Ia Tumau Atoatoa ma le Mautinoa
“O loo finafinau e le aunoa [o ia] i tatalo mo outou; ina ia outou tumau ua atoatoa ona lelei, ma ua mautinoa le finagalo uma lava o le Atua.”—KOLOSE 4:12, LT.
1, 2. (a) O le ā se mea na mātauina mai e tagata i tua e faatatau i uluaʻi Kerisiano? (e) Ua faapefea ona atagia mai le naunau alofa i le tusi o Kolose?
SA MATUĀ naunau lava soo o Iesu i isi o latou uso tapuaʻi. Na taʻua e Tetuliano (se tusitala o le senituri lona lua ma le lona tolu T.A.) le agalelei sa latou faaali atu i tamaiti sa aumatuā, o ē matitiva, ma ē ua matutua. O na faamaoniga o le alofa e ala i gaoioiga sa matuā maofa ai tagata lē talitonu ma faapea mai ai nisi e faatatau i Kerisiano, ‘Tagaʻi i le auala latou te alolofa ai le tasi i le tasi.’
2 Ua atagia mai i le tusi o Kolose lena naunau alofa o le aposetolo o Paulo ma lana aumea o Epafara mo uso ma tuafāfine i Kolose. Na tusi atu Paulo ia i latou: O Epafara “o loo finafinau e le aunoa i tatalo mo outou; ina ia outou tumau ua atoatoa ona lelei, ma ua mautinoa le finagalo uma lava o le Atua.” A o faagasolo le 2001, o le a faaaogā ai e Molimau a Ieova e avea ma a latou mau o le tausaga nei upu o le Kolose 4:12, (LT): “Ia outou tumau ua atoatoa ona lelei, ma ua mautinoa le finagalo uma lava o le Atua.”
3. O ā mea e lua na tatalo ai Epafara?
3 E mafai ona e iloa e lua vala sa tatalo i ai Epafara mo ē pele ia te ia: (1) ina ia latou “tumau ua atoatoa ona lelei” ma lona (2) ina ia latou tumau “ma ua mautinoa le finagalo uma lava o le Atua.” O lenei faamatalaga sa faaaofia mai i le Tusi Paia mo so tatou lelei. Seʻi e fesili ifo la ia te oe lava, ‘O le ā se mea ou te manaʻomia totino ona fai ina ia ou tumau ai i le atoatoa ona lelei ma ua ou mautinoa i le finagalo uma lava o le Atua? Ma a o oʻu faia faapea, o le ā se iʻuga o le a iai?’ Seʻi o tatou tilofaʻia.
Ia Tauivi e ‘Tumau i le Atoatoa Ona Lelei’
4. O le ā le uiga sa manaʻomia ona “atoatoa ona lelei” ai Kerisiano i Kolose?
4 Sa matuā faanaunau Epafara ina ia ‘tumau i le atoatoa ona lelei’ ona uso ma tuafāfine faaleagaga i Kolose. O le upu sa faaaogā e Paulo, lea ua taʻua iinei o le “atoatoa ona lelei,” e mafai ona iai le uiga o le lelei atoatoa, ua tagata matua, po ua taʻumatuaina. (Mataio 19:21; Eperu 5:14; Iakopo 1:4, 25) Atonu ua e silafia, o le avea o se tasi ma Molimau papatiso a Ieova e lē otometi ai ona avea o ia o se Kerisiano ua taʻumatuaina. Na tusi atu Paulo i Kerisiano Efeso, o ē na nonofo i le itu i sisifo o Kolose e faapea, e taumafai leoleo mamoe ma aʻoaʻo e fesoasoani ina ia “oo atu o i tatou uma lava i le loto gatasi i la le faatuatua, ma le iloa lelei o le Alo o le Atua, ia fai foi ma tagata matua, ia oo i le fua o le ua matua, e tatau ma le tumu o Keriso.” E iai foʻi isi tusi na faamalosiau atu ai Paulo i Kerisiano ina ia latou “tagata matutua i le mafaufau.”—Efeso 4:8-13, LF; 1 Korinito 14:20.
