‘O Loʻu Fesoasoani e Mai iā Ieova Lea’

O Ē Nofo Fua ma Faamalieina i le Auaunaga iā Ieova

UA FAAPEA mai se tamaʻitaʻi Kerisiano i Sepania: “O le toʻatele o i matou o loo maua pea le fiafia e ui e lē o iai ni a matou paaga.” Aiseā? “Ua mafai ai ona faateleina la matou auaunaga iā Ieova, ma saʻoloto mai ai i le tele o popolega e fesootaʻi atu i faaipoipoga.”

Ua ōgatusa nei faalogona ma le mea o loo fai mai ai le Afioga a le Atua e uiga i le nofo fua. Ina ua talanoa le aposetolo o Paulo i mataupu e aofia ai ma le faaipoipoga, sa ia faalaeiau: “O laʻu lenei upu i tagata nofo fua ma fafine ua oti a latou tane, e lelei ona latou nonofo pea pei o aʻu nei.” Sa nofo fua Paulo. Ae aiseā na ia fautuaina ai le lelei o le nofo fua? Sa ia taʻua e faapea, o lē ua faaipoipo ua popole i mea e faafiafia ai le paaga, a o lē nofo fua, ua ‘popole o ia i mea a le Alii.’ (1 Korinito 7:8, 32-34) O le auauna atu iā Ieova, o se tasi lenā o vala e mafai ai e se tagata nofo fua ona fiafia ma faamalieina ai.

Se Māfuaaga Tāua ua Nofo Fua Ai

Atonu e faigatā ona faatatau atu upu a Paulo i aganuu ia e faatāuaina ai le faaipoipoga ma le tausia aʻe o se aiga. Peitaʻi, na taʻua e Iesu Keriso o lē na mauaina pea le fiafia ma le faamalieina e ui ina nofo fua, se māfuaaga tāua ua nofo fua ai nisi Kerisiano. Na ia fetalai: “O i ai foʻi eunuka o ē ua faaeunukaina i latou e i latou, ona o le malo o le lagi. Ai sē na te mafaia ona talia, inā talia lea e ia.”—Mataio 19:12.

Ua iloa le moni o na upu, auā o le toʻatele o ē nofo fua, ua latou auauna atu i le Atua ma se loto lē fetosinaaʻi i se faaipoipoga. (1 Korinito 7:35) E faitau afe Kerisiano o loo tapuaʻi atu iā Ieova e aunoa ma ni paaga faaipoipo, ma o loo olioli i le maelega e fesoasoani atu i isi.a

E toʻatele Kerisiano nofo fua ua iloa, e lē na o i latou e faanoanoa, ma e lē na o tagata foʻi ua uma ona faaipoipo e mauaina le fiafia. I nisi taimi, e mafai e i latou uma na ona maua le fiafia ma le faanoanoa. O le mea moni, ua faapea mai le Tusi Paia o le faaipoipo e aumaia ai “puapuaga i le tino.”—1 Korinito 7:28.

Māfuaaga Eseese ua Nofo Fua ai Nisi

Ua nofo fua le toʻatele o isi ona o tulaga e lē maʻalofia, ae lē ona o ni a latou lava filifiliga. Atonu o loo latou moomoo atu i se mafutaga māfana ma le alofa lea e maua i totonu o le liʻo o le faaipoipoga. Ae lē gata i lea, o nisi ua latou nofo fua pea ona o faafitauli tau tupe ma isi tulaga. O nisi Kerisiano, o le toʻatele o i latou o tuafāfine pele, o loo nonofo fua pea ona o le usitaia o fautuaga a le Tusi Paia ina ia faaipoipo “tau lava i lē ua i le Alii.” (1 Korinito 7:39) O loo latou saʻilia ma le faamaoni ni paaga faaipoipo i ē ua tuuina atu ma papatisoina e avea o ni tagata tapuaʻi o Ieova.

