Ua Agaʻi Atu le ʻAufaauu a Kiliata o se ʻAufaigaluega Maelega o le Seleselega!
“E TELE le saito e seleseleina, a o le ʻau fai galuega e toʻaitiiti ia; o lea ia outou ʻaiʻoi atu ai i le Alii e ana le saito e seleseleina, ina ia aauina mai e ia ni ē galulue i lana saito e seleseleina.” (Mataio 9:37, 38) Sa iai se uiga faapitoa o na upu i a i latou na faauu mai i le vasega lona 116 o le Aʻoga Faale-Tusi Paia a le Olomatamata o Kiliata, a o latou sauniuni e ō atu i vaipanoa ua tofia i latou e galulue ai o ni misionare.
O le Aso Toonaʻi o Mati 13, 2004, na tauaofia ai i latou e 6,684 i le Nofoaga Tau Aʻoaʻoga a le Olomatamata i Patterson, i Niu Ioka, atoa ai ma isi nofoaga sa faaoo atu i ai e ala i le satelite ia le polokalame o le faauuga, lea a o faagasolo sa faafofoga ai le vasega i fautuaga ma faalaeiauga faamavae. E mafai ona aogā iā i tatou uma lava nei fautuaga, a o tatou galulue maelega i le seleselega faaleagaga.
I upu amata a Theodore Jaracz, o se sui o le Vaega Pule ma o sē na faauu mai i le vasega lona fitu o Kiliata, sa ia faamatilatila ai le fetalaiga a Iesu: “Ia outou ō . . . e fai nuu uma lava ma soo.” (Mataio 28:19, 20) Maʻeu le talafeagai o na timaʻiga, auā ua auina atu nei le ʻaufaauu e galulue i atunuu eseese e luasefulu! Na ia faamanatu atu i le ʻaufaauu e faapea, ua lelei ona faaauupegaina i latou i faatonuga mai le Afioga a le Atua ina ia avea o nisi e galulue maelega i le seleselega faaleagaga sili ona tāua.—Mataio 5:16.
Le Auala e Avea ai o se ʻAufaigaluega e Fuatele Mai i le Seleselega
O le failauga muamua o le polokalame o Robert Wallen, o lē ua tele tausaga o galue vavalalata ma le Aʻoga i Kiliata. A o lauga atu i le matua “Le Matagofie o le Tigāalofa,” na ia taʻu atu i le ʻaufaauu: “O le tigāalofa o se gagana e oo lava i tagata logonoa e mafai ona latou lagonaina ma e mafai foʻi e tauaso ona vaai i ai.” Sa silafia lelei e Iesu puapuaga o isi ma saʻili ma le naunau e faaitiitia. (Mataio 9:36) O le a maua e le ʻaufaauu le tele o avanoa e faia ai faapea—i le galuega talaʻi, i le faapotopotoga, i le aiga misionare, ma i a latou lava faaipoipoga. Sa faalaeiauina i latou e le failauga i le faapea atu: “Tau ina ia atagia atu le matagofie o le tigāalofa i o outou olaga a o outou auauna atu i isi. E manaʻomia a outou amioga lelei mo le faatumauina o le sologa lelei i le olaga i aso taʻitasi i le aiga misionare. O le mea lea, ia maumauaʻi e faaofuina outou i le tigāalofa.”—Kolose 3:12.
Na sosoo ai ma Gerrit Lösch, o se sui o le Vaega Pule ma na faauu mai i le vasega lona 41 i Kiliata, na ia saunia le mataupu “O Ē Faalauiloa le Olataga.” (Isaia 52:7) Ina ia faasaoina tagata pe a faaumatia le faiga o mea o iai nei, e ao ona latou ave i fale le poto saʻo mai le Afioga a le Atua, ia faalauiloa atu i le lautele le faatuatua, ma ia papatisoina. (Roma 10:10; 2 Timoteo 3:15; 1 Peteru 3:21) Peitaʻi, o le māfuaaga autū mo le faalauiloaina o le faaolataga e lē ina ia faasaoina ai tagata, ae ia viia ai le Atua. O le māfuaaga lenā, na fautuaina ai e le uso o Lösch i latou ua sauni atu i le auaunaga faamisionare ina ia “Momoli le feʻau o le Malo i tuluʻiga o le lalolagi, ma ia avea ma ē maelega e faalauiloa le olataga, ma ia viia ai Ieova.”—Roma 10:18.
