‘Ia Faalatalata Atu i le Atua, Ona Ia Faalatalata Mai Lea’
Le Olaga Muamua ma Mulimuli Ane Ai—Le Auala na Suia ai e le Tusi Paia Lenei Tamāloa
NA AVEA le musika o se mea e sili ona tāua i le olaga o Rolf-Michael. Sa pulea lona olaga e fualaau faasāina. I Siamani a o talavou o ia, sa ia inu tele i le ʻava malosi ma faaaogāina le LSD, cocaine, mariuana ma isi fualaau faasāina.
A o taumafai ia Rolf-Michael e ave faananā ni fualaau faasāina i se atunuu o Aferika, na puʻea faapagota ai o ia ma faafalepuipuiina mo le 13 masina. I le taimi a o iai o ia i le fale puipui na ia manatunatu ai e faatatau i le fuafuaga moni lava o le olaga.
Sa matuā saʻili lava Rolf-Michael ma lana avā o Ursula mo le uiga o le olaga ma le upu moni. E ui ina sa tutupu ni mea e lē fiafia i ai laʻua a o feagai ma lotu ua faapea mai o Kerisiano, ae na iai pea so la faanaunauga malosi e fia iloa le Atua. Peitaʻi, sa iai a la fesili ae e leʻi mauaina ni tali e faamalieina ai mai lotu eseese. Ae sili atu i lenā, na lē mafai e nei lotu ona saunia se uunaʻiga malosi e la te faia ai ni suiga i o la olaga.
Ae mulimuli ane, sa feiloaʻi atu Rolf-Michael ma Ursula i Molimau a Ieova. Ina ua la suʻesuʻeina le Tusi Paia, na matuā ootia faalogona o Rolf-Michael i le apoapoaʻiga e faapea: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) Na ia maumauaʻi e ‘to ese le tagata tuai o loo ua leaga, e tusa ma le amioga faaanamua, ae ofu i le tagata fou ua faia e foliga i le Atua, i le amiotonu ma le amio lelei e faamaoni.’—Efeso 4:22-24.
Na faapefea ona ofu Rolf-Michael i le tagata fou? Na ia iloa mai le Tusi Paia e faapea, e “ala i le poto” e mafai ona faafouina ai uiga o le tagata ‘ia foliga i lē na faia o ia,’ o lona uiga o Ieova le Atua.—Kolose 3:9-11, LT.
A o ia ave i fale le poto saʻo, sa saʻili ai Rolf-Michael ina ia ōgatusa lona olaga ma mataupu silisili o le Afioga a le Atua. (Ioane 17:3) Sa faigatā ona tuua le faaaogāina o fualaau faasāina peitaʻi, na iloa e Rolf-Michael le tāua o le faalatalata atu iā Ieova i le tatalo ma mauaina lana fesoasoani. (1 Ioane 5:14, 15) O isi fesoasoani na maua mai i le auaumea atu iā i latou ua avea ma Molimau a Ieova, o ē o loo galulue mamafa e faia le finagalo o le Atua.
O le iloaina e faapea o le a mavae atu le lalolagi ae na o i latou o ē faia le finagalo o le Atua o le a tumau e faavavau, na fesoasoani foʻi iā Rolf-Michael. Na mafai ai ona ia filifili i faamanuiaga e faavavau o se faiā vavalalata ma le Atua alofa o Ieova ae lē o le lalolagi o le a mavae atu. (1 Ioane 2:15-17) Na matuā pāʻia Rolf-Michael i upu o le Faataoto 27:11 e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” Ua ia faapea mai ma le lotofaafetai: “Ua faaalia i lenei fuaiupu le tele naʻuā o le alofa o Ieova, i lona tuuina i tagata o le avanoa e faafiafia ai lona finagalo.”
E faitau selau afe i latou ua maua aogā e ala i le faatatauina o mataupu silisili o le Tusi Paia e pei foʻi o Rolf-Michael, lana avā ma o la alo e toʻatolu. E mafai ona maua i latou na i faapotopotoga o Molimau a Ieova i le lalolagi aoao. O se mea e faanoanoa ai, i nisi o atunuu, ua tuuaʻia sesē ai Molimau e faapea o se lotu mavae mataʻutia e na te faamalepeina aiga. Ae ua faamaonia i le mea na tupu iā Rolf-Michael le sesē o lenā manatu.—Eperu 4:12.
Ua faapea mai Rolf-Michael ua avea apoapoaʻiga o loo i le Mataio 6:33 ia faamuamua mea faaleagaga ma “tapasā,” e taʻitaʻiina lona aiga i le auala saʻo. Ua matuā lotofaafetai o ia ma lona aiga iā Ieova, ona o le olaga faaleaiga fiafia ua latou olioli ai o ni Kerisiano. Ua latou ioe i le faisalamo o lē na pese e faapea: “Se a se mea ou te taui aʻi atu iā Ieova ona o lona agalelei mai uma lava iā te aʻu?”—Salamo 116:12.
[Faamatalaga faaopoopo i le itulau 9]
Ua tuu e le Atua le avanoa i tagata e faafiafia ai lona finagalo
[Pusa i le itulau 9]
O Mataupu Silisili e Aogā
O nisi nei o mataupu silisili o loo mulimuli mai na uunaʻia ai nisi e lafoaʻi a latou masaniga leaga:
“Outou ē ua alolofa atu iā Ieova, ia outou ʻinoʻino i mea leaga.” (Salamo 97:10) Ina ua talitonu i le leaga o masaniga ia e ono oo ai i le oti ma matuā ʻinoʻino i ai, o le a faigofie ai i se tasi ona faia le mea e fiafia i ai le finagalo o le Atua.
“O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.” (Faataoto 13:20) E manaʻomia e se tasi ona filifili aumea lelei ina ia mafai ona ia teena ai fualaau faasāina ma isi mea o loo puleaina ai. E matuā aogā lava le faia o faauōga ma Kerisiano o ē o le a fesoasoani iā te ia e teena nei mea leaga.
“Aua neʻi popole outou i se mea e tasi, a ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai. O le manuia foʻi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau iā Keriso Iesu.” (Filipi 4:6, 7) O lenā filemu o le loto ma le mafaufau e lē mafai ona mauaina i se isi lava auala e pei o le faaaogāina o fualaau faasāina. O le faalagolago foʻi i le Atua e ala i le tatalo e fesoasoani lea i se tasi e manumalo ai i faafitauli o le olaga e aunoa ma le faaaogāina o fualaau faasāina.