Le Itu e Eseese ai le Vaega Pule ma se Sosaiete ua Lesitalaina Faaletulafono
NA AMATA mai lava ia Ianuari o le 1885 ona usuia fonotaga faaletausaga a le Watch Tower Bible and Tract Society of Pennsylvania. A o faagasolo le aoaoina o Kerisiano faauuina i tausaga faaiʻuiʻu o le lona 19 senituri, sa iai i faatonu ma ē na umia tulaga tofi sinia o lenei sosaiete le faamoemoe faalelagi. Ma e toetoe lava o le tulaga lena na sau aʻi.
E tasi sina eseesega na iai. I le 1940, o Hayden C. Covington—o lē na avea i lena taimi ma loia a le Sosaiete ma o ia o se tasi o “isi mamoe,” sa iai le faamoemoe i le lalolagi—na palotaina e fai ma se faatonu o le Sosaiete. (Ioane 10:16) Sa auauna o ia o le sui peresitene o le Sosaiete mai le 1942 e oo i le 1945. O le taimi lena na faamavae ai le uso o Hayden Covington mai le tofiga o le faatonu ina ia ōgatusa ma le mea sa foliga mai o le finagalo lea o Ieova—o faatonu uma ma ē na umia tulaga tofi sinia o le sosaiete a Pennsylvania e ao ona avea o ni Kerisiano faauuina. Sa tulaʻi mai Lyman A. Swingle e suia Hayden C. Covington i le komiti o faatonu, ae palotaina Frederick W. Franz e avea ma sui peresitene.
Aiseā na talitonu ai auauna a Ieova faapea e ao i faatonu uma ma ē na umia tulaga tofi sinia o le Watch Tower Bible and Tract Society of Pennsylvania ona avea o ni Kerisiano faauuina? Auā i na aso, o ē na iai i le komiti o faatonu ma ē na umia tulaga tofi sinia o le sosaiete a Pennsylvania, sa tai tutusa lava ma ē na iai i le Vaega Pule o Molimau a Ieova, lea sa faia atoa lava i tane ua faauuina e le agaga.
Se Fonotaga Taʻutaʻua Faaletausaga
I le fonotaga faaletausaga sa faia ia Oketopa 2, 1944, i Pittsburgh, na pāsia ai e sui o le sosaiete a Pennsylvania ni iʻugafono se ono o le toe teuteuga o lona faavae. Na taʻua e le faavae faapea o ē uma e foaʻiina atu tupe i le galuega a le Sosaiete, sa mafai ona fai ni a latou palota, peitaʻi o le toe teuteuga lona tolu na soloia ai lena faatulagaga. Na taʻua i se lipoti i lena fonotaga faaletausaga e faapea: “O ē mafai ona avea ma sui o le Sosaiete o le a faatapulaa mai ia lē silia le 500 . . . O ē uma e filifilia e tatau ona avea o se auauna faataimi atoa a le Sosaiete po o sē o loo auauna faavaitaimi i se kamupani [faapotopotoga] a molimau a Ieova ma e tatau ona ia faaalia le agaga o le Alii.”
Na amata mai iinā, sa tatau ai ona palotaina faatonu o le Sosaiete e tagata o ē sa tuutoina atoatoa ia Ieova, e tusa lava pe fia se aofaʻiga o tupe na latou foaʻiina mo le faaauilumaina o le galuega o le Malo. Na iloa ane sa talafeagai lenei fuafuaga ma faaleleiga faasolosolo na valoia mai i le Isaia 60:17, lea tatou te faitau ai: “Ou te aumaia le auro e sui aʻi le ʻapa memea; ou te aumaia foi le ario e sui aʻi le uamea, ma le ʻapa memea e sui aʻi laau, ma uamea e sui aʻi maa; e avea foi e aʻu ou alii [“ovasia,” NW] ia filemu, ma ou faipule ia amiotonu.” I le taʻua o “ovasia” ma “faipule,” na faasino atu ai lenei valoaga i ni faaleleiga o le a fai i taualumaga faalefaalapotopotoga a tagata o Ieova.
O lenei laasaga tāua i le faasagatonuina o le faalapotopotoga ina ia tusa ai ma taʻiala faatiokarate, na oo mai i le iʻuga o “afiafi ma taeao e lua afe ma le tolu o selau,” lea e taʻua i le Tanielu 8:14. O le taimi lena sa “faapaiaina ai” loa “le malumalu.”
