Talaaga o le Soifuaga

Tumau o se Tagata Tau a Keriso

FAAMATALAINA E YURII KAPTOLA

“O lea la ua ou iloa nei o oe o se tagata faatuatua tele!” Na faateʻia aʻu i na upu auā na fai mai e se tagata aloaʻia o le vaegaau a Rusia, ma na matuā faalaeiauina ai aʻu. O le taimi lea na ou sauni e alu i le falepuipui mo se taimi umi, ma sa ou ʻaiʻoi atu e lē aunoa iā Ieova mo se fesoasoani. Na ou fesagaʻia se tauiviga umi, lea e manaʻomia ai le tumau ma le maumauaʻi.

NA OU fanau iā Oketopa 19, 1962, ma sa ou ola aʻe i le itu i sisifo o Ukraine. O le tausaga lava lenā na feiloaʻi atu ai loʻu tamā lea foʻi na igoa iā Yurii, i Molimau a Ieova. Na avea o ia ma uluaʻi tagata tapuaʻi a Ieova i lo matou nuu. Na iloa ana galuega e pule o le nuu lea na faasagatau mai i Molimau a Ieova.

Ae ui i lea, sa faaaloalogia e le tele o o matou tuaoi oʻu mātua ona o o la uiga faa-Kerisiano, ma le manatu mamafa mo isi. Na faaaogā e oʻu mātua avanoa uma e totō i o matou loto ma oʻu tuafāfine e toʻatolu le alofa mo le Atua mai lava a o laiti, ma sa fesoasoani lenei mea iā te aʻu e faafetaiaʻia ai le tele o luʻi na ou fesagaʻia i le aʻoga. O se tasi o luʻi, ina ua faatonuina tamaiti uma e faapipii i o latou laʻei se pine lea e faailoa ai o ia o se tasi o le Faapotopotoga faa-Komunisi mo Tamaiti. Talu ai loʻu solitū faa-Kerisiano, sa ou lē faapipii ai le pine ma sa ou tumatilatila ese ai.—Ioane 6:15; 17:16.

Mulimuli ane, ina ua ou auai i le vasega lona tolu, na faatonuina ai tamaiti uma lava ina ia auai i se faalapotopotoga faa-Komunisi e taʻua o Paeonia Talavou. Na ō uma i fafo i le lotoā a le aʻoga la matou vasega i se tasi o aso, mo le sauniga e tusia ai igoa. Na matuā ou palaai lava, i loʻu faatalitalia o le a tauemua ma otegia aʻu. Na aumai fasi ieie fou lanu mūmū a tamaiti uma lava seʻi vaganā ai aʻu, ma sa matou tutū i se laina umī i luma o le pule aʻoga, faiaʻoga ma tamaiti aʻoga matutua. Ina ua faatonuina tamaiti aʻoga matutua e fusi fasi ieie i o matou ua, sa ou punou ma tilotilo i lalo, i loʻu faamoemoe ina ia aua neʻi amanaʻia mai e se tasi aʻu.

Faafalepuipui i Nuu Mamao

Ina ua 18 oʻu tausaga, na faasalaina aʻu i le falepuipui ona o le tausisia o le solitū faa-Kerisiano. (Isaia 2:4) Na ou falepuipui i le tausaga muamua i le taulaga o Trudovoye i le itumalo o Ukraine o Vinnitskaya. Na ou feiloaʻi i ni Molimau a Ieova pe tusa e 30, a o oʻu iai i inā. Na mananaʻo le malo e taofia i matou mai le toe auaufaatasi atu i isi molimau, o lea na tofia ai i matou e galulue taʻitoʻalua i ni vaega eseese.

Iā Aokuso 1982, na ave ai i maʻua ma le isi Molimau o Eduard, i se nofoaafi i le itu i mātū, i se vaipanoa maugā faatasi ma isi pagota. Na matou onosaia le vevela ma le tumu o le potu i tagata mo aso e valu seʻia matou taunuu i le falepuipui i Solikamsk, i le itumalo o Permskaya. Na eseese sela na tuu ai i maʻua ma Eduard. I le lua vaiaso mulimuli ane, na toe ave aʻu i le itu i mātū e mamao atu i Vels, i le vaipanoa o Krasnovishersky.