5. E mafai faapefea ona avea ma o tatou sini autū le atoatoa ona lelei?
5 Pe afai na iai nisi i Kolose sa leʻi oo ina tagata matutua, pe taʻumatuaina faaleagaga, sa manaʻomia ona avea lena ma o latou sini. Pe lē tatau ea ona moni foʻi lena mea i aso nei? E tusa lava po ua fia sefulu tausaga talu ona tatou papatiso pe leʻi leva foʻi, pe mafai ea ona tatou iloa o loo tatou agaʻigaʻi moni lava i luma i o tatou tomai faalemafaufau ma o tatou manatu faaalia? Pe tatou te mafaufauina ea mataupu silisili o le Tusi Paia a o tatou leʻi faia ni faaiʻuga? Po o sili ea ona faatāuaina i o tatou olaga mataupu e fesootaʻi i le finagalo o le Atua ma manaʻoga o le faapotopotoga, na i lo le avea o ni mea e tau ina fai pe a fetaui? E lē mafai i lenei mataupu ona tatou faataʻitaʻia ai auala uma tatou te ono faaatagia atu ai lena tuputupu aʻe i le atoatoa, ae seʻi talanoaina ni faaaʻoaʻoga se lua.
6. O le ā se vaipanoa e mafai e se tasi ona ia agaʻigaʻi ai i luma ina ia lelei atoatoa, e pei o Ieova?
6 Faaaʻoaʻoga muamua: Seʻi faapea na tatou ola aʻe i se siʻomaga ua mātaulia i faiga faailogatagata po o le ʻinoʻino i tagata o se isi lanu, isi atunuu, po o isi vaipanoa. Ua tatou iloa nei e lē faailogatagata le Atua ma e lē tatau foʻi la ona tatou faapena. (Galuega 10:14, 15, 34, 35) I la tatou faapotopotoga po o le matagaluega, e iai tagata e ese o latou tupuaga mai, ae o lea tatou te iai faatasi ma i latou. Peitaʻi, o le ā le mamao e tumau ai pea i o tatou loto ni lagona lē lelei po o ni masalosaloga i tagata mai lena tupuaga? Pe tatou te soona inainā ea, e vave ona mafaufau leaga pe a faia e se tasi mai lena tupuaga se measesē po ua na o sina ona masei mai foʻi ia i tatou? Fesili ifo ia te oe lava, ‘Pe manaʻomia ea ona ou agaʻigaʻi atili i luma ina ia ou maua le silafaga lē faailogatagata a le Atua?’
7. O le atoatoa i le avea o se Kerisiano e mafai ona aofia ai le mauaina o le ā le manatu e faatatau i isi?
7 Faaaʻoaʻoga e lua: E tusa ai o le Filipi 2:3, e lē tatau ona tatou “faia se mea e tasi ma le finau vale, ma le mitamita fua; a ia taitasi [i tatou] ma manatu ma le loto maulalo, ua sili nisi.” O faapeʻī lo tatou agaʻigaʻi i luma i lenei itu? E tofu lava le tagata ma itu e vaivai ai ma itu foʻi e malosi ai. Pe afai i le taimi ua teʻa sa vave ai ona tatou mātauina vaivaiga o isi, po ua tatou agaʻigaʻi ea i luma, tatou te lē toe faatalitalia ai i latou ina ia toetoe lava “lelei atoatoa”? (Iakopo 3:2, faatusatusa i le NW.) I le taimi nei, e sili atu na i lo muamua, po o mafai ea ona tatou iloa atu—pe saʻili mo—auala e silisili atu ai isi? ‘E tatau ona ou ioe, e silisili atu lenei tuafafine na i lo aʻu i le lava o lona onosai.’ ‘E sili atu ona tele le faatuatua mautinoa o le tagata le la na i lo aʻu.’ ‘Pe a tuusaʻo le manatu, e sili atu le lelei o lana faiaʻoga na i lo aʻu.’ ‘E silisili o ia i le puleaina o lona ita.’ Atonu o le itu lenei sa manaʻomia e nisi Kerisiano i Kolose ona latou agaʻigaʻi ai i luma. Po o faapena ea tatou?
