Le Fai Ipu Omea Sili ma lana Galuega
“[Ia avea] ma ipu e taʻuleleia, . . . ua saunia mo galuega lelei uma.”—2 TIMOTEO 2:21.
1, 2. (a) Na faapefea ona avea le foafoaina e le Atua o le tamaloa ma le fafine o se galuega ofoofogia? (e) Mo le ā le fuafuaga na foafoaina ai Atamu ma Eva e le Fai Ipu Omea Sili?
O IEOVA o ia o le Fai Ipu Omea Sili. O le galuega sili ona ofoofogia o lana foafoaga o lo tatou uluai matua lea, o Atamu. Ua taʻu mai e le Tusi Paia ia i tatou: “Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola; ona avea ai lea o le tagata ma tagata ola,” o lona uiga, o se “foafoaga o loo mānava.” (Kenese 2:7, le faamatalaga i le pito i lalo i le NW) Sa lelei atoatoa le uluai foafoaga faaletagata, sa foafoaina i le faatusa moni o le Atua, o se faamaoniga o Lona atamai tauatua ma Lona alofa i le amiotonu ma le faamasinotonu moni.
2 I le faaaogaina o se vaega mai ivi asoaso o Atamu, na sauniunia ai foi e le Atua se faaatoaga ma se fesoasoani mo le tamaloa—o le fafine. O le lalelei lē ponā o Eva sa sili mamao atu na i lo se fafine e pito sili ona aulelei i aso nei. (Kenese 2:21-23) E lē gata i lea, sa tuuina atu i le uluai ulugalii faaletagata ni tino ma ni tomai sa lelei atoatoa ona fuafuaina mo le faataunuuina o le la galuega tofia, o le faaparataisoina o lenei lalolagi. Sa foai atu foi ia i laua le malosi e faatino ai le poloaiga a le Atua lea e taʻua i le Kenese 1:28 faapea: “Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.” O le iuga, sa tatau ona faatumulia lenei faatoaga i le lalolagi aoao i le faitau piliona o tagata fiafia, o loo fusia i le ituaiga o alofa lea e avea ma ‘fusi e atoatoa ona lelei ai.’—Kolose 3:14.
3. Na faapefea ona avea o tatou uluai mātua ma ipu taʻuleagaina, faatasi ai ma le ā le iuga?
3 E faanoanoa lava, ona sa filifili ma le loto i ai o tatou uluai mātua e fouvale i le pule a le Silisili Ese o Lē na Foafoaina i laua, o le Fai Ipu Omea Sili. Na oo ina avea lo la ala e pei ona faamatala mai i le Isaia 29:15, 16: “Oi talofa i e o fai togafiti faaloloto ina ia lilo ai la latou filifiliga ia Ieova; ua fai i le pouliuli a latou mea, ma ua faapea ane i latou, O ai ea se vaai mai ia te i tatou? o ai foi se iloa mai i tatou? . . . Pe faatusaina ea le omea i le tufuga? pe fai atu ea le mea na faia i le na na faia, E lei faia lava aʻu e ia? pe fai atu ea le mea na gaosia i le na na gaosia o ia, E leai sona mafaufau?” O lo la lē usitai na aumaia ai mala—le faasalaga o le oti e faavavau. E lē gata i lea, o le fanau uma a tagata lea na tupuga mai ia i laua ua tuufaasolo i ai le agasala ma le oti. (Roma 5:12, 18) O le matagofie o le foafoaga a le Fai Ipu Omea Sili ua oo ina matuā ponā lava.
4. Mo le ā le fuafuaga lelei e mafai ona tatou auauna ai?
4 Peitai ane, e oo lava i lo tatou tulaga lē lelei atoatoa o loo iai nei, e mafai lava e i tatou o ē na tupuga mai i le tagata agasala o Atamu ona vivii atu ia Ieova i upu o le Salamo 139:14 e faapea: “Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea.” Ae pagā le faanoanoa, talu ai ua matuā ponā lava le uluai galuega a le Fai Ipu Omea Sili!
Ua Faalautele Atu e le Fai Ipu Omea Lana Galuega
5. Sa faapefea ona faatinoina le tomai o le Fai Ipu Omea Sili?
5 E fiafia lava, ona o le tomai o Lē na Foafoaina i tatou i le avea o le Fai Ipu Omea sa faatinoina atili nai lo le na ona sauniunia o lana uluai foafoaga faaletagata. Ua taʻu mai e le aposetolo o Paulo ia i tatou: “O oe na le tagata, o ai ea oe e te finau atu ai i le Atua? Po o le a fai atu ea le mea na faia i le na faia o ia, ‘Se ā ea ua e fai ai aʻu faapenei?’ Pe ua lē iai ea i le fai ipu omea le pule i le omea, e fai mai ai i le paluga e tasi o le tasi ipu mo se faaaogaina e taʻuleleia, a o le tasi mo se faaaogaina e taʻuleagaina?”—Roma 9:20, 21, NW.
