Pe e Mafai Moni Ona Iai se Sosaiete e Leai ni Faaeseesega o Vaega o Tagata?

O JOHN ADAMS, o lē na avea ma peresitene lona lua o le Iunaite Setete, o ia o se tasi o i latou na sainia le Faalauiloaga o le Tutoʻatasi mataʻina, lea na aofia ai upu tāua nei: “Matou te talitonu i nei mea e manino moni, e faapea o tagata uma ua foafoaina e tutusa.” E ui i lea, na manino mai le faalētonu o John Adams faapea e tutusa moni lava tagata, ona na ia tusi e faapea: “O le lē tutusa o Mafaufau ma Tino sa faia ai e le Atua e Ona le Malosi Uma Lava i lona Foafoaina o le tulaga faale-Natura o le Tagata, lea e leai se mataʻisau poto po o se faatulagaga e mafai ona faatutusaina ai.” I sona faaeseesega, na mafai e H. G. Wells, o sē e tulimataʻia talafaasolopito, ona faaata i lona mafaufau se sosaiete e tutusa uma tagata e faavae i mea e tolu: se lotu e mamā ma lē filogia e maua i so o se itu o le lalolagi, e tutusa aʻoaʻoga mo tagata uma, ma e leai ni taua e tauina ai.

E oo mai lava i le taimi nei, e leʻi tupu lava i le talafaasolopito se sosaiete e tutusa uma tagata lea na faaataina i le mafaufau o Wells. E matuā mamao lava tagata mai le tutusa uma, ma o le faaeseese o vaega o tagata o loo avea pea ma vala autū o le sosaiete. Po ua aumaia ea e na vaega ni aogā i le sosaiete o tagata i sona tulaga atoa? E leai. Ua faavasegaina tagata ona o le faiga o loo vaevaeina ai i le sosaiete, lea ua oo ai i le mataʻua, feitagaʻi, loto tigā, ma le tele o le faamasaatoto. O le iai i Aferika, Ausetalia, ma Amerika i Mātū o le manatu faapea e maualuga aʻe le lanu paʻepaʻe, na aumaia ai ni mafatiaga iā i latou e lē o ni tagata papaʻe—e aofia ai le faatamaʻiaga atoatoa o ituaiga o tagata Aborigine i Van Diemen’s Land (lea ua taʻua o Tasmania i le taimi nei). I Europa, o le faavasegaina o tagata Siū o ni tagata e maulalo ifo na amata ai se Fasiotiga Tagata tele. O le mauaina o le tele o le manuia e tagata maualuluga ma le lē malilie o le vaega maulalo ma le vaega feoloolo, o ni vala ia na taʻitaʻiina ai i le Fouvalega a Falani i le senituri lona 18 ma le Fouvalega a Bolshevik i le senituri lona 20 i Rusia.

Na tusi se tamāloa atamai i aso ua mavae e faapea: “E pule ai le tasi tagata i le tasi, e leaga ai o ia lava.” (Failauga 8:9) Ua moni lava ana upu pe a pulea e tagata taʻitoʻatasi po o vaega foʻi. Pe a faamaualuga aʻe e le tasi vaega i latou lava i luga o isi, e mautinoa le oo ai i mafatiaga ma puapuaga.

E Tutusa Tagata Uma i le Atua

Po o iai ea nisi vaega o tagata na fananau mai lava e maualuluga aʻe na i lo isi vaega? E lē faapena le silafaga a le Atua. Ua faapea mai le Tusi Paia: “Ua faia foi e le Atua nuu uma o tagata i le toto e tasi, ia nonofo i le fogaeleele uma lava.” (Galuega 17:26) E lē gata i lea, o Lē na Foafoaina Mea “na te le faailogaina alii sili, ma ua le sili lona silasila i lē mauoa i lona silasila i lē mativa? auā o le galuega a ona aao i latou uma.” (Iopu 34:19) E aiga tagata uma, ma i luma o le Atua e tutusa uma tagata na fananau mai.

Manatua foʻi, pe a maliu se tagata, o manatu faafia maualuga uma faapea o ia e maualuga i isi ua mavae atu. Sa leʻi talitonu i ai tagata Aikupito anamua i lenā tulaga. Pe a maliu se Farao, e latou te tuuina mea taugatā i lona tuugamau ina ia mafai ai ona olioli o ia i na mea, a o faaauau ona soifua i lona tulaga maualuga i se isi olaga pe a mavae le oti. Pe na ia olioli ai? E leai. O le tele o na ʻoa na aveina e tagata faomea i tuugamau, ma o le tele o mea na leʻi gaoia e tagata faomea e mafai ona vaaia i fale mataaga i aso nei.