8, 9. (a) I le ā le uiga na tatalo atu ai Epafara mo Kerisiano i Kolose ina ia “tumau” atoatoa? (e) O le ā ua faaalia mai e le ‘tumau i le atoatoa ona lelei’ e tusa ai o le lumanaʻi?
8 Sa tatalo Epafara ina ia mafai e Kerisiano i Kolose ona ‘tumau i le atoatoa ona lelei.’ E manino lava, sa tatalo Epafara i le Atua ina ia mafai e le tele lea ua atoatoa, ua tagata matutua, ma taʻumatuaina ai Kerisiano i Kolose, ona latou “tumau” ai, pe faaauau ai i lena tulaga.
9 E lē mafai ona tatou faia se faaiʻuga mautinoa faapea o tagata taʻitoʻatasi uma ua avea ma Kerisiano, e oo lava i sē ua taʻumatuaina, o le a faaauau ai pea i lena tulaga. Na fetalai Iesu faapea, sa iai se atalii agelu o le Atua na leʻi “tumau lava ia i le upu moni.” (Ioane 8:44, LT) Na faamanatu atu foʻi e Paulo i Kerisiano i Korinito nisi i aso ua teʻa o ē na auauna ia Ieova mo sina taimi ae na toe paʻūʻū ese. Sa ia lapataʻia uso faauuagagaina: “O lē manatu o loo o tu ia, ina faaeteete ia neʻi paū.” (1 Korinito 10:12) Ua faamalosia atili e lenei lapataʻiga le tatalo ina ia mafai e Kerisiano i Kolose ona ‘tumau i le atoatoa ona lelei.’ O le taimi lava na avea ai i latou o ni tagata ua atoatoa, ua tagata matutua, sa manaʻomia ona latou maumauaʻi, ia lē tuumuli ese, ia lē faavaivai, pe tafetafea ese atu. (Eperu 2:1; 3:12; 6:6; 10:39; 12:25) O lea la, o le a latou “atoatoa ona lelei” ai i le aso e asiasia ai i latou ma aumaia ai lo latou faamaoniga faaiʻu.—2 Korinito 5:10; 1 Peteru 2:12.
10, 11. (a) O le ā le faaaʻoaʻoga na faataatia e Epafara mo i tatou e tusa ai o tatalo? (e) I le ōgatusa ma le mea na faia e Epafara, o le ā se faaiʻuga e te manaʻo e fai?
10 Ua uma ona tatou talanoaina le tāua o le tatalo mo isi i le taʻua o o latou igoa, e faapatino ai le ole atu ina ia fesoasoani Ieova ia i latou, ia faamaise ia i latou, ia faamanuia i latou, ma foaʻi ia i latou le agaga paia. Sa faapena tatalo a Epafara mo Kerisiano i Kolose. Ma tatou te mafai—o le mea moni e tatau ona tatou—maua i na upu se manatu aogā e faatatau i mea tatou te taʻuina atu ia Ieova i le tatalo e uiga ia i tatou lava. Ma le lē mafesiligia, e tatau ona tatou ole atu mo le fesoasoani a Ieova i lea itu, ina ia mafai e i tatou taʻitoʻatasi ona ‘tumau i le atoatoa ona lelei.’ Po o e faia ea faapena?
