“Na Faamalieina ai Loʻu Loto”
“FAAFETAI tele lava mo le meaalofa matagofie Faalatalata Atu iā Ieova. Na faamalieina ai loʻu loto—lea na moomoo atu i le alofa faapelepele mai o Ieova. Ua sili atu nei ona ou vavalalata atu iā Ieova ma lona Alo pele. Ou te manaʻo e faailoa atu i tagata uma lenei tusi ma ia tofu i latou e pele iā te aʻu, ma le tusi.” O faalogona na o se tasi o Molimau a Ieova i le tusi fou e 320 itulau na tatalaina i le Tauaofiaga Itumalo “O Ē Maelega e Faalauiloa le Malo,” i le 2002 ma le 2003. Seʻi o tatou iloiloina nisi o vala o lenei tusi fou ma le māfuaaga na lomia ai.
Nisi o Vala o le Tusi Fou
O le ā o loo iai i lenei tusi fou? O faamatalaga uma o loo i mataupu e lua mo suʻesuʻega o i lenei mekasini—ma isi vala e tele! E 31 mataupu o loo iai, ma o mataupu taʻitasi e umī e pei o le suʻesuʻega o Le Olomatamata. Pe a uma upu tomua ma uluaʻi mataupu e tolu, ona vaevaeina lea o le tusi i ni vaega se fā, e tofu vaega taʻitasi ma le uiga autū o Ieova. E amata vaega taʻitasi i se otootoga o le uiga o Ieova. Ona iloilo lea e mataupu o mulimuli mai ai, auala e faaalia ai e Ieova lenā uiga. O loo iai i vaega taʻitasi se mataupu e faatatau iā Iesu. Aiseā? Auā na fetalai mai Iesu: “O lē ua vaai mai iā te aʻu, ua vaai o ia i le Tamā.” (Ioane 14:9) Na saunia e Iesu ni faaaʻoaʻoga mataʻina i le auala e faaalia ai uiga o le Atua, ona na faaatagia atoatoa e Iesu le ituaiga Atua e iai Ieova. O loo faaiʻu vaega taʻitasi i se mataupu e aʻoaʻoina mai ai le auala e tatou te faaaʻoaʻo ai iā Ieova, e ala i le faaalia o le uiga o loo iloiloina. Ua faasino atu le tusi fou i tusi uma o le Tusi Paia pe a talanoa i uiga o Ieova.
E iai foʻi vala faapitoa o le tusi Faalatalata Atu iā Ieova. E amata mai i le mataupu e 2, e tofu le mataupu ma le pusa e faapea lona ulutala “Fesili e Mafaufau Loloto i Ai.” O mau ma fesili o loo iai, e lē o se autaluga o le mataupu. Peitaʻi, ua saunia mau ma fesili na ina ia fesoasoani iā te oe e faaaogā le Tusi Paia e manatunatu loloto ai i le mataupu. Ua fautuaina i tatou e faitau lelei mau taʻitasi o loo iai. Ona manatunatu lea i fesili ma taumafai e faatatau i lou olaga. O le mafaufau loloto faapena, e mafai ona uunaia ai lou loto ma fesoasoani ai iā te oe e faalatalata atu pea iā Ieova.—Salamo 19:14.
Na filifilia ma saunia lelei ata o loo i le tusi Faalatalata Atu iā Ieova ina ia aʻoaʻo ma faamalosia ai i tatou. E 17 mataupu o loo iai itulau na o ata faale-Tusi Paia.
Aiseā na Lomia Ai?
Aiseā na lomia ai le tusi Faalatalata Atu iā Ieova? O le fuafuaga autū o lenei lomiga fou, e fesoasoani iā i tatou ina ia iloa lelei Ieova ma atiina aʻe ai sa tatou faiā malosi ma māfana ma lo tatou Atua.
Pe e mafai ona e mafaufau i se tagata e aogā i ai le tusi Faalatalata Atu iā Ieova, atonu o se suʻesuʻega faale-Tusi Paia po o se uso ma se tuafafine Kerisiano ua lē o toe talaʻi? Ae ā oe—po ua amata ona e faitau i lenei tusi fou? Afai e leai, aiseā e lē faatulaga ai loa se taimi ina ia amata ai? Ia faaalu se taimi e manatunatu loloto ai i mea na e faitau iai. Tau ina ia fesoasoani lenei tusi fou e te faalatalata atu ai pea iā Ieova le Atua, ma mafai ai ona e faalauiloaina le tala lelei o lona Malo i se agaga fiafia ma le maelega!