‘Ia Anaana i le Atua i lo Tagata’

‘Ua Fai Ieova Moʻu Olataga’

NA TATAU ona fai se filifiliga a tagata o Ieova. Pe latou te anaana i le pule amioleaga o Aikupito? Pe anaana iā Ieova ma tuua le mea na pologa ai, ae ō atu i le Nuu Folafolaina?

Na aumaia e le Atua mala e sefulu i Aikupito, ona na musu Farao faauamaaa e tuusaʻoloto tagata o Ieova. O i inā na faaali ai e Ieova le tele o lona mana! Na matuā iso atua o Aikupito auā na lē mafai ona latou taofia nei mala.

Ina ua fai atu le Atua iā Farao e tuu ona tagata e ō, na tauemu Farao ma faapea mai: “O ai ea Ieova ou te faalogo ai i lana upu, ma ou tuuina atu ai o Isaraelu e ō? Ou te leʻi iloa Ieova, ou te lē tuuina atu foʻi Isaraelu e ō.” (Esoto 5:2) Ona o lea, na puapuagatia ai Aikupito i mala nei: (1) liu toto le vai, (2) o rane, (3) o utu, (4) o lago lapopoʻa, (5) mamate meaola, (6) maʻi leaga i tagata ma manu, (7) o uatoʻa, (8) o sē akerise, (9) pogisa ma le (10) feoti o ulumatua uma o Aikupito e aofia ai le atalii o Farao. Ona tuu atu lea e Farao tagata Eperu e ō. Na tauanau atu foʻi o ia e ō ese atu loa!—Esoto 12:31, 32.

E pe tusa ma le tolu miliona le nuu o Isaraelu na ō ese faatopetope, o tane, fafine, tamaiti ma tagata ese e toʻatele. (Esoto 12:37, 38) E leʻi umi ae tuliloa i latou e Farao ma lana ʻautau malosi. Na aliali mai na poloka ai i inā le nuu o Isaraelu i le va o le Sami Ulaula, o se toafa mataʻutia ma ʻautau a Farao. Peitaʻi ane, na fai atu Mose i le nuu: “Aua tou te fefefe, a ia outou laulau tutū ma vāai atu i le olataga mai iā Ieova.”—Esoto 14:8-14.

Na faia e Ieova le vavega ina ua ia vaeluaina le Sami Ulaula e sosola ai le nuu o Isaraelu. Ae na toe faapaʻū ifo e Ieova le suāsami ina ua oo ane ʻautau a Aikupito. ‘Na lafoina e Ieova kariota a Farao ma lana itu taua i le sami.’ (Esoto 14:26-28; 15:4) E mataʻutia le mea na oo iā Farao faamaualuga, ona o lona lē migao iā Ieova.

O Ieova “o le toa lava ia,” e pei ona faamaonia i le mea na tupu i le Sami Ulaula. (Esoto 15:3) Ua faapea mai le tala: “Ua iloa foʻi e Isaraelu le vavega na faia e Ieova iā Aikupito, ona matataʻu lea o le nuu iā Ieova; ua latou faatuatua foi iā Ieova.” (Esoto 14:31; Salamo 136:10-15) Na faaalia lo latou lotofaafetai i le Atua ina ua lagi e Mose ma tane Isaraelu le pese o le manumalo, ma taʻitaʻia e Miriama le tuafafine o Mose, le siva a fafine.a

Laveaʻi Pea e Ieova Ona Tagata

E tele manatu lelei ua aʻoaʻoina e auauna a Ieova i aso nei, ina ua laveaʻi e Ieova le nuu o Isaraelu i lona mana tele. O se tasi o manatu lelei, e lē uma le mana o Ieova ma e malosi lana lagolago i ona tagata. Na pepese Mose ma tagata Isaraelu i la latou pese o le manumalo: “Ieova e, ua mamalu lou aao taumatau i le malosi; Ieova e, o lou aao taumatau ua nutipalaina ai lē ua ita mai.”—Esoto 15:6.

O le isi manatu lelei, e finagalo le Atua e ou le malosi uma lava, ina ia puipuia ona tagata. Na pepese le nuu o Isaraelu: “O Ioa, o loʻu malosi ia, ma laʻu pese, ua fai foʻi o ia moʻu olataga; o loʻu Atua lenei, ou te faaneenee i ai.” O le isi foʻi manatu lelei, e leai se tasi e mafai ona foua le finagalo o Ieova le Atua. Na pepese tagata Isaraelu i la latou pese o le manumalo: “Ieova e, o ai ea sē ua tusa ma oe i le vao atua? O ai sē ua tusa ma oe, o lē silisili ona paia, o lē mataʻutia i viiga, o lē fai vavega?”—Esoto 15:2, 11.

E pei o Farao o Aikupito, ua sauāina foʻi e taʻitaʻi o malo tagata o Ieova i aso nei. E ono faia e nei taʻitaʻi faasausili “upu i lē Silisili ese, ma faaumatia le ʻau paia a lē Silisili ese.” (Tanielu 7:25; 11:36) Ae o le taʻutinoga lenei a Ieova i ona tagata: “O auupega uma e faia e tau ma oe e lē manuia ia; o laulaufaiva uma e finau atu iā te oe i le faamasinoga e te faasalaina ia; o le tofi lenā o auauna a Ieova.”—Isaia 54:17.

E iʻuvale taumafaiga a ē tetee i le Atua, e pei foʻi ona sa tupu iā Farao ma lana ʻautau. O le laveaʻia e Ieova o le nuu o Isaraelu mai Aikupito, ua faamaonia ai le lelei ona mulimuli i le taʻiala lea na taʻua e aposetolo o Iesu: “E tusa ona sili o lo matou anaana i le Atua i lo matou anaana i tagata.”—Galuega 5:29.

[Faamatalaga pito i lalo]

[Pusa/Ata i le itulau 9]

PE E TE SILAFIA?

• Na faaagi e Ieova se matagi malosi i le pō atoa, ina ia mafai ai ona uia e le fanauga a Isaraelu le Sami Ulaula i le ilititai mātūtū.—Esoto 14:21, 22.

• Na tatau ona iai se ala e silia i le maila le lautele, ina ia savavali ai le faitau miliona o tagata Isaraelu i le Sami Ulaula i se taimi puupuu.

[Ata i le itulau 9]

E leʻi mafai e atua sesē o Aikupito ona taofi Mala e Sefulu mai iā Ieova

[Ata i le itulau 9]

O tupua e tolu: Photograph taken by courtesy of the British Museum