O Ē Faia le Afioga a le Atua e Maua le Fiafia

I le amataga lava o le Tauaofiaga Itumalo a Molimau a Ieova “O Ē Faia le Afioga a le Atua,” na faapea mai ai se tasi o failauga: “Tatou te manatu i lenei tauaofiaga o se tasi o sauniuniga a Ieova e sauniunia ai i tatou mo isi galuega o le Malo.” Sa ia faaauau mai e faapea: “Ua sauniunia i tatou lava ina ia aʻoaʻoina e uiga i olaga faaleaiga fiafia, ma faalaeiauina ina ia pipii vavalalata atu i le faalapotopotoga a Ieova, ma uunaʻia ai ina ia tumau lo tatou maelega i le auaunaga o le Malo, ma faamanatu mai ai foʻi le manaʻoga ina ia faaauau ona mataala.”

TALU mai le faaiʻuga o Me 2000, e faitau miliona o ē faia le afioga a le Atua ma a latou uō na lolofi atu i le faitau afe o nofoaga o tauaofiaga i le lalolagi aoao ina ia mauaina ai aʻoaʻoga tāua faale-Tusi Paia. O ā mea na latou aʻoaʻoina i na aso e tolu o le tauaofiaga?

Aso Muamua—Aua Neʻi Faagaloina Mea na Faia e Ieova

I le lauga amata, na valaaulia ai e le taʻitaʻifono le aofia ina ia tofo i faamanuiaga e maua mai le tapuaʻi ma le autasi ia Ieova i tauaofiaga. Sa faamautinoa atu ia i latou uma na auai o le a faateleina lo latou faatuatua ma o le a faamalosia ai la latou faiā totino ma Ieova.

Ua silafia e “le Atua manuia [“fiafia,” NW]” mea e tatou te manaʻomia mo lo tatou fiafiaga taʻitoʻatasi. (1 Timoteo 1:11) I lea, o le lauga “E Maua le Fiafiaga i le Faia o le Finagalo o le Atua” na faamamafa mai ai e faapea, o le Afioga a Ieova, le Tusi Paia, o loo otooto mai ai le auala aupito sili ona lelei o le olaga. (Ioane 13:17) O ni faatalanoaga ma i latou ua loa tausaga o avea ma Molimau a Ieova na faaalia ai le auala e atili uigā ai o tatou olaga ona o le faia o le finagalo o le Atua i tulaga eseese. O le lauga na sosoo ai, “Ia Matuā Fiafia i le Agalelei o Ieova,” na faamamafa mai ai e faapea, i le avea o ē ‘faaaʻoaʻo i le Atua,’ e mananaʻo ai Kerisiano e fuaina mai “le agalelei uma lava” i o latou olaga. (Efeso 5:1, 9) O le tasi o auala mataʻina e faia ai lenei mea, o le talaʻiina lea o le tala lelei ma faia soo.—Salamo 145:7.

O le talanoaina o le mataupu “Ia Faaauau Ona Faamalosi e Pei ua Iloa Atu Lē e Lē o Vaaia” na faaalia ai le auala ua fesoasoani ai ia i tatou le faatuatua malosi ina ia “iloa” atu le Atua e lē vaaia. Na faamatalaina e le failauga le auala ua iloa ai e tagata faaleagaga uiga o le Atua, e aofia ai ma lona tomai e silafia e oo lava i mea o tatou mafaufau i ai. (Faataoto 5:21) Na faamatala mai e i latou na faatalanoaina laasaga na latou faia ina ia atiina aʻe atili ai se faatuatua malosi ma faamuamua manaʻoga faaleagaga i o latou olaga.

Na faaiʻuina le polokalame o le taeao i le lauga autū, “Ia Viia Ieova—O Lē Faia Mea Ofoofogia.” Sa fesoasoani lena lauga i le aofia e talisapaia e faapea, o le tele o lo tatou aʻoaʻoina e uiga ia Ieova, o le tele foʻi lena o pogai e tatou te maua e vivii atu ai ia te ia o Lē e Faia mea ofoofogia. Na faapea mai le failauga: “A o tatou manatunatu i galuega mataʻina o le foafoaga a le Atua faatasi ai ma mea ofoofogia uma o loo ia faia mo i tatou i le taimi nei, ua uunaʻia i tatou e le lototalisapaia e vivii ia te ia. A o tatou manatunatu loloto i mea mamana sa ia faia mo ona tagata i taimi ua teʻa, e tatou te mananaʻo ai e viia o ia. E lē gata i lea, a o tatou manatunatu i folafolaga o mea ofoofogia o le a faia e Ieova, tatou te saʻilia ai foʻi auala e faaleoina atu ai le talisapaia.”