Na lāgā e le faiaʻoga o le Aʻoga i Kiliata o Lawrence Bowen le fesili e faapea: “E Faapefea Ona e Faasusulu Atu le Malamalama Faaleagaga?” Sa ia faasino atu i fetalaiga a Iesu o loo faamauina i le Mataio 6:22 ma faalaeiauina le ʻaufaauu ina ia “lelei” pe ia faafaigofie la latou vaai ina ia mafai ai ona “faasusulu atu le malamalama faaleagaga lea e faamamaluina ai Ieova ma aogā i uso a tagata.” Mai lava i le amataga o lana faiva, na faataatia ai e Iesu se faaaʻoaʻoga lelei atoatoa i lenei tulaga e ala i le faaauau pea ona ia uaʻi atu i le faia o le finagalo o le Atua. O le manatunatu loloto i mea matagofie na aʻoaʻoina ai o ia e lona Tamā i le lagi sa fesoasoani iā Iesu e onosaia ai faaosoosoga na ala mai iā Satani i le vao. (Mataio 3:16; 4:1-11) Sa faataʻitaʻia e Iesu le faalagolago atoatoa atu iā Ieova i le faataunuuina o le tofiga na tofia o ia e le Atua e fai. O le tulaga lava foʻi lenā e tasi i misionare, ina ia faafetaiaʻia ma le manuia luʻitau o iai i le lumanaʻi, e ao ona faaauau i a latou masaniga lelei o le suʻesuʻeina o le Tusi Paia ma faalagolago atoatoa iā Ieova.
O le lauga mulimuli na tauaaoina e Mark Noumair, o ia o se faiaʻoga o le Aʻoga i Kiliata ma na faauu mai i le vasega lona 77, o lana matua “O i Matou Nei o i Lau Pule.” (Iosua 9:25) Na ia faalaeiauina le ʻaufaauu ina ia faaaʻoaʻo i le uiga sa i tagata Kipeona anamua. E ui lava sa avea Kitiona ma “aai tele, . . . o ona tagata uma foʻi e totoa i latou,” e leʻi manatu tagata Kipeona e fai atu ni faaaloaloga taualoa iā i latou pe faatalitalia foʻi le tele o mea ia fai e tusa ma lo latou manaʻo. (Iosua 10:2) Sa latou auauna ma le loto malie e avea ma tagata “fāi fafie, ma utu vai” i lalo o le vaaiga a sa Levī mo le lagolagoina o le tapuaʻiga iā Ieova. (Iosua 9:27) I sona faatusatusaga, e tusa o lea ua fai atu tagata o le vasega lea ua faauuina i le Iosua Sili, o Iesu Keriso, “O i matou nei o i lau pule.” O lona uiga a o latou amata i o latou tofiga i le mea o le a latou galulue ai, e manaʻomia ona latou taliaina po o le ā lava le galuega e tuuina atu e le Iosua Sili iā i latou e fai.
Mea na Tutupu i le Faiva ma Faatalatalanoaga
Sa faia e Wallace Liverance, o ia o se tasi na faauu mai le vasega lona 61 i Kiliata ma o ia o se faiaʻoga faatasi ai ma se vaega o le ʻaufaauu se talanoaga i le matua “Ua Faamatala Mai Foʻi o Tusi.” Sa latou faamatala ma toe faaata mai mea na tutupu sa latou fiafia ai i le faiva i le fanua a o faagasolo le aʻoga. Sa manino mai le pāʻia o o latou loto i a latou suʻesuʻega māeʻaeʻa o le Tusi Paia i le lima masina o le aʻoga, ma uunaʻia ai i latou e tufa atu i isi mea ua latou aʻoaʻoina. (Luka 24:32) A o faagasolo le lima masina o le aʻoga, sa mafai e se tasi o tagata aʻoga ona tufa atu i lona uso faaletino mea na ia aʻoaʻoina. Na faalaeiauina ai i lenei mea lona uso e saʻili atu i le faapotopotoga e lata ane ma amata ai lana ia lava suʻesuʻega o le Tusi Paia. Ua agavaa nei o ia e avea ma tagata talaʻi e leʻi papatisoina.
