Ua Saunia Lelei e Avea ma Faiaʻoga o le Afioga a le Atua
“[O] le Atua, o lē ua ia matuā taʻuagavaaina lelei i tatou ina ia fai ma faifeʻau.”—2 KORINITO 3:5, 6, NW.
1, 2. O ā taumafaiga e talaʻi atu o loo faia i nisi taimi, ae aiseā ua masani ai ona lē taulau?
O LE ā sou manatu pe a tuu atu iā te oe se galuega e te faia ae e te lē agavaa e fai? Seʻi manatu i tulaga nei: Ua iā te oe mea e manaʻomia ona faaaogā e fai ai le galuega, ma o loo iai mea faigaluega e manaʻomia mo le galuega. Peitaʻi e matuā leai lava ma sou silafia pe faapefea ona fai le galuega. Ua atili faateteleina le faalētonu, ona o le galuega lenei e faanatinati. O loo faalagolago mai tagata iā te oe. Pagā le faalotovaivaiina ai!
2 O loo tutupu moni mea faapena. Seʻi manatu i se faaaʻoaʻoga. I nisi taimi, e taumafai ai se tasi o lotu o Kerisinetoma e faatulaga ma faataunuu se talaʻiga i lea fale i lea fale. E masani lava ona lē taulau na taumafaiga, ma e toe mou mālie atu lava i ni nai vaiaso po o ni masina foʻi. Aiseā? E lē o fesoasoani atu Kerisinetoma i ona tagata ina ia agavaa e fai le galuega. E oo lava foʻi i le ʻaufailotu e lē o agavaa i latou mo le faia o lenā galuega talaʻi, e ui lava i le tele o tausaga sa aʻoaʻoina ai i aʻoga masani atoa ai ma aʻoga faafaifeʻau. Aiseā e mafai ai ona tatou fai atu faapea?
3. I le 2 Korinito 3:5, 6, (NW) o le ā le faaupuga o loo faaaogāina faatolu, ma o le ā lona uiga?
3 O loo faamatalaina i le Afioga a le Atua mea e taʻuagavaaina ai se tagata talaʻi moni o le tala lelei faa-Kerisiano. Na faagaeeina le aposetolo o Paulo e tusi faapea: “Auā e lē faapea ua taʻuagavaaina lelei i tatou ina ia manatunatu i so o se mea e peiseaʻī o loo mai iā i tatou lava, ae o le taʻuagavaaina lelei o i tatou e mai le Atua, o lē ua ia matuā taʻuagavaaina lelei i tatou ina ia fai ma faifeʻau.” (2 Korinito 3:5, 6, NW) Mātau le faaupuga o loo faaaogāina faatolu i inei—o le “taʻuagavaaina lelei.” O le ā lona uiga? Ua faapea mai le Vine’s Expository Dictionary of Biblical Words: “Pe a faatatau atu i ni mea, e mafai ona uiga atu [le upu Eleni] i le ‘lava’ . . . ; pe a faatatau atu i tagata, o lona faauigaina o le ‘atoatoa ona lelei,’ po o le ‘talafeagai.’” O lea la, o se tasi ua “taʻuagavaaina lelei,” e atoatoa ona lelei ma ua talafeagai ona ia faia se galuega ua tuuina atu e fai. Ioe, o faifeʻau moni o le tala lelei ua agavaa i latou e talaʻi. Ua atoatoa ona lelei, onomea, po ua talafeagai ona talaʻi.
4. (a) Ua faapefea ona faaalia i le faaaʻoaʻoga a Paulo e faapea o le taʻuagavaaina mo le auaunaga faa-Kerisiano e lē faatapulaaina i se vaega faapitoa? (e) O ā auala e tolu ua faaaogāina e Ieova e taʻuagavaaina ai i tatou o ni faifeʻau?
4 Ae, o fea e maua mai ai lenā agavaa? Pe maua mai ea i tomai o le tagata lava ia? Po o se atamai faapitoa ua iai i se tasi? Pe ona o ni aʻoaʻoga faapitoa mai i ni aʻoga maoaʻe? O le mea moni lava na iai i le aposetolo o Paulo na mea uma . (Galuega 22:3; Filipi 3:4, 5) Peitaʻi, na ia taʻutino mai ma le lotomaulalo e faapea, o lona taʻuagavaaina e fai ma faifeʻau sa maua e lē mai i aʻoaʻoga maualuluga, ae e mai iā Ieova le Atua. Pe sa faapitoa se vaega o tagata na latou mauaina nei agavaa? Na tusi atu Paulo i le faapotopotoga i Korinito e faatatau i le ‘matuā taʻuagavaaina lelei o i tatou.’ Ua taʻu moni mai ai e faapea ua faamautinoa e Ieova ua atoatoa ona lelei ana auauna faamaoni uma, e mafai ona faia le galuega ua ia tofia i latou e fai. O faapefea ona taʻuagavaaina e Ieova Kerisiano moni i aso nei? Seʻi o tatou talanoaina auala e tolu o loo ia faaaogāina: (1) o lana Afioga, (2) o lona agaga paia, ma (3) lana faalapotopotoga i le lalolagi.
