Po O Le A Tatou Manaomia Pea Ni Autau?
O AUTAU ua alu uma ai le tele o alamanuia a le tagata ma tafiesea ai le tele o le fiafiaga o tagata. Ua mānatu ai nisi tagata, ‘Pe o le a mafai ea e tagata ona ausia le ituaiga o saogalemu i le lalolagi lea e lē toe manaomia ai ni autau?’ Ona o lea ua iai nei ituaiga o meatau e mafai ona faia ai se faatamaiaga o ola uma, ua atili ai ona manaomia vave se tali i le fesili. Po o le ā le moni e faamoemoe ai i se lalolagi e aunoa ma ni autau?
E tele mea tutupu e faamaonia ai pe afai e iai le vafealoai lelei o atunuu ma e iu ina maua ai uiga mautinoa, atonu la e ono aveesea ai nisi o meatau. Mo se faaaoaoga, ona o le lelei o faiā lautele a Kanata ma le Iunaite Setete, ua silia ai nei i le tasi ma le ʻafa senituri talu ona lē toe tau leoleoina e autau o latou tuaoi e tusa ma le 3,000 maila (5,000 kilomita) le va. E faapena foi le tulaga ua ausia e Nouē ma Suetena, faapea ma le tele o isi atunuu. Pe mafai ea e se maliliega i le va o atunuu uma ona maua ai se lalolagi e aunoa ma ni autau? Ona o le matautia o le Taua Muamua a le Lalolagi, ua faapea ai ona matuā taatele lenei manatu i se tulaga sa lei faapea muamua.
Ina ua talanoaina le filemu i le 1918, o se tasi o fuafuaga o le feagaiga na faavaeina i Versailles, o le “taumafai lea e faapogai le faatapulaaina o meatau a atunuu uma.” A o faagasolo tausaga na sosoo ai, na lauiloa ai le talitonuga o le teena o faiga faatupu faalavelave ma taua. Ua faapea mai nisi e tetee i faiga taua, o taua ua avea ma mea e silisili ona leaga e mafai ona tupu i se atunuu ma ua sili ai la ona leaga nai lo le toilalo. Na lē ioeina e tagata e lagolagoina faiga taua, i lo latou faapea mai, a o mavae le tele o senituri, na itiiti ni taumafaiga na fai e tagata Siū i le tele o vaipanoa e tau faasaga atu ai i tagata sa osofai ane, peitai na faaauau pea taumafaiga matuiā ina ia tafiesea i latou. Na itiiti se avanoa e tetee atu ai tagata Aferika i ē na ave faapologaina i latou i atunuu o Amerika, peitai e tele senituri na faia ai ni faiga lē alofa ia i latou.
E ui i lea, ina ua gāpā le Taua Lona Lua a le Lalolagi, e toatele tagata e teena faiga taua na latou manatu e manaomia e atunuu se puipuiga. O lea ina ua faavae Malo Aufaatasi ina ua uma le Taua Lona Lua a le Lalolagi, na fai ifo ai le faatāuaina o le aveesea o meatau, ae ua tele ina faatāua le felagolagomai o atunuu uma mo le teteeina o faiga o le faoa faamalosi. Sa iai le faamoemoe o atunuu na auai faapea o le saogalemu e maua mai i nei taumafaiga o le a maua ai e atunuu se lagona mautinoa e aveesea ai meatau.
Ua faasolosolo ina manino mai le isi faafitauli. O le mea masani, o taumafaiga a se atunuu ina ia latou maua le saogalemu, e oo ai le lagona lē saogalemu i ona atunuu tuaoi. O lenei faagasologa matautia ua iu i se tauvaga i meatau. Ae lata mai nei lava, ua avea le faaleleia o faiā i le va o atunuu tetele ua faamalosia ai le faamoemoe mo le aveesea o meatau. Peitai, talu mai lena taimi, o le Taua i le Vaifagaloa o Peresia, ma faafitauli i le atunuu sa taʻua muamua o Yugoslavia, ua tafiesea ai faamomoe o le toatele mo le aveesea o meatau. E tusa ma le lima tausaga ua mavae, na faapea mai ai le mekasini o le Time: “E ui ua uma le taua faaupufai, ae ua faateteleina, nai lo le faaitiitia, ona avea le lalolagi ma se nofoaga e lamatia ai.”
Faanaunauga mo se “Leoleo” mo le Lalolagi Aoao
E toatele le au mātau mea ua latou faapea mai e manaomia e tagata se pulega faalemalo e tasi mo le lalolagi atoa, ma se autau e lava le malosi e puipuia ai tagata uma. Ona e lē mafai e le faalapotopotoga o Malo Aufaatasi faapea ma vaegaau pito i malolosi o le lalolagi ona faia lenei mea, ua manatu ai isi e itiiti se faamoemoe mo le lumanai. Ae afai e te taliaina le Tusi Paia o le Afioga a le Atua, atonu e te tau mānatu ai pe faamata o le a faamalieina e le Atua e Ona le Malosi Uma Lava lenei manaoga tāua.