6, 7. (a) Ua faapefea ona filifili le toatele o tagata i aso nei ina ia fafauina i latou mo le taʻuleagaina? (e) Ua fafauina faapefea ē amiotonu mo se faaaogaina e taʻuleleia?
6 Ioe, e iai nisi galuega a le Fai Ipu Omea Sili o le a sauniunia mo se faaaogaina e taʻuleleia, ae o nisi, mo se faaaogaina e taʻuleagaina. O i latou e filifili e ō ma le lalolagi a o matuā magoto ifo i le loloto o amioga faalēmataʻu, ua sauniunia i se auala o le a faailogaina ai i latou mo le faaumatiaga. Pe a afio mai le Tupu faamamaluina, o Keriso Iesu, mo le faia o le faamasinoga, o na ipu taʻuleagaina o le a aofia ai tagata uma pei ni ʻoti o ē, e pei ona taʻua e le Mataio 25:46, o le a ‘o atu i le sala e faavavau.’ Peitai o “e amiotonu” e pei ni mamoe, o i latou ua sauniunia mo le faaaogaina “e taʻuleleia,” o le a fai mo latou tofi le ‘ola e faavavau.’
7 I se uiga lotomaulalo, o le a gauai atu ai i latou nei amiotonu i le sauniuniga tauatua. Ua latou ulu atu i le ala a le Atua i le ola. Ua latou talia le fautuaga o loo maua i le 1 Timoteo 6:17-19 e faapea: “Aua foi [tou te] faamoemoe i le oloa e faaletumau, a o le Atua soifua, o loo foai tele mai ia te i tatou mea uma lava e faafiafia ai.” Ua latou faamasani i le “agalelei atu, ia tamaoaiga i galuega lelei, ia mataalofa, ia latou avatu fua a latou mea, ma ia faapea ona latou teua oloa mo i latou lava, o le faavae lelei mo aso atali, ina ia latou fetagofi atu i le ola moni lava.” Ua faatulagaina i latou e le upu moni tauatua ma latou faaalia ai se faatuatua lē maluelue i sauniuniga a Ieova e ala mai ia Keriso Iesu, o lē “na foaifuaina o ia e ia e fai ma togiola” ina ia mafai ona toe faafoisia mai i latou uma na leiloloa ona o le agasala a Atamu. (1 Timoteo 2:6) Maeu la se tatau ona tatou naunau atu, e gauai i le fautuaga a Paulo ina ia “[tatou] oofu i le tagata fou, o le ua faafouina i le iloa [“le poto saʻo,” NW], [ua sauniunia] e faatatau ia foliga i le na faia o ia”!—Kolose 3:10.
O le ā le Ituaiga o Ipu o le a Iai Oe?
8. (a) O le ā e iloa ai le ituaiga o ipu o le a iai se tagata? (e) O ā vala e lua e fafauina ai se tasi?
8 O le ā e iloa ai le ituaiga o ipu o le a iai se tagata? O ona uiga ma lana amio. O mea nei e muai fafauina mai e ala i faanaunauga ma uunaiga o le loto. Na faapea mai le tupu poto o Solomona: “E filifili i le loto o le tagata lona ala; a o Ieova na te faatonuina le mea e ui ai o ia.” (Faataoto 16:9) Lona lua, e faatulaga mai e mea o loo faalogo ma vaai i ai, o aumea ma ni mea sa oo totino i ai. O lea la, e maeu le tāua, o lo tatou utagia o le fautuaga: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.” (Faataoto 13:20) E pei ona lapataia i tatou e le 2 Peteru 1:16, e ao ona tatou alofia le talitonuina o “tala o le vavau ua fatua ma le poto,” pe e pei ona faaupu ai e le faaliliuga faa-Katoliko Roma a Knox, o “talafatu a tagata.” O le a aofia ai i nei tala le tele o aʻoaʻoga faaaposetate a Kerisinetoma ma faatasiga faamanatu faalotu.