Ua Taʻuagavaaina i Tatou e le Afioga a Ieova
5, 6. O ā aafiaga o le Tusi Paia ua iai i Kerisiano moni?
5 Muamua, e faapefea ona taʻuagavaaina i tatou e le Afioga a le Atua e avea ma faifeʻau? Na tusi Paulo e faapea: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:16, 17) E fesoasoani la le Tusi Paia ina ia tatou “atoatoa ona lelei, . . . ia saunia lava” e fai le “galuega lelei” o le aʻoaʻoina lea o tagata i le Afioga a le Atua. Ae faapefea la tagata o lotu Kerisinetoma? O loo iā i latou foʻi le Tusi Paia. E faapefea ona mafai e lenei tusi e tasi ona fesoasoani i isi ina ia avea ma faifeʻau ua atoatoa ona lelei ae lē faia faapea i isi? E faalagolago le tali i o tatou uiga faaalia agaʻi i le Tusi Paia.
6 E faanoanoa lava ona e toʻatele tagata o loo auai i lotu e lē taliaina le feʻau a le Tusi Paia, e faapea o “le upu a le Atua, (e moni lava lea).” (1 Tesalonia 2:13) Ua ati aʻe e Kerisinetoma se talaaga e faalumaina ai e tusa ai ma lenei mea. Pe a uma ona faaaluina ni tausaga se tele e suʻesuʻe ai i aʻoga faafaifeʻau, po ua lelei ai ea la ona saunia le ʻaufailotu e avea o ni faiaʻoga o le Afioga a le Atua? E leai. O le mea moni, o nisi o tagata aʻoʻoga sa amata a latou suʻesuʻega i seminario a o talitonu i le Tusi Paia, ae e faauu ane ua faalētalitonu i ai! O lea, na i lo le talaʻia o le Afioga a le Atua—lea ua lē o toe talitonu i ai le toʻatele o i latou—ae ua taulaʻi atu la latou faiva i isi tafa eseese, i le auai atu i fefinauaʻiga faapolotiki, faaauilumaina le feʻau e faamamafa ai le faaleleia o faafitauli i faiga faaletagata, ia po o le faamatilatilaina foʻi o filosofia a lenei lalolagi i a latou lauga. (2 Timoteo 4:3) Ua ese ai Kerisiano moni o ē e mulimuli atu i faaaʻoaʻoga a Iesu Keriso.
7, 8. Na faapefea ona ese uiga o Iesu i le Afioga a le Atua mai taʻitaʻi lotu o ona aso?
7 Sa leʻi faatagaina e Iesu taʻitaʻi lotu o ona aso e faaaafia ai ona manatu. E tusa lava pe sa ia aʻoaʻo atu i se vaega toʻaitiiti, e pei o ona aposetolo, po o se vaega toʻatele, ae sa lelei lava ona faaaogāina e Iesu tusitusiga paia. (Mataio 13:10-17; 15:1-11) O le faiga lenei sa ese ai o ia mai taʻitaʻi lotu o ona aso. Sa matuā faalotovaivaiina e taʻitaʻi lotu tagata lautele ina ia aua neʻi tilofaʻia aʻoaʻoga loloto a le Atua. O le mea moni, sa fai ma masani a se faiaʻoga i na aso ona talitonu e faapea, o nisi vaega o le Tusi Paia e loloto tele mo le talanoaina ma so o se tasi, seʻi vaganā ai lana tagata aʻoga e pito sili ona ia fiafia i ai—ae e oo lava foʻi i lenā tulaga, e ao ona fetalanoaaʻi i se leo lemu lava ma ia ufitia foʻi o la ulu. Sa iai i na taʻitaʻi lotu ni talitonuga e lē faavaea e tusa ai ma le faaleoina o le suafa o le Atua, ma sa tai faapena foʻi lo latou manatu e tusa ai o le talanoaina o nisi vaega o le Tusi Paia!
