁷ Ua taʻua e nisi o lipoti e faapea pe afai tatou te faaaofia ai ma taua i va o atunuu, ma fetauaiga i le va o tagata o se atunuu lava latou, ma tagata maliliu na faapogaia e faiga malo i o latou lava tagatanuu, e oo atu le aofai o i latou na fasiotia i lenei senituri i le 200 miliona. Na taʻua e se isi lipoti e oo atu lava i le 360 miliona. Seʻi tau ina mafaufau i le matautia sa oo i ai—o tiga, o loimata maligi, le tagiauē, le faatamaia o soifua! E lē gata i lea, i se faatatauga, e tusa ma le 40,000 tagata, o le toatele lava o tamaiti, e feoti i aso taitasi ona o mafuaaga e fesootai atu i le mativa. E faatoluina lena fuainumera o i latou ua maliliu i faapaʻūga tama i aso taitasi. E lē gata i lea, e tusa ma le piliona tagata o loo matuā matitiva lava ua lē mafai ona latou maua meaʻai manaomia mo se malosi e galue ai mo se aso se tasi. O nei tulaga uma o se faamaoniga lea o mea na muai taʻu mai e valoaga o le Tusi Paia faapea o loo tatou ola i “aso e gata ai” o lenei faiga amioleaga o mea.—2 Timoteo 3:1-5, 13; Mataio 24:3-12; Luka 21:10, 11; Faaaliga 6:3-8.

E Lē o i Tagata ni Vaifofo

8. Aisea e lē mafai ai e taʻitaʻi faaletagata ona foia faafitauli o le lalolagi?

⁸ A o latalata atu ina uma lenei 20 senituri, e mafai ona tatou faaopoopo atu mea na tutupu ai i mea na tutupu i senituri ua teʻa. O le ā ua taʻu mai ia i tatou e lena talafaasolopito? Ua taʻu mai ai ia i tatou ua lē mafai e taʻitaʻi faaletagata ona faaleleia faafitauli tugā o le lalolagi, e lē o mafai ona latou faaleleia ia faafitauli i le taimi nei, ma o le a lē mafai foi ona latou faaleleia i le lumanai. E lē mafai e lo latou tomai ona aumaia le ituaiga o lumanai lea tatou te mananao i ai, e tusa lava po o le ā le lelei o latou faanaunauga. Ma o nisi o i latou o iai le pule e leai ni o latou faanaunauga lelei; latou te saili le pule ma tulaga maualuluga mo lo latou lava lelei ma ni mea faitino e maua mai ai, ae lē mo le lelei o isi.

9. Aisea ua iai ai se mafuaaga e tau masalosalo ai po o iai i le faasaienisi tali i faafitauli o tagata?

⁹ Pe e maua ea i le faasaienisi le tali? E leai pe afai tatou te iloiloina mea ua uma ona tutupu. Ua faaalu e saienitisi a malo se aofaiga tele o tupe, o taimi, ma taumafaiga e saunia ai ni mea e faaumatia ai e pei o vailaau matautia, o meatau o siama e faatupu ai faamaʻi, ma isi ituaiga o auupega. O atunuu, e aofia ai atunuu latou te lē gafatiaina, ua latou faaaluina le sili atu i le 700 piliona tālā i meatau i tausaga taitasi! E lē gata i lea, e iai foi se vaega a ‘faiga faasaienisi’ i vailaau ia o loo māfua ai le faapolusioneina o le ea, le laueleele, le suavai, ma meaʻai.

10. Aisea ua oo ai lava i aʻoaʻoga ua lē faamautinoa mai ai se lumanai e sili atu ona lelei?

¹⁰ Pe mafai ea ona tatou faamoemoe o le a fesoasoani aʻoaʻoga a le lalolagi e atiina ae ai se lumanai e sili atu ona lelei e ala i le aʻoaʻoina o tulaga maualuluga tau amio mamā, le manatu mamafa i isi, ma le alofa i tuaoi? E leai. Nai o lena, o loo latou taulai atu i le mauaina o tomai faapitoa tau galuega, le sailia o tupe. Ua latou atiina ae se agaga tauvā, e lē o se agaga o le felagolagomai; e lē o aʻoaʻoina foi e aʻoga amioga mamā. Nai lo lea, o le tele o na aʻoga latou te faataga le saʻolotoga e faia ai feusuaiga, lea ua māfua ai le anoano o teineiti o le tupulaga talavou e maua i maʻitō ma faamaʻi pipisi e feaveai i feusuaiga.