9. E mafai faapefea ona tatou tali lelei atu i le sauniuniga ua faia e le Fai Ipu Omea Sili?
9 O lea la, o la tatou tali atu, e mafai ai e le Atua ona sauniunia i tatou. I le faamaulalo i luma o Ieova, e mafai ona tatou toe faaleo atu le tatalo a Tavita: “Le Atua e, ia e suesue mai ia te au, ma ia e silafia loʻu loto; tofotofo mai ia ia te au, ma ia e silafia oʻu manatunatu; ma ia e silafia po o ia te au se ala e tiga ai; ma e taʻitaʻiina mai aʻu i le ala o le faavavau.” (Salamo 139:23, 24) E finagalo Ieova ina ia talaʻia le feau o le Malo. Ua tali atu ma le talisapaia o tatou loto i le tala lelei ma isi ana taitaiga. E ala mai i lana faalapotopotoga, ua ia faasafua mai ai ia i tatou faaeaga eseese e fesootai atu i le talaʻia o le tala lelei; o lea, seʻi o tatou taofi mau i nei faaeaga ma ia faapelepele i ai.—Filipi 1:9-11.
10. E tatau faapefea ona tatou matuā galulue i le mulimuli i polokalame faaleagaga?
10 E tāua tele lo tatou uaʻi atu pea i le Afioga a le Atua, e ala i le mulimuli i le polokalame i aso taitasi o le faitau Tusi Paia ma ia avea le Tusi Paia ma le auaunaga ia Ieova, o se faavae mo talanoaga i totonu o o tatou aiga ma i a tatou uo. O le polokalame o le tapuaiga i taeao o loo faia i le taimi o le mālū taeao i aiga Peteli taitasi ma aiga misionare o Molimau a Ieova, e masani ona aofia ai, i vaiaso e feauauai, se faitauina puupuu o le Tusi Paia po o le Yearbook fou o loo iai. Pe mafai ea e lou aiga ona faia se faatulagaga faapea? Maeu ni aogā tatou te mauaina uma lava foi, e ala i a tatou aufaatasiga i le faapotopotoga Kerisiano, i a tatou sauniga, ae maise lava i so tatou sao e faia i le suesuega faalevaiaso o Le Olomatamata!
Ua Faia Ina ia Manumalo Mai Faaosoosoga
11, 12. (a) E mafai faapefea ona tatou faatatauina le fautuaga a Iakopo e tusa ai o tofotofoga i lo tatou olaga i aso taitasi? (e) E faapefea i le mea na tupu ia Iopu ona faalaeiauina ai i tatou ina ia tausia le faamaoni?
11 I lo tatou olaga i aso taitasi, e faataga ai e le Atua nisi o tulaga e tutupu aʻe, o nisi o na tulaga ua tatou iloa le faigata. E tatau faapefea ona tatou manatu i na mea? E pei ona fautua mai le Iakopo 4:8, ia aua lava neʻi o tatou ita, ae ia tatou faalatalata atu i le Atua, ia faatuatua ia te ia ma o tatou loto atoa, i le mautinoa faapea a o tatou ‘faalatalata atu ia te ia, ona faalatalata mai lea o ia ia i tatou.’ E moni, o le a tatau ona tatou onosaia faigata ma tofotofoga, peitai ua faataga na mea e tutupu e saosaolaumea i le sauniunia ai o i tatou, faatasi ai ma se iuga fiafia. Ua faamautinoa mai le Iakopo 1:2, 3 ia i tatou: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.”
12 Ua faapea mai foi Iakopo: “A faaosoosoina se tasi, aua le faapea, ‘Ua faaosoosoina aʻu mai le Atua,’ auā e le mafai ona faaosoosoina [e] le Atua i mea leaga, e le faaosooso atu foi o ia i se tasi; a ua taitasi ma faaosoosoina, pe a tosina ma maileia i lona lava tuʻinanau.” (Iakopo 1:13, 14) Atonu e tele ma eseese o tatou faaosoosoga, ae e pei ona iai i le tulaga o Iopu, o na mea uma e iai sa latou vaega i le sauniunia o i tatou. Maeu la se faamautinoaga sili ua aumaia e le Tusi Paia ia i tatou i le Iakopo 5:11: “Faauta, ua tatou taʻuamuia i e onosai. Ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.” A o avea o ni ipu i aao o le Fai Ipu Omea Sili, tau ina ia tatou tausia le faamaoni i taimi uma lava, ona iai lea o le mautinoa i le taunuuga mulimuli e pei o le mautinoa lea sa ia Iopu!—Iopu 2:3, 9, 10; 27:5; 31:1-6; 42:12-15.
Le Fafauina Aʻe o a Tatou Tamaiti
13, 14. (a) O afea e tatau i mātua ona amata fafau aʻe ai a latou fanau, faatasi ai ma le ā le iuga o loo taulai atu i ai? (e) O ā ni iuga fiafia e mafai ona e taʻu mai?