Na taunuu la matou taavale i le tulua o pō ma ao, ma sa matuā pogisa. E ui i le pogisa, ae na faatonuina i matou e se leoleo ina ia sopoʻia le vaitafe i se vaa. Na matuaʻi matou lē iloa le vaa po o le vaitafe foʻi! Peitaʻi, na matou au tagotago pea seʻia maua le vaa, ma e ui i lo matou fefefe, na mafai lava ona matou sopoʻia le vaitafe. Ina ua taunuu i le isi itu, na matou agaʻi saʻo atu i se molī na susulu mai i se aʻega latalata ane, lea na maua ai ni faleʻie. O lo matou nofoaga fou lenei. Sa ou nofo i se faleʻie e fai sina telē, ma pe ā ma le 30 pagota na nonofo uma ai. Sa matou onosaia le mālūlū tele pe a oo i le vaitaimi o le tau mālūlū, ma sa lē lava le māfanafana o le faleʻie. O le galuega muamua a isi pagota o le tatipi lea i lalo o laau, ae sa ou galue i le fausiaina o tamaʻi fale mo pagota.

Taunuu Mai Meaʻai Faaleagaga i le Vaomatua

E na o aʻu le Molimau i lenā nofoaga; peitaʻi sa leʻi tuulafoaʻia e Ieova aʻu. Na ou mauaina i se tasi o aso se afīfī mai loʻu tinā, lea sa nofo pea i le itu i sisifo o Ukraine. Ina ua tatala e se leoleo le afīfī, o le mea muamua lava na ia iloaina o se tamaʻi Tusi Paia. Na ia tago i ai ma suʻesuʻe itulau. Sa ou taumafai e fai atu se tala ina neʻi aveesea lenei meaalofa tautele faaleagaga. Na faafuaseʻi ona fesili mai le leoleo: “O le ā lenei mea?” A o leʻi oʻu mafaufau i saʻu tali e fai atu, na tali atu le pule na tu i autafa ane: “Oi! O se lomifefiloi.” Na leai saʻu tala na fai i ai. (Failauga 3:7) Na saʻilia e le pule isi vaega uma o le afīfī ona tuu mai lea iā te aʻu faatasi ma lenei Tusi Paia tāua. Sa ou fiafia tele ma na ou foaʻi i ai ni pinati mai laʻu afīfī. Ina ua ou mauaina lenei afīfī, na ou iloa ai e leʻi faagaloina aʻu e Ieova. Na ia naunau mai ma le alofa ma tausia aʻu faaleagaga.—Eperu 13:5.

Lē Mapu i le Talaʻi Atu

I ni nai masina mulimuli ane, na ou maofa ina ua ou maua se tusi mai se uso sa falepuipui pe tusa e 250 maila [400 kilomita] le mamao ese atu. Na ia talosaga mai iā te aʻu ina ia saʻilia se tamāloa na faaalia sona fiafia, ma atonu o loo iai i le nofoaga lea ou te iai. E lē o se mea poto le tusiaina o se tusi faapea, auā sa faitauina uma a matou tusi e leoleo. O lea la, na faatonuina aʻu e se tasi o leoleo ina ia oo atu i lona ofisa, ma lapataʻia malosi aʻu ina ia aua neʻi toe talaʻi. Ona ia faatonuina lea o aʻu e saini se pepa o loo tusia ai, o le a ou lē toe talaʻi atu i isi. Na ou tali i ai, e leai se aogā e sainia ai lea pepa, auā ua leva ona iloa uma e tagata o aʻu o se Molimau a Ieova. Na ou taʻu i ai na fia iloa e isi pagota le māfuaaga na ala ai ona ou falepuipui. O le ā la laʻu tala o le a fai atu iā i latou? (Galuega 4:20) Na iloa e le leoleo e lē mafai ona ia faafefeina aʻu, o lea na ia tulia ese ai loa aʻu. Sa toe ave foʻi aʻu i se isi falepuipui.

