O Loo Ola le Afioga a Ieova

Manatu Tāua Mai le Tusi o Faamasino

NA FAAPEFEA ona tali atu Ieova ina ua fulitua ona tagata iā te ia ma tapuaʻi i atua sesē? Ae faapefea pe afai e mumusu i latou e usiusitai ma faatoʻā valaau atu iā te ia pe a mafatia i latou? Pe na saunia ea e Ieova se auala e laveaʻi ai i latou? Ua tali e le tusi o Faamasino nei fesili ma isi fesili tāua. Na tusia lenei tusi e le perofeta o Samuelu pe tusa o le 1100 T.L.M., ma e aofia ai mea na tutupu i se vaitaimi pe a ma le 330 tausaga—mai le maliu o Iosua seʻia oo i le faauuina o le uluaʻi tupu o Isaraelu.

E tāua tele le tusi o Faamasino iā i tatou auā e mai le Afioga mamana a le Atua. (Eperu 4:12) O tala faafiafia loto o loo faamauina ai, e tatou te malamalama ai i uiga o le Atua. O lesona tatou te aʻoaʻoina mai ai e faamalosia ai lo tatou faatuatua ma fesoasoani iā i tatou e fetagofi atu i le “ola moni lava,” le ola e faavavau i le lalolagi fou na folafola mai e le Atua. (1 Timoteo 6:12, 19; 2 Peteru 3:13) O gaoioiga o le faaolataga na faia e Ieova mo ona tagata, ua aumaia ai se faataʻimuaga o le laveaʻiina sili i le lumanaʻi e ala i lona Alo, o Iesu Keriso.

AISEĀ NA MANAʻOMIA AI FAAMASINO?

(Faamasino 1:1–3:6)

Ina ua faatoʻilaloina tupu o Kanana i le taʻitaʻiga a Iosua, na ō atu ai ituaiga taʻitasi o Isaraelu i o latou tofi ma nofoia le laueleele. Ae peitaʻi, e leʻi aveesea e Isaraelu tagata moni o le nuu. Na matuā maileia le nuu o Isaraelu ona o lo latou lē usiusitai.

O le augātupulaga na iai ina ua mavae aso o Iosua, sa “lē iloa Ieova ma ana galuega na ia faia mo Isaraelu.” (Faamasino 2:10) Ae lē gata i lea, sa latou faaipoipo i tagata Kanana ma auauna i o latou atua. O lea, na tuu atu ai e Ieova Isaraelu i lima o o latou fili. Ina ua matuā faapologaina i latou, na valaau atu ai Isaraelu i le Atua moni mo se fesoasoani. O le tulaga lenā tau tapuaʻiga, le va fealoaʻi, faiga faapolotiki, ua tatou maua ai le tala i le faasologa o faamasino na faatūina e Ieova e laveaʻiina ona tagata mai o latou fili.

Taliina o Fesili Faale-Tusi Paia:

1:2, 4—Aiseā na tofia ai Iuta e fai ma ituaiga muamua e nonofo i le fanua lea na filifilia mo i latou? E masani lava, o lenei faaeaga e tatau ona maua e le ituaiga o Reupena, le ulumatua a Iakopo. Ae peitaʻi, a o leʻi maliu Iakopo na ia valoia ai, o le a lē faasili Reupena auā na maumau lona tofi o le ulumatua. O Simeona ma Levi o ē na faia amioga sauā, e ao ona faataapeapeina i Isaraelu. (Kenese 49:3-5, 7) O lea la, na sosoo atu ai Iuta le atalii lona fā o Iakopo ma na ia maua lenā faaeaga. O Simeona o lē na ō faatasi ma Iuta, na ia maua ni fasi fanua na tutū solo i le oganuu tele o Iuta.a—Iosua 19:9.

1:6, 7—Aiseā na tipi ese ai lima matua ma vae matua o tupu na faatoʻilaloina? O se tasi ua leai ni ona lima matua ma vae matua, e foliga mai e lē mafai ona tau i le taua. E faapefea e se fitafita ona uu se pelu po o se tao e aunoa ma lima matua? E lē gata i lea o le leai o ni vae matua e faigatā ai ona tū lelei.