Ina ua uma tala i mea na tutupu, ona tauaaoina lea e Richard Ashe ma John Gibbard se faatalanoaga ma nisi ua loa tausaga o auauna faamaoni iā Ieova, e aofia ai ni ovasia femalagaaʻi o ē na mauaina se toleniga i le Nofoaga Tau Aʻoaʻoga a le Olomatamata. Sa faauuina i latou i uluaʻi vasega o le Aʻoga i Kiliata. E manatua e se tasi o i latou le faia e le uso o Knorr a o faagasolo la latou aʻoga o le faamatalaga e faapea: “I Kiliata e anoanoaʻi suʻesuʻega e te faia ai. Ae a e foʻi mai ma se manatu faamaualuga, e te lē taulau. Matou te mananaʻo ina ia e foʻi mai ma se loto e agalelei ma alofa atu.” Sa faalaeiauina e uso femalagaaʻi le vasega faauu ina ia manatu mamafa i tagata ma o latou manaʻoga, ia feutagaʻi ma isi e pei ona faia e Keriso, ma ia talia ma le loto maulalo po o le ā lava le tofiga e avatu iā i latou. O le faatatauina o nei fautuaga o le a lē taumatea le fesoasoani i misionare fou ina ia fua tele mai i o latou tofiga.
Ō Atu ia o se ʻAufaigaluega Maelega o le Seleselega!
Sa maua e le aofia le avanoa e faafofoga ai iā Stephen Lett, o le isi sui o le Vaega Pule. Na ia tauaaoina le lauga autū o le polokalame, o le matua “Ō Atu Ia o se ʻAufaigaluega Maelega o le Seleselega!” (Mataio 9:38) I se seleselega faaletino lava ia, e tapulaa le taimi e selesele ai se fuata. E manaʻomia ai i le ʻau selesele ona galulue mamafa. E sili atu ai la ona tāua le taimi lenei a o faagasolo le faaiʻuiʻuga o lenei faiga o mea! I le seleselega sili faaleagaga, o loo i se tulaga lamatia ola o tagata. (Mataio 13:39) Sa faalaeiauina e le uso o Lett le ʻaufaauu ina ia aua le ‘faavaivai i lo latou filigā,’ ae ia “malosi le loto” ma ia “auauna i le Alii” i lenei seleselega e lē toe faia faalua. (Roma 12:11) Na sii mai e le failauga fetalaiga a Iesu e faapea: “Inā tepa aʻe ia o outou mata, ma vaavaai i le fanua ua sinasina mai nei i le seleselegāsaito.” (Ioane 4:35) Ona ia uunaʻia lea o le ʻaufaauu ina ia faaalia lo latou maelega mo le galuega o le seleselega e ala i le faia o taumafaiga faamaoni ina ia oo i tagata po o le ā lava le taimi ma le nofoaga e maua ai i latou, ma e ala i le faaaogāina o avanoa uma lava e molimau atu ai lē fuafuaina. O le mataalia i avanoa e tulaʻi mai e faigofie ai ona avatu se molimau uigā. O Ieova o ia o se Atua maelega, ma na te faatalitalia i tatou ina ia faaaʻoaʻo iā te ia ma galulue mamafa i le seleselega faaleagaga.—2 Tupu 19:31; Ioane 5:17.
I le faaiʻuga o le polokalame, na faitauina ai e le taʻitaʻifono, le uso o Jaracz, ia faamanuiaga mai le tele o ofisa o lālā ma tauaao atu i le ʻaufaauu a latou tipiloma. Sa faitauina e se tasi o le ʻaufaauu ia se tusi a le vasega lea sa faailoa mai ai le talisapaia loloto o le toleniga na latou mauaina. E mautinoa lava, na uunaʻia e le polokalame o le faauuga o le vasega lona 116 i latou uma sa auai ina ia atili ai ona naunau e agaʻi i luma o se ʻaufaigaluega maelega o le seleselega.
[Pusa i le itulau 25]
FAAMAUMAUGA O LE VASEGA
Aofaʻi o atunuu o loo iai o latou sui: 6
Aofaʻi o atunuu ua tofia i ai: 20
Aofaʻi o tagata aʻoga: 46
Faatatauga o tausaga: 34.2
Faatatauga o tausaga i le upu moni: 17.2
Faatatauga o tausaga i le faiva faataimi atoa: 13.9
[Ata i le itulau 26]
Vasega Faauu Lona 116 o le Aʻoga Faale-Tusi Paia a le Olomatamata o Kiliata
I le lisi i lalo, e amata mai laina i luma ma faasolo i tua, ma o suafa e lisi mai i le itu agavale e agaʻi atu i le taumatau.
(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.