Na Matuā Fiafia Tagata Uma ina ua Tatalaina i le Tauaofiaga Itumalo
Le Tusi Fou ua Faamatilatila ai le Poto e Uiga i le Atua
1 I la tatou tauaofiaga itumalo i lenei tausaga, maeu le faafiafiaina o i tatou i le polokalame atoa! I le aoauli o le Aso Toonai, na faumasoloi lo tatou olioli ina ua tatou faalogo i le faasilasilaga e faatatau i le tusi fou, Knowledge That Leads to Everlasting Life, ma le faamatalaga e faatatau i ai lea na mulimuli mai ai. E manaomia e le faitau piliona o tagata i le lalolagi le poto lea e na o le Atua e mafai ona ia aumaia—le poto e uiga i le Atua ma lona Alo, o Iesu Keriso.—Faata. 2:1-6; Ioa. 17:3.
2 Maeu le manino ona faamatalaina mai e le failauga o vaega o le tusi! O ulutala faatupu manatu o mataupu, o ata matagofie, le faailoaina mai ma le mautinoa o le upu moni, fesili faigofie, ma i le faaiuga o mataupu taitasi, o loo iai se pusa ua faaulutalaina e faapea, “Seʻi Tofotofo Lou Iloa” o se tasi lea o le tele o vala o le a talafeagai lelei ma i latou uma o ē faitau i ai. Ae o le a maua faapitoa ai lava e a tatou tagata aʻoga aogā, a o faavave ona latou aveina i fale aʻoaʻoga faavae o le Tusi Paia.
3 I le faagasologa o lauga faaiu i le Aso Toonai ma le Aso Sa, na faalaeiauina ai i tatou ina ia faia se suesuega faaleaiga e faaaogā ai lenei tusi fou. I le taimi nei, e lē taumatea ua faapena foi ona tatou masani ma ona mataupu. Masalo foi ua uma ona outou talanoa i ni manatu e tatau ona manatua pe a ofoina lenei tusi fou i le fanua.
4 Manatu e Autalu: Masalo o e manatua e faapea, ina ua taulimaina e le failauga le mataupu “Le Pogai e Manaomia ai e Tagata le Poto e Uiga i le Atua,” na ia faamamafaina ai nisi o manatu, e aofia ai ma nei manatu: (1) Pe a e faaaogaina lenei tusi e faia ai suesuega, e lē atamai le aumai o nisi manatu faaopoopo mai nisi tusi e ono faanenefu ai manatu autū; tau lava ina ia uaʻi totoʻa atu i le faafesootaia o mea o loo saunia i mataupu taitasi o le tusi. (2) Ua talafeagai le uumi o mataupu ina ia mafai ai ona e faaaofia le mataupu atoa i taimi taitasi e faia ai lau suesuega e pei ona masani ai. (3) I le faaiuga o mataupu taitasi, o fesili i le pusa ua faaulutalaina e faapea “Seʻi Tofotofo Lou Iloa” o le a saunia ai se autaluga tuusaʻo.
5 Faaaogā i Suesuega Faale-Tusi Paia: E iai nisi o le au talaʻi ua fesili mai po o se fautuaga lelei le suia o tusi o loo faia ai a latou suesuega faale-Tusi Paia i lenei tusi fou. Afai ua toeitiiti uma le tusi lea o loo faia ai nei lau suesuega, e tatau lava la ona faauma pea le suesueina o le tusi lena. Ae afai e leai, e fautuaina la ina ia suia loa i le tusi o le Knowledge pe afai o faia sau suesuega o faaaogā ai se tusi faa-Peretania. Afai na e faaaogaina le polosiua po o se sāvali e amata ai se suesuega faale-Tusi Paia, ia faailoa le tusi fou i se taimi talafeagai ma faaaogā loa mo le suesuega. O nisi faamatalaga atili e uiga i le faaaogaina o le tusi Knowledge, o le a faailoa atu i La Tatou Faiva o le Malo i masina ia o faagasolo mai.
6 Ua saunia e Ieova lenei tusi fou e fesoasoani ai ia i tatou e aʻoaʻoina isi e uiga i le poto e taʻitaʻiina ai i le ola e faavavau. O lea la, e manaomia ona tatou sauniuni lelei ma faia se sao atoatoa i le galuega lea o loo manaomia ona faia.