Na amata le polokalame o le aoauli i le lauga “Aua Neʻi Faapalapala i le Faia o le Mea Lelei,” lea na faamanatu atu ai i tagata uma o le aofia e faapea, o omiga mai lenei lalolagi ua faamautinoa ai ua latalata mai le iʻuga. (2 Timoteo 3:1) Ae peitaʻi, o le lē faapalapala, ua mafai ona tatou faamaonia atu ai o i tatou “o ni e faatuatua e ola ai le agaga.”—Eperu 10:39, LF.

O ā fautuaga a le Tusi Paia na ofoina mai e faatatau i le olaga faaleaiga? O le lauga faasolo muamua o le tauaofiaga—“Ia Usiusitai i le Afioga a le Atua”—na amata i le vaega “I le Filifilia o se Paaga Faaipoipo.” O le filifilia o se paaga faaipoipo, o se tasi lea o filifiliga aupito sili ona tāua ua faia e tagata. I lea, ua mananaʻo ai Kerisiano e faatali e faatoʻā faaipoipo pe a oo ina taʻumatuaina, ma e latou te faaipoipo e “tau lava i le ua i le Alii.” (1 Korinito 7:39) O le isi vaega na sosoo ai o le lauga faasolo na talanoaina ai le naunau o Ieova ina ia taulau manuia aiga Kerisiano taʻitasi uma i le avea o ni aiga malolosi faaleagaga, ma na faailoa mai ai foʻi ni auala aogā e mafai ona faataunuuina ai lenei mea. O le vaega faaiʻu na faamanatu atu ai i mātua e faapea, o le aʻoaʻoina o a latou fanau ia alolofa i le Atua e amata lava i le alolofa o mātua ia te ia.

O manatu na folasia mai i le lauga “Ia Nofouta i Tala Feaveaʻi ma le Faitala” na fesoasoani i tagata uma e iloa e faapea, e ui lava e tutupu mea ofoofogia, e tatau ona tatou gaoioi ma le poto, ae aua le faasesēina pe a tatou faalogo i tala uigaese naʻuā. E sili ona lelei mo Kerisiano le tautala i mea latou te iloa e moni—le tala lelei o le Malo. E toʻatele na latou iloa le matuā faamāfanafanaina ma le faagaeetia i le isi lauga na sosoo ai, “Gafatia o ‘Mea Matuitui i le Tino.’” Sa fesoasoani le lauga ia i latou e iloa ai e faapea, e ui lava i tofotofoga faifai pea atonu o loo tatou fesagaʻi, ae e mafai ona faamalosia i tatou e Ieova e ala i lona agaga paia, lana Afioga, ma lo tatou ʻauuso Kerisiano. E tele ni faalaeiauga na maua mai i mea na oo totino i le aposetolo o Paulo e tusa ai ma lenei vala.—2 Korinito 12:7-10; Filipi 4:11, 13.

Na faaiʻuina le aso muamua i le lauga “Ia Ō Faatasi ma le Faalapotopotoga a Ieova.” E tolu ni vala na talanoaina ua agaʻi patino ai i luma le faalapotopotoga a le Atua: (1) o le faateleina o le malamalama faaleagaga mai ia Ieova, (2) o le faiva ua tuuina mai e le Atua ia i tatou, ma lona (3) o fetuutuunaʻiga i taimi talafeagai i taualumaga a le faalapotopotoga. Ona faailoa mai lea ma le mautinoa e le failauga e faapea: “Ua faagaeetia i tatou i mea o le a tutupu i le lumanaʻi.” Na ia fesili mai ai: “Pe o iai ea ni masalosaloga e faapea ua ia i tatou māfuaaga uma e tausia ai le mautinoa lea sa muaʻi iai ia i tatou seʻia oo atu lava i le iʻuga?” (Eperu 3:14) Sa manino lava le tali. O lena mea na iʻu ai i le tatalaina o se polosiua fou o lona matua, E Mafai Ona Avea Oe ma Uō a le Atua! O le a avea lena polosiua ma fesoasoani malosi faaleaʻoaʻoga e fesoasoani ai i tagata e faalēlelei lo latou tomai tauaʻoaʻoga pe e lē lava le tomai e faitau ai ina ia aʻoaʻoina e uiga ia Ieova.