Lesona mo i Tatou:

2:10-12. E ao ona i ai sa tatou polokalame e lē aunoa o le suʻesuʻeina o le Tusi Paia ina ia lē ‘galo se mea e tasi o mea alofa a Ieova,’ ma ana galuega na ia faia. (Salamo 103:2) E ao i mātua ona tāmau le upu moni o le Afioga a le Atua i loto o a latou fanau.—Teuteronome 6:6-9.

2:14, 21, 22. E iai se fuafuaga ua faatagaina ai e Ieova mea leaga e tutupu i ona tagata lē usiusitai, e aʻoaʻia ai i latou, faaleleia ai a latou amio, ma uunaʻia i latou e toe foʻi atu iā te ia.

UA FAATŪINA E IEOVA FAAMASINO

(Faamasino 3:7–16:31)

Ua amata le tala i mea mataʻina na faia e faamasino i le tala i le faamutaina e Otinielu o le valu tausaga talu ona pulea e se tupu Mesopotamia Isaraelu. E ala i gaoioiga lototele, na fasiotia ai e le faamasino o Euta le tupu lapoʻa o Moapi o Ekelona. O Samekara le toa, na ia fasiotia le 600 Filisitia i se tui povi. O le faalaeiauga mai iā Tepora, o lē na avea o se perofeta fafine, ma le lagolagosua a Ieova, sa mafai ai e Parako ma lana ʻautau e 10,000 e ui e lē tutusa a latou auupega ma le fili, ona faatoʻilaloina le ʻautau malosi a Sesera. Na faatūina e Ieova Kitiona ma avatu iā te ia ma ana ʻautau e 300 le manumalo iā Mitiana.

E ala iā Iefata, na laveaʻiina ai e Ieova Isaraelu mai tagata Amoni. Sa iai foʻi Tulaga, Iairo, Ivisona, Aluna, ma Apetonu i le vaega e 12 o ē na faamasino iā Isaraelu. Na faaiʻuina le vaitaimi o le ʻau Faamasino iā Samasoni, o lē na tau faasaga iā Filisitia.

Taliina o Fesili Faale-Tusi Paia:

4:8—Aiseā na maumauaʻi ai Parako ia latou ō ma le perofeta fafine o Tepora i le tafā o le taua? E foliga mai na lagona e Parako lona lē agavaa e alu na o ia e tau faasaga i le ʻautau a Sesera. Ae o le ō faatasi ma le perofeta fafine, ua faamautinoa ai iā te ia ma ana ʻau le taʻitaʻiga a le Atua ma faamalosia ai i latou. O le maumauaʻi o Parako e ō ma Tepora, e lē o se faailoga o lona loto vaivai ae o lona faatuatua malosi.

5:20—Na faapefea ona tau fetu mai le lagi mo le itu a Parako? E lē o taʻua i le Tusi Paia pe na aofia ai i lenei tulaga le fesoasoani a agelu, po o ni fetu na paʻūʻū mai le lagi ia na manatu i ai tagata popoto a Sesera o ni faailoga o ni mala o le a tutupu, po o ni valovaloga sesē na faia mo Sesera e ala i le vaai i fetu. Ae peitaʻi, e lē taumatea sa iai ni gaoioiga na faia e le Atua.

7:1-3; 8:10—Aiseā na fetalai ai Ieova ua toʻatele naʻuā ʻau a Kitiona e 32,000 faasaga i ʻau a le fili e 135,000? Talu ai na finagalo Ieova e avatu iā Kitiona ma ana ʻau le manumalo. E leʻi finagalo Ieova e latou te mafaufau na latou faatoʻilaloina tagata Mitiana i so latou lava malosi.

11:30, 31—Ina ua faia lana tautoga, pe sa mafaufau Iefata i se tagata e fai ai le taulaga? E leʻi manatu faapena Iefata auā na faapea mai le tulafono: “Aua neʻi iloa iā te oe se tasi na te faaui ane lona atalii po o lona afafine i le afi.” (Teuteronome 18:10) Ae na mafaufau Iefata i se tagata ae lē o se manu. O manu sa fai ai taulaga e leʻi teuina i fale o tagata Isaraelu. E lē gata i lea, e lē o se mea mataʻina le ofoina atu o se manu. Na iloa e Iefata o le tagata e ulufafo mai i lona fale e faafeiloaʻi iā te ia atonu o lona afafine. O le ofoina atu o lea tagata e fai ai le “taulaga mū,” o lona uiga o le tuuina atu o ia e auauna iā Ieova i lona malumalu.

