Po ua Tuulafoaia Ea Keriso e le Kirisimasi?

“E lei mafai lava ona ou faamautuina loʻu nei tagata ina ia talia fiafiaga ia e faia i vaitaimi o le Kirisimasi. O na fiafiaga e foliga mai ia te au e matuā feteenai lava ma le soifuaga ma le aʻoaʻoga a Iesu.”—Mohandas K. Gandhi.

E TOATELE o le a matuā lē ioe lava i le manatu o Gandhi. Atonu latou te mafaufau faapea, ‘O le ā le mea e iloa e lena tagata Hinitu e mau tofiga i le malo e faatatau i se aso mālōlō faa-Kerisiano?’ Ae ui i lea e ao ona faapea atu, ua salalau atu le Kirisimasi i le lalolagi atoa, ua aafia ai aganuu eseese uma. Ia Tesema o tausaga taitasi, e foliga mai ai ua maua lenei aso mālōlō i aganuu uma lava.

Mo se faaaoaoga, pe tusa ma le 145 miliona tagata Asia latou te faamanatuina le Kirisimasi, e 40 miliona ua sili atu ai na i lo le sefulu tausaga ua tuanai. Ma afai o “fiafiaga” ia e taʻua e Gandhi o loo uiga atu i masaniga e lē faalelotu i Kirisimasi i aso nei, le agaga soonafai i le fefaatauaiga o meafaitino o loo tatou vaaia, o le a lē faigofie ona teena e faapea o le vaega lea o lenei aso fiafia e sili ona matilatila. Ua matauina e le mekasini o le Asiaweek e faapea: “O le Kirisimasi i Asia—e amata mai i molī faapitoa i Hong Kong mo le aso fiafia seʻi oo i laau Kirisimasi tetelē i poletito o faletalimalo i Beijing, seʻi oo i le faatusa o le fale o manu sa Fanau Mai ai Iesu i le taulaga o Sigapoa—e tumu i gaoioiga (ae maise lava fefaatauaiga) faaletino.”

Po ua tuulafoaia ea Keriso i le faamanatuina o le Kirisimasi i ona po nei? O le tulaga masani, o Tesema 25 ua faamamaluina talu mai le senituri lona fa T.A., ina ua faatulaga e le Lotu Katoliko le aso lena e faamanatu ai e lotu le fanau mai o Iesu. Peitai e tusa ai o se suesuega sa faia talu ai nei i le Iunaite Setete, e na o le 33 pasene o i latou sa faatalanoa e manatu faapea o le fanau mai o Iesu o le vaega sili ona tāua lea o le Kirisimasi.

O le ā sou manatu? Pe e te lagona ea i nisi taimi e faatatau i faasilasilaga faatauanau o mea e fia faatau atu, o le faatauina ma le faanatinati o meaalofa, le teuteuina faamatagofie o laau, le faamaopoopoina ma le auai i pātī, le lafoina atu o pepa faamanuia o loo iai faamanuiaga o le Kirisimasi—e foliga mai ua tuulafoaia ai Iesu?

E manatu le toatele o se tasi o auala e toe faaaafia ai Keriso i le Kirisimasi o le faaaliali atu lea o se vaaiga o le Fanau Mai o Iesu. E lē taumatea ua uma ona e tagai i se vaaiga o ni faatusa faapena, o loo faaāta mai ai le pepe o Iesu i le fale o manu o loo lio e Maria, o Iosefa, o ni leoleomamoe, o “makoi e toatolu,” po o “tupu e toatolu,” ma ni faatusa o ni manu, ia ma ni tagata o loo matamata atu i ai. O le faalogona masani e faapea o nei vaaiga o le fanau mai o Iesu e aogā e faamanatu ai i tagata le uiga moni o le Kirisimasi. E tusa ai o le U.S. Catholic, “o se vaaiga o le fanau mai o Iesu ua aumaia ai se ata e sili atu ona manino na i lo le mea e mafai ona aumaia e se feau faaevagelia, e ui o loo faatāua mai ai foi le leai o se uiga faatalafaasolopito o nei mea.”

Ae faapefea la, i se vaaiga i le Fanau Mai o Iesu ona foliga mai ai o mea o loo taʻua i le Tusi Paia i tala faamaumau o feau faa-Evagelia e lē o ni mea moni o le talafaasolopito? Ia e aunoa ma se faafitia e faapea o nei tamai faatusa ua valivali faalelei ua na o ni faaātaga o se talafatu po o se talafaafagogo o le fanau mai o Keriso. Na faapogaia e se monike i le senituri e 13 ona aloaia ma fiafia i ai tagata, ma o lenei vaaiga i le Fanau Mai o Iesu e pei ona faaāta mai e faatusa o se faiga sa lei matuā taatele naʻuā. I aso nei, e pei lava ona iai i le tele o isi mea o loo fesootai atu i lenei aso mālōlō, o vaaiga i le Fanau Mai o Iesu ua avea ma pisinisi tetele. I Naples, i Italia, o loo iai le tele o faleoloa o loo faatau atu ai i le tausaga atoa faatusa o vaaiga i le Fanau Mai o Iesu. O nisi o faatusa sili ona taulia o loo faaāta mai ai, e lē o tagata o loo taʻua i faamatalaga a Evagelia, ae o tagata o loo faamanatuina i ona po nei, e pei o Purinisese Diana, o Mother Teresa, ma le tagata lauiloa i le fai ofu o Gianni Versace. I isi vaipanoa, ua fai ai i le sukalati, le makaroni, e oo lava i atigi figota o le sami lenei vaaiga o le Fanau Mai o Iesu. E faigofie ona e malamalama i le pogai ua faigata ai ona atagia mai le mea moni na tupu faatalafaasolopito i nei mea e pei ona faaalia.

O le a faapefea la i na vaaiga i le Fanau Mai o Iesu ona aumaia ai se “ata e sili atu ona manino na i lo le mea e mafai ona aumaia e se feau faaevagelia”? Po o faamatalaga ea a Evagelia e lē moni i le talafaasolopito? E oo lava i tagata sili ona masalosalo, e ao ona latou tautino mai sa iai moni Iesu, o se tagata e iai moni i le talafaasolopito. Sa tatau la ona iai se taimi na avea ai o se pepe, ma se nofoaga moni na fanau mai ai. E tatau ona iai se auala e sili atu ona lelei e maua ai le ata moni o mea na tutupu i lona fanau mai na i lo le na ona vaavaai atu i se vaaiga o le Fanau Mai o Iesu!

O le mea moni, e iai. E toalua tusitala o talafaasolopito na tusia faamatalaga eseese e uiga i le fanau mai o Iesu. I nisi taimi afai e te manatu ua matuā tuulafoaia Keriso i le Kirisimasi, aisea e te lē suesueina ai e oe lava nei faamatalaga? I nei faamatalaga, o le a e maua ai, e lē o ni talafaafagogo pe o ni talafatu, ae o se faamatalaga e faagaeeina ai—le tala moni i le fanau mai o Keriso.

[Ē Ana le Ata i le itulau 3]

Teuteu o loo siʻo ai pito o itulau 3-6, 8, ma le 9: Fifty Years of Soviet Art