Aso Lona Lua—Faalauiloa Atu Pea Galuega Ofoofogia a le Atua

Ina ua uma ona talanoaina le mau o le aso, na faaauau ai le aso lona lua o le tauaofiaga i le lauga faasolo “Faifeʻau o le Afioga a le Atua.” O le vaega muamua na taulaʻi atu ai manatu i le taulau manuia o la tatou galuega talaʻi i le lalolagi atoa i le taimi nei. Ae peitaʻi, e luʻia e le toʻatele o ē tetee i le feʻau o le Malo lo tatou onosai i lenei galuega. Ua faamatala mai e le toʻatele o tagata talaʻi ua loa tausaga o faia lenei galuega le auala na latou faatumauina ai lo latou olioli i le faiva e ala i le faamalosia o o latou mafaufau ma loto e faafetaiaʻia ai le luʻi o le lē ano mai po o teteega. O le vaega lona lua na faamanatu mai ai i le ʻauusufono e faapea, e tauivi Molimau a Ieova e faafesootaʻi tagata i so o se mea, i tulaga fuafuaina ma le lē fuafuaina. Ma o le vaega mulimuli na faamatalaina ai le tele o vala eseese e mafai e Kerisiano uma ona faalautele ai la latou lava faiva. Na faamamafa mai e le failauga e faapea, ina ia faia lenei mea, e tatau ona tatou faamuamua le Malo o le Atua, e tusa lava po o le faia faapea e aofia ai le iai o ni mea faigatā ma le faataulagaina o le tagata lava ia.—Mataio 6:19-21.

Talu ai o loo tatou ola i se lalolagi lē amioatua ua tele naʻuā ai le faamalieina i le manaʻo tele i mea faitino, na matuā talafeagai ai lava le lauga “Ati Aʻe le Tuutoina i le Atua Faatasi ma le Lotomalie.” I le faavaeina o nisi o ana faamatalaga i le 1 Timoteo 6:6-10, 18, 19, na faailoa mai ai e le failauga le auala e fesoasoani ai le tuutoina i le Atua i Kerisiano e ʻalofia le manaʻo tele i tupe, lea e mafai ona faasesēina ai i latou ma faapogaia ai le tele o tigā. Sa ia faamamafa mai e faapea, po o le ā lava lo tatou tulaga tau tamaoaiga, a o le fiafia e faalagolago i la tatou faiā ma Ieova ma lo tatou tulaga lelei faaleagaga. E toʻatele sa faagaeetia i manatu na folasia mai i le lauga “Ia Lē Tuu Atu i le Atua se Pogai e Maasiasi Ai.” Sa faamamafaina ai le mea moni e faapea, e lē faagaloina e Ieova ana Molimau faamaoni. O le faaaʻoaʻoga lē mafaatusalia a Iesu Keriso—o lē e “le liu lava ia, o ananafi, ma le asō, e oo foi i le faavavau”—o le a fesoasoani i le toʻatele ina ia faaauau pea ona taufetuli ma le onosai i le tausinioga mo le ola.—Eperu 13:8.

I le faaiʻuina o le polokalame o le taeao, na faia ai le lauga o le papatisoga—o se vala tāua lea e faia pea i faatasitasiga tetele a Molimau a Ieova. Maʻeu se olioli i le vaai atu i ē fou ua tuuina atu ia Ieova o mulimuli i tulagaaao o Iesu e ala i le gauaʻi atu e papatisoina i le vai! (Mataio 3:13-17) O i latou uma o ē ua faia lenei laasaga ua latou faataunuuina ni mea se tele i le avea ma ē e faia le afioga a le Atua. E lē gata i lea, pe afai ua papatisoina ua avea ai i latou o ni faifeʻau tofia o le tala lelei, ma ua mauaina le olioli tele i le iloaina o loo faia so latou sao i le faapaiaina o le suafa o Ieova.—Faataoto 27:11.

Sa avatuina fautuaga tuusaʻo i le lauga “E Manaʻomia le Taʻumatuaina Ina ia ‘Iloa ai le Lelei ma le Leaga.’” E matuā lē aogā lava tapulaa o le saʻo ma le sesē a le lalolagi. O le mea lea e manaʻomia ai ona tatou faalagolago i tapulaa a Ieova. (Roma 12:2) Na faalaeiauina ai tagata uma ina ia galulue malolosi ia maua le malamalama saʻo i ala a le Atua ma ia tutupu aʻe e avea ma tagata taʻumatuaina. Ona o le faataʻitaʻi soo, o le a aʻoaʻoina ai o tatou tomai faalemafaufau ina ia “iloa ai le lelei ma le leaga.”—Eperu 5:11-14.

