Le Auala e Foia ai Faafitauli ma le Toafilemu

O LE sauā o tagata, ua toeitiiti lava tutusa lona leva ma le umi talu ona iai le tagata. Ua faasino e le Tusi Paia le amataga o faiga sauā i tuā ia Kaino, le uso o Apelu ma o le atalii ulumatua o le uluai ulugalii faaletagata. Ina ua talia e le Atua le taulaga a Apelu na i lo o lana taulaga, “ona ita tele ai lea” o Kaino. Na faapefea ona ia taulimaina le faafitauli? “Ona tulai atu lea o Kaino ia Apelu lona uso, ma fasioti ia te ia.” Mulimuli ane, na oo ai o ia i se tulaga faamalaiaina e le Atua. (Kenese 4:5, 8-12) O le faiga sauā, sa lei faaleleia ai le faafitauli o le tulaga leaga lea na iai Kaino i luma o le silafaga a Lē na Faia o ia.

E mafai faapefea ona tatou alofia le auala o Kaino o le lolo atu e faaaogā le malosi faaletino e foia ai faafitauli?

Mai le Sauā i le Faapalepale

Seʻi manatu i se tagata o lē na matamata ma le loto i ai i le fasiotiga o Setefano, le uluai Kerisiano na fasiotia faamaturo. (Galuega 7:58; 8:1) O lea tagata, o Saulo o Taso, sa lē fiafia o ia i le tulaga faalelotu o Setefano ma sa ia lagolagoina le fasiotiga sauā o se auala tautonuina e taofia ai gaoioiga a Setefano. E moni, atonu e lei sauā Saulo i ala uma o lona olaga. Peitai, sa fiafia o ia e faamaonia faia faiga sauā e avea o se auala e foia ai faafitauli. Ina ua faatoʻā uma lava le maliu o Setefano, sa “soona sauā Saulo i le ekalesia [Kerisiano], ua ulufale ia i lea fale ma lea fale, ma fetoso mai i tane ma fafine, ma tuuina atu i le fale puipui.”—Galuega 8:3.

E tusa ai ma le faamatalaga a le tagata aʻoga o le Tusi Paia o Albert Barnes, o le upu Eleni iinei ua faaliliuina i le “soona sauā” ua faaalia ai se faatamaiaga e mafai ona faia e manu feai e pei o leona ma luko. Ua faamatala mai e Barnes e faapea: “O Saulo, sa matuā ita i le ekalesia e pei o se manu feai—o se faaupuga malosi, e faaalia ai le maelega ma le aasa o le ita i le taimi lea na ia faia ai sauaga.” Ina o agaʻi atu Saulo i Tamaseko e tapue ma fusifusi mai isi soo o Keriso, sa ʻmapugatamai pea o ia i le faamatau ma le fia fasioti i soo o le Alii [o Keriso].’ A o alu atu o ia i le ala, na fetalai mai ai Iesu ua toe faatuina ia te ia, ma o lenei mea na iu ai i le faaliliuina o Saulo i le Faa-Kerisiano.—Galuega 9:1-19.

Ina ua uma ona faaliliuina, na suia ai le auala na feutagai ai Saulo ma isi tagata. O se mea na tupu i le 16 tausaga mulimuli ane ai na faaalia tino ai lena suiga. Na ō atu ai se vaega o tagata i le faapotopotoga i lona nuu o Anetioka ma uunaia Kerisiano iina ina ia tausia le Tulafono faa-Mose. “Sa tele le upu ese ma le fefinauai” na faia ai. I le taimi lea, na faaali atu ai e Saulo o lē ua lauiloa i lena taimi o Paulo, sona manatu e uiga i le finauga. E foliga mai na tupu ai se finauga aasa. Ae sa lei liliu atu Paulo i faiga sauā. Na i lo o lea, na ia ioeina atoatoa le faaiuga a le faapotopotoga ina ia tuuina atu le mataupu i aposetolo ma toeaina o le faapotopotoga i Ierusalema.—Galuega 15:1, 2.

I Ierusalema foi, sa “tele le fefinauai” na faia ai i le fono a toeaina. Sa faatali lava Paulo ʻseʻi faalologo le toatele uma lava’ ma sa tala atu loa galuega mamana ua faia e le agaga o le Atua i tagata talitonu e lei peritomeina. Ina ua maeʻa se talanoaga faale-Tusi Paia, na “loto gatasi” ai le au aposetolo ma toeaina i Ierusalema ina ia aua neʻi faaee atu ni avega mamafa e lē talafeagai i tagata talitonu e lei peritomeina ae ia apoapoai atu ia te i latou ina ia “faamamao . . . i mea e fasia mo tupua, ma le toto, ma mea titina, ma le faitaaga.” (Galuega 15:3-29) E moni lava, na suia Paulo. Sa ia iloa ona foia ni fefinauaiga e aunoa ma le liliu atu i faiga sauā.