Na ave aʻu i le nuu o Vaya, lea e 125 maila [200 kilomita] le mamao. Na amanaʻia e pule o na falepuipui loʻu tulaga o se Kerisiano, ma tofia aʻu i galuega e lē fesootaʻi i vaegaau—muamua o se kamuta, ona sosoo ai lea ma se fai molī. Ae sa tofu nei galuega ma luʻi. I se tasi aso, sa faatonuina aʻu ia ave aʻu mea faigaluega ma alu atu i le fale kalapu a le nuu. Na fiafia fitafita ina ua latou vaai mai iā te aʻu. Sa faalētonu a latou molī, ia e teuteuina ai faailoga faavaegaau. Sa latou mananaʻo ia ou fesoasoani atu i le toe faaleleia o nei molī, auā na latou sauni atu mo le aso faamanatu faapitoa mo vaegaau faa-Komunisi. Ina ua ou tatalo ma mafaufau i le mataupu, sa ou taʻu atu iā i latou e lē mafai ona ou faatinoina lea galuega. Na ou ave i ai aʻu mea faigaluega ma alu ese loa. Na lipotia aʻu i le sui faatonu sili, ma sa faateʻia aʻu auā ina ua ia faalogo i faitioga faasaga iā te aʻu ona ia tali atu lea: “Ou te faamālō atu iā te ia ona o le tulaga lenā. O ia o se tagata e lē maluelue i ona talitonuga.”

Faalaeiauga e Leʻi Faatalitalia Mai se Tasi

Na ou saʻoloto iā Iuni 8, i le 1984 ina ua uma se faasalaga faafalepuipui e tolu tausaga. Ina ua ou toe foʻi atu i Ukraine, sa tatau ona lesitalaina aʻu i le ofisa faavaegaau o sē sa avea muamua ma pagota. Na taʻu mai e tagata aloaʻia iā te aʻu faapea i le ono masina o i luma, o le a toe faamasinoina aʻu ma e sili ai la loʻu tuua loa o le itumalo. Sa ou tuua ai loa Ukraine ma maua se galuega i Latvia. Na mafai ona ou auai faatasi ma talaʻi ma se vaega toʻaitiiti o Molimau, na nonofo latalata ane i le laumua o Riga mo se taimi. Ae, e na o le tasi le tausaga na va ai, ae toe valaauina foʻi aʻu ina ia auai i le vaegaau. I le ofisa, na ou taʻu i le tamāloa sa ou teena muamua foʻi le auai i le vaegaau. Na ia alaga mai e faapea: “E te faavalevalea? Seʻi e faatalitali la po o le ā lau tala o le a fai i le sui taʻitaʻi!”

Na ia momolia aʻu i se potu o le fogāfale lona lua, lea o loo saofaʻi mai ai le sui taʻitaʻi o le vaegaau i lana laulau. Sa ia faalogologo lelei i laʻu faamatalaga, ona ia taʻu mai lea e faapea o loo lava pea le taimi e toe iloilo ai laʻu filifiliga, a o leʻi oʻu oo i luma o le komiti faafoe. A o ma tuua le ofisa o le sui taʻitaʻi o le vaegaau, na taʻutino mai e le leoleo lea na ia otegiaina aʻu e faapea: “O lea la ua ou iloa nei o oe o se tagata faatuatua tele!” Ina ua ou tulaʻi i luma o le komiti faafoe, sa ou maumauaʻi pea i loʻu tulaga solitū, ma na leai sa latou gaoioiga na fai i lenā taimi ae tuu loa aʻu.

O le taimi lenā sa ou nofo i se fale talimālō. I se tasi o afiafi, na ou faalogoina ai se tuʻituʻi lemū i le faitotoʻa. Na ou tatalaina ma iloa ai se tamāloa o loo laʻeiina se suti ma sana ato taʻitaʻi. Na ia faailoa mai o ia ma faapea mai: “O aʻu o se tasi o leoleo faapitoa a le malo. Ua ou iloa o loo iai ni ou faafitauli ma o le a e toe tulaʻi foʻi i luma o le faamasinoga.” “Ioe, e saʻo lelei oe,” o laʻu tali atu lea. Ona ia fai mai lea: “E mafai ona matou fesoasoani atu iā te oe, pe a e finagalo malie tatou te galulue faatasi.” Na ou tali atu: “Oi e leai, e lē mafai ona ou faia lenā mea. E tumau lava loʻu faamaoni i oʻu talitonuga faa-Kerisiano.” Na leai nisi ana taumafaiga na toe fai ae alu ese loa.

