Feteenaiga i se Laueleele “Paia”

IA Iulai 15, 1099, na ausia ai le sini o le Uluai Taua o Laueleele Paia, lea na faatonuina e le pope o Roma, ina ia puleaina Ierusalema. Sa matuā matautia le fasiotiga tagata na faia ai! E na o le pau lava tagata na aināina le laueleele na sao mai, o le kovana ma lana leoleo e puipuia lona saogalemu, ina ua uma ona totogia se tau tele o le faatogafalea. I lana tusi The Crusades, o loo lipotia ai e le faifeau o Antony Bridge le mea na tupu i le isi vaega uma na totoe o tagata Musalimi ma tagata Siu na aināina le laueleele: “O le taimi lava na matala mai ai fitafita o le taua i totonu o le aai, na matuā faamaeʻaeʻa ai loa ona latou faia se faamasaatoto tele ma le matautia. . . . Na latou fasiotia uma tane, fafine ma tamaiti na mafai ona latou maua i totonu o le aai . . . Ina ua leai se tasi na totoe e fasiotia, ona alu atu loa lea o le solo umi a le au manumalo i le alatele o le aai . . . e agaʻi atu i le Falesa o le Holy Sepulchre e avatu le faafetai i le Atua.”

Talu mai le manumalo a fitafita o taua paia, ua faailogaina ai le auai o Kerisinetoma i totonu o Ierusalema i femisaaiga i le va o le Katoliko Roma, le lotu Orthodox i Sasaʻe, ma isi lotu ua taʻua o lotu Kerisiano. I le 1850, na avea ai se finauga i le va o nisi taʻitaʻi lotu i ni laueleele paia i Ierusalema ma ona vaipanoa, ma mafuaaga autū o le Crimean War. Sa tau Egelani, Falani, ma le Setete o Take e tetee atu ia Rusia, ma e ʻafa miliona le aofai o tagata na maliliu ai.

Sa lei aumaia e le taua le iuga i feeseeseaiga a Kerisinetoma ia Ierusalema ma ona laueleele paia. O tagata Take, o ē na puleaina le atunuu i lena taimi, sa latou taumafai e aumaia le filemu, e ala i le vaevaeina o laueleele paia i lotu eseese. “O lenei faatulagaga,” o le tala lea a Dr. Menashe Har-el i lana tusi This Is Jerusalem, “sa taliaina . . . e Malo Aufaatasi e tusa ai o le faaiuga tau vaevaeina (Partition Resolution) lea na pasia ia Novema 1947. Ua avea ai la ma vaega o le tulafono faava-o-malo.” O le iuga, ua tuuina atu ai le Falesa o le Holy Sepulchre ina ia pulea e tagata Katoliko Roma, le lotu Orthodox a Eleni, tagata Armenia, Suria, ma Copt. O le iuga, na faamausalī e tagata Aitiope la latou aiā i lenei falesa e ala i le faia e nisi o o latou tagata ni faleoo i luga o le taualuga o le falesa ma nonofo ai. Sa manatu le toatele o tagata i le Falesa o le Holy Sepulchre faapea o le laueleele sili ona paia lea a Kerisinetoma. Ua faatumulia i tamai malumalu, o faatusa, ma maa faamanatu. O le isi laueleele na taʻua o le laueleele paia, o le Kalevario o Gordon, lea e faamamalu e nisi tagata Porotesano faapea o le nofoaga lea na fasiotia ma tanumia ai Iesu.

I se taimi ua leva na fetalai atu ai Iesu i se fafine o lē na talitonu i nofoaga paia: “E oo mai ona aso, tou te tapuai ai i le Tamā e lē i lenei mauga, e lē i Ierusalema foi. . . . O ē tapuai faamaoni latou te tapuai i le Tamā i le agaga ma le upu moni.” (Ioane 4:21-24, NW) O lea la, e lē faamamaluina e Kerisiano moni ni laueleele paia. O le faaumatiaga o Ierusalema lē faatuatua e autau a Roma i le 70 T.A. o loo avea pea ma lapataiga ia Kerisinetoma. O lona ifo i tupua, o ana fevaevaeaiga, ma le faamasaatoto ua lē tutusa lea ma lona faapea mai o se Kerisiano. O lea la, o le a puapuagatia ai o ia i le mala ua valoia mai e le Atua mo lotu uma o loo faia aʻe ai Papelonia le Aai Tele.—Faaaliga 18:2-8.