8 Sa lē faapena Keriso. Na talitonu o ia, e lē mo na o se vaega faapitoa, ae o tagata uma sa manaʻomia ona manatunatu i “afioga uma e tulei mai i le fofoga o le Atua.” Sa leʻi manatu Iesu e tuu atu le faaeaga o le faamalamalamaina o le Tusi Paia i se vaega faapitoa o ni tagata popoto. Na ia fetalai atu i ona soo e faapea: “O laʻu e fai atu ia te outou i le pouliuli, tou te taʻu atu lea i le malamalama; o le mea foi ua lagona i o outou taliga, ia outou talaʻi atu i luga o fale.” (Mataio 4:4; 10:27) Sa matuā naunau lava Iesu e taʻu atu le poto o le Atua i le tele o tagata sa mafai ona oo atu iai.
9. Ua faaaogāina faapefea e Kerisiano moni le Tusi Paia?
9 E ao ona avea le Afioga a le Atua ma vala autū o la tatou aʻoaʻo atu. Mo se faaaʻoaʻoga, pe a tatou faia se lauga i le Maota o le Malo o Molimau a Ieova, o le tulaga masani lava ia, e lē lava le faitauina o mau e filifilia mai i le Tusi Paia. E tatau ona tatou faaalu se taimi e faamatala ai, faataʻitaʻi, ma faatatauina mau mai i le Tusi Paia. O lo tatou sini o le faaooina atu lea o le feʻau a le Tusi Paia ina ia pāʻia loto o ē o faalogologo mai iā i tatou. (Neemia 8:8, 12) E ao foʻi ona faaaogā le Tusi Paia pe afai e tatau ona avatu se fautuaga po o se aʻoaʻiga e faasaʻo ai. E ui lava ina eseese gagana e tautatala ai tagata o Ieova ma e eseese o latou talaaga, e latou te faaaloalogia uma lava le Tusi e aupito silisili o tusi uma—o le Tusi Paia lea.
10. O ā āuga e mafai ona oo iā i tatou mai le feʻau faagaeeina a le Tusi Paia?
10 E iai le mana o le feʻau o le Tusi Paia pe a faaaogāina ma le migao. (Eperu 4:12) E uunaʻia tagata e faia suiga i o latou olaga, e pei o le liliu ese mai amioga e lē faale-Tusi Paia e pei o le faitaaga, mulilua, ifo i tupua, onā, ma le gaoi. Ua fesoasoani i le toʻatele ina ia toese le tagata tuai ae ofu i le tagata fou. (Efeso 4:20-24) Ioe, afai tatou te faaaloalo i ai e sili aʻe i so o se manatu po o ni uputuu faaletagata, ma faaaogā ma le tonu, e mafai e le Tusi Paia ona fesoasoani ina ia tatou atoatoa ai ona lelei, ma sauniunia atoatoa i tatou o ni faiaʻoga o le Afioga a le Atua.
Ua Taʻuagavaaina i Tatou e le Agaga o Ieova
11. Aiseā ua fetaui lelei ai le faasino atu i le agaga paia o Ieova o “le Fesoasoani”?
11 Lona lua, seʻi o tatou talanoaina le vaega a le agaga paia o Ieova, po o le mana galue, i le saunia lelei o i tatou. Aua lava neʻi galo iā i tatou o le agaga paia o Ieova o le mana aupito i malosi lava lea o loo iai. Ua tuuina atu e Ieova le pule i lona Alo pele ina ia faaaogāina lenā mana maoaʻe mo Kerisiano moni uma. O le mea lenā, na faasino atu ai Iesu i le agaga paia e faapea o “le Fesoasoani.” (Ioane 16:7) Na ia faalaeiauina ona soo ina ia talosaga atu iā Ieova mo lenā agaga, ma faamautinoa atu iā i latou o le a foaʻi mai ma le agalelei e Ieova.—Luka 11:10-13; Iakopo 1:17.
12, 13. (a) Aiseā e tāua ai lo tatou tatalo mo le agaga paia e fesoasoani iā i tatou i la tatou faiva? (e) Na faapefea ona faaalia mai e le ʻau Faresaio e leʻi galue le agaga paia iā i latou?
