Māfuaaga Latou te Ō ai i Lotu

“I LE taimi nei, ua toetoe lava ina faafā taimi e sili atu ai le toʻatele o tagata lolotu Perepereane i Korea i Saute na i lo Amerika.” Atonu e faateʻia le toʻatele o tagata i le faamatalaga lenā a le mekasini Newsweek, auā foʻi e manatu le toʻatele e faapea o Korea e taatele ai le lotu Confucius ma le lotu Puta. I aso nei, e vaaia ai e tagata asiasi le tele o lotu “Kerisiano” i inā, lea e masani ona iloa i koluse e fai i molī mūmū. I Aso Sa, e masani lava ona vaaia tagata o ō taʻitoʻalua pe taʻitoʻatolu i le lotu ma uu a latou Tusi Paia. E tusa ai ma se suʻesuʻega i le 1998, e toetoe lava o le 30 pasene o tagata Korea e lolotu Katoliko pe Porotesano, lea e sili atu na i lo ē ua faapea mai e lotu Puta.

I so o se atunuu i aso nei, o se mea ese le vaaia o le toʻatele o tagata o loo toʻaʻaga i lotu. E ui i lea, o le mea lenā o loo tupu e lē gata i Korea, a o isi foʻi atunuu o Asia, faapea foʻi Aferika ma Amerika Latina. Aiseā ua talitonu ai pea le toʻatele o tagata i le Atua, ae ua matuā taatele le lē ano ma le lē manatu mamafa foʻi i lotu? Aiseā latou te ō ai i lotu?

Na faailoa mai e se suʻesuʻega e faapea, e sili atu ma le ʻafa o ē e toʻaʻaga i lotu i Korea o loo latou saʻilia se toʻafilemu o le mafaufau; ma pe tusa o le tasi vae tolu o tagata o loo faamoemoe mo le ola e lē uma pe a mavae le oti; ma e toʻatasi mai tagata e toʻasefulu o loo faamoemoe e maua le soifua mālōlōina lelei, o ʻoa ma le taulau manuia.

O le toʻatele o tagata i Saina, e latou te ō i lotu ma le faanaunauga ina ia faamalieina o latou manaʻoga faaleagaga, ona ua faifai mālie ona lē toe malolosi tele aʻoaʻoga faa-Komunisi e pei ona sa iai muamua. I tausaga taʻitasi, e faitau miliona le aofaʻiga o Tusi Paia e lomia ma tufatufaina atu i Saina, ma e foliga mai ua faitau ma le fiafia i ai tagata e pei ona sa latou faitau i tusi na tusia e le taʻitaʻi o Saina e suafa iā Mao.

E lē o faamalieina nisi tagata Katoliko i Pasili aemaise lava le tupulaga talavou, i le folafolaga o le olioli i le olaga atalī—latou te mananaʻo e maua le olaga lelei i le taimi nei. Na mātauina e le mekasini o le Tudo e faapea: “I le 1970 e oo i le 1979, o gaoioiga faalelotu mo le faasaʻolotoina o tagata mai tulaga pagatia na uunaʻia ai loto ma mafaufau o tagata, peitaʻi i aso nei, ua uunaʻia tagata ona o le fia mauʻoa.” I se suʻesuʻega na faia i Peretania, na faatū ai se fesili i tagata e ō i lotu i inā, e taʻu mai se tasi o māfuaaga latou te fiafia ai i la latou lotu. O le toʻatele o i latou, na faapea mai ina ia mafuta ai ma isi.

O nei mea uma ua faaalia ai, e ui lava e anoanoaʻi tagata o loo talitonu pea i le Atua, ae o le toʻatele o i latou o loo popole i mea e mafai ona latou maua i le taimi nei na i lo le lumanaʻi—ma e lē o manatu mamafa foʻi i le Atua. O le ā sou silafia, o le ā le māfuaaga saʻo e ala ai ona talitonu i le Atua? O le ā o loo fai mai ai le Tusi Paia e tusa ai ma lenei mataupu? O le a e mauaina le tali i le mataupu o sosoo mai.