Fesili Mai le ʻAufaitau

Talu ai na fulitua i le Atua le tupu o Isaraelu anamua o Solomona ina ua matua, po o lona uiga ea la o le a lē toe tū mai o ia?—1 Tupu 11:3-9.

E ui lava ua lisi mai e le Tusi Paia igoa o isi tane ma fafine faatuatua e mautinoa e toe tutū, e lē o taʻua faapitoa mai ai faapea, o le a toe tutū mai tagata taʻitoʻatasi uma o loo taʻua o latou igoa i le Tusi Paia. (Eperu 11:1-40) Ae peitaʻi, e tusa ai ma le tulaga o Solomona, e mafai ona tatou maua se manatu i le faamasinoga a le Atua e ala i le faatusatusa o le mea na tupu iā te ia ina ua maliu ma le mea na tupu i nisi tagata faamaoni ina ua maliliu.

I le Tusi Paia, e na o le lua lava iʻuga mo ē ua feoti, o le moe lea i le tuugamau mo se taimi, ma le oti e faavavau. O i latou ua faamasinoina e lē tatau i ai le toe tū, e lafoina i “Kena,” po o le “lepa afi.” (Mataio 5:22; Mareko 9:47, 48; Faaaliga 20:14) E aofia ai faatasi ma i latou ia Atamu ma Eva, le faalata o Iuta le Sekara, ma i latou na feoti ina ua faasalaina e le Atua, e pei o tagata i aso o Noa ma Sotoma ma Komoro.a Ae o i latou o le a toe tutū e mālōlō i le tuugamau po o Seoli pe a feoti. Ua taʻua i le Tusi Paia e tusa ai ma lo latou lumanaʻi: “Ua avaʻe foʻi e le sami ē na oti sa i ai, ua avaʻe foʻi e le oti ma seoli ē na oti sa i ai; e taʻitasi foʻi o i latou ma faamasinoina e tusa ma a latou amio.”—Faaaliga 20:13.

O ē faamaoni o loo faasino i ai le Eperu mataupu e 11, o loo iai pea i latou i Seoli po o le tuugamau, o loo faatalitali ai mo le toe tū. Ua aofia ai iā i latou ia auauna faamaoni, o Aperaamo, Mose ma Tavita. Ia mātau le auala o loo faamatala ai e le Tusi Paia lo latou maliliu. Na fetalai atu Ieova iā Aperaamo: “A o oe, e te alu atu ma le filemu i ou tamā, e tanumia oe pe a e matuā toeaina lava.” (Kenese 15:15) Na fetalai Ieova iā Mose: “Faauta, o le a e taoto faatasi ma ou tamā.” (Teuteronome 31:16) Ua taʻua i le Tusi Paia e faatatau i le tamā o Solomona, o Tavita: “Ua taoto foʻi Tavita faatasi ma ona tamā; ona tanumia lea o ia i le aai a Tavita.” (1 Tupu 2:10) O lea la, o le faaupuga, ‘taoto faatasi ma ona tamā,’ o se isi auala lea e iloa ai o loo i seoli lea tagata.

O le ā na tupu iā Solomona ina ua oti? Ua tali le Tusi Paia: “O tausaga na fai ai Solomona ma tupu iā Isaraelu uma lava i Ierusalema e fagafulu o tausaga ia. Ona taoto ai lea o Solomona faatasi ma ona tamā, ua tanumia foʻi o ia i le aai a Tavita lona tamā.” (1 Tupu 11:42, 43) O lea la, e foliga mai e talafeagai le faapea atu, o loo i seoli Solomona, o le a toe faatūina o ia.

Ona o lenei faaiʻuga ua foliga mai, o le a toe tutū i latou uma ua faamatalaina i le Tusi Paia na ‘latou taooto ma o latou tamā.’ O le mea moni, o le toʻatele o isi tupu na sosoo ma Solomona, e ui ina lē faamaoni, ae o loo taʻua i latou i lenei auala. E mafai ona tatou malamalama i lenei mea, talu ai “o le a toe tutū mai ē ua amiotonu atoa ma ē ua amiolētonu.” (Galuega 24:15) Pe a mavae le toe tutū mai o i “latou uma ua i tuugamau,” ona tatou iloa lea po o ai moni ua toe tutū mai. (Ioane 5:28, 29) Na i lo le maumaututū e uiga i le toe tū mai o se tasi o aso anamua, ia tatou faatalitali ma faatuatua i le faaiʻuga sili ona lelei a Ieova.

[Faamatalaga pito i lalo]