Polokalame Fou o le Aso Faapitoa o Fonotaga

O le matua o le polokalame mo le aso faapitoa o fonotaga mo le tausaga faaleauaunaga o le 2008, “O Tatou o le Omea—A o Ieova le Tufuga,” e faavae mai i le Isaia 64:8. O le a fesoasoani fautuaga faale-Tusi Paia mai lenei polokalame e faatuputeleina ai lo tatou talisapaia o le poto, le faamasinotonu, le mana ma le alofa o Ieova o se Tufuga Sili.

I le lauga a le ovasia matagaluega, “Ia Auauna o ni Ipu e Taʻuleleia i le Faiva,” o le a faailoa mai ai le auala ua olioli ai le toʻatele o tagata, i le tele o faamanuiaga i le mauaina o le upu moni ma le tufa atu i isi. O le a faailoa mai e le lauga “O le Manatunatu Loloto e Leoleoina ai Oe,” le auala e puipuia ai i tatou ona o le manatunatu loloto i taʻiala amiotonu a Ieova. O le a faauaʻi e le failauga asiasi i tatou i ana lauga “E Lē ‘Amio Faatasi ma Lenei Lalolagi’” ma “Ia Sauniunia e le Fai Ipu Omea Sili.” O le a faalaeiauina mātua ma talavou i lauga nei, “O Talavou o Loo Aogā iā Ieova” ma “Le Matafaioi Tāua a Mātua i le Tausia Aʻe o Fanau.” E ala i faataʻitaʻiga ma faatalanoaga, o le a tatou fiafia e faalogologo ma mātauina mea na faataunuu e o tatou uso ma tuafāfine i le latou faiva. O ē ua mananaʻo e faailoga lo latou tuuina atu iā Ieova e ala i le papatisoga, e ao ona vave logo le ovasia taʻimua mo lenā tulaga. Ia faamautinoa e aumai lau Olomatamata mo le suʻesuʻeina i le vaiaso o le aso faapitoa o fonotaga.

Po o ā lava mea e finagalo i ai le Tufuga Sili, e na te faataunuuina. Peitaʻi, e ao ona filifili le tagata lava ia i le auala o le a ia tali atu ai i Ana faatonuga. O i latou e gauaʻi faamaoni i tapulaa ma fetuutuunaʻiga a Ieova, e ono pei i latou o se paluga ele o loo gaosia i lima o le tufuga, lea o le a faamatagofieina ma avea o se ipu e sili ona aogā. Pe a tatou felagolagomaʻi ma Ieova, o le a tatou faamamaluina lana pule silisili ese ma maua le tele o faamanuiaga.