Po o Pulea ea e Satani Lenei Senituri?
“UA SILISILI ona leaga le tulaga ua pulea ai e Satani lenei senituri. E leai se taimi na muamua atu ua faapea ona faaalia ai e tagata se faanaunauga malosi, ma le matuā naunau e fasiotia le faitau miliona o isi tagata ona o le faailoga lanu, lotu po o tulaga tau i le tamaoaiga.”
I se tusi i le faatonu i le New York Times o Ianuari 26, 1995, na taʻua ai e faatatau i le faamanatuina o le 50 tausaga talu ona faasaʻolotoina tagata lē sala na tuuina i falepuipui i nofoaga o faasalaga oti a le ʻau Nasi e faapea: O le Fasiotiga Tagata Mataʻutia a le ʻAu Nasi, o se tasi lea o faatamaʻiaga ua sili ona lauiloa i le tala faasolopito o tagata i totonu o se atunuu—na faaumatia ai le tusa ma le ono miliona tagata Siū. E latalata i le tolu miliona tagatānuu o Polani e lē ni Siū na maliliu ai i le mea na faaupuina o le “Forgotten Holocaust.”
Ua faapea mai Jonathan Glover i lana tusi, Humanity—A Moral History of the Twentieth Century: “O se fua faatatau mai le vaitaimi o le 1900 e oo atu i le 1989, e 86 miliona tagata na fasiotia ai i lenā taua.” Ua ia faaopoopo mai: “E matuā faigatā lava ona mafaufau i le anoanoaʻi o i latou na maliliu i taua i le senituri lona luasefulu. E so o se fua faatatau lava la i le fuainumera o tagata na maliliu, e lē saʻo, talu ai o le mea moni, e tusa ma le lua vaetolu (58 miliona) tagata na fasiotia i taua e lua a le lalolagi. Ae afai e fuafua tutusa nei tagata na maliliu i le faagasologa o le 20 senituri, e tusa la ma le 2,500 tagata na fasiotia i aso taʻitasi o le taua. O lona uiga e sili atu i le 100 tagata e fasiotia i le itula, mo le ivasefulu tausaga.”
O le mea moni, ua taʻua le lona 20 o senituri, o se vaitaimi e aupito sili ona faamasaatoto e leʻi iloa muamua e tagata. Ua tusia e Nadezhda Mandelstam i le tusi, Hope Against Hope, e faapea: “Ua tatou vaaia le manumalo o le leaga i tapulaa o amioga tatau faaletagata, ua matuā paʻū maulalo ma solipalaina.” I le tauiviga o le lelei faasaga i le leaga, po ua manumalo moni ea le leaga?
[Faamatalaga i Ata i le itulau 2]
FAAVAA: Tinā mo lana tama teine: J.R. Ripper/SocialPhotos
[Faamatalaga i Ata i le itulau 3]
U.S. Department of Energy photograph