Ona sosoo ai lea ma le lauga faasolo “Galue Malosi ia Atiina Aʻe le Itu Faaleagaga.” Ua iloa e Kerisiano moni le tāua o le atiina aʻe ma le tausisia o le itu faaleagaga. E aofia ai i lenei mea le galue malosi—faitau, suʻesuʻe, ma le manatunatu loloto. (Mataio 7:13, 14; Luka 13:24) O tagata faaleagaga foʻi e latou te faia pea “talotaloga ma faatoga uma.” (Efeso 6:18) Ua tatou iloa o a tatou tatalo e faaalia ai le loloto o lo tatou faatuatua ma le tuutoina, le tulaga o lo tatou itu faaleagaga, faapea foʻi ma mea e tatou te manatu i ai o “mea e sili ona tāua.” (Filipi 1:10, NW) Na faamamafaina ai foʻi le tāua o le atiina aʻe o se faiā māfana alofa ma Ieova e pei o lea e maua e se tamaitiiti usiusitai ma se tamā agalelei. E lē faapea ua tau ina iai sa tatou lotu—e tusa lava po o le lotu moni—ae tatou te mananaʻo ia ati aʻe le faatuatua malosi, ‘e pei o sē iloa atu i le Atua.’—Eperu 11:6, 27.

Na talanoaina atili ai foʻi le mataupu i le agaʻigaʻi i luma faaleagaga i le lauga e faapea “Ia Faailoa Atu Lou Agaʻigaʻi i Luma.” E tolu vaega o lena agaʻigaʻi i luma na talanoaina: (1) ia faateleina le poto, le malamalama, ma le atamai, (2) ia fuaina mai fua o le agaga o le Atua, ma le (3) ia faatinoina a tatou tiute tauave i le avea o se tasi o le aiga.

I le faaiʻuga o le lauga mulimuli o le aso, “Ia Savavali i le Malamalama Auiluma o le Afioga a le Atua,” na matuā faafiafiaina ai le ʻauusufono i le taliaina o le tusi fou, Isaiah’s Prophecy—Light for All Mankind I. O le uluaʻi tusi lea o tusi e lua o loo talanoaina faasolo ai mataupu taʻitasi o le tusi o le Tusi Paia o Isaia. Na mātauina e le failauga e faapea: “O loo i le tusi o Isaia se feʻau mo i tatou i aso nei.” Sa ia faaauau mai e faapea: “Ioe, o le tele o ona valoaga sa faataunuuina anamua i aso o Isaia. . . . Ae peitaʻi, o le tele o valoaga a Isaia o loo faagasolo le faataunuuina i aso nei, ma o nisi o le a faataunuuina i le lalolagi fou ua folafola mai e le Atua.”

Aso Lona Tolu—Ia Avea ma Ē Faia le Afioga a Ieova

Na amata le aso mulimuli o le tauaofiaga i le talanoaina o le mau o le aso. Ona sosoo ai lea ma le lauga faasolo “Le Valoaga Uigā a Sefanaia mo Ē Faia le Finagalo o le Atua.” O lauga e tolu o lenei lauga faasolo na faaalia ai e faapea, e pei ona ia faia i aso o Iuta lē usiusitai, o le a faapena ona aumaia e Ieova mafatiaga ia i latou o ē o loo mumusu nei e utagia lana lapataʻiga. Ona ua latou agasala i le Atua, o le a latou feoaʻi tautoʻai solo ai e lē mafai ona faia se mea e pei o tagata tauaso, ua lē mafai ona maua se laveaʻi. Ae peitaʻi, o Kerisiano moni, o loo saʻili pea ma le faamaoni ia Ieova, ma o le a lilo ai i latou i le aso o le toʻasa o le Atua. E lē gata i lea, o loo latou olioli i le taimi nei i le tele o faamanuiaga. Ua latou maua se avanoa faamanuiaina e tautala ai i le “gagana lelei [“mamā,” NW]” o le upu moni o le Tusi Paia. (Sefanaia 3:9) Na taʻua e le failauga e faapea: “O le tautala i le gagana mamā e aofia ai e lē gata i le talitonu i le upu moni ma aʻoaʻo atu i isi, ae e aofia ai le ōgatusa o a tatou amio ma tulafono atoa ma mataupu silisili a le Atua.”