Faamata o le a faaaogā e Lē o loo taʻua e le Tusi Paia o “le Atua o le alofa ma le filemu” le malosi faavaegaau e aumai ai le faamasinoga tonu? Afai o lea, o lē fea autau? O le tele o autau i aso nei latou te fai mai o loo lagolago i latou e le Atua, ae faamata o latou faia moni le finagalo o le Atua? Po o iai se isi auala a le Atua e faalaa ane ai ma aumaia le filemu ma le saogalemu?—2 Korinito 13:11, NW.
Na feutagai le Atua e Ona le Malosi Uma Lava ma le uluai fouvalega, e ala i le tuliesea o Atamu ma Eva mai Etena ma tuu ai kerupi ina ia alofia lo la toe ulu atu i ai. Na ia folafola foi lana fuafuaga e aveesea fouvalega uma e faasagatau atu i lana pule silisiliese. (Kenese 3:15) Faamata e aofia ai i lena mea le faaaogaina e le Atua o se autau?
Ua taʻua e le Tusi Paia taimi na faaaogā ai e le Atua autau e faaoo maia ana faamasinoga. Mo se faataitaiga, sa faia e malo i le nuu o Kanana ni feusuaiga ma meaola, faia taulaga i tamaiti, ma faia taua sauā. Na poloaia e le Atua lo latou faaumatiaga atoatoa ma faaaogā le autau a Iosua e faaooina atu le faasalaga. (Teuteronome 7:1, 2) I se tulaga tutusa, na faaoo atu e le autau a le tupu o Tavita sala faafaamasinoga a le Atua agaʻi i le au Filisitia, e avea o se faaaoaoga i le auala o le a faaumatia ai e le Atua mea leaga uma i le aso faaiu o lana faamasinoga.
Na avea na mea tutupu ma aʻoaʻoga. Na faaalia ai e Ieova na te mafai ona faaaogā se autau e aumaia ai le saogalemu i tagata. O le mea moni, o loo iai se autau uigaese a Ieova, o le a feutagai ma le fouvalega e sili ona telē faasaga i lana pulega.
“Ieova o Au”
Ua faaaogā e le Tusi Paia le faaupuga “Ieova o au” e sili atu i le 250 taimi. Ua faauiga atu le faamatalaga i le tulaga o le Atua o se taʻitaʻi o le aofaiga tele o agelu. I se tasi taimi na taʻu atu ai e le perofeta o Mekaio i tupu o Aapo ma Iosefatu e faapea: “Na ou iloa atu ia Ieova o loo tietie i lona nofoālii; sa tutū foi ʻau uma a le lagi e latalata ia te ia, i lona itu taumatau ma lona itu tauagavale.” (1 Tupu 22:19) O loo faasino iinei i autau a agelu. Na faaaogā e Ieova nei autau e puipuia ona tagata. Ina ua siomia le aai o Totana, na mou atu le faamoemoe o le auauna o Elisaia. Ae peitai, ina ia faamalosia o ia, na avatu ai e le Atua ia te ia se vaaiga faavavega o lana autau o meafaiola agaga. “Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi.”—2 Tupu 6:15-17.
Po o na ea mea na tutupu e uiga ai faapea e lagolago e le Atua autau i aso nei? Atonu ua faapea mai nisi autau a Kerisinetoma o latou o autau a le Atua. E toatele ua talosagaina le faamanuiaga a taʻitaʻi lotu mo i latou. Ae o autau a Kerisinetoma e masani ona fetauaʻi lava latou, e faasagatau atu i o latou uso talitonu. O taua e lua a le lalolagi i lenei senituri na amata mai i le va o autau sa faapea mai o ni Kerisiano. E lē mafai ona avea lenei mea ma galuega a le Atua. (1 Ioane 4:20) A o faapea mai na vaegaau o loo latou tau mo le filemu, pe na faatonuina ea e Iesu ona soo ina ia faamaopoopo na autau i se taumafaiga e taofia le faavevesiina o le filemu i le lalolagi?
Sa matuā motusia le filemu ina ua puʻe e se motu o tagata faatupu faalavelave faaauupegaina Iesu a o iai i le faatoaga lea sa ia tatalo ai faatasi ma ona soo. Na taia i le naifi e se tasi o le au soo se tamaloa sa iai i lenei motu o tagata. Na faaaogā e Iesu lena taimi e faamalamalama ai se mataupu silisili tāua. Na fetalai o ia: “Ina toe sulu ia o lau pelu i lona faamoega; auā o i latou uma o e tago i le pelu, e oti i latou i le pelu. Fa te oe ea ou te le mafaia ona aioi atu nei i loʻu Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua?” E matuā telē le autau a Iesu sa iai i lana faatonutonuga, ae sa lei aofia ai Peteru o se fitafita, e leai foi ma se isi lava tagata. Nai lo lea, na valaauina Peteru ma isi uma soo o Iesu ina ia avea ma “fai faiva i tagata.” (Mataio 4:19; 26:47-53) I ni nai itula mulimuli ane, na faamanino ai e Iesu lenei mea ia Pilato. Na ia fetalai: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina neʻi tuuina atu aʻu ia Iutaia; a o lenei, e le mai iinei loʻu malo.” (Ioane 18:36) I le lē pei o le malo o Tavita lea na faavaeina i le lalolagi, o le Malo lea ua tuuina atu e le Atua ia Iesu e i le lagi, ma o le a na aumaia le filemu i le lalolagi.
