Pe Mafai Ona E Faatuatuaina Lou Loto Fuatiaifo?

O LE tulaga masani lava, o le tapasā o se meafaigaluega maufaatuatuaina. O lona nila, e otometi ona gaoioi i le malosi faamaneta mai aave o le lalolagi, e faasino atu lava i le itu i mātū. Ua faalagolago atu i ai tagata femalagaai i le tapasā mo le faatonutonuga pe a leai ni taiala i le laueleele e taitaia i latou. Ae o le ā e tupu pe a tuu latalata i le tapasā se mea faamaneta? O le a liliu atu loa le nila i le mea faamaneta nai lo le faasino atu i le itu i mātū. Ona lē toe avea loa lea o le tapasā ma se taiala e faatuatuaina.

E mafai foi ona tupu se mea faapena i le loto fuatiaifo o le tagata. Na tuuina e Lē na Foafoaina Mea lenei tomai i totonu o i tatou ia auauna o se taiala maufaatuatuaina. Ona sa faia i tatou i le faatusa o le Atua, e tatau ai ona faataulai atu pea e le loto fuatiaifo i tatou i le itu saʻo pe a manaomia ona faia ni a tatou faaiuga. E tatau ona uunaia e le loto fuatiaifo i tatou e manatunatu i tulaga tau amio a le Atua. (Kenese 1:27) E masani lava, ona faapena. Mo se faataitaiga, na tusi le aposetolo Kerisiano o Paulo e faapea e oo lava ia i latou e lē o iai le tulafono a le Atua, “e fai fua e i latou mea e tusa ma le tulafono.” Aisea? Ona “o loo molimau lava o latou loto fuatiaifo ia i latou.”—Roma 2:14, 15, NW.

Ae ui i lea, e lē o taimi uma e gaoioi ai le loto fuatiaifo pe afai e manaomia. Ona o le lē lelei atoatoa faaletagata, tatou te mātele ai ina faia mea tatou te iloa e sese. “Ou te fiafia i le tulafono a le Atua i le tagata i totonu,” na faailoa mai ai e Paulo, “a ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foi aʻu ma tagata o taua i le tulafono a le agasala o loo i oʻu tino.” (Roma 7:22, 23) Afai e fai ma masani lo tatou lolo atu i faanaunauga sese, e mafai ai ona faasolo ina vaivai le loto fuatiaifo ma iu ai lava ina muta le toe taʻuina mai ia i tatou faapea o sea amioga e sese.

Peitai, e ui i le lē lelei atoatoa, e mafai lava ona tatou faagatusa atu lo tatou loto fuatiaifo ma tapulaa a le Atua. O le mea moni, e tāua lo tatou faia faapea. O le loto fuatiaifo e mamā ma toleniina lelei, e lē gata ina taitaiina atu i se faiā totino ma mafana ma le Atua ae e manaomia mo lo tatou faaolataga. (Eperu 10:22; 1 Peteru 1:15, 16) E lē gata i lea, o se loto fuatiaifo lelei o le a fesoasoani ia i tatou e faia ai filifiliga poto i le olaga, lea o le a taitaia atu ai i lo tatou filemu ma le fiafia. Na faapea mai le faisalamo i se tagata e faapena sona loto fuatiaifo: “O loo i lona loto le tulafono a lona Atua, e le mapeva foi ona vae.”—Salamo 37:31.

Toleniina le Loto Fuatiaifo

O le toleniina o le loto fuatiaifo e sili atu mea e aofia ai nai lo le na ona taulotoina o se lisi o tulafono ma matuā tausisi i ai. O le mea lena na faia e Faresaio i aso o Iesu. Na iloa e nei taʻitaʻi lotu le Tulafono ma fafau aʻe ai a latou uputuu ua auiliili lona faamatalaina, ma le faamoemoe ia fesoasoani i tagata e alofia ai le solia o le Tulafono. O lea, na vave ai ona latou lē malilie ina ua otoina i le Sapati e soo o Iesu saito ma ʻai fatu. Ma na latou luia Iesu ina ua ia faamaloloina le lima na gase o se tamaloa i le Sapati. (Mataio 12:1, 2, 9, 10) O nei gaoioiga uma, e tusa ai i uputuu a Faresaio, ua soli ai le tulafono lona fa.—Esoto 20:8-11.

O le mea moni lava, na suesueina e Faresaio le Tulafono. Ae pe na ogatusa ea o latou loto fuatiaifo ma faatulagaga a le Atua? E matuā leai lava! Auā, ina ua faatoʻā mavae lava ona faitio faatatau i le mea na latou manatu o se matuā solia ai o le tulafono o le Sapati, sa taupulepule ai loa Faresaio faasaga ia Iesu “ina ia latou fasioti ia te ia.” (Mataio 12:14) Seʻi manatu i ai—o nei taʻitaʻi lotu faafiaamiotonu na feita i sia tamai mea o le ʻaiina o saito fou faatoʻā ootiina mai ma le faamalologa i le Sapati; ae na leai so latou faalogona popole mai o latou loto fuatiaifo e faatatau i le taupulepuleina o le fasiotia o Iesu!

Na faaalia foi e ositaulaga sili lea lava manatu piopio. Na lei faalogoina lava e nei tagata piopio sina lagona nofosala ina ua latou ofoina atu ia Iuta tupe siliva e 30 mai le pusa tupe o le malumalu ina ia faalata ai Iesu. Ae ina ua teʻi ua toe faafoi ane e Iuta le tupe, ma toe lafo atu i le malumalu, na feagai ai loto fuatiaifo o ositaulaga sili ma se faafitauli faaletulafono. Na latou fai mai: “E sa ona tuu ia mea [tupe] i le tuugaoloa o le malumalu, auā o le tau o le toto.” (Mataio 27:3-6) E foliga mai, na popole ositaulaga sili faapea o le tupe lea a Iuta ua lē o toe mamā. (Faatusatusa i le Teuteronome 23:18.) Peitai, o tagata lava nei na manatu e leai se mea na sese ai le faaaogaina o ia tupe e totogi aʻi le faalataina o le Alo o le Atua!

Ia Faagatusa Atu i le Silafaga a le Atua

O faataitaiga i luga ua faaalia ai e faapea o le toleniina o le loto fuatiaifo e manaomia ai mea e sili atu nai lo le faatumuina o le mafaufau i se lisi o tulafono e ao ona fai ma tulafono e lē tatau ona faia. O le mea moni, o le poto i tulafono a le Atua e tāua, ma o le usiusitai atu i ai e manaomia mo le faaolataga. (Salamo 19:7-11) E ui i lea, i le faaopoopo atu i le aʻoaʻoina o tulafono a le Atua, e tatau ona tatou atiina ae se loto ia faagatusa atu i le silafaga a le Atua. Ona mafai lea ona faataunuuina ia i tatou le valoaga a Ieova e ala mai ia Isaia, lea ua faapea mai: “E vaai atu o outou mata i o outou aʻoaʻo [“lo outou Aʻoaʻo Sili,” NW]. E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.”—Isaia 30:20, 21; 48:17.

O le mea moni, e lē o le uiga o lea mea faapea pe a tatou fesagai ma se filifiliga mamafatu, o le a taʻu mai e se leo moni lava ia i tatou le mea e fai. Nai lo lena, pe a faagatusa atu o tatou mafaufauga ma manatu o le Atua i mataupu, o le a faaauupegaina lelei ai o tatou loto fuatiaifo e fesoasoani ia i tatou e faia filifiliga e faafiafiaina ai o ia.—Faataoto 27:11.