13 E mafai ona saosaolaumea mātua i le fafauina aʻe o a latou tamaiti, mai lava a o tamameamea le fanau, ma e maeu le mafai ona ola aʻe o a tatou fanau ma avea o ni ē tausia le faamaoni! (2 Timoteo 3:14, 15) Ua moni lenei mea e oo lava i taimi sa matuā ogaoga ai tofotofoga. I ni tausaga ua mavae, a o aasa sauaga i se atunuu Aferika, na lolomia faananā ai e se aiga maufaatuatuaina Le Olomatamata i se tamai fale e teu ai meafaigaluega i tua o lo latou fale. I se tasi aso na faasolo mai ai fitafita i le auala, e saili uma fale taitasi mo ni tama talavou e ave i le vaegaau. Sa maua lava se taimi mo tama talavou e toalua o lenei aiga e lalafi ai, peitai o le sailia o i laua e fitafita e mautinoa le ono maua ai loa o le masini lomitusi. E mafai ona iu lenei mea i le faataugaina pe fasiotia ai le aiga atoa. O le ā e mafai ona faia? Na tautatala atu ma le leotetele nei tama e toalua, i lo la toe taʻua ma le loto tetele o upu o le Ioane 15:13: “E le sili lava le alofa o se tasi i lenei alofa, ia tuuina atu e se tasi lona ola mo ana uo.” Ona la filifili ai lava lea e nonofo pea i le potu mālōlō o lo latou fale. O le a maua ai i laua iina e fitafita ma e mautinoa o le a faia ia i laua ni faiga faataugā matuitui pe oo lava ina fasiotia i laua pe a la mumusu e auai atu. Ae o le a taofia ai le sailiga atili a fitafita. O le a faasaoina ai le masini lomitusi ma isi tagata o le aiga. Peitai, sa iai se iuga mataina na tupu. O le mea moni lava na laaloa fitafita i lenei fale e tasi, ae agaʻi atu i isi fale! O na ipu faaletagata sa fafauina mo se faaaogaina e taʻuleleia, na faasaoina, faatasi ai ma le masini lomitusi, ina ia faaauau ai ona lomia meaʻai faaleagaga i le taimi tatau. O se tasi o nei tama e toalua ma lona tuafafine matua o loo auauna nei i le Peteli; o loo ia faaaogaina pea le masini lomitusi tuai.
14 E mafai ona aʻoaʻoina tamaiti i le auala e tatalo ai, ma e tali mai le Atua i a latou tatalo. O se faataitaiga mataina o lenei mea na tupu i le taimi o le fasiotiga tagata tele i Rwanda. A o sauniuni e tagata fouvale se faasalaga e faia i se teineitiiti e ono tausaga ma ona mātua e ala i se pomu ʻati fanaiʻa, sa tatalo leotele ai le teineitiiti ma le naunautai ina ia faasao i latou mo le faaauauina o la latou auaunaga ia Ieova. Sa ootia lagona o ē na semanū e faia le fasiotiga tagata, ma latou toe faasaoina ai le aiga, i le faapea atu i ai, “E lē mafai ona matou fasiotia outou talu ai lenei teineitiiti.”—1 Peteru 3:12.
15. O ā taaʻiga leaga na lapatai mai ai Paulo?
15 O le toatele o a tatou tamaiti atonu latou te lē o fetaiai ma ni tulaga faigata e pei o tulaga o loo faamatalaina i luga, peitai e tele tofotofoga o loo latou fesagai i aʻoga ma i totonu o sosaiete faapiopio i aso nei: o gagana masoā, o ata lē mamā, o faafiafiaga matagā, ma omiga mai aumea ina ia faia amioga sese, ua matuā taatele i le tele o nofoaga. Sa lapatai soo mai le aposetolo o Paulo faasaga i nei taaʻiga.—1 Korinito 5:6; 15:33, 34; Efeso 5:3-7.