Sa faatalitali ma le naunau le ʻauusufono mo le tala, “Faaaʻoaʻoga Lapataʻi mo o Tatou Aso.” O lenei tala sa faatinoina i teuga faaanamua na faaalia ai le auala na leiloloa ai ola o le faitau afe o tagata Isaraelu i le tuaoi o le Nuu o le Folafolaga ona sa latou faagaloina Ieova ma na maileia e fafine faapaupau e faia le faitaaga ma le tapuaʻiga sesē. O le tasi o tagata autū—o Iaminu—sa muaʻi fesaeaʻina i le vā o faatosinaga a fafine Moapi ma lona tuutoina atu ia Ieova. O manatu sesē ma mafaufauga taufaasesē o le tagata lē amioatua o Semeri, na matuā aliaʻi mai lava i lumamea, e pei foʻi ona aliali mai le faatuatua ma le tuutoina o Fineaso. Na matuā faaalia mai ai lava le tulaga mataʻutia o le faifaimea faatasi ma i latou o ē lē alolofa ia Ieova.

Na faatupu ai e le tala le naunau e fia faalogologo atu i le lauga na sosoo ai, “Aua Neʻi Avea ma Ē Faalogologo ma le Faagalogalo.” O se auʻiliʻiliga o le 1 Korinito 10:1-10 na faaalia ai e faapea, e tofotofoina e Ieova lo tatou usiusitai ina ia iloa ai pe aogā ona tatou maua se tofi i le lalolagi fou. Mo nisi, o tuʻinanauga o le tino ua titina ai sini faaleagaga i le taimi nei, a o latalata ona tatou ulu atu i le faiga fou. Na faalaeiauina ai tagata uma ina ia aua neʻi melea le avanoa e ‘sao atu ai i le mālōlōga o Ieova.’—Eperu 4:1.

O le mataupu o le lauga lautele “O Māfuaaga e Ao Ona Uaʻi Atu ai i Galuega Ofoofogia a le Atua.” O “galuega ofoofogia” a Ieova ua faaalia ai lona atamai ma lana pule i luga o foafoaga faitino ia o loo siʻomia ai i tatou. (Iopu 37:14, NW) O le tele o fesili faatupu manatu mai ia Ieova sa lava ma totoe e maofa ai Iopu i le mana o Lē na Foafoaina Mea e ona le malosi uma lava. O le a faia foʻi e Ieova “galuega ofoofogia” i le lumanaʻi mo ana auauna faamaoni. Na faaiʻu mai le failauga e faapea: “Ua ia i tatou le anoanoaʻi o māfuaaga e uaʻi atu ai i galuega ofoofogia a Ieova—mea sa ia faia i le taimi ua teʻa, mea o loo ia faia i le foafoaga o loo siʻomia ai i tatou i aso nei, atoa ma mea ua ia folafola mai o le a ia faia i le lumanaʻi lata mai.”

Na sosoo le otootoga o le mataupu mo le suʻesuʻega o Le Olomatamata o le vaiaso ma le lauga faaiʻu o le tauaofiaga. Sa faamatuaina e faapea, “Ia Matuā Faatāuaina Lou Faaeaga o Sē Faia le Afioga a le Atua,” o lenei lauga faagaee loto na faamamafa mai ai e faapea, o se tulaga faamamaluina le avea o ni ē faia le afioga a le Atua. (Iakopo 1:22) Na faamanatu atu ai i le aofia e faapea, e matuā tutasi lava lo tatou faaeaga o le avea o ni ē faia le afioga a le Atua, ma o le umi lava tatou te faia ai, o le sili atu foʻi lena ona tatou faatāuaina. Na faalaeiauina i latou uma na iai ina ia faaalia uunaʻiga aogā o lenei tauaofiaga itumalo i o latou faanaunauga e avea o ni ē faia le afioga a le Atua i le tele e mafai ai. E na o le pau lava lena o le auala e tofo ai i le fiafiaga sili ua mafai ona maua.

[Pusa/Ata i le itulau 25]

E Mafai Ona Avea Oe ma Uō a le Atua!

I le afiafi o le Aso Faraile na tatalaina ai se polosiua fou o lona matua E Mafai Ona Avea Oe ma Uō a le Atua! O loo iai se manaʻoga tele mo le faafaigofieina o le aʻoaʻoina o le Tusi Paia i le tele o vaega o le lalolagi, ma o le a faaaogāina lenei polosiua e faataunuuina ai lena manaʻoga. O le a avea lea polosiua ma faamanuiaga tele i tagata e faalēlelei lo latou tomai tauaʻoaʻoga pe e lē lava le tomai e faitau ai.

[Pusa/Ata i le itulau 26]

Isaiah’s Prophecy—Light for All Mankind

Sa faafiafiaina le ʻauusufono e talia le Tusi I o tusi e lua o le Isaiah’s Prophecy—Light for All Mankind. I lenei lomiga, o loo faamamafa mai ai le aogā ma le tāua o le valoaga a Isaia mo o tatou aso.