11. Ua faapefea ona aumaia e le talaaga o faiga faapisinisi ni masalosaloga e uiga i le lumanai?

¹¹ Po o le a faafuasei ea ona uunaia faiga faapisinisi tetele o le lalolagi e tausia lelei lo tatou paneta ma faaalia le alofa mo isi e ala i le gaosia o oloa e aogā moni lava nai lo na o oloa e maua ai tupe faasili? E lē mafaia lena mea. Po o le a latou taofia ea le aumaia o polokalame i le televise ia e tumu i faiga sauā ma amioga lē mamā ua māfua ai le faaleagaina o mafaufau o tagata, ae maise lava le autalavou? E leai se faalaeiauga o maua mai i mea ua teʻa auā, o le tele lava o taimi, ua avea le TV ma puna o amioga lē mamā ma faiga sauā.

12. O le ā le tulaga o iai tagata e tusa ai o faamaʻi ma le oti?

¹² E lē gata i lea, e ui lava i taumafaiga naunautai a fomaʻi, ae latou te lē o mafai ona foia maʻi ma le oti. Mo se faataitaiga, i le iuga o le Taua Muamua a le Lalolagi, sa latou lei mafaia ona taofia le pepesi o le fulū Sepania; i le lalolagi atoa, e 20 miliona soifua na maliliu ai. I aso nei, ua matuā taatele le maʻi fatu, le kanesa, ma isi maʻi e faapogaia ai le oti. E lē o mafai foi e le itulagi o vailaau faafomai ona togafitia le mala ua iai i ona po nei o le AIDS. Nai lo lea, na faasalalauina e se lipoti a Malo Aufaatasi ia Novema 1997 lea na taʻua ai faapea ua faaluaina ona sili atu le fuainumera ua oo i ai le pipisi o le siama e mafua ai le AIDS nai lo fuainumera sa iai muamua. E faitau miliona tagata ua maliliu mai ai. I se tausaga e lei leva tele atu, e tolu miliona isi tagata ua aafia ai foi.

Le Vaaiga a Molimau a Ieova i le Lumanai

13, 14. (a) O le ā le vaaiga a Molimau a Ieova i le lumanai? (e) Aisea e lē mafai ai e tagata ona aumaia se lumanai e sili atu ona lelei?

¹³ Peitai ane, e talitonu Molimau a Ieova o loo iai se lumanai pupula o tagata, e matuā lelei lava! Ae latou te lē faatalitalia lena lumanai lelei faapea o le a oo mai i taumafaiga a tagata. Nai lo lea, latou te faamoemoe atu i Lē na Foafoaina Mea, o Ieova le Atua. Ua ia silafia po o le a faapeī le lumanai, ma o le a avea o se lumanai matagofie! Ua ia silafia foi e lē mafai e tagata ona aumaia se lumanai faapena. Talu ai o le Atua na foafoaina i latou, e sili atu foi la lona silafia i o latou vaivaiga nai lo o se isi lava tagata. I lana Afioga, ua ia taʻu manino mai ai ia i tatou lona lei foafoaina o tagata ma se tomai e pulea ai ma le manuia i latou lava e aunoa ma le taitaiga tauatua. O le umi ona faatagaina e le Atua o tagata e pule e aunoa ma le faalagolago atu ia te ia, ua faaalia mai ai le matuā leai o so latou tomai. Na taʻutino mai e se tasi tusitala: “Ua faia e tagata ituaiga eseese uma o pulega na latou mafaufauina, ae lē taulau lava.”

¹⁴ I le Ieremia 10:23, ua tatou faitau ai i upu a le perofeta faagaeeina e faapea: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” Ua taʻua foi e le Salamo 146:3: “Aua tou te faatuatua i alii, po o le fanau a tagata, e le o i ai se olataga.” O le mea moni, talu ai ua tatou fananau mai ma le lē lelei atoatoa e pei ona faaalia e le Roma 5:12, ua lapataia ai i tatou e le Afioga a le Atua ina ia aua neʻi o tatou faatuatua ia i tatou lava. Ua faapea mai le Ieremia 17:9: “E sili le faaʻoleʻole o le loto i mea uma.” O lea, ua faalauiloa mai ai e le Faataoto 28:26: “O le ua faatuatua i lona lava loto, o le vale ia; a o lē savali ma le poto, e laveaiina o ia.”