16. E ono avea faapefea se tasi ma ipu mo se faaaogaina e taʻuleleia?
16 Ina ua uma ona faasino atu i ipu ua teuina, “o isi ua taʻuleleia, a o isi ua taʻuleagaina,” ona faapea mai lea o Paulo: “O lenei, ai se tasi e faamamā ia te ia ai nei mea ua taʻuleagaina, e fai o ia ma ipu e taʻuleleia, e faasaina [“faapaiaina,” NW], e aoga foi mo le alii, ua saunia mo galuega lelei uma.” O lea seʻi o tatou faalaeiauina a tatou talavou ina ia mataala i a latou aumea. Ia latou “sola ese i tuʻinanau o taulelea, ia . . . tausisi i le amiotonu, ma le faatuatua, ma le alofa, atoa ma le filemu, faatasi ma i latou o e valaau i le Alii ai le loto mamā.” (2 Timoteo 2:20-22) O se polokalame a le aiga mo le “fefaamafanafanai” e mafai ona matuā aogā i le sauniunia o a tatou talavou. (1 Tesalonia 5:11; Faataoto 22:6) O le faitauina ma le suesueina o le Tusi Paia i aso taitasi e faaaogā ai ni lomiga talafeagai a le Sosaiete, e mafai ona avea ma fesoasoani sili.
Le Sauniunia o Tagata Uma Lava
17. O le a faapefea i aoaiga ona sauniunia ai i tatou, faatasi ai ma le ā le iuga olioli?
17 Ina ia sauniunia i tatou, ua aumaia e Ieova fautuaga i lana Afioga ma auala mai i lana faalapotopotoga. Aua lava neʻi teena na fautuaga faaleatua! Ia tali atu i ai ma le atamai, ma ia faataga e saunia ai oe mo se faaaogaina e taʻuleleia e Ieova. Ua fautua mai le Faataoto 3:11, 12: “Loʻu atalii e, aua le faatauvaa ia te oe le aoaiga a Ieova; aua foi e te ʻinoʻino pe a aoaiina oe e ia. Auā o le ua alofagia e Ieova, e aoaiina o ia e ia; e pei o le tamā ona aoaiina o lona atalii ua ia fiafia i ai.” O isi fautuaga faatamā o loo maua i le Eperu 12:6-11: “O le ua alofagia e le Alii, ua aoai atu o ia ia te ia . . . O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aʻoaʻoina ai.” O le ala autū o na aoaiga e tatau ona maua mai i le Afioga faagaeeina a le Atua.—2 Timoteo 3:16, 17.
18. O le ā tatou te aʻoaʻoina mai le Luka mataupu e 15 e tusa ai o le salamō?
18 E alofa mutimutivale foi Ieova. (Esoto 34:6) Pe afai e faaalia le salamō moni mai le loto e tusa lava po o se agasala e sili ona matuia, e faasalafa mai e ia lana faamagaloga. E oo lava i ‘uii faamaumauoa’ o aso nei e mafai ona sauniunia i latou e avea ma ipu mo se faaaogaina e taʻuleleia. (Luka 15:22-24, 32) Atonu e lē tutusa le matuia o a tatou agasala ma le matuia o agasala a le uii faamaumauoa. Peitai, o lo tatou tali atu ma le lotomaulalo i fautuaga a le Tusi Paia o le a taitaiina atu ai pea i le sauniunia o i tatou e avea ma ipu mo se faaaogaina e taʻuleleia.
19. E mafai faapefea ona tatou faaauau ona auauna atu o ni ipu e taʻuleleia i aao o Ieova?
19 Ina ua tatou faatoʻā aʻoaʻoina le upu moni, sa tatou faaalia se naunautai e faataga Ieova na te toleniina i tatou. Na tatou lafoai ala faalelalolagi, sa amata ona tatou oofu i le tagata fou, ma avea ma Kerisiano tuuina atu ma papatisoina. Sa tatou usiusitai i le fautuaga a le Efeso 4:20-24, ‘ina ia to ese le tagata tuai o loo ua leaga e tusa ma a tatou amioga tuai, e tusa ma tuʻinanau e faasese ai, ae ia oofu i le tagata fou ua faia e tusa o le finagalo o le Atua, i le amiotonu ma le amio lelei e faamaoni.’ Tau ina ia faaauau ona tatou gauai totino atu i aao o Ieova, le Fai Ipu Omea Sili, i le auauna pea o ni ipu mo lona faaaogaina e taʻuleleia!
I le Autaluga
◻ O le ā le fuafuaga a le Fai Ipu Omea Sili mo lo tatou lalolagi?
◻ E ono sauniunia faapefea oe mo se faaaogaina e taʻuleleia?
◻ I le ā le auala e mafai ona fafauina ai a tatou fanau?
◻ O le ā le vaaiga e tatau ona tatou vaai ai i aoaiga?
[Ata i le itulau 10]
Po o le a sauniunia ea oe mo se faaaogaina e taʻuleleia pe teena?
[Ata i le itulau 12]
E mafai ona fafauina aʻe tamaiti mai lava a o tamameamea