I nisi taimi, e lagona ai e nei Kerisiano le tuua toʻatasi. Na taʻua e se Kerisiano nofo fua o lē na lagona faapena: “E matou te iloa le tulafono a Ieova, ma lē mananaʻo e faia se mea e faatigā ai o ia. E matou te mananaʻo i ni paaga, ae i le taimi e tasi, matou te maumauaʻi e tumau i le nofo fua, pe afai e taumafai tagata o le lalolagi e faatulaga ni a matou faaipoipoga. E matou te lē mananaʻo e aumea ma ni alii ma ni tamaʻitaʻi e lē talitonu.” Ua ono ma tatau ona faamālō atu i nei Kerisiano ona o le faatatauina o fautuaga a le Tusi Paia, ma le tausisia o tapulaa maualuluga tau amio, lea e faafiafiaina ai pea Ieova e ui i ni o latou faalogona mafatia.

Se Fesoasoani Alofa Mai iā Ieova

E alofa Ieova iā i latou o ē alolofa iā te ia, o ē ua ʻalofia le faaipoipo atu i ē e lē o auauna atu iā te ia. Na faamaonia e le tupu o Tavita mai mea na ia iloaina e faapea: “E te amio alofa oe [Ieova] i lē ua alofa.” (Salamo 18:25) Na folafola atu e le Atua iā i latou o ē usiusitai iā te ia: “Ou te lē tuua lava oe, ou te lē tuulafoaʻi lava iā te oe.” (Eperu 13:5) I le faaaʻoaʻo atu iā Ieova, e tatou te faamālō atu ai i Kerisiano nofo fua uma po o le ā lava le matua, o ē o loo pipiimau atu ma le faamaoni i le Afioga a le Atua. E tatou te tatalo foʻi iā Ieova ina ia faamalosia i latou e fesagaʻia o latou luʻi.—Faamasino 11:30-40.

O le toʻatele o isi Kerisiano nofo fua, ua latou iloa o le faia o se sao i le galuega talaʻi, ua faamalieina ai i latou. O se faaaʻoaʻoga, seʻi mātau mai Patricia pe ā ma le 35 tausaga, o sē talaʻi faataimi atoa ma nofo fua. Ua faapea mai o ia: “E ui lava e iai faafitauli o le nofo fua, ae ua ou maua ai se avanoa e talaʻi faasoloatoa ai. Pe a fua atu i loʻu tulaga, e faigofie tele ona fetuutuunaʻi laʻu faasologa, ma ua tele ai ma le taimi mo aʻu lava suʻesuʻega. Ua ou iloaina ai foʻi le tāua o le faalagolago atu iā Ieova, aemaise lava i taimi sili ona faigatā.”

Ua faavaeina nei faalogona i folafolaga a le Tusi Paia: “Ia e tuuina atu lou ala iā Ieova, ma faatuatua iā te ia, ona faia lava lea e ia.” (Salamo 37:5) Ioe, ua mafai ona faamalosia ma faamāfanafanaina tagata tapuaʻi faamaoni o Ieova, o ē nofo fua ma ē ua faaipoipo i upu nei: ‘O loʻu fesoasoani e mai iā Ieova lea.’—Salamo 121:2.

[Faamatalaga pito i lalo]

[Faamatalaga faaopoopo i le itulau 9]

“Ua popole lē nofo fua i mea a le Alii i se mea e fiafia mai i ai le Alii.”—1 KORINITO 7:32

[Pusa i le itulau 8]

GALUEGA E FAAMALIEINA AI

Na fetalai Iesu o lē na nofo fua: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.”—Ioane 4:34.

Sa pisi afafine nofo fua e toʻafā o Filipo e “perofeta ane.”—Galuega 21:8, 9.

Ua avea tuafāfine Kerisiano nofo fua uma o ē o loo folafola atu le feʻau o le Malo, ma se “ʻau o ē na talaʻiina.”—Salamo 68:11.