Ae peitaʻi, a o mavae atu le fonotaga taʻutaʻua faaletausaga i le 1944, sa tumau pea se fesili matuā tāua. Talu ai sa tai tutusa ē na iai i le Vaega Pule ma le toʻafitu o sui o le komiti o faatonu o le sosaiete a Pennsylvania, pe o le uiga ea la o lenei mea e lē taitai mafai ona sili atu i le toʻafitu ni Kerisiano faauuina e faia aʻe ai le Vaega Pule? E lē gata i lea, talu ai o sui o le sosaiete lea sa latou palotaina faatonu, pe sa palotaina foʻi la e sui o le sosaiete sui o le Vaega Pule i le taimi o fonotaga faaletausaga i tausaga taʻitasi? Pe tutusa ea faatonu ma ē o umia tulaga tofi sinia a le Watch Tower Bible and Tract Society of Pennsylvania, ma sui o le Vaega Pule, po o le mea e eseese?
Le Isi Fonotaga Faaletausaga e Manatua Pea
Na taliina nei fesili i le fonotaga faaletausaga na usuia ia Oketopa 1, 1971. I lena fonotaga, na taʻua ai e se tasi o failauga e faapea, o le vaega pule a “le auauna faamaoni ma le mafaufau” o se vaega ua faitau fia selau tausaga na muamua atu ai na i lo le Watch Tower Bible and Tract Society of Pennsylvania. (Mataio 24:45-47) Sa faavaeina se vaega pule i le Penetekoso 33 T.A., i le silia ma le 18 senituri a o leʻi amataina le sosaiete a Pennsylvania. Muamua lava, sa faia aʻe le vaega pule i aposetolo e toʻa 12, ae lē o ni tane se toʻafitu. E manino mai, na mulimuli ane faatoʻateleina lona aofaʻi, auā sa taʻimua ai “le au aposetolo ma toeaina i Ierusalema.”—Galuega 15:2.
I le 1971 na faamalamalama ai e le failauga lava lea e faapea e lē mafai e sui o le Sosaiete o le Olo Matamata ona latou palotaina sui o le Vaega Pule faauuina. Aiseā? “Auā,” na ia faapea mai, “o le vaega pule o le vasega a le ‘auauna’ e lē tofia e se tagata. E tofia mai e . . . Iesu Keriso, le Ulu o le faapotopotoga Kerisiano moni ma o le Alii ma le Matai o le vasega a le ‘auauna faamaoni ma le mafaufau.’” Ua manino la, e lē mafai e tagata o fai ma sui o so o se sosaiete ua lesitalaina faaletulafono ona latou palotaina mai sui o le Vaega Pule.
Sa faaauau ona taʻu mai e le failauga lenei faamatalaga matuā mataʻina lava: “E lē iai i le vaega pule ni ona sui e umia ni tulaga tofi sinia e pei ona iai i le Komiti o Faatonu o le Sosaiete, e pei o le peresitene, le sui peresitene, le failautusi-teutupe ma le failautusi-teutupe lagolago. E na o lona taʻitaʻifono lava e iai.” E tele tausaga sa avea ai le peresitene o le sosaiete a Pennsylvania ma sui foʻi e faauluulu i ai le Vaega Pule. O le a lē toe faapena le tulaga o mea. E ui ina lē tutusa o latou potomasani po o tomai, ae o sui uma lava o le Vaega Pule o le a tutusa uma i o latou tiute tauave. Na faapea mai atili le failauga: “I lena la tulaga, e mafai e so o se tasi o le vaega pule ona avea ma taʻitaʻifono e aunoa ma le avea foʻi ma le peresitene o le . . . Sosaiete . . . E fuafua lava i le faataamilosaga mo le tofiga o le taʻitaʻifono i le vaega pule.”
I lena fonotaga faaletausaga e lē mafaagaloina i le 1971, na faailoa manino mai ai se faaeseesega i le vā o sui faauuagagaina o le Vaega Pule ma faatonu o le sosaiete a Pennsylvania. Ae sa faaauau pea ona avea sui o le Vaega Pule o ni faatonu ma o ē umia tulaga tofi sinia a le Sosaiete. Peitaʻi ane, i aso nei, ua lāgā ai le fesili: Pe iai ea se māfuaaga faale-Tusi Paia e tatau ai i faatonu o le Watch Tower Bible and Tract Society of Pennsylvania ona faia aʻe i sui o le Vaega Pule?
