Na Fesoasoani o Ia i le Faasalalauina o le Malamalama “i Tuluʻiga o le Lalolagi”
NA FAAAOGĀINA le aposetolo o Paulo ina ia faasalalauina le malamalama faaleagaga “i tuluʻiga o le lalolagi.” O le iʻuga, “ua faatuatua foi [le toatele] . . . ua saunia i le ola e faavavau.”—Galuega 13:47, 48, LT; Isaia 49:6.
Na faamaonia sa iai i le olaga tuutōina ma taumafaiga faa-Kerisiano e aunoa ma se faavaivai a William Lloyd Barry se faanaunauga filigā ina ia faasalalauina atu le malamalama faaleagaga, ma o ia o se sui o le Vaega Pule o Molimau a Ieova. Na maliu le uso o Barry ia Iulai 2, 1999, a o faia tuusaʻo atu sana vaega i se tauaofiaga itumalo i Hawaii.
Na soifua mai Lloyd Barry i Niu Sila ia Tesema 20, 1916. Muamua atu na faaalia ai e lona tinā ma lona tamā se naunau maelegā i upu moni o le Tusi Paia sa aumaia i lomiga a C. T. Russell, ia sa tufatufaina e le Watch Tower Bible and Tract Society. O lea, sa soifua aʻe ai le uso o Barry i se aiga Kerisiano tuutōina.
E ui sa fiafia i taaloga ma aʻoaʻoga, ma oo lava ina mauaina se faailoga i mataupu faasaienisi, ae na tumau pea ona taulaʻi atu ma le naunautaʻi le uso o Barry i mea faaleagaga. O lea, ia Ianuari 1, 1939, na auai ai o ia i le faiva faataimi atoa, avea ma sui o le aiga Peteli i le ofisa o le Sosaiete i Ausetalia. Ina ua faasāina e le malo le galuega a le Sosaiete i le 1941, na faaauau pea ona galue le uso o Barry i le ofisa, ma na iai ni taimi na tofiaina ai o ia e lomia ni mataupu e faalaeiʻauina ai uso talitonu. Na faapea foi ona taulāmua o ia e avea o se faaaʻoaʻo lelei i le faiva i le lautele.
Ia Fepuari 1942, na faaipoipo atu ai le uso o Barry i sē na auauna foi faataimi atoa. Na galue soosoo tauʻau atu ma le faamaoni lona faletua o Melba faatasi ma ia i nei tausaga uma i le tele o vaipanoa o le lalolagi. Na laasia e i laʻua se laasaga tele ina ia auauna ai i atunuu ese e ala i le auai atu i le vasega lona 11 o le Aʻoga Faale-Tusi Paia a le Olomatamata o Kiliata i le Iunaite Setete. Na manatu le toʻatele i lo la tofiga i Iapani, o ‘se tuluʻiga o le lalolagi.’ Ina ua taunuu ia Novema 1949, ona amata loa lea ona la galulue o ni misionare i le taulaga o Kobe lea e iai le uafu. I lena taimi, sa na o le toʻa 12 tagata na talaʻia le tala lelei i Iapani. Na aʻoaʻoina e le uso o Barry le gagana ma tū masani a le atunuu na avea ma ona aiga fou ma atiina aʻe se alofa loloto mo tagata Iapani, o ē na latou auauna faatasi mo le isi 25 tausaga. Sa manino i le auuso Kerisiano o loo tuputupu aʻe i Iapani, lona alofa mo ē “ua saunia i le ola faavavau,” ma na fesoasoani ai ia te ia e tinoū i le vaavaaia o le lālā mo le faitau sefulu o tausaga.
I le ogatotonu o le 1975, ina ua pe ā ma le 30,000 Molimau i Iapani, na siitia atu ai loa le uso o Barry ma lana avā i Brooklyn, Niu Ioka. I le avea ma Kerisiano faauuagagaina, na valaaulia ai le uso o Barry e auauna o se sui o le Vaega Pule o Molimau a Ieova. (Roma 8:16, 17) O lona poto masani i mea tau tusitusiga na mautinoa le matuā aogā i lana galuega fou i le Matagaluega o Tusitusiga. Ma o le tele o lona poto masani e faatatau i galuegafai i totonu o lālā ma isi atunuu na faaauupegaina ai o ia e faia se sao tāua o se sui o le Komiti Lomitusi a le Vaega Pule.
A o faagasolo tausaga, sa tumau pea le alofa o le uso o Barry mo atunuu i Sasaʻe ma ona tagata. E mafai ona mautinoa e tagata aʻoga o le Aʻoga o Kiliata ma sui o le aiga Peteli e faapea o ana lauga ma ana faamatalaga na faamatilatilaina ai tala faamafanafanaloto e uiga i le toʻatele o ē na auauna i le galuega faamisionare. Sa pei lava o loo faatino moni galuega o le talaʻiga o le Malo i “tuluʻiga o le lalolagi” pe a faamatalaina nei ma le aasa e le uso o Barry mea na oo totino ia te ia. O nisi o nei mea o loo taʻua i lana tala na lomiaina i le Watchtower o Setema 15, 1960.
Tatou te mautinoa e faapea i le avea ai o se ‘suli faatasi ma Keriso,’ o le a faaauau pea le naunau o le uso o Barry ia i latou o ē ua “saunia i le ola e faavavau.” O le mea moni, o le a matuā misia o ia e i latou uma na iloa ma alolofa ia te ia o se tane faaleagaga, sa tuutōina atu atoatoa ia Ieova ma alofa māfana mo tagata o le Atua. Ae peitai, tatou te olioli ona sa tumau ma le faamaoni le uso o Barry seʻia oo ina faaiʻuina lona soifua i le lalolagi.—Faaaliga 2:10.
[Ata i le itulau 16]
Lloyd Barry ma John Barr ina ua tatalaina le tusi o le “Insight on the Scriptures” i le 1998
[Ata i le itulau 16]
Le aufaauu o le vasega lona 11 o Kiliata, feiloaʻi i Iapani ina ua mavae le 40 tausaga