Feagai ai ma Faanaunauga Sauā

Na apoapoai mai mulimuli ane Paulo e faapea: “E le tatau ona faamisa o le auauna a le Alii, a ia agamalu i tagata uma, ia mafaia ona aʻoaʻo atu, ma ia onosai, ia aoai atu ma le agamalu i e o finau mai.” (2 Timoteo 2:24, 25) Na timai atu Paulo ia Timoteo, o se ovasia talavou lava, ina ia taulimaina ma le toafilemu tulaga faigata. Sa moni le manatu o Paulo. Sa ia iloa lelei e oo lava i Kerisiano e ono mapuna aʻe ni faalogona malolosi. (Galuega 15:37-41) O se mafuaaga lelei lea, na ia fautua mai ai e faapea: “A outou ita, aua le agasala ai; aua neʻi goto le la o ita pea outou.” (Efeso 4:26) O le taofiofia o le ita e aunoa ma le soona faapasae atu ma le lē pulea, o le auala saʻo lena e feagai ai ma na ituaiga o faalogona. Ae e mafai faapefea ona faataunuuina lena mea?

I aso nei, e lē o se mea faigofie ona taofiofia le ita. Fai mai Dr. Deborah Prothrow-Stith, le sui pule o le aʻoga o le soifua maloloina i Harvard: “O le sauā ua avea o se mea e lauiloa ai. O le mea moni, o tomai e tumau ai ona solosolo lelei faiā ma isi—le faia o fetuutuunaiga, le faia o ni maliega, tiga alofa, ma le loto faamagalo—o uiga na e masani ona faasino atu i tagata vāivai.” Peitai, o uiga faatamalii na, ma ua avea na uiga ma autū i le puleaina o faanaunauga sauā e ono mapuna aʻe i totonu o i tatou.

Ina ua avea ma Kerisiano, na aʻoaʻoina ai e Paulo se auala e sili atu ona lelei i le feagai ai ma feeseeseaiga o manatu. Sa faavae i aʻoaʻoga a le Tusi Paia. Ona o se tagata poto i le tulaga o faiga faa-Iutaia, sa masani lelei ai Paulo ma Tusitusiga Eperu. Atonu sa ia iloa e uiga i na mau e pei o le: “Aua e te mataua i le tagata faasaua; aua foi e te filifili i se tasi o ona ala.” “E sili ona lelei o le ua gesegese i le ita i le ua malosi; e sili foi le ua pule i lona loto i le na te aea le aai.” “O le aai ua sofaia, ua leai se pa, o le tagata lea na te le mataofia lona loto.” (Faataoto 3:31; 16:32; 25:28) Peitai, o lena iloa, sa lei taofia ai Paulo mai le faia o faiga sauā i Kerisiano a o lei faaliliuina o ia. (Kalatia 1:13, 14) Ae o le ā na fesoasoani ia Paulo i le avea o se Kerisiano, e faatautaia ni mataupu sa ono tutupu ai ni faalavelave e ala i le talanoa ma le faatauanau na i lo o le faasauā?

Na faailoa mai e Paulo ia i tatou se vaifofo i lona faapea mai: “Ia outou faaaʻoaʻo mai ia te au, pei o aʻu ia Keriso.” (1 Korinito 11:1) Sa ia matuā talisapaia le mea na faia e Iesu Keriso mo ia. (1 Timoteo 1:13, 14) Na avea Keriso ma faaaʻoaʻo mo ia e mulimuli ai. Sa ia iloa le auala na puapuagatia ai Iesu e sui ai tagata agasala. (Eperu 2:18; 5:8-10) Sa mafai ona faamautinoa e Paulo e faapea, o le valoaga a Isaia e uiga i le Mesia, na faataunuuina ia Iesu: “Na faasauaina o ia, sa tigaina foi o ia, a e le tautala mai o ia; e pei o le tamai mamoe ua taʻitaʻiina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai.” (Isaia 53:7) Na tusi le aposetolo o Peteru e faapea: “O le [Iesu] sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu.”—1 Peteru 2:23, 24.

O le talisapaia e Paulo o le auala na feutagai ai Keriso ma tulaga faigata na uunaia ai o ia e faia suiga i lona olaga. Sa mafai ona ia apoapoai atu i ona uso talitonu e faapea: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii [o Ieova] ia te outou, ia faapea foi outou.” (Kolose 3:13) E lē lava le na o le iloa faapea e lē tatau ona faasauā. O le talisapaia o mea ua faia e Ieova ma Iesu Keriso mo i tatou, ua fesoasoani e saunia le uunaiga e manaomia ina ia manumalo ai i faanaunauga sauā.

Pe Mafai Ona Faia?