O le tali e leai. O le sosaiete a Pennsylvania e lē na o le pau lena o se faalapotopotoga faaletulafono o loo faaaogā e Molimau a Ieova. E iai isi faalapotopotoga. O se tasi o na faalapotopotoga o le Watchtower Bible and Tract Society of New York, Incorporated. O loo faafaigofieina la tatou galuega i le Iunaite Setete. E manino lava le iai o faamanuiaga a Ieova i lena sosaiete, e ui o le toʻatele o ona faatonu ma ē o umia tulaga tofi sinia e mai ia i latou o “isi mamoe.” O loo faaaogā i Peretania le International Bible Students Association. O loo faaaogā isi faalapotopotoga faaletulafono e faalauteleina atili manaʻoga o le Malo i isi atunuu. E galulue autasi na faalapotopotoga uma e fesoasoani ma faatinoina la latou matafaioi i le talaʻia o le tala lelei i le lalolagi aoao. E tusa lava po o fea le vaipanoa o faavae ai ma pe o ai foʻi o loo galulue ai o ni faatonu po o ē umia tulaga tofi sinia, ae o nei faalapotopotoga ua taʻitaʻia faatiokarate ma o loo faaaogāina e le Vaega Pule. O lea, ua tofia atu ai i na faalapotopotoga ni tiute latou te faatino mo le faalauteleina o manaʻoga o le Malo.
E aogā mo i tatou le iai o ni faalapotopotoga faaletulafono. O iinā e mafai ai ona tatou usiusitai atu i tulafono a le nuu ma le atunuu, e pei ona tāpā mai e le Afioga a le Atua. (Ieremia 32:11; Roma 13:1) O faalapotopotoga faaletulafono, e faafaigofieina la tatou galuega o le faasalalauina atu o le feʻau o le Malo e ala i le lomiaina o Tusi Paia, o tusi, mekasini, polosiua, ma isi lomiga. O faalapotopotoga foʻi na o loo galulue o ni auala faaletulafono e taulimaina mataupu e fesootaʻi ma le umiaina o ni meatotino ma fanua, galuega laveaʻi, le faia o feagaiga mo le faaaogāina o nofoaga e fai ai tauaofiaga, ma isi mea faapena. E tatou te faafetaia auaunaga a na faalapotopotoga faaletulafono.
Ua Faamatilatilaina le Suafa o Ieova
I le 1944, sa toe teuteuina ai le Mataupu II o le faavae o le Watch Tower Bible and Tract Society of Pennsylvania ina ia faamamafa atili ai sini a lenei sosaiete. E tusa ai ma le faavae, o fuafuaga a le Sosaiete e aofia ai le fuafuaga autū lenei: “Ia talaʻi atu i atunuu uma le evagelia o le malo o le Atua i le pulega a Keriso Iesu e fai ma molimau i le suafa, le afioga ma le tulaga silisili ese o IEOVA le Atua e Ona le Malosi Uma Lava.”
Talu mai le 1926, ua faamatilatilaina ai e “le auauna faamaoni” le suafa o Ieova. E sili ona mātaulia le 1931 ina ua talia e Tagata Aʻoga o le Tusi Paia le igoa o Molimau a Ieova. (Isaia 43:10-12) Ua faamamafaina e lomiga a le Sosaiete le suafa o le Atua e aofia ai tusi ua faaulutalaina Jehovah (1934), “Let Your Name Be Sanctified” (1961), ma le “The Nations Shall Know That I Am Jehovah”—How? (1971).
E tatau ona taʻua faapitoa le New World Translation of the Holy Scriptures, lea na lomia lona lomiga atoa i le faa-Peretania i le 1960. O loo iai le suafa o Ieova i mau uma lava na e taʻua ai le Tetakalamatone i Tusitusiga Eperu. E aofia ai foʻi i lenei faaliliuga le taʻua o le suafa tauatua i nofoaga eseese e 237 i Tusitusiga Kerisiano Eleni, lea e ala i ni iloiloga ma le faaeteete ua faaalia ai sa faamaonia le faia o lenei mea. Maʻeu so tatou lotofaafetai ona o auala eseese ua faataga ai e Ieova le “auauna” ma lana Vaega Pule ina ia faaaogā a latou meafaigaluega tau lomitusi ma faalapotopotoga faaletulafono i le faailoaina atu o lona suafa i le lalolagi aoao!