11 Aiseā e lē taʻua ai lou tulaga i le tatalo? Talanoa atu i le Atua e faatatau i le mamao ua oo i ai lou agaʻigaʻi i luma i le avea o oe ma sē ua “atoatoa ona lelei,” ua tagata matua, ua taʻumatuaina. ʻAiʻoi atu ia te ia e fesoasoani mai ina ia e mātaulia vaipanoa e manaʻomia ona e tuputupu aʻe ai faaleagaga. (Salamo 17:3; 139:23, 24) E mautinoa lava, o loo ia te oe nisi o na vaipanoa. O lea la, na i lo le lotovaivai ai i lenei itu, ia manino lau faatoga atu i le Atua, talosaga saʻo atu mo se fesoasoani ina ia e agaʻigaʻi i luma. Ia sili atu i le faatasi ona e faia lenei mea. O le mea moni, aiseā e te lē filifili ai faapea, i le vaiaso o loo lumanaʻi nei o le a faaumiumi ai lau tatalo atu mo se fesoasoani ina ia e ‘tumau i le atoatoa ona lelei.’ Ma ia e fuafua e faia atili lena mea a o e manatunatu i le mau o le tausaga. I au tatalo, ia taulaʻi atu i ni ou faalogona atonu o loo iai o le toe fia solomuli, ia toe faavaivai, pe tafetafea ese atu mai le auaunaga a le Atua ma le auala e mafai ai ona e ʻalofia lena mea.—Efeso 6:11, 13, 14, 18.
Ia Tatalo mo le Mautinoa
12. Aiseā na manaʻomia faapitoa ai lava e Kerisiano i Kolose se “mautinoa”?
12 Sa tatalo foʻi Epafara mo se isi mea sa matuā tāua pe afai e mananaʻo Kerisiano i Kolose e maua atu i latou ua iʻu ina tumau ma taliaina e le Atua. E tutusa lelei lona tāua mo i tatou. O le ā lena mea? Sa ia tatalo ina ia latou tumau ma ia “mautinoa [i] le finagalo uma lava o le Atua.” Sa siʻomia i latou i filosofia e feteenaʻi ma aʻoaʻoga faalotu ma filosofia leaga, o nisi o na filosofia sa taufaasesē lona foliga mai e peiseai o le tapuaʻiga moni lea. Mo se faaaʻoaʻoga, sa uunaʻia i latou ina ia tausia ni aso faapitoa e anapogi pe faia ai ni faigaʻai e pei ona sa manaʻomia muamua i le tapuaʻiga faa-Iutaia. Sa taulaʻi atu aʻoaʻo pepelo i agelu, o agaga malolosi na sa faaaogā e momoliina atu le Tulafono ia Mose. Seʻi faaata i le mafaufau le aafia i ni omiga faapena! O se matuā lavelave lava o na manatu feteenaʻi.—Kalatia 3:19; Kolose 2:8, 16-18.
13. O le amanaʻiaina o le ā le vala na mafai ona fesoasoani i Kerisiano i Kolose, ma e mafai faapefea ona fesoasoani lena vala ia i tatou?
13 Sa avatu e Paulo ni faamaoniga o ona manatu e ala i le faamamafaina o le matafaioi a Iesu Keriso. “Faapei ona outou talia o le Alii Keriso Iesu, ia savavali ai outou o ia te ia; ia mauaa outou ma ia atiina ae ia te ia, ma ia faatumauina i le faatuatua, faapei ona aʻoaʻoina o outou.” Ioe, sa iai se manaʻoga (o Kerisiano i Kolose ma i tatou foʻi) mo se talitonuga atoatoa e uiga i le matafaioi a Keriso i fuafuaga a le Atua ma i o tatou olaga. Na faamatala mai e Paulo: “O loo mau i totonu ia te ia le tumu uma lava o le uiga Atua ua i lona tino; o loo ua faaatoatoaina foi outou ia te ia; o le ulu ia o alii sili uma lava atoa ma faipule.”—Kolose 2:6-10.