15. O fea e mafai ona tatou maua i ai le poto e taitaia ai i tatou?

¹⁵ O fea e mafai ona tatou maua i ai lenei poto? “O le mataʻu ia Ieova, o le amataga o le poto lea; ia iloa foi le Paia, o le atamai lava lea.” (Faataoto 9:10) E na o Ieova o loo iai le poto lea e mafai ona taitaia ai i tatou i nei taimi matautia. Ma ua ia faatagaina lo tatou mauaina o lona poto e ala i le Tusi Paia, lea na ia faagaeeina mo lo tatou taitaiga.—Faataoto 2:1-9; 3:1-6; 2 Timoteo 3:16, 17.

Le Lumanai o Pulega a Tagata

16. O ai na te filifilia le lumanai?

¹⁶ O le ā la ua taʻu mai ia i tatou e le Afioga a le Atua e faatatau i le lumanai? Ua taʻu mai ia i tatou e faapea i le lumanai e mautinoa o le a lē toe faatino mai mea na faia e tagata i taimi ua teʻa. O lona uiga la e sese le manatu o Patrick Henry. O le lumanai mo lenei laueleele atoa ma i latou o loo iai o le a lē filifilia e tagata, ae o Ieova le Atua. O le a faia lona finagalo i le lalolagi, ae lē o le manao o ni tagata po o ni atunuu o lenei lalolagi. “E tele mafaufau o loo i le loto o le tagata; a o le pule a Ieova e tumau lava lea.”—Faataoto 19:21.

17, 18. O le ā le finagalo o le Atua mo o tatou taimi?

¹⁷ O le ā le finagalo o le Atua mo o tatou taimi? Ua ia fuafua e faamutaina lenei faiga o mea sauā ma amio lē mamā. O pulega leaga ua faitau senituri a tagata ua lē o toe umi nei ona suia lea i le pulega ua saunia e le Atua. Ua faapea mai le valoaga o loo i le Tanielu 2:44: “O ona po o ia tupu [o loo iai i aso nei] e faatuina ai e le Atua o le lagi o le malo [i le lagi] e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” O le a aveesea foi e le Malo taaʻiga leaga a Satani le Tiapolo, o se mea e lē tāitai mafai e tagata ona faia. O le a mou atu e faavavau lana [Satani] pulega o lenei lalolagi.—Roma 16:20; 2 Korinito 4:4; 1 Ioane 5:19.

¹⁸ Mātau o le a nutimomoia e le malo faalelagi ituaiga uma o faiga malo faaletagata. O le a lē tuuina atu i tagata le puleaina o lenei lalolagi. I le lagi, o i latou e faia aʻe ai le Malo o le Atua o le a latou puleaina mataupufai uma i le lalolagi mo le lelei o tagata. (Faaaliga 5:10; 20:4-6) I luga o le lalolagi, o le a lagolagosua atu ai tagata faamaoni i taitaiga a le Malo o le Atua. O le pulega lenei na aʻoaʻo i tatou e Iesu e tatalo i ai ina ua ia fetalai: “Ia oo mai lou malo, Ia faia lou finagalo, I le lalolagi e pei ona faia i le lagi.”—Mataio 6:10.

19, 20. (a) E faapefea ona faamatala mai e le Tusi Paia le fuafuaga o le Malo? (e) O le ā o le a faia e lana pulega mo tagata?

¹⁹ E tuu atu le faatuatua o Molimau a Ieova i le Malo o le Atua. O le “lagi fou” lea na tusi faatatau i ai le aposetolo o Peteru e faapea: “A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” (2 Peteru 3:13) O le “lalolagi fou” o le sosaiete fou o tagata lea o le a pulea e le lagi fou, le Malo o le Atua. O le fuafuaga lenei na faaalia mai e le Atua i se vaaiga i le aposetolo o Ioane, o lē na tusi: “Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:1, 4.