Toe Faafalepuipui ma Talaʻi Foʻi

Na faasalaina aʻu iā Aokuso 26, 1986 i le Fale Faamasino i Riga i le fā tausaga e faia galuega mamafa, ma na ave aʻu i le Falepuipui Tutotonu i Riga. Na latou tuuina aʻu i se sela telē faatasi ma isi pagota e toʻa fāsefulu, ma na ou taumafai e talaʻi i nei pagota uma. O nisi e faapea mai e talitonu i le Atua; a o isi e na o le taliē. Sa ou mātauina ni tamāloloa ua potopoto faatasi i ni vaega, ma ina ua mavae ni vaiaso se lua, na faailoa mai e taʻitaʻi o nei vaega ua lē toe faatagaina ona ou toe talaʻi, ona ou te lē o usiusitai i a latou tulafono. Sa ou faamatala i ai o le māfuaaga tonu lea na ou falepuipui ai, ona e ese tulafono ia ua ou usiusitai i ai.

Sa faaauau ona ou talaʻi ma le utaga mamao, ma ina ua ou iloaina nisi sa naunau i mea faaleagaga, sa ou suʻesuʻe loa le Tusi Paia ma le toʻafā o i latou. A o faia a matou talanoaga, latou te tusia i se api aʻoaʻoga autū o le Tusi Paia. I ni nai masina mulimuli ane, sa ave aʻu i se falepuipui e malosi ai le vaavaaiga a leoleo i Valmiera, lea na ou galue ai o se fai molī. Na ma suʻesuʻe ai i inā ma le isi fai molī, lea na avea ma Molimau a Ieova i le fā tausaga mulimuli ane.

Na ave aʻu iā Mati 24, 1988 mai le falepuipui lea i se isi falepuipui latalata ane, ma o se faamanuiaga lenei auā na tele loʻu saʻolotoga na maua ai. Na tofia aʻu e galue i nofoaga eseese e faia ai faugāfale, ma sa lē aunoa ona ou saʻilia avanoa e talaʻi ai. E masani lava, ou te alu ese mai le falepuipui ma talaʻi seʻia oo i le pō, ae leʻi iai ma ni faafitauli pe a ou toe foʻi atu i le falepuipui.

Sa faamanuia e Ieova aʻu taumafaiga. E toʻalaiti ni Molimau na nonofo latalata mai i le mea lea sa ou iai, ae na o le toʻatasi sa nofo i le taulaga o se tuafafine matua e igoa iā Vilma Krūmin̗a. Na amata ona ma faia ma le tuafafine o Krūmin̗a ni suʻesuʻega se tele ma tagata talavou. O taimi na e ō mai ai uso ma tuafāfine mai Riga e auai i le talaʻiga, ma na ō mai foʻi ma nisi sa galulue faataimi atoa mai Leningrad (lea ua taʻua nei o St. Petersburg). Sa matou faia ni suʻesuʻega se tele ona o le fesoasoani a Ieova, ma e leʻi pine ae avea aʻu ma paeonia, lea e talaʻi e tusa ma le 90 itula i le masina.

Na toe iloilo loʻu faamasinoga iā Aperila 7, 1990 i le Fale Faamasino a Tagata i Valmiera. Na ou iloaina le lōia ina ua amata le faamasinoga. Sa ma talanoa i le Tusi Paia a o talavou o ia! Na ia iloaina mai foʻi aʻu ma ata mai ae leai sana tala na fai mai. O loo oʻu manatuaina pea le tala a le faamasino na fai mai iā te aʻu i lenā aso: “Yurii, o le faaiʻuga lea sa faia na māfua ai ona faafalepuipui oe mo tausaga e fā, e sesē. Sa lē tatau ona latou faasalaina oe.” Na faafuaseʻi lava ona faasaʻolotoina aʻu!

O se Tagata Tau a Keriso

Iā Iuni 1990, sa manaʻomia ona ou lesitala i le ofisa o le vaegaau ina ia maua ai soʻu pemita nofo mau i Riga. Sa ou toe alu foʻi i le ofisa lava lea e tasi, lea na ou faapea atu ai i le sui taʻitaʻi e lē mafai ona ou auai i le vaegaau, i le fā tausaga ua mavae. Ae i le taimi la lenei, sa ia tū mai i luga, faafeiloaʻi ma faatalofa mai iā te aʻu, ma faapea mai: “O se mea e faanoanoa ai le faasalaina o oe i le falepuipui. Ou te faamalie atu sa lē tatau ona tupu lenā mea iā te oe.”

