Lipoti a Ē Faalauiloa le Malo

Ua Aʻoaʻoina le Upu Moni e se Tagata na Muai Tetee

E TELE ni mea ua lipotia mai i tala fou e faatatau i le taua i le va o tagata lava ia o le atunuu o Laiperia. E faitau sefulu afe na maliliu ai, ae e sili atu le faitau aofai o ē na leai ai ni aiga. E ui lava i nei tulaga faigata, ae sa faaauau pea ona talia e tagata loto faamaoni le upu moni, e pei ona faataitaia mai e le mea na tupu o loo mulimuli mai.

I le sefulu o ona tausaga, na aʻoaʻoina ai Iakopo i le Lotu Luteru. Ina ua avea o ia ma faatonu o se nusipepa a le lotu, na faaaogā ai e ia lona tulaga e tusia ai ni ana mataupu e tetee atu ai i Molimau a Ieova. Na ia faia lenei mea e ui o le mea moni e lei feiloai lava o ia i se tasi o i latou.

Na iai le taimi na tuua ai e Iakopo le avea o ia ma faatonu o le nusipepa a le lotu, ae fai lona faletalimalo lea sa taulau manuia. I se tasi aso a o ia saofai i le ofisa e faafeiloai ai malo o lona faletalimalo, sa asiasi atu ai ni tuafāfine sa laei lelei ia te ia. Ina ua ia vaaia le mamā o o la laei, na ia valaaulia ai i laua i totonu. Peitai ina ua la faamatala atu le fuafuaga o le la asiasiga, na ia faapea mai: “E matuā leai lava soʻu avanoa e talanoa ai.” Na ofoina atu i ai e Molimau ia te ia ni tusiga o mekasini o Le Olomatamata ma le Ala Mai!, ma sa ia taliaina ina ia faatea ese atu ai i laua. E 12 masina na lafoina atu ai mekasini i lona aiga, ae sa ia tuuina i totonu o se taga pepa iila e aunoa ma le tatalaina o pepa sa afifi ai.

Na matuā aasa le taua i le va o tagata o le atunuu, o lea na teuina ai e Iakopo tupe ma mea totino tāua i totonu o se taga ina ia sola ese ma ia pe a vaaia uluai faailoga lava o le osofaiga. I le tasi taeao na pa ai se pomu ʻati i lona faitotoa pito i tua, ma ona o lona lē toʻa tele na ia tago atu ai ma toso mai lana taga ma momoʻe loa mo lona faasaoina. I le avea ma se tasi o le faitau afe o tagata o le atunuu na tuumuli, na tatau ai ona uia e ia le tele o vaega e sueina ai. O iina, na masani ona faoa ai mea totino ma fasiotia ai tagata lautele o le atunuu e lē o fai taua e aunoa ma se mafuaaga.

I le veaga muamua e sueina ai, na fesiligia ai Iakopo i ni fesili ma faatonuina e tatala lana taga. Ina ua ia tatalaina sa ia lē talitonu i mea na ia iloa atu o loo iai i totonu. Na matuā gatete o ia ma ia iloa ai o le taga lea sa ia aumaia e lē o iai ana mea tāua. Ona o lona lē toʻa, sa ia aumaia ai le taga o loo iai mekasini o Le Olomatamata ma le Ala Mai! e lei tatalaina. Peitai, ina ua vaai atu le fitafita o mekasini ma o lona igoa o loo pipii ai, na ia faapea atu: “Oi, o oe o se tasi o Molimau a Ieova. Matou te lē o sueina outou, matou te iloaina tou te lē tala pepelo.” Ina ua maeʻa ona auauai aʻe ni nai mekasini mai le taga ona faatonuina ai loa lea e le fitafita Iakopo e alu.

O le mea lava foi lea e tasi na tupu i vaega e iva ia e sueina ai, ona o lea ua manatu taʻitaʻi uma o vaega ia, o Iakopo o se tasi o Molimau a Ieova ma faataga ai o ia e alu e aunoa ma le afaina. Na matuā faafetai Iakopo ona sa lei aumaia ana mea tāua ona o le mea lea na ia vaai i ai, e ono fasiotia ai o ia ona o ana mea totino.

Ina ua ia taunuu atu i le vaega mulimuli ma le pito sili ona tau faamataʻu lea e sueina ai, na matuā fefe lava o ia i le vaai atu i le tele o tino oti o loo taatitia mai le palapala. Ona o le gatete tele na valaau atu ai o ia i le suafa o Ieova. Na ia tatalo faapea pe afai o le a fesoasoani mai le Atua ia te ia ina ia sao ese mai lenei nofoaga fasioti tagata, o le a ia auauna ia te ia i taimi uma o totoe o lona olaga.

Na faaali atu e Iakopo lana taga i fitafita, ma na latou toe faapea ane: “Matou te lē o sueina tagata nei.” Na tau fai liliu ane i latou ia te ia ma faaopoopo ane: “O se tasi o ou uso e nofo i lalo atu o le mauga lenei. Alu e nonofo faatasi ma ia.” I lena taimi na suia atoatoa ai le manatu o Iakopo i Molimau. Na ia faafesootai atu loa le uso, ma faia se fuafuaga mo se suesuega faale-Tusi Paia i le tusi E Mafai ona E Ola e Faavavau i Parataiso i Le Lalolagi.a

I ni nai aso mulimuli ane ai, na faamalosia ai o ia e sola ese mai i lena vaipanoa ona o se osofaiga. I lena taimi, na momoʻe atu ai Iakopo i le togavao ma na o lana tusi lava o le Ola e Faavavau na mau i lona lima! A o faagasolo masina e 11 o nofo mamao ese mai Molimau, sa faalima ona suesueina e ia lana tusi. Ina ua mafai ona ia toe foi atu i le aai mulimuli ane, na ia toe faaauau ai ona toe suesue le Tusi Paia ma Molimau ma vave ona agaigai i luma. E lei umi lava mulimuli ane, ae papatiso loa o ia, ma ua auauna nei o ia ma le faamaoni faatasi ma ona uso faaleagaga.

[Faaopoopoga i lalo]