Sa manaomia e se tasi tamaloa i Iapani se uunaiga malosi faapena. O lona tamā sa avea o se fitafita ma e ita vave tele, sa pulea lona aiga i le sauā. I le avea o se tagata ua afaina fua i faiga sauā ma vaai atu i lona tinā o faapena ona mafatia ai, na tupu aʻe ai i le tamaloa se uiga sauā. Sa ia tauaveina ni pelu taupelu faa-Iapani se lua e eseese le uumi e na te faalālā atu ina ia foia ai ni faafitauli ma faamataʻu ai tagata.

Ina ua amata ona suesueina e lana avā le Tusi Paia, sa nofo ma faalogologo ai o ia i le suesuega e aunoa ma le manatu mamafa i ai. Ae peitai, ina ua ia faitauina le tamai tusi o lona matua e faapea, Lenei Tala Lelei o le Malo,a na suia ai o ia. Aisea? Na faapea mai o ia: “Ina ua ou faitauina le mataupu i lalo o tamai ulutala, ʻIesu Keriso’ ma ʻLe Togiola,’ sa lagona loʻu māsiasi. E ui lava sa ou ola i se olaga sese, ae sa ou manao pea ou te agalelei atu ia i latou o loo matou faifai mea faatasi. Sa ou fiafia e faafiafia aʻu uo, ae sa gata mai le mamao pe afai e lē o afaina ai loʻu ola. Ae, sa finagalo malie le Alo o le Atua o Iesu e foaiina mai lona soifua mo le fanau a tagata, e aofia ai ma tagata e pei o aʻu. Sa faateia aʻu, e pei ua taia aʻu i se samala laupapa.”

Sa lē toe auaufaatasi o ia ma ana uo muamua ma sa lei pine ae tusia lona igoa i le Aʻoga o le Faiva Faatiokarate a le faapotopotoga o Molimau a Ieova. E fesoasoani lenei aʻoga i ē o auai ina ia maua le tomai e aʻoaʻo atu ai le Tusi Paia i isi. O le aʻoga na maua ai e lenei tamaloa se fesoasoani aogā. Ua ia manatu ai e faapea: “A o oʻu laitiiti, sa ou faia le faamataʻu ma faiga sauā ona sa lē mafai ona ou faamatala atu oʻu faalogona i isi. A o oʻu aʻoaʻoina le auala e faailoa atu ai oʻu manatu i isi, sa amata loa ona matou felafolafoai ma i latou na i lo o le faia o faiga sauā.”

Po ua pei ea o ia o Paulo, ua avea ala o Keriso ma ala o lona lava olaga? Sa tofotofoina lona faatuatua ina ua taumafai sana uo muamua e taofia o ia mai le avea ma Kerisiano, o se tasi na la faia se tautoga e avea ai i laua e pei o ni uso. Na tuʻi o ia e lana “uo” ma faifai i lona Atua, o Ieova. Na mafai e le tamaloa o lē na sauā muamua ona pulea lona ita ma faatoese atu ona o le lē mafai ona ia tausisia le tautoga. Ma le lē fiafia lava, na tuua ai o ia e lona “uso” e lei toe faalavelave i ai.

I le manumalo mai ona faalogona sauā, ua maua ai e lenei tamaloa na ita i le taimi muamua le tele o uso ma tuafāfine, o ē o loo autasia i le alofa mo le Atua ma tuaoi. (Kolose 3:14) O le mea moni, i le sili atu i le 20 tausaga talu ona avea ma Kerisiano tuuina atu, ua auauna nei o ia o se ovasia femalagaai a Molimau a Ieova. Maeu se olioli mo ia i le mafai lea ona ia faailoa mai i le Tusi Paia e faapea, ua mafai e tagata e iai uiga faamanu ona aʻoaʻoina ina ia foia feeseeseaiga e aunoa ma ni faiga sauā e pei lava ona ia aʻoaʻoina! Ma maeu se faaeaga mo ia o le mafai lea ona ia faasino atu i le faataunuuga sili o upu faavaloaga e faapea: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami”!—Isaia 11:9.

I le pei o le aposetolo o Paulo ma lenei tagata na avea muamua ma tagata sauā, e mafai foi ona e aʻoaʻoina le auala e faafetaiaia ai tulaga e avea ma luitau, i le foia o faafitauli i se auala toafilemu. O le a fiafia Molimau a Ieova i lou vaipanoa e fesoasoani atu ia te oe.

[Faaopoopoga i lalo]

[Faamatalaga faaopoopo i le itulau 5]

Sa moni le manatu o Paulo. Sa ia iloa e oo lava i Kerisiano, e mafai ona oo ina faateteleina faalogona tiga

[Ata i le itulau 7]

O le talisapaia o mea ua faia e le Atua mo i tatou, e mafai ai ona maua ni faiā filemu