Talu ai ua oti o ia, o le mea moni la, na leʻi mafai ona faaaogāina e Farao na mea taugatā. I le maliu, e leai se vaega e maualuga aʻe ma maulalo ifo, e leai se mauʻoa ma e leai foʻi se mativa. Ua taʻua e le Tusi Paia e faapea: “E oti tagata popoto, e fano foi le tagata valea atoa ma le vale . . . A e le tumau le tagata i lona lelei; e tusa i latou ma manu ona fano.” (Salamo 49:10, 12) Po o i tatou o ni tupu po o pologa, ua moni nei upu faagaeeina mo i tatou uma lava: “A o e ua oti, latou te le iloa se mea; ua leai foi se toe totogi ia te i latou . . . E leai se galuega, po o se mafaufau, po o se iloa, po o se poto i le tuugamau, o loo e alu atu i ai.”—Failauga 9:5, 10.

Ua tatou fananau uma mai e tutusa i le silafaga a le Atua, ma e tatou te tutusa uma lava foʻi i le oti. Pagā la le lē aogā, o le siitia o le tulaga o se tasi vaega o tagata i luga aʻe o le isi vaega a o faagasolo lo tatou olaga puupuu!

Se Sosaiete e Leai se Faaeseesega o Vaega o Tagata—E Faapefea Ona Maua?

Peitaʻi, po o iai ea se faamoemoe faapea o le a iai se aso o le a iai se sosaiete o i latou o loo ola, o le a lē toe faatāuaina ai le faaeseesea o vaega o tagata? Ioe, o loo iai le faamoemoe. I le toetoe lava 2,000 tausaga ua mavae a o iai Iesu i le lalolagi, na faataatia ai le faavae mo lenā sosaiete. Na tuuina atu e Iesu lona ola e fai ma taulaga togiola mo tagata uma e talitonu ina ia “le fano se tasi e faatuatua ia te ia, a ia maua e ia le ola e faavavau.”—Ioane 3:16.

Ina ia faaalia faapea e leai se tasi o ona soo e faamaualugaina o ia i ona uso talitonu, na taʻua ai e Iesu e faapea: “Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi neʻi taʻua outou o aʻoaʻo; auā e toatasi la outou aʻoaʻo, o le Keriso lea. A o lē sili ia te outou e fai lea ma a outou auauna. O sē faamaualuga o ia ia te ia, e faamaulaloina lea.” (Mataio 23:8-12) I le silasila a le Atua, o soo moni o Iesu, e tutusa uma i latou i le lotu moni.

Pe na vaai uluaʻi Kerisiano iā i latou faapea e tutusa? O i latou na mauaina le uiga o aʻoaʻoga a Iesu na latou faia faapea. Na latou vaai le tasi i le isi e tutusa i le faatuatua ma na faaalia lenā tulaga e ala i le taʻua e le tasi o le isi o se “uso.” (Filemoni 1, 7, 20) Sa leʻi faalaeiauina se tasi e vaai iā te ia e sili aʻe na i lo isi. Seʻi manatu mo se faaaʻoaʻoga i le auala lotomaulalo lea na faamatalaina ai e Peteru ia lava i lana tusi lona lua: “O Simona Peteru, o le auauna ma le aposetolo a Iesu Keriso, i e ua maua le faatuatua e tusa lona lelei ma lo matou.” (2 Peteru 1:1, LF) Na aʻoaʻoina totino Peteru e Iesu, ma ona o ia o se aposetolo, sa iā te ia se tulaga tāua i le tauaveina o tiute tauave. Peitaʻi, na ia manatu iā te ia lava o se auauna ma na ia iloa lelei faapea, o isi Kerisiano o loo iā i latou foʻi le faaeaga tutusa lea e pei foʻi ona iā te ia e tusa ai ma le faatuatua.

E ono faapea mai nisi o le faatulagaga sili o le faatutusa o tagata e feteenaʻi ma le mea moni faapea, i taimi a o leʻi oo i le Faa-Kerisiano na faia ai e le Atua ia Isaraelu ma ona nuu faapitoa. (Esoto 19:5, 6) Atonu e latou te faapea mai o se faataʻitaʻiga lenei o le faamaualugaina o se ituaiga, ae peitaʻi e lē o le tulaga lenā. E moni o tagata Isaraelu, o ni ē na tupuga mai iā Aperaamo, na latou olioli i se faiā faapitoa ma le Atua ma na faaaogāina o se auala mo le faaalia mai o faaaliga tauatua. (Roma 3:1, 2) O le fuafuaga o lenei mea e lē o le tuuina ai o i latou i se tulaga maualuga. Na i lo lenā, sa faia ina ia ‘manuia ai nuu uma lava.’—Kenese 22:18; Kalatia 3:8.

Na faamaonia faapea o le toʻatele o tagata Isaraelu sa leʻi faataʻitaʻi atu i le faatuatua o lo latou augātamā o Aperaamo. Na latou lē faamaoni ma teena Iesu o le Mesia. Ona o lenā tulaga, na teena ai i latou e le Atua. (Mataio 21:43) Peitaʻi, o ē na agamalu i tagata sa mauaina le taui o mea lelei na folafolaina mai. I le Penetekoso o le 33 T.A., na faavaeina ai le faapotopotoga Kerisiano. O lenei faalapotopotoga o Kerisiano o ē na faauuina e le agaga paia na taʻua o “le Isaraelu o le Atua,” ma na faamaonia o le auala lenā o le a oo mai ai na faamanuiaga.—Kalatia 6:16.

