Se Tupu na Tamaoaiga ma Poto

Pe te manatu faapea o oa o le a mafai ona faafiafiaina ai oe? Afai e avatu ia te oe e se tasi se aofaiga tele o tupe, pe e te lē fiafia ai ea? Atonu o le a e fiafia. E foliga mai o le a e mafaufau i ni auala e faaaogaina ai.

E MAUTINOA, e tele ni mea e faatauina e faafaigofie ai le olaga ma maua ai le olioli. E mafai foi ona avea le tupe ‘ma laveai’ i faafitauli e tutupu faafuasei, e pei o faamaʻi po o le leai o ni galuega.—Failauga 7:12.

Ae o le ā le sootaga o tupe ma le fiafia? Pe e te manatu e pei o le tele o tagata, faapea o le fiafia o se mea e maua mai i le tele o le tamaoaiga? O le mauaina o tali i nei fesili atonu e faigata, ona o tupe e faigofie ona fuaina, po o le faitauina foi, a o le fiafia e lē mafai. E lē mafai ona e tuuina le fiafia i luga o se fua ma fua ai.

E lē gata i lea, o nisi o tagata mauoa e foliga mai e fiafia, ae o isi e lē fiafia. Ua faapena foi ia i latou e matitiva. Peitai, o le tele o tagata—e oo lava ia i latou ua tamaoaiga—e talitonu faapea o le tele o tupe o le a aumaia ai ia i latou le fiafiaga sili.

O se tasi o tagata na tusi e faatatau i na mea o le tupu o Solomona o Isaraelu anamua. O ia o se tasi o tagata e aupito i sili lona mauoa na soifua mai. E mafai ona e faitau i ai i se faamatalaga o le tele o le tamaoaiga na ia te ia i le mataupu e 10 o le tusi o le Tusi Paia o le Muamua le Tupu. Mo se faataitaiga, seʻi mātau, ua faapea mai le fuaiupu e 14: “O le fua o le mamafa o auro na aumaia ia Solomona i tausaga taitasi, o taleni o auro e ono selau ma le onogafulu ma le ono.” O lena fuainumera e tusa ma le 25 tone o le auro. I aso nei, o lena aofaiga o le auro e sili mamao atu i le $200,000,000 Amerika!

Peitai, sa lē na o le tamaoaiga na ia Solomona; sa faamanuia foi o ia e le Atua i le poto. Ua taʻua e le Tusi Paia faapea: “Na silisili le tupu o Solomona i tupu uma o le lalolagi i le mauoa ma le poto. Na sailiili atu ia Solomona salemausau uma ina ia latou faalogo i lona poto na tuuina e le Atua i lona loto.” (1 Tupu 10:23, 24) E mafai foi ona tatou maua aogā mai i le poto o Solomona, ona o ana tusitusiga o loo faia aʻe ai se vaega o le Tusi Paia. Seʻi o tatou vaai po o le ā na ia fai mai ai e faatatau i le sootaga a le tamaoaiga ma le fiafia.

[Ē Ana le Ata i le itulau 3]

Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart