O Ai le Atua?
E FAAPEFEA ona e taliina lenei fesili? Ua manatu nisi e latou te iloa lelei le Atua, o ia o se uō māfana. Ae manatu isi o le Atua ua pei o se tauaiga e mamao la latou faiā. E latou te talitonu e iai le Atua, ae e lē tele se mea e latou te iloa iā te ia. Afai e te talitonu i le Atua, o le a faapefea ona e tali i fesili o loo i lalo?
1. Po o soifua moni lava le Atua?
2. Pe iai se suafa o le Atua?
3. Po o Iesu o le Atua e Ona le malosi uma lava?
4. Pe alofa mai le Atua iā te aʻu?
5. Pe e talia e le Atua tapuaʻiga uma?
Pe a e fesili atu i isi e tali mai i nei fesili, e mautinoa lava o le a tele tali eseese o le a e mauaina. E lētioa a tele manatu sesē ua iai e faatatau i le Atua.
Le Māfuaaga e Tāua ai le Tali
A o talanoa Iesu Keriso ma se fafine mapolotu i le vaieli, sa faamatilatila ai e Iesu le manaʻoga ia iloa le mea moni e faatatau i le Atua. Na talitonu le fafine Samaria, o Iesu o se perofeta. Ae sa iai se mea na faalētonu ai lenei fafine. Sa ese le tapuaʻiga a Iesu mai lana tapuaʻiga. Ina ua ia faailoa atu lona atugaluga, sa fetalai atu ma le manino Iesu iā te ia: “Ua outou tapuaʻi i mea tou te lē iloa.” (Ioane 4:19-22) E mautinoa lava, sa silafia e Iesu e toʻatele tagata o lotu e latou te lē o iloa moni le Atua.
Po o le uiga o le fetalaiga a Iesu e lē mafai e se tagata ona iloa moni le Atua? E leai. Ona na toe fetalai atili Iesu i lenei fafine: “O ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o loo saʻilia e le Tamā tagata faapena e tapuaʻi atu iā te ia.” (Ioane 4:23) Po o e auai faatasi ma i latou o loo tapuaʻi i le Atua “i le agaga ma le upu moni”?
E matuā tāua lava ona e faamautinoaina le tali o lenā fesili. Aiseā? Ona sa faamatilatila mai e Iesu, e manaʻomia le poto saʻo ina ua ia tatalo: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.” (Ioane 17:3) Ioe, o lou mauaina o le ola e faavavau, e fesootaʻi atu i lou iloa o le mea moni e faatatau i le Atua!
Pe e mafai ea ona iloa le mea moni e faatatau i le Atua? Ioe, e mafai! E faapefea la ona e mauaina? Ua faapea mai Iesu e faatatau iā te ia: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” (Ioane 14:6) Na ia taʻua foʻi e faapea: “E leai se tasi ua iloa le Tamā e na o le Atalii, ma sē ua loto le Atalii e faaali i ai.”—Luka 10:22.
O le ki i le iloaina o le Atua o loo maua i aʻoaʻoga a Iesu Keriso, le Alo o le Atua. O lea la, ua folafola mai e Iesu iā i tatou e faapea: “Afai tou te tumau i aʻu aʻoaʻoga, o oʻu soo moni outou. O le a outou iloa ai le mea moni, ma o le a tuusaʻolotoina outou e le mea moni.”—Ioane 8:31, 32, The Holy Bible—New International Version.
O le a faapefea la ona taliina e Iesu fesili e lima ia na lāgā muamua?
[Ata i le itulau 4]
Po o e tapuaʻi i se Atua e te lē iloaina?