14. Aiseā na avea ai le faamoemoe o se mea moni mo i latou sa i Kolose?
14 O uso i Kolose o ni Kerisiano faauuagagaina. Sa ia i latou se faamoemoe maʻoti, le ola i le lagi, ma sa ia i latou māfuaaga uma e tatau ai ona latou matuā mautinoa i lena faamoemoe. (Kolose 1:5) O ‘le finagalo o le Atua’ ina ia ia i latou le talitonuga mausalī e faatatau i le mautinoa o lo latou faamoemoe. Pe tatau ea ona masalomia e se tasi o i latou lena faamoemoe? E leai lava! Pe tatau ea ona ese mai i aso nei mo i latou uma ua iai le faamoemoe na foaʻiina mai e le Atua ina ia ola i se parataiso i le lalolagi? E matuā leai lava! O lena faamoemoe mautinoa e manino lava le avea ma vaega o ‘le finagalo o le Atua.’ Seʻi manatu nei la i fesili nei: Pe afai o loo e taumafai ia avea oe o se tasi o le “motu o tagata e toatele” o lē o le a faasaoolaina mai “le puapuaga tele,” o faapeʻī le moni o lou faamoemoe? (Faaaliga 7:9, 14) Po o avea ea ma vaega o lou ‘mautinoa i le finagalo uma lava o le Atua’?
15. O le ā le faasologa na otooto mai e Paulo lea sa aofia ai le faamoemoe?
15 I le taʻua o le “faamoemoe,” tatou te lē o faauiga atu i se faanaunauga o loo momoo lē mautinoa i ai, po o se miti. E mafai ona tatou faamaonia lenei manatu mai le faasologa o manatu na folasia e Paulo i se taimi muamua atu i Kerisiano i Roma. I lena faasologa, e fesootaʻi atu ai pe tataʻi atu mea taʻitasi uma na taʻua, i le isi mea e sosoo mai. Seʻi mātau foʻi le vaega ua faatulaga ai e Paulo le “faamoemoe” i lona manatu: “Ua tatou mitamita foi i puapuaga, ina ua tatou iloa o le puapuaga e tupu ai le onosai, o le onosai e tupu ai le [“tulaga faamaonia,” NW ] o le [“tulaga faamaonia,” NW ] e tupu ai le faamoemoe; o le faamoemoe foi e le mā ai, auā ua faamaligi mai le alofa o le Atua i o tatou loto e le Agaga Paia.”—Roma 5:3-5.
16. A o e aʻoaʻoina upu moni a le Tusi Paia, o le ā le faamoemoe na e maua ai?
16 Ina ua faatoʻā tufa atu lava e Molimau a Ieova le feʻau o le Tusi Paia ia te oe, atonu e iai se upu moni patino na sili ona e uaʻi atu i ai, e pei o le tulaga o ē ua maliliu po o le toetū. Mo le toʻatele o tagata, o le manatu autū fou sa faatoʻā maua o le avanoa lea e faavae i le Tusi Paia mo le mauaina o le ola i luga o se lalolagi parataiso. Seʻi manatu i le taimi na e faatoʻā faalogo ai lava i lena aʻoaʻoga. Maʻeu se faamoemoe ofoofogia—o le a lē toe iai se maʻi ma le soifua matua, e mafai ona e ola pea e olioli i fua o au galuega, ma o le a iai le filemu faatasi ma manu! (Failauga 9:5, 10; Isaia 65:17-25; Ioane 5:28, 29; Faaaliga 21:3, 4) Ua e maua se faamoemoe ofoofogia!
17, 18. (a) Na faapefea i le faasologa o mea ia na taʻu atu e Paulo i Kerisiano i Roma ona taʻitaʻia atu ai i le faamoemoe? (e) O le ā le ituaiga o faamoemoe o loo faauiga atu i ai le Roma 5:4, 5, ma pe o ia te oe ea lena faamoemoe?