O nisi o tagata o lenā faapotopotoga na manaʻomia ona aʻoaʻoina e faatatau i le tulaga o le faatutusa ma isi. Mo se faaaʻoaʻoga, na fautuaina e le soo o Iakopo i latou na latou avatua le ava i Kerisiano mauʻoa na i lo i latou e matitiva. (Iakopo 2:1-4) E sesē lenā mea. Sa faaalia e le aposetolo o Paulo faapea o Kerisiano o Nuu ese sa lē maulalo ifo i Kerisiano Iutaia, ma o fafine Kerisiano sa lē maulalo ifo i tane. Na ia tusi mai e faapea: “Auā o atalii o le Atua outou uma lava i le faatuatua ia Keriso Iesu. Auā o outou uma lava na papatisoina ia Keriso, ua outou oofu ia Keriso; e le o i ai se Iutaia po o se Eleni, e le o i ai se pologa po o se saʻoloto, e le o i ai se tane po o se fafine; auā ua tasi lava outou uma ia Keriso Iesu.”—Kalatia 3:26-28.

Tagata e Lē o Faaeseesea i ni Vaega i Aso Nei

Ua taumafai Molimau a Ieova i aso nei e ola e tusa ai o mataupu silisili faale-Tusi Paia. E latou te iloa e faapea o le faaeseesea o vaega o tagata e leai se tāua i le silafaga a le Atua. O lea, e leai ni vasega o faifeʻau po o tagata lotu e vaevaeina i ai, ma e lē o faaeseesea foʻi e tusa ai o o latou lanu po o le tamaoaiga. E ui o nisi o i latou atonu e tamāoaiga ae latou te lē o taulaʻi atu i “le faalialia o mea o loo maua e le tagata i lenei olaga,” (NW) ona ua latou iloa o na mea ua na o ni mea e lē tumau. (1 Ioane 2:15-17) Na i lo lea, ua autasia tagata uma i la latou tapuaʻiga i le Alii Pule Silisili Ese, o Ieova le Atua.

O tagata uma taʻitoʻatasi, e taliaina le tiute tauave o le auai i le galuega o le talaʻia o le tala lelei o le Malo i o latou uso a tagata. I le pei o Iesu, e latou te ava iā i latou ua lotomomomo ma tuulafoaʻia e ala i le asiasi atu i ai i o latou aiga, ma ofo atu e aʻoaʻoina i latou i le Afioga a le Atua. O i latou e maulalo lo latou tulaga i le olaga e galulue soosoo tauʻau ma i latou atonu e vāai i ai nisi o se vaega e maualuga aʻe. O uiga faaleagaga e tāua, ae lē o le vaega o tagata. E pei ona iai i le uluaʻi senituri, o tagata uma o uso ma tuafāfine i le faatuatua.

O le Faatutusa ua Iai Foʻi ma Ituaiga Eseese

O le mea moni, o le faatutusa e lē uiga i le matuā tutusa aʻiaʻi. O tane ma fafine, o ē matutua ma talavou, o i latou uma o loo fai ma sui o lenei faalapotopotoga Kerisiano lea e aofia ai tagata mai le tele o lanu, o gagana, o atunuu, ma talaaga tau tamaoaiga. O tagata taʻitoʻatasi, e eseese o latou tomai faalemafaufau ma faaletino. Ae o na eseesega e lē avea ma mea e sili aʻe ai nisi ae maulalo ifo ai isi. Na i lo lenā, o na eseesega e mauaina ai ni tulaga eseese matagofie. E iloa e na Kerisiano faapea e so o se taleni o loo iā i latou o meaalofa mai le Atua ma e lē o ni māfuaaga na mo le iai o ni faalogona o le maualuga aʻe i lo isi.

O le faaeseese o vaega o tagata o iʻuga na o le taumafai o le tagata e pulea o ia lava na i lo le mulimuli atu i taʻiala a le Atua. E lē o toe umi, ae pulea atoatoa loa e le Malo o le Atua lenei lalolagi, ma o le a faaiʻua ai le faaeseesega o vaega o tagata o loo faia e le tagata lava ia, faatasi ai ma isi mea na māfua ai le puapuagatia mo le tele o tausaga. O lea, i se uiga moni lava, “o e agamalu, e fai mo latou le nuu.” (Salamo 7:11) O māfuaaga uma mo le mitamitavale e faatatau i le maualuga aʻe o le tagata lava ia, o le a mavae atu. O le a lē toe faatagaina le iai o se faaeseesega o vaega o tagata e vaevaeina ai le ʻauuso o tagata i le lalolagi atoa.

[Faamatalaga faaopoopo i le itulau 5]

O Lē na Foafoaina Mea ‘ua le sili lona silasila i lē mauoa i lona silasila i lē mativa, auā o le galuega a ona aao i latou uma.’—Iopu 34:19.

[Ata i le itulau 6]

E faaalia e Molimau a Ieova le ava i o latou tuaoi

[Ata i le itulau 7]

O uiga faaleagaga e tāua i Kerisiano moni