Ua Uunaʻia Atili le Tufatufaina Atu o le Afioga a le Atua
Ua faaauau pea ona molimau atu tagata o Ieova i lona suafa ma sapasapaia lana Afioga e ala i le lomiaina ma le tufatufaina o le faitau miliona o lomiga faale-Tusi Paia faapea foʻi le Tusi Paia lava ia. I le amatamataga o vaitausaga e amata mai le 1900, na avea ai le Watch Tower Society ma sosaiete e iai le aiā e umia ai le tusi, The Emphatic Diaglott, o le lomiga o loo faaalia mai ai le faa-Eleni ma lona faaliliuga i le faa-Peretania mo Tusitusiga Kerisiano Eleni, na faia e Benjamin Wilson. Na lomia e le Sosaiete le lomiga faapitoa o le King James Version mo Tagata Aʻoga o le Tusi Paia, lea sa aofia ai se faaopoopoga e 500 ona itulau. I le 1942 na lomia ai le King James Version lea e iai ona faasinoga i autafa. Ae i le 1944 na amata ai e le Sosaiete ona lomia le American Standard Version o le 1901, lea o loo faaaogā ai le suafa o le Atua. Sa avea foʻi le suafa o Ieova ma vala matilatila o The Bible in Living English, na faaliliuina e Stephen T. Byington, ma lomia e le Sosaiete i le 1972.
O faalapotopotoga faaletulafono ua faaaogā e Molimau a Ieova, ua fesoasoani i le lomiaina ma le tufatufaina atu o nei faaliliuga uma o le Tusi Paia. Ae peitaʻi, o loo sili ona lauiloa, le felagolagomaʻi vavalalata i le vā o le Watch Tower Society ma le vaega o Molimau faauuina a Ieova lea o loo faia aʻe ai le Komiti Faaliliu o le Tusi Paia a le Lalolagi Fou. Tatou te olioli ona, e silia ma le 106,400,000 kopi o lenei faaliliuga i ona lomiga atoa pe i vaega, ua lomia i gagana e 38. E mautinoa lava, o le Watch Tower Bible and Tract Society of Pennsylvania, o se sosaiete mo le Tusi Paia!
Ua ‘tofia le auauna lelei e pule i mea e tele a lona alii.’ E aofia ai fale uma i le ofisaulu i le Setete o Niu Ioka i le Iunaite Setete o Amerika, faapea ma lālā e 110 o loo faagaoioia nei i le lalolagi aoao. Ua iloa e i latou o le vasega o le auauna e faapea, o le a tāpā mai i latou e tala atu se tala e tusa ai o le auala ua latou faaaogāina ai mea na faatuatuaina mai latou te vaavaaia. (Mataio 25:14-30) Ae peitaʻi, e lē taofia e lenei mea le “auauna” mai le faatagaina o ni ovasia agavaa mai “isi mamoe” ina ia tausia tiute faaletulafono ma tiute tau pulega. O le mea moni, i lenei itu ua mafai ai e sui o le Vaega Pule ona faaaluina le sili atu o le taimi i “talotaloga ma le auauna i le upu.”—Galuega 6:4.
Po o le ā lava le umi e faataga ai le tulaga o mea o iai i lenei lalolagi, o le a faapena foʻi ona faaaogā e le Vaega Pule, lea o loo fai ma sui o “le auauna faamaoni ma le mafaufau,” faalapotopotoga faaletulafono. E aogā nei faalapotopotoga, ae e lē matuā manaʻomia tele. Pe afai e soloia se faalapotopotoga faaletulafono e ala i se poloaʻiga a le malo, o le a faaauau pea le galuega talaʻi. E oo foʻi i aso nei, i atunuu o iai faasāsāga ma lē faaaogāina ai ni faalapotopotoga faaletulafono, ae o loo folafolaina atu pea le feʻau o le Malo, o loo faia pea soo, ma o loo iai pea faatelega faatiokarate. O loo tutupu na mea talu ai o loo totō ma faasūsū e Molimau a Ieova, ma ‘ua faatupuina e le Atua.’—1 Korinito 3:6, 7.
A o tatou tulimataʻi atu i le lumanaʻi, ua tatou mautinoa o le a tausia e Ieova manaʻoga faaleagaga ma faaletino o ona tagata. O le a faaauau e ia ma lona Alo, o Iesu Keriso, ona saunia mai le taʻitaʻiga faalelagi ma le lagolagosua manaʻomia ina ia faaatoatoa ai le galuega talaʻi o le Malo. O le mea moni, po o ā lava mea tatou te faataunuuina o ni auauna a le Atua, ua faataunuu ‘e le i le fitafita, e le i le malosi, ae i le Agaga o Ieova.’ (Sakaria 4:6) O lea tatou te tatalo ai mo le fesoasoani tauatua, i le iloa faapea, o le malosi o loo foaʻi mai pea e Ieova, o le a mafai ai ona tatou faamāeʻaina le galuega ua ia tuuina mai tatou te faia i lenei taimi o le iʻuga!