²⁰ Mātau o le lalolagi fou o le a avea o se lalolagi amiotonu. O mea lē amiotonu uma o le a aveesea e ala i se gaoioiga tauatua, le taua o Amaketo. (Faaaliga 16:14, 16) E faapenei ona faaupuina e le valoaga o i le Faataoto 2:21, 22: “O e amio saʻo, latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga ai le laueleele.” Ua folafola mai foi le Salamo 37:9: “E faaumatia o e fai amio leaga; a o e faatalitali ia Ieova, o i latou lava ia e fai mo latou le nuu.” Pe e te lē manao ea e soifua ai i lena lalolagi fou?

Ia Faatuatua i Folafolaga a Ieova

21. Aisea e mafai ai ona tatou faatuatua i folafolaga a Ieova?

²¹ Pe e mafai ona tatou faatuatua i folafolaga a Ieova? Faafofoga i le mea ua ia fetalai ai e ala mai i lana perofeta o Isaia: “Ia outou manatunatu i mea muamua talu mai le vavau; auā o aʻu o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu laʻu pule, ou te faia foi mea uma ou te loto i ai.” Ua faapea mai le vaega mulimuli o le fuaiupu e 11: “Na ou fai atu ai, ou te faaooina ai lava; na ou fuafuatia, ou te faia lava.” (Isaia 46:9-11) Ioe, e mafai ona tatou faatuatua ia Ieova ma ana folafolaga, e mautinoa e pei lava ua uma ona faataunuuina moni na folafolaga. O loo faamatala mai faapenei e le Tusi Paia: “O le faatuatua, o le faalagolago lea ma le mautinoa i mea ua faamoemoe i ai, o le mautinoa lea o mea e lē o vaaia.”—Eperu 11:1, NW.

22. Aisea e mafai ai ona tatou mautinoa o le a faataunuuina e Ieova ana folafolaga?

²² E faaalia e tagata lotomaulalo lena faatuatua auā ua latou iloa o le a faataunuuina e le Atua ana folafolaga. Mo se faaaoaoga, i le Salamo 37:29, tatou te faitau ai: “E fai lava le nuu mo tagata amiotonu, e nonofo ai pea i latou.” Pe mafai ea ona tatou talitonu i lenei mea? Ioe, auā ua faapea mai le Eperu 6:18: “E le mafai ona pepelo ai le Atua.” Po o le Atua ea e ana le lalolagi, lea e mafai ai ona ia foaiina atu i ē lotomaulalo? Ua faalauiloa mai e le Faaaliga 4:11: “Na e faia mea uma lava, ona o lou finagalo foi e i ai i latou ma ua faia.” O lea, ua faapea mai ai le Salamo 24:1: “O le lalolagi ma mea ua tumu ai o a Ieova ia.” O Ieova na foafoaina le lalolagi, o ia e ana, ma na te foaiina atu ia i latou o ē faatuatua ia te ia. Mo se fesoasoani i le atiina ae o lo tatou mautinoa i lenei itu, o le a faaalia ai e le mataupu o loo sosoo mai le auala ua tausia ai e Ieova ana folafolaga i ona tagata i taimi ua mavae faapea foi i o tatou aso, ma le pogai e mafai ai ona tatou matuā mautinoa o le a ia faia lena mea i le lumanai.

Manatu mo le Autaluga

◻ O le ā ua tupu i faamoemoega o tagata a o faagasolo talafaasolopito?

◻ Aisea e lē tatau ai ona tatou faamoemoe atu i tagata e aumaia se lumanai e sili ona lelei?

◻ O le ā le finagalo o le Atua e faatatau i le lumanai?

◻ Aisea tatou te mautinoa ai o le a faataunuuina e le Atua ana folafolaga?

[Ata i le itulau 10]

Ua taʻua ma le saʻo e le Tusi Paia: “E le o i le tagata . . . ona faatonuina le mea e ui ai o ia.”—Ieremia 10:23

[Ē Ana le Ata]

Pomu: U.S. National Archives photo; tamaiti matelaina: WHO/OXFAM; tagata sulufai: UN PHOTO 186763/J. Isaac; Mussolini ma Hitila: U.S. National Archives photo