12 E manaʻomia ona tatou tatalo atu i aso uma mo le agaga paia, aemaise lava ina ia fesoasoani mai iā i tatou i la tatou faiva. O ā aafiaga o lenā mana galue iā i tatou? E mafai ona galue i o tatou mafaufau ma loto, e fesoasoani iā i tatou ina ia faia ni suiga, e fesoasoani iā i tatou e tutupu aʻe faaleagaga, ma suia uiga tuai faaletagata i ni uiga fou. (Kolose 3:9, 10) E mafai ona fesoasoani iā i tatou e ati aʻe uiga tāua sa faaalia e Keriso. O le toʻatele o i tatou e mafai ona taulotoina le Kalatia 5:22, 23. O fuaiupu na o loo lisi mai ai fua o le agaga o le Atua. O le uiga muamua lava o le alofa. O se uiga e tāua tele lea i la tatou faiva. Aiseā?
13 O le alofa o se uunaʻiga e malosi tele. O le alofa mo Ieova ma o tatou uso a tagata e uunaʻia ai Kerisiano moni e tufa atu le tala lelei. (Mareko 12:28-31) A aunoa ma se alofa faapena, e lē mafai ona tatou agavaa moni o ni faiaʻoga o le afioga a le Atua. Seʻi mātau le eseesega o Iesu ma le ʻau Faresaio. Ua faapea ona faamatalaina i le Mataio 9:36 ia Iesu: “Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” E faapeʻī lagona o le ʻau Faresaio i tagata lautele? Ua latou faapea mai: “O lenei vao tagata ua le iloa le tulafono, ua fetuuina lava i latou.” (Ioane 7:49) Sa aunoa na Faresaio ma se alofa i tagata ae ua tele le manatu faatauvaa. E manino lava le mata o le vai, e leʻi galue le agaga paia o Ieova iā i latou.
14. E tatau faapefea ona uunaʻia i tatou i le faaaʻoaʻoga a Iesu i le faaalia o le alofa i le taimi o lana faiva?
14 Sa tigā alofa Iesu mo tagata. Sa ia silafia o latou tigā. Na ia silafia le faileagaina o i latou, sa mafatia ma tuulafoaʻiina e pei o mamoe ua leai so latou leoleo mamoe. Ua taʻu mai iā i tatou e le Ioane 2:25 e faapea “ua na silafia mea o i loto o tagata.” Talu ai sa avea o ia ma Tufuga a Ieova i le taimi o le foafoaga, sa iā Iesu se malamalamaga loloto e faatatau i tulaga o tagata. (Faataoto 8:30, 31) O le malamalamaga lenā sa faalolotoina ai lona alofa. Tau ina ia avea lenā alofa ma uunaʻiga mo i tatou i taimi uma, i le faia o le galuega talaʻi! Afai tatou te lagona e mafai ona tatou faia ni faaleleiga atili i lenei tulaga, e ao ona tatou tatalo atu mo le agaga paia o Ieova ma galulue e ōgatusa ma a tatou tatalo. O le a tali mai Ieova iā i tatou. O le a ia auina mai lea mana e lē mataofia e fesoasoani iā i tatou ina ia pei o Keriso, o lē na matuā agavaa lava e talaʻia le tala lelei.
15. Na faapefea ona faatatau upu o le Isaia 61:1-3 iā Iesu ae i le taimi e tasi ua faaalialia ai tusiupu ma Faresaio?
15 O fea na maua mai ai agavaa o Iesu? Ua ia faapea mai: “Ua i oʻu luga le Agaga o le Alii [Ieova].” (Luka 4:17-21) Ioe, na tofiaina Iesu e Ieova e ala i le agaga paia. Sa leʻi toe manaʻomia ai e Iesu nisi agavaa. Pe na tofia e le agaga paia taʻitaʻi lotu o ona aso? E leai. E leʻi saunia foʻi i latou e faataunuuina le valoaga i le Isaia 61:1-3, lea na faitau leotele e Iesu ma faatatauina iā te ia lava. Faamolemole faitau i fuaiupu na, ma e tagaʻi i ai i le leai o se agavaa o tusiupu ma Faresaio faafiaamiotonu. Sa lē iā i latou se tala lelei e folafola i ē matitiva. Ma o le a faapefea ona latou talaʻia se saʻolotoga i le tafeaga, ma faapupulaina mata o ē tauaso? I sona uiga faaleagaga, o lea foʻi o loo latou tauaso ma nofo pologa i uputuu a tagata! I le lē pei o na tagata, po ua taʻuagavaaina ea i tatou e aʻoaʻo tagata?