Manatu foi ia Iosefa, o lē na ola i le vaitaimi o le lona 18 o senituri T.L.M. Ina ua tauanauina o ia e le avā a Potifara ia la faia se mulilua, na musu Iosefa ma faapea atu: “Pe faapefea ona ou faia lenei mea leaga tele ma ou agasala ai i le Atua?” (Kenese 39:9) I aso o Iosefa, sa lei iai se tulafono tusitusia mai le Atua e taʻusala ai le gaoioiga o le mulilua. E lē gata i lena, sa ola Iosefa i Aikupito, e mamao mai lona aiga e maua ai le aʻoaʻoina po o tulafono faamātua. O le ā la, na mafai ai ona teena e Iosefa le faaosoosoga? O le tali faigofie, ona o lona loto fuatiaifo aʻoaʻoina po ua toleniina. Na mauaina e Iosefa le manatu o le Atua e faapea o se tane ma le avā e tatau ona “tino e tasi.” (Kenese 2:24) Na ia manatu e sese la le ave fua o le avā a se isi tamaloa. Sa faagatusa atu mafaufauga o Iosefa i manatu o le Atua i le mataupu. E faaleagaina e le mulilua ona lagona mamā tauamio na iai.

I aso nei, e toalaiti lava tagata o iai e pei o Iosefa. Ua taatele feusuaiga lē mamā, ma ua lē o lagona e le toatele sa latou matafaioi i Lē na Faia i latou, ia i latou lava, po o latou paaga foi ia tumau ai i le tulaga mamā tau amio. O le tulaga o loo iai ua pei lava o lea na faamatalaina i le tusi o Ieremia e faapea: “E leai se tagata ua salamo i lana amio leaga, ua faapea mai, Se a le mea ua ou faia? Ua latou taitasi ma liliu atu i o latou taufetuliga, e pei ona oso atu o le solofanua i le taua.” (Ieremia 8:6) O lea, ua iai ai se manaoga silisili atu nai lo se isi lava taimi mo i tatou ina ia faagatusa atu i manatu o le Atua. O loo iai se sauniuniga matagofie e fesoasoani ia i tatou e faia faapea.

Se Fesoasoani e Toleniina ai le Loto Fuatiaifo

O Tusitusiga faagaeeina e “aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:16, 17) O se suesuega o le Tusi Paia o le a fesoasoani ia i tatou e toleniina ai i mea ua taʻua e le Tusi Paia o o tatou ‘lagona malolosi masani,’ ia e mafai ona faaeseese ai le lelei mai le leaga. (Eperu 5:14) O le a mafai ai ona tatou atiina ae se alofa mo mea e alofa i ai le Atua ma se matuā ʻinoʻino mo mea e ʻinoʻino i ai o ia.—Salamo 97:10; 139:21.

O le sini la o le suesuega faale-Tusi Paia, ia maua le agaga ma aogā o le upu moni nai lo na o sina poto faamatala o le Tusi Paia. I le lomiga o Setema 1, 1976, o le Watchtower ua taʻua ai faapea: “I lo tatou suesueina o Tusitusiga Paia e tatau ona tatou faanaunau ina ia pueina mai ai le lagona o le faamasinotonu a le Atua, le alofa ma le amiotonu ma totō mau nei uiga i totonu o o tatou loto ina ia mafai ai ona avea ia uiga ma vaega tele o i tatou e pei o le ʻai ma le mānava. E tatau ona tatou taumafai ia matuā sili atu ona mataala i la tatou matafaioi tau i le mea ua tonu e ala i le galueaiina o le matuā mataala e faaeseese le mea saʻo ma le mea sese. E sili atu i lena, e tatau ona tatou faamalosia le olaola o o tatou loto fuatiaifo i lana matafaioi agaʻi i le Fai-Tulafono lelei atoatoa ma o le Faamasino. (Isa. 33:22) A o aʻoaʻoina la mea e uiga i le Atua, e tatau ona tatou taumafai ia faataitai ia te ia i vala uma o le olaga.”

Mauaina “le Finagalo o Keriso”

O se suesuega faale-Tusi Paia o le a fesoasoani foi ia i tatou ina ia maua ai “le finagalo o Keriso,” le tulaga faalemafaufau o le usiusitai ma le lotomaulalo lea sa faailoa mai e Iesu. (1 Korinito 2:16) O le faia o le finagalo o lona Tamā sa avea ma fiafiaga, ae lē na o se masani sa tatau ona otometi ona ola ai e aunoa ma le mafaufau i ai. O ona uiga sa faamatalaina faavaloaga e le faisalamo o Tavita, o lē na tusi e faapea: “Loʻu Atua e, ou te fiafia e fai lou finagalo; o loo i totonu lava ia te au lau tulafono.”a—Salamo 40:8.

O le mauaina o “le finagalo o Keriso” e tāua tele i le toleniina o le loto fuatiaifo. A o iai Iesu i le lalolagi o se tagata lelei atoatoa, na ia faaatagia mai ai uiga faaalia ma le peresona o lona Tamā i se tulaga atoatoa, i le mamao na ia mafai e tusa ai o le tulaga faatapulaaina o le tagata. O lea, na mafai ai ona ia faapea mai: “O le ua vaai mai ia te au, ua vaai o ia i le Tamā.” (Ioane 14:9) I tulaga uma na ia faafesagaia i le lalolagi, na faia ai e Iesu e pei lava ona sa finagalo ai lona Tamā ia te ia na te faia. O le mea lena, pe a tatou suesueina ai le soifuaga o Iesu, ua tatou maua ai se ata manino i le pe faapēʻi Ieova le Atua.

Ua tatou faitau i ai faapea o Ieova e “alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) I se tulaga faifaipea, na faaalia ai e Iesu nei uiga i le feagai ai ma ona aposetolo. Ina ua latou finau soo po o ai o i latou e sili, sa aʻoaʻo ma le onosai i latou e Iesu i upu ma e ala i lana faaaoaoga e faapea “o sē fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma a outou tautua.” (Mataio 20:26, 27) Ua na o se tasi lenei o faataitaiga e faaalia ai e mafai ona tatou faagatusa atu i manatu o le Atua e ala i le iloiloina o le soifuaga o Iesu.

O le tele o lo tatou aʻoaʻoina e uiga ia Iesu, o le lelei foi lea ona faaauupegaina o i tatou ina ia faaaoao i lo tatou Tamā faalelagi o Ieova. (Efeso 5:1, 2) O se loto fuatiaifo ua faagatusa atu i manatu o le Atua o le a taitaia i tatou i le ala saʻo. Ua folafola e Ieova ia i latou o ē faatuatua atu ia te ia: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.”—Salamo 32:8.

Maua Aogā Mai se Loto Fuatiaifo ua Aʻoaʻoina

O le iloaina o le tulaga faalogogata o tagata lē lelei atoatoa, na lapataia ai e Mose tagata Isaraelu e faapea: “Ia outou manatunatu i upu uma ou te taʻu atu ia te outou i le aso nei; tou te poloai atu ai i a outou fanau ia anaana e faia upu uma o lenei tulafono.” (Teuteronome 32:46) E tatau foi la ia i tatou ona tusia tulafono a le Atua i o tatou loto. Afai tatou te faia faapea, o le a sili atu ona foliga mai ai o le a taitaia e lo tatou loto fuatiaifo i tatou, ia saʻo o tatou ala ma fesoasoani ai ia i tatou ina ia faia faaiuga saʻo.

Ae o le mea moni, e tatau ona tatou faaeteete. Ua faapea mai le faataoto o le Tusi Paia: “O i ai le ala ua tonu i le manatu o le tagata; a o lona taunuuga, o ala ia e oti ai.” (Faataoto 14:12) Aisea ua avea ai o le tulaga lea e masani ona iai? Talu ai, e pei ona taʻua mai e le Tusi Paia e faapea: “E sili le faaʻoleʻole o le loto i mea uma, ma ua matuā leaga lava; po o ai na te mafaia ona iloa?” (Ieremia 17:9) O le mea lea, o loo manaomia ai mo i tatou uma lava ona tatou mulimuli atu i le timaiga a le Faataoto 3:5, 6 e faapea: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”

[Faaopoopoga i lalo]

[Ata i le itulau 7]

E pei o se tapasā, o se loto fuatiaifo ua aʻoaʻoina mai le Tusi Paia e mafai ona faasinoina atu i tatou i le ala saʻo

[Ē Ana le Ata]

Tapasā: Courtesy, Peabody Essex Museum, Salem, Mass.