17 Mulimuli ane, atonu sa e fesagaʻi ai ma ni teteega po o ni sauāga. (Mataio 10:34-39; 24:9) E oo lava i taimi e leʻi mamao tele atu, na gaoia ai ma faaleagaina fale o Molimau i nisi atunuu, pe na oo foʻi ina latou sosola ese ma avea ai ma tagata sulufaʻi. O nisi na sasaina, sa aveesea a latou lomiga faale-Tusi Paia, pe avea ma taulaʻiga o lipoti pepelo a le ʻaufaifaasalalauga. Po o le ā lava le ituaiga o sauāga o loo fesagaʻi ma oe, ae pei ona taʻua e le Roma 5:3, e mafai ona e olioli i puapuaga, ma aumaia ai se iʻuga lelei. E pei lava ona tusi mai Paulo, o puapuaga e faatupuina ai ia te oe le onosai. Ona taʻitaʻia atu lea e le onosai i se tulaga faamaonia. Sa e iloa o le mea saʻo lea na e faia, le faia o le finagalo o le Atua, o lea na e mautinoa ai sa ia te oe lana faamaoniga. E tusa ai o upu a Paulo, sa e lagonaina lou iai i se “tulaga faamaonia.” Ina ia faaauau, na tusi mai Paulo e faapea “o le tulaga faamaonia e tupu ai le faamoemoe.” Atonu e foliga uigaese mai lena mea. Aiseā na mulimuli ai lava lisi mai e Paulo le “faamoemoe” i le faasologa? Pe lē ua leva ea ona ia te oe le faamoemoe, mai lava i le taimi na e muaʻi faalogo ai i le tala lelei?
18 E manino lava, e lē o faasino atu upu a Paulo iinei i o tatou uluaʻi faalogona e uiga i le faamoemoe i se olaga lelei atoatoa. O le mea o loo ia faasino atu i ai e maotua atu na i lo lena; e loloto atu, e atili uunaʻia ai e gaoioi. Pe a tatou onosai ma le faamaoni ma iloa ai o loo ia i tatou le faamaoniga a le Atua, e iai se aafiaga aogā o lenei mea ina ia atili uigā ma faamalosia ai lo tatou uluaʻi faamoemoe. O le faamoemoe lea sa ia i tatou ua amata nei ona atili avea o se mea moni, ua atili faamausalīina, ma atili avea o sa tatou lava mea totino. O lenei faamoemoe ua faalolotoina ua atili malamalama lona susulu mai. Ua matuā ulufia ai lo tatou tagata atoa, le vaega autū o i tatou. “O le faamoemoe foi e le mā ai, auā ua faamaligi mai le alofa o le Atua i o tatou loto e le Agaga Paia.”
19. E tatau faapefea ona avea lou faamoemoe ma vaega o au tatalo e lē aunoa?
19 Sa tatalo faatauanau Epafara ina ia tumau pea ona uigā uso ma tuafāfine i Kolose ma ia latou mautinoa i le mea o loo taatia mai i o latou luma, e ala i le iai o se ‘mautinoa i le finagalo uma lava o le Atua.’ Ia faapena foʻi ia i tatou taʻitoʻatasi ona faalatalata atu e lē aunoa i le Atua e faatatau i lo tatou faamoemoe. I au lava tatalo totino, ia faaaofia ai lou faamoemoe e faatatau i le lalolagi fou. Ia faaali atu ia Ieova le tele o loo e moomoo ai mo lena faamoemoe, faatasi ai ma lou talitonuga atoatoa o le a oo moni mai lava. Ia faatoga atu ia te ia mo se fesoasoani ina ia faalolotoina ai ma faalauteleina lou talitonuga mautinoa. E pei ona tatalo Epafara ina ia iai i Kerisiano i Kolose le ‘mautinoa i le finagalo uma lava o le Atua,’ ia e faia foʻi lena lava mea. Ia faifai soo.
20. Pe afai e iai nisi e toe fulitua ese mai le ala faa-Kerisiano, aiseā e lē manaʻomia ai ona avea lenei mea ma pogai o le faavaivai?
20 E lē tatau ona e faalavelaveina oe pe faalotovaivaia i le faapea e lē o tagata uma o tumau atoatoa ma iai le talitonuga mausalī. Atonu e lē taulau nisi, e toe fulitua ese mai, pe na ona faamaamulu lava. Na tupu lena mea ia i latou na sili ona vavalalata ia Iesu, ona aposetolo. Peitaʻi ina ua liua Iuta e avea ma faalata, pe na faavaivaia ai ea isi aposetolo pe faamaamulu? E leai lava! Sa sii mai e Peteru le Salamo 109:8 e faaalia ai e iai se isi o le a suitulaga ane ia Iuta. Na filifili sē e suitulaga, ma faaauau ai pea i latou o ē faamaoni atu i le Atua, i la latou tofiga o le talaʻiga. (Galuega 1:15-26) Sa latou maumauaʻi e tumau atoatoa i le talitonuga mausalī.