Sa ou tali atu: “O aʻu o se tagata tau a Keriso ma e tatau ona faataunuu loʻu tofiga. E mafai ona fesoasoani le Tusi Paia iā te oe, e olioli i le folafolaga lea sa faia e Keriso i ona soo—o se olaga fiafia ma se lumanaʻi e faavavau.” (2 Timoteo 2:3, 4) Na tali mai le sui taʻitaʻi: “E leʻi leva talu ai nei ona ou faatauina mai se Tusi Paia, ma o lea o loo oʻu faitauina.” Sa iā te aʻu le tusi, E Mafai ona E Ola e Faavavau i Parataiso i le Lalolagi.a Sa ou suʻe i le mataupu lea o loo talanoaina ai le faailoga o aso e gata ai, ma faaali iā te ia le auala e fesootaʻi mai ai i o tatou aso valoaga a le Tusi Paia. I lona loto faafetai, na ia toe faatalofa ma faamanuia mai i laʻu galuega.

Na matuā sinasina le fanua i Latvia mo le seleselega i lenā taimi. (Ioane 4:35) Na avea aʻu ma se toeaina i le 1991. Sa na o le lua toeaina na tofia i le atunuu atoa! I se tausaga mulimuli ane, na vaeluaina ai le faapotopotoga e tasi lea sa iai i Latvia i ni faapotopotoga se lua—o le isi e tautatala i le faa-Latvia ma le isi i le faa-Rusia. Na ou maua se faaeaga e auai i le faapotopotoga faa-Rusia. Sa vave le faatelega ma na toe vaevaeina foʻi la matou faapotopotoga i ni faapotopotoga se tolu! Pe a toe tepa i mea na tutupu, e manino ai sa tosina mai e Ieova ana mamoe i lana faalapotopotoga.

Na tofia aʻu i le 1998 e paeonia faapito i Jelgava, o le taulaga e 25 maila [40 kilomita] le mamao i le itu i saute sisifo o Riga. I le tausaga lava lenā, o aʻu le tagata muamua mai Latvia na valaaulia e auai i le Aʻoga mo le Toleniina i le Faiva, lea sa faia i le gagana Rusia i Solnechnoye, e latalata ane i St. Petersburg i Rusia. A o iai i le aʻoga, na ou iloa ai le tāua o le alofa i tagata ina ia taulau manuia ai i le talaʻiga. O le mea sili sa faagaeetia ai aʻu, o le alofa ma le uaʻi mai na faaalia e le Aiga Peteli ma faiaʻoga o le aʻoga.

Na ou ausia se isi mea mataʻina i loʻu olaga, ina ua ou faaipoipo iā Karina o se tamaʻitaʻi Kerisiano aulelei i le 2001. Sa ma auai ma Karina i le auaunaga faataimi atoa, ma e faalaeiauina aʻu i aso uma i le vaai atu i laʻu avā o toe foʻi mai le talaʻiga ma foliga fiafia. Ioe, o se oliolisaga le auauna iā Ieova. O faiga sauā i lalo o pulega faa-Komunisi, na ou aʻoaʻoina ai e ao ona faatuatua atoatoa atu iā te ia. E mafai ona onosaia puapuaga uma pe a manaʻo se tasi ia tausisia pea lana faauōga ma Ieova ma lagolagoina lana pule silisili ese. O le fesoasoani i isi e iloa Ieova ua aumaia ai se fiafiaga i loʻu olaga. O se matuā faaeaga loʻu auauna iā Ieova “o se tagata tau e lelei a Keriso.”—2 Timoteo 2:3.

[Faamatalaga pito i lalo]

[Ata i le itulau 10]

Na faasalaina aʻu e faia galuega mamafa ma faafalepuipui mo tausaga e fā i le Falepuipui Tutotonu i Riga

[Ata i le itulau 12]

I maʻua ma Karina i le talaʻiga