16. O le ā le mautinoa atonu e mafai ona iai i tagata o Ieova i aso nei e tusa ai o lo latou agavaa e avea ma faifeʻau?
16 E moni, e tatou te leʻi aʻoʻoga i aʻoga maualuluga a Kerisinetoma. E leʻi tofia foʻi i tatou e avea ma faiaʻoga mai aʻoga faafaifeʻau. Pe o lona uiga ea la ua leai ni o tatou agavaa? E mautinoa e iai! O o tatou tofiga o le avea ma ana Molimau e sau mai iā Ieova. (Isaia 43:10-12) Pe afai e tatou te tatalo mo lona agaga paia ma galulue ia ōgatusa ma a tatou tatalo, ua iai la iā i tatou agavaa e sili ona maualuluga. O le mea moni, e tatou te lē lelei atoatoa ma ua lē ausia ai le faaaʻoaʻoga na faataatia e le Faiaʻoga Sili, o Iesu. E ui i lea, pe tatou te lē lotofaafetai ea ona ua faaaogā e Ieova lona agaga e taʻuagavaaina ma faaauupegaina ai i tatou e avea ma faiaʻoga o lana Afioga?
Ua Taʻuagavaaina i Tatou e le Faalapotopotoga a Ieova
17-19. E faapefea e sauniga e lima i le vaiaso ua saunia e le faalapotopotoga a Ieova ona fesoasoani e taʻuagavaaina ai i tatou o ni faifeʻau?
17 Seʻi o tatou talanoaina nei le auala lona tolu a Ieova mo le sauniaina o i tatou e avea ma faiaʻoga o lana Afioga—lana faapotopotoga faalelalolagi, po o le faalapotopotoga lea e toleniina i tatou e avea ma faifeʻau. E faapefea? Seʻi tau ina manatu i le polokalame tau aʻoaʻoga o loo tatou mauaina ai aogā! I le faasologa masani o le vaiaso, tatou te auai i sauniga faa-Kerisiano e lima. (Eperu 10:24, 25) E tatou te faapotopoto i vaega laiti i Suʻesuʻega Tautusi a le Faapotopotoga ina ia talanoaina ai se suʻesuʻega loloto o le Tusi Paia, e ala i le faaaogāina o se tusi ua saunia mai e le faalapotopotoga a Ieova. O le faalogologo lelei ma le faia o ni tali, e tatou te aʻoaʻoina mai ai ni aogā ma faalaeiau ai le tasi i le isi. E tatou te taʻitoʻatasi foʻi ma mauaina ai faatonuga patino ma le uaʻi totino mai o le ovasia o le suʻesuʻega tautusi iā i tatou. I le Sauniga i le Lautele ma le Suʻesuʻega o Le Olomatamata, tatou te mauaina ai le anoanoaʻi o taumafa susua faaleagaga.
18 Ua fuafuaina la tatou Aʻoga o le Faiva Faatiokarate ina ia aumaia ai iā i tatou faatonuga i le auala e aʻoaʻo ai. E ala i le saunia o lauga ua tofia mai iā i tatou i le aʻoga, tatou te aʻoaʻoina ai le auala e faaaogāina ai le Afioga a le Atua e aʻoaʻo atu ai i le tele o mataupu. (1 Peteru 3:15) Pe sa tofia ea oe e fai se lauga na e manatu ua e iloa lelei le mataupu, ae mulimuli ane e aʻoaʻoina mai ai se manatu fou? O le tulaga lenā e masani ona tupu. E leai se isi auala e sili ona faaleleia ai lo tatou iloaina o se mataupu, na i lo le aʻoaʻo atu i isi. E tusa lava foʻi pe tatou te lē o faia se lauga, e mafai lava ona tatou aʻoaʻoina mea ina ia avea ai ma faiaʻoga lelei. E tatou te mātauina ni uiga lelei o tagata aʻoga taʻitoʻatasi, ma e mafai ona tatou manatunatu i le auala tatou te faataʻitaʻia ai na uiga.