Ua Ō Atu Autau a le Atua i le Taua
Ua toeitiiti nei ona gaoioi loa lea o autau a le Atua. I le faamatalaina o fetauaiga o lumanai nei, ua taʻua ai e le Faaaliga Iesu “O le Upu a le Atua.” Ua tatou faitau ai e faapea: “O ʻau foi o i le lagi ua mulimuli atu ia te ia i luga o solofanua sisina, ua oofu i latou i le ie vavae sinasina ma le mamā. Ua alu atu foi le pelu maai nai lona fofoga ina ia taia aʻi e ia o nuu.” Ua faapea mai le Tusi Paia o nei fetauaiga o le a iu ai i le faaumatiaga o “tupu o le lalolagi, ma a latou ʻau.” A o isi e lei faaalia so latou faamaoni i le Atua, ua faaopoopo mai le valoaga: “A o e na totoe, ua fasiotia i latou i le pelu ua alu atu nai le fofoga o le ua tietie i le solofanua.” E oo lava ia Satani le Tiapolo o le a aveesea. O lenei mea o le a maua moni ai se lalolagi e filemu e aunoa ma ni autau.—Faaaliga 19:11-21; 20:1-3.
Seʻi Manatu Faalemafaufau i se Lalolagi e Aunoa ma ni Taua
Pe mafai ona e faaātaina i lou mafaufau se lalolagi e matuā saogalemu lava e lē manaomia ai ni autau? Ua faapea mai se salamo o le Tusi Paia: “Ina o mai ia, ina vaavaai i galuega a Ieova, o le ua faia faatafunaga i le lalolagi. Ua faaiua e ia o taua e oo lava i tuluʻiga o le lalolagi.”—Salamo 46:8, 9.
Maeu se mapusaga o lenei mea! Seʻi manatu faalemafaufau i avanoa e matuu mai ai le sosaiete a tagata mai le avega pologa lea o le totogia o lafoga e faatupe ai autau ma a latou auupega! O le a mafai e tagata ona taulai atu lo latou malosi i le faaleleia o le tulaga o le soifuaga mo tagata uma, agaʻi i le faamamāina o le lalolagi faapea ma le toe faatoʻaina. O le a iai avanoa fou e faia ai ni mea fou ia o le a aogā moni mo tagata.
O lenei folafolaga o le a iai sona faataunuuga mo le lalolagi aoao: “E le toe lagona le sauaga i lou laueleele; o le faatafunaina ma le lepetia o mea e le lagona ia i lou nuu.” (Isaia 60:18) O le a lē toe fesulufaʻi solo le faitau miliona o tagata mai nofoaga o fetauaiga, ma aveesea faamalosi mai o latou aiga ma a latou meatotino ina ia nonofo i nofoaga mo tagata sulufai. O le a lē toe auē tagata ona o ē pele ua fasiotia pe faamanuʻalia i fetauaiga i le va o atunuu. O le a faamautu e le Tupu faalelagi a Ieova le filemu i le lalolagi. “O lana nofoaiga e tupu olaola mai ai le ua amiotonu; e manuia tele ai, seia leai se masina. E laveai o ia ia i latou ai le saua ma le faamalo.”—Salamo 72:7, 14.
O le a iai nisi fiafiaga atili i olaga o tagata o ē e lē ʻinoʻino ae latou te faataitai atu i ala o le alofa o le Atua. Ua muai taʻu mai e le Afioga a le Atua: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.” O le a faapeī le ola faatasi ma tagata o ē iloa ma alolofa ia Ieova? Ua valoia mai e lena lava tusi: “O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau. E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.”—Isaia 11:9; 32:17, 18.
O tagata o ē faavae aʻe lo latou faatuatua i le poto o le Tusi Paia, latou te iloa ua fuafuaina autau a le Atua ina ia faamamā ese ai mai le lalolagi fili uma o le filemu. O lenei malamalamaga ua latou loto tetele ai e faatatauina mea ua fai mai le Tusi Paia ‘e ao ona tupu i aso e gata ai.’ O lona uiga: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.”—Isaia 2:2-4.
O tagata mai le tele o atunuu o ē ua avea ma Molimau a Ieova ua latou faamaamulu ese mai le ‘aʻoaʻoina o taua.’ Ua latou faatuatua atu ma le mautinoa i le puipuiga a autau faalelagi a le Atua. E ala i le suesueina o le Tusi Paia ma i latou, e mafai ai foi ona e maua lea lava faatuatua mautinoa.
[Ē Ana le Ata i le itulau 28]
U.S. National Archives photo