Lesona mo i Tatou:

3:10. O le taulau manuia i le saʻilia o mea faaleagaga, e lē faalagolago i le atamai faaletagata ae o le agaga o Ieova.—Salamo 127:1.

3:21. E atamai Euta i le faaaogāina ma le lototele o lana pelu. E ao ona tatou maua le tomai i le faaaogāina o le “pelu a le Agaga, o le afioga lea a le Atua.” O lona uiga e ao ona tatou faaaogā ma le lototele le Tusi Paia i le talaʻiga.—Efeso 6:17; 2 Timoteo 2:15.

6:11-15; 8:1-3, 22, 23. Ua tatou aʻoaʻoina ni lesona se tolu mai le lotomaulalo o Kitiona: (1) Pe a tatou maua ni faaeaga i le auaunaga, e ao ona tatou mafaufau i tiute tauave e aofia ai, na i lo o le tulaga aloaʻia po o le maualuga o lea tofiga. (2) O se ala atamai le faaalia o le lotomaulalo pe a tatou feutagaʻi ma ē finau mai. (3) O le lotomaulalo, tatou te lē soona manatu ai i tulaga maualuga.

6:17-22, 36-40. E ao foʻi ona tatou mataala ma aua le “faalogo i agaga uma lava.” Na i lo lea, e manaʻomia ona “tofotofo i agaga pe mai le Atua i latou.” (1 Ioane 4:1) Ina ia faamautinoa o fautuaga o le a avatu e faavae i le Afioga a le Atua, e atamai ai i se Kerisiano faatoʻa toeaina ona talanoa atu i se toeaina ua iai le poto masani.

6:25-27. Sa faaaogā e Kitiona le faautaga mamao ina ia lē faaita ai fua i tagata na tetee ane iā te ia. Pe a talaʻi atu le tala lelei, e ao ona tatou faaeteete ia lē faatigā i isi i le auala tatou te talanoa atu ai.

7:6. E ao ona tatou pei o ʻau a Kitiona e 300, e faautauta ma mataala i le auauna atu iā Ieova.

9:8-15. Pagā le valea o le loto fefete ma le fia maua o tulaga maualuga!

11:35-37. E lē taumatea o le faaaʻoaʻoga lelei a Iefata na fesoasoani i lona afafine ina ia maua le faatuatua moni, ma le agaga lē manatu faapito. E mafai e mātua i aso nei ona faia se faaaʻoaʻoga faapena mo a latou fanau.

11:40. O le faamālō atu i se tasi ua iai le agaga naunau e auauna iā Ieova, e mafai ona faalaeiauina ai o ia.

13:8. E ao i mātua ona tatalo iā Ieova mo le taʻitaʻiga ma mulimuli i lana faatonuga i le aʻoaʻoina o a latou fanau.—2 Timoteo 3:16.

14:16, 17; 16:16. E mafai ona faaleagaina se faiā i le tagi ma le faatauanau soo.—Faataoto 19:13; 21:19.

NISI AGASALA NA FAIA E ISARAELU

(Faamasino 17:1–21:25)

O loo aofia i le vaega mulimuli o le tusi o Faamasino ni tala mataʻina se lua. O le tala muamua, e faatatau i se tamāloa e igoa iā Mika, o lē na faia ni tupua i lona fale ma faafaigaluega se sa Levī e fai ma ana ositaulaga. Ina ua mavae le faaumatiaina o le aai o Laisa po o Lesema, na fausia ai e tagata o Tanu o latou lava aai ma faaigoa iā i latou. I le faaaogāina o le tupua a Mika ma lana ositaulaga, na latou faatū ai se isi ituaiga o tapuaʻiga i Tanu. E foliga mai, na faoa le aai o Laisa a o lumanaʻi le maliu o Iosua.—Iosua 19:47.

O le mea lona lua, na tupu a o leʻi leva ona maliu Iosua. Na faia e nisi o tane sa Peniaminā i le aai o Kipea se agasala mataʻutia tau feusuaʻiga ma na iʻu ai i le toetoe lava a fasiotia ai le ituaiga uma o sa Peniaminā, ae na o le 600 tane na faasaoina. Ae peitaʻi, e ala i se fuafuaga aogā na maua ai a latou avā, ma na faateleina ai le faitau aofaʻi o tagata tau i le toetoe 60,000 i le taimi o le pulega a Tavita.—1 Nofoaiga a Tupu 7:6-11.

