Pe e Aogā ea le Faamaoni?

“UA TAUGATĀ tele le inisiua o lou soifua mālōlōina,” o le faamatalaga lea a Karl, o se alii e faigaluega i le ofisa o inisiua.a “Afai e te liliu mai i la matou kamupani, e $20 (Amerika) lau tupe e sefe i masina taʻitasi, ma o se aofaʻiga tele lenā.”

Sa faapea atu Jens: “Atonu e saʻo oe, ae ua tele tausaga o oʻu totogia le kamupani lea e iai laʻu inisiua o le soifua mālōlōina. Ua tele la latou fesoasoani iā te aʻu i tausaga ua mavae, ma o lea ou te manaʻo ai lava ia ou faamaoni pea iā i latou.”

Sa tali atu Karl: “O le faamaoni o se uiga e lelei tele, ae o loo alu ai au tupe ona o lou faamaoni pea i lenā kamupani, ma e taugatā tele.”

E saʻo le manatu o Karl. I nisi o taimi o le tausisia o le faamaoni i le va ma se tasi atonu e alu ai ni tupe se tele pe taugatā foʻi. E masani foʻi ona manaʻomia le tele o le taimi, le malosi, aemaise e aafia ai foʻi ma faalogona. Pe e aogā moni ea le faamaoni?

O se Uiga e Viiviia e Tagata ae e Lē Faatinoina

I se suʻesuʻega na faia e se ofisa i Siamani e suʻesuʻeina ai manatu o le lautele, na talitonu le 96 pasene o ē na tali mai o le faamaoni o se uiga lelei. Ae i se isi suʻesuʻega na faia mo i latou i le va o le 18 i le 24 tausaga, na iloa ai e toʻa 2 mai le toʻa 3 tagata na tali mai faapea, o le faamaoni o se uiga lelei.

O le mea moni lava e faigofie tele ona viiviia ma taʻuleleia lenei uiga o le faamaoni ae peitaʻi e faigatā ona faatinoina. O se faataʻitaʻiga, i nisi o atunuu i Europa, ua tau mou atu le faamaoni o ulugalii faaipoipo ma tagata o le aiga. E masani foʻi ona lē faamaoni le tagata i lana uō. Ua mou atu foʻi le faamaoni lea sa iai i taimi ua teʻa, i le va o le pule i fale faigaluega ma le ʻaufaigaluega faapea i le va o pisinisi ma le ʻaufaatauoloa. Aiseā?

O nisi taimi, o le pisi i meafai o le olaga ua leai ai se taimi ma leai ai foʻi se uunaʻiga malosi i tulaga e manaʻomia ai le faamaoni. Ona o mea na tutupu i nisi tagata, atonu ua fiu ai ma faigatā ona toe faamaoni i isi. A o nisi, ua iā i latou le mafaufau faapea e sili ai le ola mo le aso lenei auā e lē iloa le mea e tupu a taeao, ma e lē manaʻomia ai ona latou faamaoni.

Po o le ā lava le māfuaaga, e mautinoa o le faamaoni o se uiga e viiviia e tagata ae seāseā ona faatinoina. Ona o lenei tulaga, seʻi o tatou talanoaina fesili nei: Pe e aogā ea le faamaoni? Afai o lea, o ai e ao ona tatou faamaoni i ai ma e faapefea ona faaalia? O ā aogā o le tausisia o le faamaoni?

[Faamatalaga pito i lalo]

[Faamatalaga faaopoopo i le itulau 3]

O le faamaoni o se uiga e viiviia e tagata ae seāseā ona faatinoina