Fesili Mai le ʻAufaitau
Pe afai o lea e finagalo malie Ieova e faamagalo agasala e ala i le aogā o le taulaga togiola, aiseā la e manaʻomia ai mo Kerisiano ona taʻutino a latou agasala i toeaina o le faapotopotoga?
E pei ona mātauina i le mea na tupu i a Tavita ma Patesepa, e ui i se matuiā o le agasala a Tavita, ae sa faamagalo e Ieova talu ai sa moni aʻiaʻi le salamō o Tavita. Ina ua talanoa atu le perofeta o Natano i a te ia, sa taʻutino ma le faamaoni e Tavita e faapea: “Ua ou agasala lava ia Ieova.”—2 Samuelu 12:13.
Ae peitaʻi, e lē gata ina talia e Ieova le taʻutinoga faamaoni a le tagata ua agasala ma faamagalo mai i ai, ae ua ia saunia foʻi sauniuniga alofa e fesoasoani i lē ua sesē ina ia toe faasolo ina malosi faaleagaga. I le tulaga o Tavita, na faaauala mai le fesoasoani i le perofeta o Natano. I aso nei, i le faapotopotoga Kerisiano, o loo iai tane matutua faaleagaga, po o toeaina. Ua faamatala mai e le soo o Iakopo e faapea: “Ua maʻi [faaleagaga] ea so outou? Ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suauu i le suafa o [Ieova]. O le tatalo foi e faia i le faatuatua e faaolaina ai le maʻi, e faatuina foi o ia e [Ieova]; afai foi ua agasala, e faamagaloina ia.”—Iakopo 5:14, 15.
E tele mea e mafai ona faia e toeaina ua iai le potomasani e faateʻa ese ai tigā o le loto, lea ua lagonaina e le tagata agasala ua salamō. E latou te taumafai e faataʻitaʻi atu i a Ieova i a latou feutagaʻiga ma ia. E lē taitai ona latou fia inainā, e ui atonu e talafeagai ona avatu ni aʻoaʻiga malolosi. Na i lo lea, e latou te iloiloina ma le alofa mea o loo manaʻomia i lea lava taimi e le tagata ua agasala. E latou te taumafai ma le onosai e toe faatonutonu mafaufauga o lē ua sesē e ala i le faaaogāina o le Afioga a le Atua. (Kalatia 6:1) E tusa lava pe lē tausolomua le tagata faimea sesē e taʻutino mai lana agasala, ae atonu e oo lava ina ia lagona le salamō pe a talanoa atu toeaina i a te ia, e pei ona sa tupu i a Tavita ina ua talanoa atu i ai Natano. O le lagolagosua lea ua tuuina atu e toeaina e fesoasoani i le tagata faimea sesē na te ʻalofia ai le lamatiaga o le toe faia foʻi o le agasala, aemaise āuga matuiā o le oo ina faaua maaa ma faifai ai pea le agasala.—Eperu 10:26-31.
E mautinoa e lē faigofie i se tasi ona taʻutino atu i isi ni gaoioiga o loo masiasi ai ona faalogona ma saʻili atu mo se faamagaloga. E manaʻomia ona malosi le loto. Ae seʻi toe tomanatu lava, i le isi itu. Na faapea mai se tamāloa o lē e na te leʻi faailoaina lana agasala matuiā i toeaina o le faapotopotoga: “Sa ou lagonaina i loʻu loto se tigā sa lē mafai ona teʻa ese. Sa ou faateleina aʻu taumafaiga i le galuega talaʻi, ae sa tumau pea le leaga o oʻu faalogona.” Sa iai lona manatu faapea, e lava lona tatalo atu i le Atua e taʻutino i ai lana agasala, peitaʻi na manino lava e lē o le tulaga lena, auā sa oo i a te ia faalogona e pei ona sa oo i le tupu o Tavita. (Salamo 51:8, 11) Maeʻu le lelei o le taliaina o le fesoasoani alofa ua saunia e Ieova e ala mai i toeaina!