21, 22. I le ā le uiga o le a mātauina ai lou tumau i le atoatoa ona lelei ma lou mautinoa?
21 E mafai ona e matuā mautinoa o le a lē mafai ona faagaloina lou tumau atoatoa ma lou talitonuga mausalī i le finagalo uma lava o le Atua. O le a mātaulia ma talisapaiaina. E ai?
22 O le a mātauina e ou uso ma ou tuafāfine, o ē latou te iloa oe ma alolofa ia te oe. E tusa lava pe lē faaleoina mai e le toʻatele o i latou, ae o le a tutusa lava aafiaga e iai, ma aafiaga ia tatou te faitau ai i le 1 Tesalonia 1:2-6, (LF): “Matou te faafetai pea lava i le Atua, ona o outou uma lava, o loo taʻutaʻua outou i a matou tatalo, e le aunoa ona matou mānatua i luma o le Atua o lo tatou Tamā lea, la outou galuega i le faatuatua, ma le faamalosi i le alofa, ma le tumau pea i le faamoemoe i lo tatou Alii o Iesu Keriso. . . . e lei oo atu la matou tala lelei ia te outou na o le upu, a o le mana, ma le Agaga Paia, atoa ma le mautinoa lava. . . . Sa outou faaaʻoaʻo mai foi ia te i matou, atoa ma le Alii.” O le a faapena foʻi lagona o Kerisiano faamaoni o loo tou mafuta faatasi a o latou mātauina lou ‘tumau i le atoatoa ona lelei ma ua mautinoa i le finagalo uma lava o le Atua.’—Kolose 1:23.
23. A o faagasolo le tausaga o lumanaʻi nei, o le ā e tatau ona avea ma au filifiliga maumauaʻi?
23 E pei lava ona mautinoa, o le a mātau mai e lou Tamā faalelagi ma o le a fiafia mai lona finagalo. Ia e mautinoa i le manatu lena. Aiseā? Auā o loo e tumau atoatoa ma le talitonuga mausalī i “le finagalo uma lava o le Atua.” Na tusi faalaeiau atu Paulo i Kerisiano i Kolose e faatatau i lo latou savavali “e tusa ma le Alii [Ieova], ina ia fiafia mai o ia ia te [i latou] i mea uma.” (Kolose 1:10) Ioe, e mafai e tagata lē lelei atoatoa ona latou faafiafiaina o ia i mea uma lava. Na faia faapena e ou uso ma tuafāfine i Kolose. O loo faia foʻi i le taimi lava lenei e Kerisiano o loo tou mafuta faatasi. E mafai foʻi ona e faia faapea! O lea, a o faagasolo lenei tausaga ua oo mai, tau ina ia avea au tatalo i aso taʻitasi ma au gaoioiga faifai pea e faamaonia atu ai, ua e filifili maumauaʻi ia “tumau [i le] atoatoa ona lelei, ma ua mautinoa le finagalo uma lava o le Atua.”
Pe Mafai Ona E Manatua?
• O le ā e aofia ai i lou ‘tumau i le atoatoa ona lelei’?
• O ā mea e uiga ia te oe e tatau ona e faaaofia i le tatalo?
• E pei ona faatū mai se manatu i le Roma 5:4, 5, o le ā le ituaiga o faamoemoe e te fia mauaina?
• O la tatou suʻesuʻega ua faagaeetia ai oe ina ia e maua le ā le sini a o faagasolo le tausaga o lumanaʻi nei?
[Faamatalaga i le itulau 20]
Sa tatalo Epafara ina ia mafai e ona uso ona tumau i le atoatoa ona lelei, faatasi ma se mautinoa e uiga ia Keriso ma lo latou faamoemoe
[Faamatalaga i le itulau 23]
O loo iai i le faitau miliona o isi le faamoemoe mautū ma le mautinoa lena foʻi o loo ia te oe