19 Ua fuafua foʻi le Sauniga o le Auaunaga ina ia saunia ai i tatou e avea ma faiaʻoga o le Afioga a le Atua. I lea vaiaso ma lea vaiaso, tatou te olioli ai i ni lauga aasa, ni mataupu e talanoaina faatasi, ma ni faataʻitaʻiga ua faafetaui atu i la tatou faiva. O le ā le taulimaga o le a tatou faaaogāina? Pe faapefea ona tatou fesagaʻia ni luʻi faapitoa e tulaʻi mai i la tatou faiva i le lautele? O ā ni auala e mafai ona talaʻi atu ai ua avanoa mai mo i tatou lea e ao ona tatou matuā faaaogāina lelei? O le ā e mafai ona fesoasoani ina ia avea ai i tatou ma faiaʻoga e sili atu ona uigā pe a tatou ō e fai toe asiga ma suʻesuʻega faale-Tusi Paia? (1 Korinito 9:19-22) O fesili faapena o loo lāgā ma talanoaina auʻiliʻili i le Sauniga o le Auaunaga. O le tele o vaega o le sauniga e faavae mai i mataupu i La Tatou Faiva o le Malo, o se tasi o meafaigaluega ua saunia e faaauupegaina ai i tatou mo la tatou galuega tāua.
20. E mafai faapefea ona tatou mauaina atoatoa aogā mai sauniga ma fonotaga?
20 E ala i lo tatou sauniuni ma auai i a tatou sauniga ma le faatatauina o mea ua tatou aʻoaʻoina i la tatou galuega o ni faiaʻoga, ua tele lava se toleniga ua tatou mauaina mai ai. Peitaʻi, e iai foʻi isi mea. E iai foʻi a tatou sauniga tetele e pei o fonotaga ma tauaofiaga ua fuafua e aʻoaʻoina ai i tatou e fai ma faiaʻoga o le Afioga a le Atua. Ma e maʻeu lo tatou tulimataʻia o le uaʻi totoʻa atu ma le faatatauina o na fautuaga!—Luka 8:18.
21. O ā mea moni ua faaalia ai e faapea o toleniga ua tatou maua e aogā, ma o ai e ave i ai le viiga?
21 Po o aogā toleniga o loo saunia mai e Ieova mo i tatou? Ua iai mea moni e faamaonia ai le ioeina o lenā tulaga. I tausaga taʻitasi, e faitau selau afe tagata ua fesoasoani atu i ai ina ia aʻoaʻoina aʻoaʻoga faavae o le Tusi Paia ma ola e ōgatusa ma mea o loo manaʻomia e le Atua mai iā i latou. E ui i le faateleina o lo tatou faitau aofaʻi, ae peitaʻi e leai se tasi o i tatou e tatau ona ave i ai le viiga. E ao ona iā i tatou le vaaiga saʻo e pei ona sa iā Iesu. Na fetalai o ia: “E le mafai se tasi ona sau ia te au, pe a le tosina mai e le Tamā ua auina mai aʻu.” I le pei o aposetolo anamua, o le toʻatele lava o i tatou e leʻi lelei tele aʻoaʻoga ma e valelea. (Ioane 6:44; Galuega 4:13) O lo tatou taulau manuia e faalagolago iā Ieova, o lē o loo tataʻiina maia tagata loto faamaoni i le upu moni. E ese le manaia o le auala sa faaupu ai e Paulo ina ua fai mai a ia: “Na ou totōina, na faasūsūina e Apolo; a e peitai o le Atua ua faatupuina.”—1 Korinito 3:6.
22. Aiseā e lē tatau ai ona tatou soona lotovaivai i le lē mafai ona auai atoatoa i le faiva faa-Kerisiano?
22 Ioe, o loo matuā aafia Ieova le Atua i la tatou galuega o ni faiaʻoga o lana Afioga. Atonu e lē o taimi uma e tatou te lagona ai le agavaa e avea o ni faiaʻoga. Ae manatua, o Ieova lea e tataʻiina maia tagata iā te ia atoa ma lona Alo. O Ieova lea e taʻuagavaaina i tatou e talaʻi atu i ē fou e ala i lana Afioga, o lona agaga paia, ma lana faalapotopotoga faalelalolagi. Ia tatou tali atu i toleniga mai iā Ieova e ala i le faatatauina o mea lelei ua ia aumaia ina ia saunia atoatoa ai i tatou o ni faiaʻoga o le Afioga a le Atua!
E Faapefea Ona E Tali?
• E faapefea ona faaauupegaina i tatou e le Tusi Paia mo le galuega talaʻi?
• O le ā le matafaioi a le agaga paia i le taʻuagavaaina o i tatou e avea ma faifeʻau?
• O ā auala ua fesoasoani ai le faalapotopotoga a Ieova e taʻuagavaaina ai oe e fai ma tagata talaʻi o le tala lelei?
• Aiseā e mafai ai ona tatou mautinoa pe a auai i le faiva?
[Ata i le itulau 25]
I le avea o se faiaʻoga o le Afioga a le Atua, na faaalia mai e Iesu le alofa mo tagata