Taliina o Fesili Faale-Tusi Paia:

17:6; 21:25—Afai e ‘taʻitasi ma fai le mea ua tonu i lona lava manatu,’ pe na lē māfua ai se tulaga vevesi i le nuu? E leai, auā na faia e Ieova sauniuniga e taʻitaʻia ai ona tagata. Na ia tuuina atu iā i latou le Tulafono ma le ʻau ositaulaga ina ia aʻoaʻoina ai i latou i ona ala. E ala i le Urima ma le Tumena, na mafai ai ona talanoa le ositaulaga sili ma le Atua e uiga i mataupu tāua. (Esoto 28:30) Sa iai toeaina i aai taʻitasi e saunia fautuaga aogā. Pe a taliaina e se Isaraelu nei sauniuniga uma, na iai taʻiala lelei mo lona lotofuatiaifo. O lona faia o le “mea ua tonu” i lona manatu i lenei auala e iʻu i le lelei. Ae i se isi itu, pe afai e lē amanaʻia e se tasi le Tulafono ma faia lana lava filifiliga e faatatau i amioga, ma le tapuaʻiga e leaga le iʻuga.

20:17-48—Aiseā na faataga ai e Ieova le ʻau sa Peniaminā e faatoʻilaloina faalua isi ituaiga o Isaraelu, e ui lava e ao ona faasalaina sa Peniaminā? E ala i le faatagaina o ituaiga faamaoni e mafatia i le fasiotia o le toʻatele o i latou i uluaʻi fetauaʻiga, na tofotofoina ai e Ieova lo latou maumauaʻi e aveesea mea leaga mai Isaraelu.

Lesona mo i Tatou:

19:14, 15. O le leai o se faanaunauga o tagata Kipea e talimālō ai, e iloa ai sa faalētonu a latou amio. Ua faatonuina Kerisiano ina ia “tausisi i le alofa i tagata ese.”—Roma 12:13.

Le Laveaʻiina o i Luma

Ua toe nei o se aga, ona faaumatia lea e le Malo o le Atua le lalolagi amioleaga e ala iā Iesu Keriso, ma laveaʻiina tagata ua sao a latou amio. (Faataoto 2:21, 22; Tanielu 2:44) ‘O le a fano atoa uma o ē ita iā Ieova, a o ē ua alolofa atu iā te ia, ia pei o le lā i latou ina o mū totoʻa.’ (Faamasino 5:31) Ia tatou auaufaatasi ma i latou e alolofa iā Ieova e ala i le faatatauina o mea ua aʻoaʻoina mai i le tusi o Faamasino.

O le upu moni autū lenei ua faaalia i le tele o taimi i tala a faamasino: O le usiusitai iā Ieova e iʻu i le sosia o faamanuiaga, a o le lē usiusitai e iʻu i mala. (Teuteronome 11:26-28) Maʻeu le tāua pe a tatou “gauaʻi nei ma le loto” i le finagalo o le Atua lea ua ia faaalia mai iā i tatou.—Roma 6:17; 1 Ioane 2:17.

[Faamatalaga pito i lalo]

[Faafanua i le itulau 25]

(Tagaʻi i le lomiga mo le ata atoa)

“Ua faatūina e Ieova o faamasino, ua latou faaola iā te i latou ai lima o ē vetea a latou mea.”—Faamasino 2:16

FAAMASINO

1. Otinielu (Ituaiga o Manase)

2. Euta (Ituaiga o Iuta)

3. Samekara (Ituaiga o Iuta)

4. Parako (Ituaiga o Nafatali)

5. Kitiona (Ituaiga o Isakara)

6. Tulaga (Ituaiga o Manase)

7. Iairo (Ituaiga o Manase)

8. Iefata (Ituaiga o Kato)

9. Ivisona (Ituaiga o Asera)

10. Aluna (Ituaiga o Sepulona)

11. Apetonu (Ituaiga o Efaraima)

12. Samasoni (Ituaiga o Iuta)

TANU

MANASE

NAFATALI

ASERA

SEPULONA

ISAKARA

MANASE

KATO

EFARAIMA

TANU

PENIAMINA

REUPENA

IUTA

[Ata i le itulau 26]

O le ā le lesona ua e aʻoaʻoina mai le maumauaʻi o Parako e ō ma Tepora i le tafā o le taua?